31/07/2026
𝐏𝐆𝐎𝐌, 𝐌𝐔𝐋𝐈𝐍𝐆 𝐌𝐀𝐆𝐒𝐀𝐒𝐀𝐆𝐀𝐖𝐀 𝐍𝐆 𝐂𝐎𝐌𝐏𝐑𝐄𝐒𝐒𝐄𝐃 𝐖𝐎𝐑𝐊𝐖𝐄𝐄𝐊 𝐒𝐈𝐌𝐔𝐋𝐀 𝐀𝐆𝐎𝐒𝐓𝐎 3, 2026
Muling magpapatupad ng Compressed Workweek ang Pamahalaang Panlalawigan ng Kanlurang Mindoro (PGOM) para sa mga empleyado at kawani nito simula sa ika-3 ng Agosto (Lunes) ngayong taon, sa Kapitolyo at mga sub-offices nito.
Ang nasabing direktiba ay pinirmahan ni Gobernador Eduardo B. Gadiano alinsunod sa kautusang inilabas ng Pangulong Ferdinand "Bongbong" Marcos Jr., ang Memorandum Circular No. 114, series of 2026, na naglalayong makatipid ang bawat ahensya ng gobyerno sa paggamit ng enerhiyang nagmumula sa petrolyo, bunga ng patuloy na sumisiklab na kaguluhan sa Gitnang Silangan.
Ang hakbanging ito ay ibinase rin ng PGOM sa CSC Resolution No. 2600838, "Amendment to the Policies on Flexible Work Arrangements in the Government." Dahil dito, papasok ang mga kawani ng PGOM sa kanilang mga tanggapan mula Lunes hanggang Huwebes, alas-7:30 ng umaga hanggang alas-12:00 ng tanghali, at muling babalik mula ala-1:00 ng hapon hanggang alas-6:30 ng gabi. Ang araw ng Biyernes ay nakalaan para sa mga gawaing maaaring gampanan sa kani-kanilang mga tahanan.
Hindi saklaw sa Compressed Workweek ang mga tanggapang nagbibigay ng mga pangunahing serbisyo (basic services), tulad ng:
-Provincial Jail Division under PGOM
-Operations and Warning Division under PDRRMO
-Information and Communication Division under MIS (PPDO)
-Animal Regulatory Services Section under PVET
-Mga empleyadong nakadeploy sa lahat ng Demo Farm under OPA
-Ticket Checkers and Revenue Collection Clerks under PTO
-Provincial/District/Community Hospitals under PHO
-Community Development Assistants under ENRO
-Security Section under GSO
-Utility Workers under GSO
-Residential Care Facilities under PSWDO
Hindi rin saklaw ng nasabing kautusan ang mga tanggapan ng pambansang ahensya na matatagpuan sa loob ng PGOM Compound.
Hinihikayat ang lahat ng mamamayan na magtungo sa mga tanggapan ng PGOM mula Lunes hanggang Huwebes upang maasikaso ang kanilang mga dokumento.
Hinihikayat din ni Gov. Ed Gadiano ang bawat mamamayan at tanggapan na makiisa sa pagtitipid ng enerhiya upang malampasan ang kasalukuyang krisis sa petrolyo.
