29/09/2026
*Sekukaningi Ungihlukumeza*
Sekukaningi ungihlukumeza,
Ngakubekezela ngenxa yabantwana,
Ngathi umshado ungcwele,
Kodwa wawungcwaba mina ngiphila.
Sekukaningi ngifihle izibazi,
Ngathi ngiwile, ngathi ngishayeke,
Umphakathi wabona umakoti omamathekayo,
Kodwa ebusuku ngangilala ngopha.
Wathatha uthando lwakho wangenza ihlazo,
Igama lami laphenduka isihlamba emlonyeni wakho,
Ngaba yisithunzi endlini yami,
Umfazi ongenalutho, ongenazwi.
Kodwa namhlanje sengivukile,
Ngibuka emuva ngibona intuthu,
Ngithatha isandla sami ngasikhulula kwesakho,
Ngikhetha ukuphila kunokufa ngisemshadweni.
Ngiyaphuma, angibaleki — ngiyazikhulula,
Indandatho ngiyishiya phezu kwetafula,
Hamba nabo ubuhlungu bakho,
Mina ngihamba nenkululeko yami.
Sekukaningi wangihlukumeza,
Kodwa lokhu kugcina ngikubona,
Ngisewumfazi ophelele ngaphandle kwakho,
Sengiyaphila, sengikhululekile.
Umzo imbongi
