LDK - Prizren

29/09/2026

22/09/2026

Të dashur qytetarë të Prizrenit,

Sot propozova Dr. Mybera Mustafën për Drejtoreshë të Shëndetësisë në Komunën e Prizrenit.

Prizreni ka nevojë për njerëz me përvojë, profesionalizëm dhe vullnet për të punuar. Për këtë përgjegjësi, besoj se Dr. Mybera Mustafa i ka të gjitha këto dhe shumë më tepër.

Me një përvojë të gjatë profesionale dhe institucionale, ajo ka shërbyer si Shefe Ekzekutive në Komunën e Prizrenit, Zëvendësministre e Shëndetësisë dhe Këshilltare e Kryeministrit Mustafa. Këto përvoja janë dëshmi e njohjes së mirë të institucioneve dhe, mbi të gjitha, e përgjegjësisë që kërkon puna në shërbim të qytetarëve.

Jam i bindur se Dr. Mybera Mustafa do të na përfaqësojë me punë, profesionalizëm dhe përkushtim.

I uroj shumë suksese në këtë përgjegjësi të rëndësishme!

28/08/2026

Dhimbje e madhe për humbjen e 14-vjeçarit Omer Purova

Me pikëllim të thellë mora lajmin për ndarjen tragjike nga jeta të 14-vjeçarit Omer Purova, një nxënës i shkollës “Emin Duraku” në Prizren.

Një jetë e re u ndërpre shumë herët, duke lënë pas dhimbje të madhe te familja, shokët, mësuesit dhe të gjithë ata që e njohën Omerin.

Në këto momente të rënda, shpreh ngushëllimet më të sinqerta familjes Purova, të afërmve, mësuesve dhe bashkëmoshatarëve të tij.

Ëndrrat e Omerit mbetën në gjysmë.

U prehtë në paqe dhe kujtimi për të qoftë i përjetshëm.

25/08/2026

NJOFTIM PËR MBLEDHJEN KOMEMORATIVE PËR PROF. DR. EQREM KRYEZIUN

Me dhimbje të thellë njoftojmë anëtarët, strukturat dhe aktivistët e Lidhjes Demokratike të Kosovës, si dhe qytetarët e Prizrenit, se sot, nën patronatin e Komunës së Prizrenit, do të mbahet mbledhja komemorative për Prof. Dr. Eqrem Kryeziun, një prej figurave të shquara të LDK-së dhe të jetës politike, akademike e shoqërore të Kosovës.

📍 Shtëpia e Kulturës “Xhemajli Berisha” – Prizren
🕝 Sot, ora 14:30

Prof. Dr. Eqrem Kryeziu do të kujtohet për kontributin e tij të jashtëzakonshëm si intelektual, profesor, veprimtar dhe një prej themeluesve e figurave qendrore të Lidhjes Demokratike të Kosovës, si dhe për angazhimin e tij të çmuar në zhvillimin dhe jetën institucionale të Prizrenit dhe Kosovës.

LDK - Dega në Prizren fton anëtarët, aktivistët, miqtë dhe bashkëpunëtorët që të marrin pjesë në këtë tubim përkujtimor, në nderim të jetës dhe veprës së Prof. Dr. Eqrem Kryeziut.

I përjetshëm qoftë kujtimi për Kryetarin Eqrem Kryeziun! 🕊️🌹

25/08/2026

Telegram ngushëllimi për ndarjen nga jeta të Kryetarit z. Eqrem Kryeziu!

Kryetari i LDK-së, Dega në Prizren, Driton Selmanaj, dërgon telegram ngushëllimi me rastin e ndarjes nga jeta të z. Eqrem Kryeziut, një prej figurave të shquara të Lidhjes Demokratike të Kosovës dhe të jetës politike e institucionale të Prizrenit dhe Kosovës.

Me pikëllim të thellë, LDK, Dega në Prizren shpreh dhimbjen për humbjen e një personaliteti të çmuar, një intelektuali të shquar, një atdhetari të vërtetë, njeriu me guxim, përkushtim dhe besnikëri ndaj idealeve të lirisë dhe shtetësisë së Kosovës.

Z. Eqrem Kryeziu ishte i angazhuar në çështjen kombëtare dhe në veprimtarinë politike shumë përpara luftës. Në periudha të vështira për popullin shqiptar të Kosovës, ai dëshmoi guxim dhe vendosmëri, duke qenë pjesë e përpjekjeve politike e shoqërore për liri, demokraci dhe të drejta kombëtare.

Gjatë viteve të luftës, ai vazhdoi angazhimin e tij në rrethana të jashtëzakonshme, duke qëndruar pranë qytetarëve dhe kauzës së Kosovës. Përkushtimi dhe guximi i tij në ato kohë të vështira janë pjesë e rrugëtimit të tij jetësor dhe politik.

Pas luftës, z. Eqrem Kryeziu iu përkushtua ndërtimit të institucioneve të Kosovës dhe rimëkëmbjes së Prizrenit. Ai shërbeu si Kryetar i Komunës së Prizrenit, duke dhënë kontribut në zhvillimin dhe organizimin institucional të qytetit. Njëkohësisht, ai ishte Kryetar i Degës së LDK-së në Prizren, duke udhëhequr strukturat e degës në një periudhë të rëndësishme të konsolidimit të jetës politike në Kosovën e pasluftës.

Kontributi i tij vazhdoi edhe në nivel qendror, si Nënkryetar i LDK-së, Nënkryetar i Kuvendit të Kosovës dhe deputet i Kuvendit të Kosovës në disa mandate, ku përfaqësoi me dinjitet qytetarët dhe dha kontributin e tij në jetën parlamentare dhe institucionale të vendit.

Z. Eqrem Kryeziu ishte një njeri i guximit dhe parimeve, i cili në momente të rëndësishme të historisë sonë nuk u tërhoq nga përgjegjësia dhe angazhimi. Për shumë breza të veprimtarëve të LDK-së, ai mbetet një figurë që mishëroi qëndrueshmërinë politike, atdhedashurinë dhe përkushtimin ndaj Prizrenit e Kosovës.

Humbja e tij është e madhe për familjen, miqtë, bashkëpunëtorët, LDK-në dhe mbarë qytetin e Prizrenit. Por vepra dhe kontributi i tij do të mbeten pjesë e kujtesës sonë kolektive.

Në emër të LDK-së, Dega në Prizren dhe në emrin tim personal, shpreh ngushëllimet më të sinqerta familjes Kryeziu, të afërmve, miqve, bashkëpunëtorëve dhe të gjithë atyre që patën fatin ta njohin e të bashkëpunojnë me të.

I lehtë i qoftë dheu i Dardanisë.
U prehtë në paqe shqiptari i madh Eqrem Kryeziu!

23/08/2026

Përjetësisht në kujtesën tonë, Altin Kryeziu 🇽🇰

Me dhimbje të thellë dhe respekt të madh kujtojmë Altin Kryeziun, pjesëtarin e Policisë së Kosovës.

Sakrifica dhe përkushtimi i tij do të mbeten gjithmonë në kujtesën e familjes, kolegëve dhe gjithë qytetarëve të Kosovës.

Ngushëllime të sinqerta familjes, miqve dhe kolegëve të tij.

U prehsh në paqe, Altin. I përjetshëm qoftë kujtimi për ty! 🇽🇰

28/07/2026

Kryetari i LDK-së, Driton Selmanaj, dërgon telegram ngushëllimi familjes së të ndjerës znj. Suzana Germizaj

"Me pikëllim të thellë pranuam lajmin për ndarjen nga jeta të aktivistes së devotshme të Lidhjes Demokratike të Kosovës, mësimdhënëses dhe anëtares së Kryesisë së Nëndegës së LDK-së 'Gani Çavdërbasha', znj. Suzana Germizaj.

Znj. Germizaj do të kujtohet gjithmonë për përkushtimin e saj ndaj arsimit, angazhimin e palodhur në radhët e LDK-së dhe kontributin e vazhdueshëm për komunitetin dhe qytetin e Prizrenit.

Ajo ishte grua e urtë, e ndershme dhe e respektuar, e cila me punën, sjelljen dhe vlerat e saj fitoi respektin e të gjithë atyre që e njohën. Kontributi dhe shembulli i saj do të mbeten pjesë e kujtesës sonë.

Znj. Suzana Germizaj do t'u mungojë familjes, miqve, kolegëve, bashkëveprimtarëve dhe gjithë strukturave të Lidhjes Demokratike të Kosovës.

Qoftë i përhershëm kujtimi për të!
I lehtë i qoftë dheu i Kosovës!
Zoti e mëshiroftë dhe e prehtë në paqe shpirtin e saj fisnik!"

02/07/2026

Sot, shënojmë 36 vjetorin e shpalljes së Deklaratës Kushtetuese të 2 Korrikut 1990, aktin historik që hodhi themelet juridike dhe politike të shtetësisë së Kosovës.

Në rrethana jashtëzakonisht të vështira, nën rrethim ushtarak dhe presion të ashpër nga regjimi serb, 114 delegatë të Kuvendit të atëhershëm të Kosovës e shpallën Kosovën si njësi të barabartë dhe të pavarur brenda federatës së asaj kohe, duke shprehur qartë vullnetin e palëkundur të popullit për liri, pavarësi dhe demokraci.

Lëvizja gjithëpopullore e Kosovës, e prirë nga Presidenti Historik i Kosovës Dr. Ibrahim Rugova, unifikoi popullin rreth kësaj kauze, vuri bazat juridike e institucionale të shtetësisë si dhe fitoi përkrahjen e botës demokratike. Këto përpjekje epike u pasuan nga lufta çlirimtare e popullit të Kosovës dhe ndërhyrja e NATO-së, të cilat sollën përfundimisht lirinë në Kosovë.

Në këtë datë të rëndësishme, shprehim mirënjohjen tonë delegatëve të Kuvendit të 2 Korrikut, për guximin në atë kohë me kushte shumë të rënda, në artikulimin e vullnetit të popullit për liri dhe pavarësi.

Deklarata e 2 Korrikut mbetet një gurthemel i pathyeshëm në ndërtimin e shtetit tonë, një pikë kthese në historinë moderne të Kosovës dhe një dëshmi e qartë e aspiratës sonë për t’u bërë pjesë e familjes euroatlantike, të integruar në NATO, Bashkimin Evropian, dhe në miqësi të përhershme me Shtetet e Bashkuara të Amerikës.