Ministria e Administrimit të Pushtetit Lokal

MBAHET PUNËTORIA TREDITORE PËR HARTIMIN E STRATEGJISË PËR VETËQEVERISJE LOKALE 2027–2031

Ministria e Administrimit të Pushtetit Lokal (MAPL) ka nisur procesin e hartimit të Strategjisë së re për Vetëqeverisje Lokale 2027–2031, përmes një punëtorie treditore të organizuar me mbështetjen e DEMOS.

Në këtë punëtori morën pjesë Sekretari i Përgjithshëm i MAPL-së z. Jeton Qela, përfaqësues të ministrive të linjës, institucioneve tjera relevante, organizatave të ndryshme, përfaqësues të shoqërisë civile, si dhe drejtorë të departamenteve të ministrisë.

Gjatë punimeve u diskutuan rezultatet e vlerësimit të zbatimit të Strategjisë për Vetëqeverisje Lokale 2016–2026, përmes të cilave u definuan objektivat strategjike, nënobjektivat dhe aktivitetet kryesore që do të përfshihen në Strategjinë e re për Vetëqeverisje Lokale 2027–2031.

Strategjia e ardhshme do të fokusohet në avancimin e vazhdueshëm të kornizës ligjore për vetëqeverisjen lokale, forcimin e zhvillimit ekonomik lokal, promovimin e qeverisjes së mirë dhe demokracisë lokale, si dhe në proceset e digjitalizimit, inovacionit dhe modernizimit të administratës komunale.

Hartimi i Strategjisë 2027–2031 synon krijimin e një qasjeje më gjithëpërfshirëse, të qëndrueshme dhe zhvillimore të pushtetit lokal, duke adresuar sfidat dhe prioritetet e komunave për vitet e ardhshme.

Ndahen 3.24 milionë euro për gjashtë projekte të reja të bashkëpunimit ndërkufitar ndërmjet Kosovës dhe Maqedonisë së Veriut

Prishtinë, 22 maj 2026

Në ceremoninë e ndarjes së granteve, të mbajtur sot në Prishtinë, u prezantuan gjashtë projekte të reja në kuadër të Programit të Bashkëpunimit Ndërkufitar Kosovë – Maqedoni e Veriut, të cilat do të mbështeten me 3.24 milionë euro nga Bashkimi Evropian.

Programi financohet nga Bashkimi Evropian përmes Instrumentit për Asistencë të Para-Anëtarësimit (IPA III), ndërsa zbatohet nga Ministria e Administrimit të Pushtetit Lokal e Republikës së Kosovës dhe Ministria e Vetëqeverisjes Lokale e Maqedonisë së Veriut, të cilat koordinojnë dhe mbështesin zbatimin e projekteve në të dyja vendet.

Projektet synojnë përmirësimin e cilësisë së jetës së qytetarëve në rajonin ndërkufitar përmes forcimit të bashkëpunimit rajonal, mbrojtjes së mjedisit dhe zhvillimit të turizmit të qëndrueshëm.

Në ceremoninë e organizuar në Prishtinë morën pjesë ministri i Administrimit të Pushtetit Lokal, z. Elbert Krasniqi, ministri i Vetëqeverisjes Lokale i Maqedonisë së Veriut, z. Zlatko Perinski, si dhe Alessandro Bianciardi, zëvendësshefi i Bashkëpunimit në Zyrën e Bashkimit Evropian në Kosovë.

Në Kosovë, aktivitetet e projekteve do të zbatohen kryesisht në Parkun Kombëtar të Sharrit dhe në komunat Ferizaj, Kllokot, Mamushë, Rahovec dhe Ranillug.

Në Maqedoninë e Veriut, përfitues do të jenë Parku Kombëtar Sharr, Parku Kombëtar Mavrovë, si dhe komunat Bërvenicë, Butel, Gazi Babë, Gostivar, Mavrovë dhe Rankocë.

Sekretari i Përgjithshëm i Ministrisë së Administrimit të Pushtetit Lokal, Jeton Qela, zhvilloi një takim me përfaqësuesit e UNICEF-it në Kosovë, me ç’rast u dakordua vazhdimi i bashkëpunimit ndërinstitucional.

Gjatë takimit u diskutua për Programin e ri pesëvjeçar të UNICEF-it, si dhe për mundësitë konkrete të bashkëpunimit në fushat e mëposhtme:

• Forcimi i mekanizmave për mbrojtjen dhe promovimin e të drejtave të fëmijëve në nivel lokal, përfshirë avancimin e planifikimit dhe buxhetimit për ofrimin e shërbimeve sociale cilësore;
• Rritja e investimeve për mirëqenien e fëmijëve dhe të rinjve;
• Bashkëpunimi në hartimin e Strategjisë për Vetëqeverisje Lokale, si dhe në rishikimin e sistemit të performancës komunale.

Ministria e Administrimit të Pushtetit Lokal mbetet e përkushtuar për forcimin e bashkëpunimit me të gjithë partnerët vendorë dhe ndërkombëtarë, në funksion të avancimit të qeverisjes lokale dhe zhvillimit të qëndrueshëm komunal.

Bursa për studentët e komuniteteve rom, ashkali dhe egjiptian

Prishtinë, 15 maj 2026

Ministri i MAPL-së, Elbert Krasniqi dhe ministri i Arsimit dhe Shkencës, Hajrullah Çeku, kanë nënshkruar Memorandumin e Bashkëpunimit për ofrimin e bursave për studentët nga radhët e komuniteteve egjiptian, ashkali dhe rom në Republikën e Kosovës.

Pas suksesit të programit që tash e katër vite mundëson ndarjen e bursave për studentët nga këto komunitete, ministritë vazhdojnë ta forcojnë këtë mbështetje, në mënyrë që asnjë i ri të mos detyrohet t’i ndërpresë studimet për shkak të vështirësive ekonomike.

Kjo nismë e mbështetjes financiare për studentët, është investim i drejtpërdrejtë i shtetit në arsim, për barazi dhe përgatitje të brezave të rinj të profesionistëve.

Qeveria e Republikës së Kosovës mbetet e përkushtuar që përmes politikave konkrete dhe mbështetjes institucionale të garantojë qasje të barabartë për çdo të ri.

Ministri Krasniqi u takua me ambasadorin gjerman Rainer Rudolph

Prishtinë, 07 maj 2026

Ministri Elbert Krasniqi ka takuar ambasadorin e Gjermanisë në Kosovë, Rainer Rudolph, me të cilin zhvilluan një bisedë të frytshme lidhur me bashkëpunimin ndërmjet komunave, si dhe punën dhe prioritetet e MAPL-së.

Ministri theksoi rëndësinë e dialogut të hapur, bashkëpunimit praktik dhe fokusit në projekte konkrete që ndikojnë drejtpërdrejt në jetën e qytetarëve.

Ambasadori Rudolph vlerësoi punën e MAPL-së, për çka ministri Krasniqi e falënderoi për mbështetjen dhe bashkëpunimin e vazhdueshëm.

Bashkëpunimi ndërinstitucional dhe partneriteti mbeten kyçe për avancimin e qeverisjes lokale dhe zhvillimin e qëndrueshëm në vend.

I shoqëruar nga disa të rinj e të reja të komunitetit egjiptian, profesionistë të fushave të ndryshme mjekësore, ministri Elbert Krasniqi ka takuar ministrin e Shëndetësisë, z. Arben Vitia.

Gjatë takimit u zhvillua një diskutim i hapur mbi sfidat kryesore që prekin komunitetet, me theks të veçantë në nënpërfaqësimin në institucionet shëndetësore.

Në këtë kuadër, ministrat Krasniqi dhe Vitia u dakorduan që, në referencë të vendimit të Qeverisë për punësimin e grupeve të nënpërfaqësuara, në konkurset për rekrutimin e stafit shëndetësor, në përputhje me legjislacionin në fuqi, të vendoset referenca e vendimit të Qeverisë për punësimin e grupeve të nënpërfaqësuara.

Gjithashtu, u ngritën shqetësime për punonjësit e sektorit teknik në shëndetësi, një sektor i privatizuar prej vitesh, ku punëtorët vazhdojnë të përballen me kushte të vështira pune.

U diskutua nevoja që institucionet shtetërore të shqyrtojnë krijimin e ndërmarrjeve publike për ofrimin e këtyre shërbimeve, me qëllim sigurimin e stabilitetit dhe dinjitetit në punë.

Mbahet takimi i grupit punues për Rishikimin e Sistemit për Menaxhimin e Performancës Komunale

Prishtinë, 28 prill 2026

Gjatë këtij takimi janë diskutuar shumë çështje përmbajtësore të cilat ndërlidhen me vlerësimin e performancës dhe grantit për performancë.

Theks i veçant në këtë takim ju kushtua metodologjisë për rishikimin e sistemit dhe strukturë së fushave, treguesve dhe të dhënave të cilat komunat i raportojnë.

Takimet e radhës do të vazhdojnë, me qëllim të analizimit të detajuar për secilin tregues dhe secilën fushë, në mënyrë që verifikimi dhe vlerësimi të bëhet në mënyrë transparente dhe korrekte.

Aprovohen projekte në vlerë prej 3.2 milionë euro në kuadër të Programit të BNK-së Kosovë – Maqedoni e Veriut

Në Prishtinë u mbajt takimi i tretë i Komitetit të Përbashkët të Monitorimit për Programin IPA III të Bashkëpunimit Ndërkufitar Kosovë – Maqedoni e Veriut 2021–2027.

Gjatë këtij takimi u aprovua lista e projekteve që do të financohen nga thirrja e parë për projekt-propozime në kuadër të këtij programi, me vlerë të përgjithshme prej 3.2 milionë euro.

Projektet e aprovuara do të fillojnë zbatimin pas përfundimit të procesit të kontraktimit dhe do të realizohen në fushat e mbrojtjes së ambientit, zhvillimit të turizmit dhe mbështetjes së bizneseve në zonën kufitare Kosovë – Maqedoni e Veriut.

Ky program synon të forcojë bashkëpunimin ndërkufitar, të mbështesë zhvillimin e qëndrueshëm lokal dhe të krijojë mundësi të reja për komunitetet në të dy anët e kufirit.

Nënshkruhet Udhëzimi Administrativ për organizimin dhe funksionimin e Bordit të Mitrovicës

Prishtinë, 23 prill 2026

Ministri Krasniqi ka nënshkruar Udhëzimin Administrativ që rregullon organizimin dhe funksionimin e Bordit të Mitrovicës.

Ky Bord vazhdon të ketë rol të rëndësishëm në forcimin e bashkëpunimit ndërmjet dy komunave dhe në realizimin e projekteve të përbashkëta, të cilat synojnë përmirësimin e shërbimeve dhe ngritjen e cilësisë së jetës për qytetarët.

Përmes këtij Udhëzimi Administrativ synohet që:

• të sigurohet qëndrueshmëri në menaxhimin dhe zbatimin e projekteve të përbashkëta;
• të fuqizohet koordinimi ndërmjet nivelit qendror dhe dy komunave;
• të krijohen kushte më të favorshme për investime të reja në infrastrukturë dhe në fushën sociale.

Ministria e Administrimit të Pushtetit Lokal do të vazhdojë të mbështesë këtë proces me qëllim të forcimit të bashkëpunimit institucional dhe zhvillimit të qëndrueshëm në komunat e Mitrovicës.

Bashkë me qytetarët për një mjedis më të pastër

Për Dita e Tokës, në lagjen Fidanisht në Mitrovicë kjo datë simbolike u shndërrua në një ditë konkrete veprimi në shërbim të mjedisit.

Ministri Elbert Krasniqi, së bashku me nënkryetarin Enis Osmani dhe banorët e lagjes, morën pjesë në një iniciativë që synon përmirësimin e kushteve të jetesës dhe rritjen e ndërgjegjësimit për mbrojtjen e mjedisit.

Aktivitetet përfshinë pastrimin e hapësirave publike, shpërndarjen e koshave për mbeturina, si dhe ndërhyrje konkrete për largimin e ujit nga podrumet e banesave, veprime këto që kontribuojnë drejtpërdrejt në një ambient më të pastër dhe më të shëndetshëm për qytetarët.

Ministri Krasniqi shprehu mirënjohje për ekipin komunal dhe të gjithë qytetarët e angazhuar për bashkëpunimin dhe kontributin e dhënë në këtë iniciativë të rëndësishme.