05/10/2026
Agter die Karel Landman Monument staan ’n groep mense wat hul tyd, energie en talente gee om ons erfenis te bewaar en aan die volgende geslag oor te dra.
In hierdie reeks stel ons graag die mense agter die monument aan julle voor.
Vandag is dit die beurt van Eben Ge**er.
Eben kom van Port Elizabeth en is betrokke by die gebeurtenisbedryf. Vir hom is Afrikaans veel meer as net ’n taal:
“Die taal waarin ek droom en die taal waarin ek my doelwitte beplan.”
Eben is passievol daaroor om mense gelukkig te maak – en as hy iemand kan seën terwyl hy dit doen, soveel te beter.
Een van sy gunsteling herinneringe by die monument is die eerste keer wat hy ’n Geloftefees bygewoon het en besef het hoeveel ander mense ook diep omgee vir ons erfenis.
“Die eerste keer toe ek die Gelofte Dag bywoon en sien dat daar so baie ander mense is wat so baie omgee oor ons erfenis.”
Vir Eben is dit juis die mense rondom hom wat hom inspireer.
“Glimlagte van ander Afrikaners.”
En sy gunsteling Afrikaanse woord?
“nooi”
Vir jongmense wat graag betrokke wil raak, het Eben ’n eenvoudige, maar belangrike boodskap:
“Raak betrokke en hou in gedagte dat dit nie oor jou gaan nie – dit gaan oor die toekoms van die volgende generasie.”
Wanneer hy oor erfenis dink, sien Eben dit as ’n konstante herinnering aan wie en wat jy vandag is – en daarom is dit iets wat gekoester moet word.
“Konstante herinnering van wie en wat jy is vandag – en daarvoor moet jy jou erfenis koester.”
Dit is Eben Ge**er, een van die mense agter die Karel Landman Monument.
Deur hierdie reeks wil ons julle bekendstel aan die mense wat hul tyd, kennis en passie gee om hierdie plek en die verhaal wat dit vertel, te bewaar.
Want erfenis is nie net iets wat ons uit die verlede ontvang nie. Dit is iets wat ons vandag koester, uitleef en uiteindelik aan die volgende geslag oordra.
