Shmu-2

Garat Republikane në Minihendboll – “Sporti në Shkolla”
Gjatë dy ditëve të fundit u zhvilluan me sukses garat republikane në minihendboll për grupmoshat U-12 dhe U-14, në kuadër të programit Sporti në Shkolla. Në këto gara morën pjesë nxënës nga shkolla të ndryshme të Kosovës, të cilët treguan përgatitje të lartë, përkushtim dhe frymë të shkëlqyer sportive.
Në konkurrencë të fortë dhe ndeshje mjaft interesante, ekipet pjesëmarrëse dhanë maksimumin për të arritur rezultate sa më të mira, duke dëshmuar edhe një herë rëndësinë e sportit shkollor në edukimin, disiplinën dhe zhvillimin e të rinjve.
🥈 Me krenari ndajmë suksesin e shkollës sonë:
🔹 Vendi i dytë në kategorinë U-12 Femra– SHMU-2 Vushtrri

Shkolla jonë u përfaqësua me gjithsej 4 ekipe:
▪️ U-12 Meshkuj
▪️ U-12 Femra
▪️ U-14 Meshkuj
▪️ U-14 Femra

Urime të gjithë nxënësve për angazhimin dhe përfaqësimin dinjitoz të shkollës sonë dhe arsimtarin e palodhshëm Arben Parduzi.
Mirënjohje për kolegët dhe drejtoreshën e shkollës për mbështetjen e vazhdueshme në zhvillimin e aktiviteteve sportive.

Sot, nxënëset tona që fituan vendin e parë në garat e diturisë u dekoruan me mirënjohje nga Drejtoria Komunale e Arsimit për suksesin dhe përfaqësimin dinjitoz.
Me mirënjohje u nderua edhe drejtoresha në emër të shkollës për mbështetjen dhe përkushtimin e vazhdueshëm ndaj nxënësve dhe procesit arsimor.
Nxënëseve tona të shkëlqyera u urojmë suksese edhe më të mëdha në vazhdim, ndërsa arsimtarët tanë shumë të respektuar i falënderojmë për punën, përkushtimin dhe mbështetjen e palodhshme.

Një numër i konsiderueshëm i arsimtarëve të shkollës sonë morën pjesë në trajnimin “Mentorimi Kolegjial në Arsim”, të organizuar nga Fakulteti i Edukimit, në kuadër të projektit “Ngritja e kapaciteteve të mësimdhënësve për të ofruar arsim cilësor për rezultate të përmirësuara të të nxënit për fëmijët, adoleshentët dhe të rinjt”, me mbështetjen e UNICEF.

Ky trajnim shërbeu si një mundësi e vlefshme për shkëmbim përvojash, avancim profesional dhe forcim të bashkëpunimit ndërmjet kolegëve, me qëllim të përmirësimit të vazhdueshëm të procesit mësimor dhe ngritjes së cilësisë në arsim.

Ne besojmë se vetëm duke investuar dhe kontribuar çdo ditë në zhvillimin tonë profesional, mund të ndërtojmë një arsim më cilësor dhe një të ardhme më të mirë për nxënësit tanë.

🔥🏫 Në kuadër të projektit të MASHTI-t “Studimi i fizibilitetit për vlerësimin e sigurisë kundër zjarrit në objektet shkollore dhe plani i integruar për përmirësimin e mbrojtjes”, në shkollën tonë u mbajt një takim informues dhe bashkëpunues me pjesëmarrjen e disa anëtarëve të stafit mësimdhënës dhe teknik.
Gjatë këtij aktiviteti u diskutua mbi rëndësinë e sigurisë në ambientet shkollore, identifikimin e rreziqeve të mundshme dhe masat parandaluese për mbrojtje nga zjarri, në përputhje me standardet bashkëkohore të sigurisë.
Falënderojmë të gjithë pjesëmarrësit për angazhimin, seriozitetin dhe gatishmërinë për të kontribuar në krijimin e një mjedisi më të sigurt për nxënësit dhe stafin tonë. Bashkëpunimi dhe përgjegjësia e përbashkët mbeten çelësi i suksesit për një shkollë më të sigurt dhe më funksionale. 👏🚒📚

Në kuadër të trajnimit për shkathtësitë e gjelbra, të organizuar nga Fakulteti i Edukimit, mësimdhënësja e shkollës sonë, Lavdije Krasniqi, ka realizuar projektin “Mbrojtja e mjedisit”.

Nxënësit kanë punuar në projekte të ndryshme me fokus mbrojtjen e mjedisit, ndërsa është formuar edhe një komision nga vetë nxënësit për të rritur vetëdijen dhe përgjegjësinë ndaj natyrës.

Si pjesë e aktivitetit, ata kanë prezantuar punimet dhe kanë vendosur mesazhe ndërgjegjësuese në tabelë.

Qëllimi i projektit ishte zhvillimi i vetëdijes mjedisore dhe nxitja e veprimeve konkrete për mbrojtjen e natyrës.

Rezultatet:

Rritje e vetëdijes së nxënësve për mbrojtjen e mjedisit;

Përfshirje aktive në aktivitete praktike;

Zhvillim i përgjegjësisë dhe bashkëpunimit.

Drejtoresha e shkollës, Shqipe Dubovci, ka përkrahur këtë iniciativë, së cilës i janë bashkangjitur edhe arsimtarët. Mësimdhënësi i biologjisë, Ramiz Parduzi, dhe ai i gjeografisë, Qendrim Meholli.
Projekti është ndërlidhur me lëndën e biologjisë përmes trajtimit të ekosistemeve dhe biodiversitetit, si dhe me gjeografinë përmes analizës së marrëdhënies njeri–mjedis dhe ndikimit të veprimtarisë njerëzore.

🌍♻️ Në kuadër të aktiviteteve të trajnimit “Shkathtësitë e Gjelbra”, së bashku me nxënësit zhvilluam një orë mësimore me temën “Ekonomia Globale dhe Mjedisi”.
Përmes diskutimeve, ideve kreative dhe punimeve të realizuara nga nxënësit tanë, trajtuam ndikimin që ekonomia globale ka në mjedis, si dhe rëndësinë e veprimeve të vogla për një të ardhme më të gjelbër dhe më të qëndrueshme. 🌱
Ishte kënaqësi të shihnim kreativitetin, bashkëpunimin dhe vetëdijesimin e nxënësve për çështjet mjedisore, duke dëshmuar se edukimi dhe angazhimi i përbashkët janë çelësi për mbrojtjen e mjedisit tonë. 🌎💚

Falenderojmë për punën dhe përkushtimin e mësimdhënësit Samir Abazi.

🏆 KAMPIONE NË GARAT E DITURISË!
Me krenari të madhe njoftojmë se shkolla jonë sot u shpall kampione në Garat e Diturisë, duke dëshmuar edhe një herë nivelin e lartë të përkushtimit, punës dhe cilësisë në arsim. Ky sukses është rezultat i një angazhimi të pandalshëm, i mundit në përgatitje, i sakrificës dhe i vullnetit për të arritur më të mirën.
Përgëzime të veçanta për vajzat tona finaliste, të cilat me inteligjencë, guxim dhe shpirt garues përfaqësuan denjësisht shkollën tonë dhe na bënë krenarë të gjithëve. Ju dëshmuat se dija, përkushtimi dhe besimi në vetvete janë çelësi i suksesit. Nxënëset që morrën pjesë në gara janë:
*Klea Verbovci
*Sumeja Hoxha
*Jara Meniqi
*Merisa Pushkolli
*Alejna Selimi
Mirënjohje të pafundme edhe për arsimtarët tanë të palodhshëm, të cilët me profesionalizëm, përkushtim dhe punë të vazhdueshme qëndruan pranë nxënësve në çdo hap të këtij rrugëtimi. Ky triumf është edhe fryt i punës suaj të jashtëzakonshme.Arsimtarët :
*Agon Krasniqi
*Ismajl Cakaj
*Ramiz Parduzi
*Aziz Selimi
* Hadije Jakupi Kurti
Ky titull kampioni nuk është vetëm një fitore, por një dëshmi se shkolla jonë vazhdon të ndërtojë gjenerata të suksesshme, konkurruese dhe të denja për sfida gjithnjë më të mëdha.
Urime kampioneve tona!

Sot u mbajtën Garat e Diturisë në nivel komunal, ku nxënëset e shkollës sonë treguan përgatitje, angazhim dhe një shpirt të lartë garues. Me shumë përkushtim dhe punë ekipore, shkolla jonë arriti ta kalojë me sukses fazën e parë dhe të sigurojë kualifikimin për në finale.
Ky sukses është rezultat i punës së vazhdueshme dhe përkushtimit të arsimtarëve tanë, të cilët me profesionalizëm dhe mund maksimal i përgatitën nxënëset për këtë garë. Një falënderim i veçantë shkon edhe për nxënëset tona, të cilat na bënë krenarë me dijen, seriozitetin dhe kulturën e treguar gjatë garës.
Shkollës sonë i urojmë suksese të mëtejshme në finalen komunale dhe besojmë se me të njëjtin vullnet e përkushtim do të vazhdojnë të arrijnë rezultate të shkëlqyera.

Në kuadër të Ditës Ndërkombëtare të Shpezëve, arsimtari i biologjisë Ramiz Parduzi realizoi një hulumtim në Lumin Silnica, ku u evidentuan 10 lloje të ndryshme shpendësh. Ky është një tregues i rëndësishëm i biodiversitetit, pasurisë natyrore dhe ekosistemit që e karakterizon qytetin tonë.

Gjatë vëzhgimit u identifikuan këto lloje shpendësh: Çapka e natës, Kalorsi, Qyrylyku i zallit, Çapka e verdhë, Bletëngrënësi, Larashi kurrizkuq, Qyqja, Gakthi i vogël, Skifteri kthetrazi dhe Fishkëllyesi gushëbardh.

Ky aktivitet kishte për qëllim ndërgjegjësimin për rëndësinë e mbrojtjes së natyrës, ruajtjes së habitateve dhe respektimit të botës së egër, si pjesë e trashëgimisë sonë natyrore.

🏆 Urime kampione! 🏀
Me krenari të veçantë ndajmë suksesin e jashtëzakonshëm të vajzave të shkollës sonë në basketboll!
Pas shpalljes kampione në nivel komunal dhe regjional, ato kanë kurorëzuar këtë rrugëtim të suksesshëm duke u shpallur kampione edhe në nivel republikan, si më të mirat në Kosovë.
Ky sukses i madh është rezultat i punës së palodhshme, përkushtimit dhe bashkëpunimit të shkëlqyer ekipor, si dhe angazhimit profesional të arsimtarëve Zaim Zenuni dhe Mensur Abazi.
Urime të përzemërta vajzave tona dhe mësimdhënësve për këtë arritje madhështore – jeni krenaria e shkollës sonë!

Rrugëtimi i orientimit vazhdon:
“Nga përvoja në përzgjedhje”

Nxënësit e klasave të nënta të shkollës sonë morën pjesë në një vizitë edukative në “Panairin e Shkencës, Kulturës dhe Sportit”, i organizuar në gjimnazin “Eqrem Çabej” në Vushtrri.

Kjo vizitë u realizua në kuadër të Orientimit dhe Këshillimit në Karrierë, e organizuar nga Këshilltarja e Karrierës, Nora Haxhaj, dhe Kujdestarët e Klasave të nënta, si dhe me pjesëmarrjen e psikologes së shkollës.

Qëllimi i kësaj vizite ishte që nxënësit të njihen nga afër me mundësitë arsimore dhe aktivitetet që ofron arsimi i mesëm, duke i ndihmuar ata në orientimin e tyre drejt zgjedhjes së profesionit dhe shkollimit të mëtejmë. Përmes këtij panairi, nxënësit patën mundësi të shohin prezantime konkrete nga fusha të ndryshme të shkencës, kulturës dhe sportit, duke zgjeruar horizontin e tyre dhe duke forcuar aftësinë për të marrë vendime të informuara për të ardhmen e tyre.

Pjesëmarrja në aktivitete të tilla ka një rëndësi të veçantë, pasi i ndihmon nxënësit të lidhin interesat dhe aftësitë e tyre me mundësitë reale të zhvillimit akademik dhe profesional.

Falënderojmë gjimnazin për mikpritjen dhe organizimin e shkëlqyer të këtij aktiviteti.