03/01/2026
Të dashur qytetarë e mbështetës,
Me qëllim të informimit korrekt të opinionit publik për zhvillimet e sotme në Kuvendin Komunal të Shtimes, Lidhja Demokratike e Kosovës – Dega në Shtime, sqaron se ka qenë e gatshme për bashkëqeverisje me Lëvizjen VETËVENDOSJE!, gjë që është konfirmuar edhe në takimet ndërmjet ekipeve negociuese.
LDK ka qenë dhe mbetet e përkushtuar për funksionalizimin e institucioneve komunale. Pikërisht për këtë arsye, më 31.12.2025, në mbledhjen e fundit të Kuvendit Komunal, LDK ka votuar pro propozimit të LVV-së për shtyrjen e seancës, me qëllim që t’u jepej kohë palëve për të arritur një marrëveshje politike. Megjithatë, përkundër kësaj gatishmërie, u dëshmua se disponimi real i Lëvizjes VETËVENDOSJE! nuk ishte arritja e një marrëveshjeje me LDK-në, por negociimi paralel me asambleistë të Partisë Demokratike të Kosovës, duke e trajtuar LDK-në vetëm si opsion formal.
Pretendimet për “kërkesa të paarsyeshme” janë të pavërteta dhe tendencioze. Rikujtojmë opinionin publik se LDK në vitin 2021 e ka ndihmuar drejtpërdrejt LVV-në në ardhjen në pushtet, duke marrë përgjegjësi qeverisëse me 2 asambleistë dhe 3 drejtori. Ndërkohë, sot, me 5 asambleistë, LDK-së i është ofruar vetëm 2 drejtori, madje me kusht që emrat e përfaqësuesve tanë të caktohen nga LVV. Një ofertë e tillë është tentativë për nënshtrim politik.
Është e rëndësishme të theksohet se sovrani në zgjedhjet për Kuvendin Komunal nuk i ka dhënë askujt legjitimitet të plotë politik për të qeverisur i vetëm apo për të diktuar vullnetin e subjekteve të tjera. Arroganca politike dhe përpjekja për poshtërimin e LDK-së nuk kanë kaluar dhe nuk do të kalojnë asnjëherë përballë LDK-së. Është totalisht e papranueshme gjuha nënçmuese ndaj LDK-së.
LDK thekson se vendimi për të mbështetur zgjedhjen e Kryesuesit të Kuvendit nuk është produkt i pazareve politike, por një veprim i domosdoshëm për garantimin e stabilitetit institucional, dhe mbi të gjitha për shmangjen e zgjedhjeve të jashtëzakonshme për shkak të tekeve personale të eksponentëve të LVV-së.
Lidhja Demokratike e Kosovës mbetet e hapur për bashkëpunim institucional në çdo çështje që i shërben qytetarëve, duke ruajtur parimet, identitetin dhe përgjegjësinë e saj politike!
Lidhja Demokratike e Kosovës - Dega në Shtime.
22/12/2025