28/11/2025
Matagumpay na isinagawa ng Rural Health Unit (RHU) ang isang Medical Outreach Program and Feeding Activity sa pamumuna ni Sittie Mo Husaifah M Baliwan na naglalayong maihatid ang pangunahing serbisyong medikal sa mga residente ng Barangay Sayap, Datu Hoffer, Maguindanao del Sur. Nakinabang ang mamamayan sa iba’t ibang serbisyo gaya ng konsultasyong medikal at pamamahagi ng mga libreng gamot. Layunin ng aktibidad na mapalakas ang kalusugan at kapakanan ng mga mamamayan, lalo na ang mga nasa liblib at mahihirap na komunidad.
Upang masiguro ang maayos, mapayapa, at ligtas na daloy ng programa, nagbigay ng buong suporta ang Alpha Company, 90th Infantry (Bigkis-Lahi) Battalion, 6ID, PA sa ilalim ng pamumuno ni 2LT ARJEM PAUL CASTROMAYOR (INF) PA, Platoon Leader. Ang kanilang presensya ay nagbigay ng katiyakan sa mga residente at nagsilbing gabay upang maging maayos ang pagsasagawa ng Outreach Program, lalo na sa pagpapanatili ng kaayusan sa paligid ng venue.
Kasama rin sa nagpabilis at nagpatatag ng seguridad sa aktibidad ang PNP Datu Hoffer Municipal Police Station na pinangunahan ni PCapt Beatriz R Taeza, Chief of Police. Sa pagtutulungan ng Philippine Army at Philippine National Police, naging organisado ang pagdaloy ng mga benepisyaryo at natugunan ang anumang pangangailangan para sa seguridad at peace and order, na nagbigay daan para sa komportableng pag-avail ng mga residente ng serbisyong medikal.
Sa pagtatapos ng programa, nagpahayag ng kasiyahan ang mga residente ng Brgy. Sayap dahil sa oportunidad na makatanggap ng libreng serbisyong medikal.
