06/11/2026
శ్రీకాకుళం జిల్లా పోలీసు
ఎంపీటీసీ,జెడ్పీటీసీ ఎన్నికల కౌంటింగ్ కేంద్రాల వద్ద మూడంచెల పటిష్ట భద్రత.
జిల్లాలోని మూడు ప్రధాన ప్రాంతాల్లో కౌంటింగ్ కేంద్రాల భద్రతా ఏర్పాట్లను క్షేత్రస్థాయిలో పరిశీలించిన జిల్లా ఎస్పీ శ్రీ కె.వి. మహేశ్వర రెడ్డి, ఐపీఎస్.
స్ట్రాంగ్ రూములు, కౌంటింగ్ కేంద్రాల వద్ద నిరంతర నిఘా – అవాంఛనీయ సంఘటనలకు తావులేకుండా ముందస్తు చర్యలు.
జిల్లా ఎస్పీ శ్రీ కేవీ మహేశ్వర్ రెడ్డి ఐపీఎస్.
శ్రీకాకుళం, నవంబర్ 06. జిల్లాలో శనివారం (నవంబర్ 7) ఉదయం నుంచి నిర్వహించనున్న ఎంపీటీసీ, జెడ్పీటీసీ ఎన్నికల ఓట్ల లెక్కింపు ప్రక్రియను ప్రశాంతంగా, పారదర్శకంగా నిర్వహించేందుకు జిల్లా పోలీసుశాఖ ఆధ్వర్యంలో కట్టుదిట్టమైన భద్రతా ఏర్పాట్లు చేపట్టారు. జిల్లాలోని మూడు ప్రధాన ప్రాంతాల్లో ఏర్పాటు చేసిన కౌంటింగ్ కేంద్రాల వద్ద మూడంచెల భద్రతా వ్యవస్థను అమలు చేస్తూ, ఎటువంటి అవాంఛనీయ సంఘటనలకు ఆస్కారం లేకుండా పటిష్టమైన బందోబస్తు నిర్వహించాలని పోలీసు అధికారులకు జిల్లా ఎస్పీ శ్రీ కె.వి. మహేశ్వర రెడ్డి, ఐపీఎస్ గారు స్పష్టమైన ఆదేశాలు జారీ చేశారు.
ఈ నేపథ్యంలో శుక్రవారం జిల్లా ఎస్పీ పలాసలోని ప్రభుత్వ జూనియర్ కళాశాల, ప్రభుత్వ ఉన్నత పాఠశాల కౌంటింగ్ కేంద్రాలు, టెక్కలిలోని ఆదిత్య ఇంజనీరింగ్ కళాశాల, శ్రీకాకుళం సమీపంలోని చిలకపాలెం శ్రీ శివానీ ఇంజనీరింగ్ కళాశాలలో ఏర్పాటు చేసిన కౌంటింగ్ కేంద్రాలను సంబంధిత పోలీసు అధికారులతో కలిసి క్షేత్రస్థాయిలో సందర్శించి భద్రతా ఏర్పాట్లను సమగ్రంగా పరిశీలించారు. గురువారం నిర్వహించిన ఎన్నికల పోలింగ్ అనంతరం బ్యాలెట్ పత్రాలు, ఎన్నికల సామగ్రిని ఆయా కేంద్రాల్లోని స్ట్రాంగ్ రూములలో పటిష్ట భద్రత నడుమ భద్రపరిచిన నేపథ్యంలో వాటి రక్షణకు తీసుకున్న చర్యలు, సీసీ కెమెరాల నిఘా, పోలీసు గస్తీ, ప్రవేశ మార్గాలు, బారికేడింగ్, వాహనాల పార్కింగ్, ట్రాఫిక్ నియంత్రణ తదితర అంశాలను అధికారులను అడిగి తెలుసుకున్నారు.
ఈ సందర్భంగా జిల్లా ఎస్పీ మాట్లాడుతూ కౌంటింగ్ ప్రక్రియ పూర్తయ్యే వరకు స్ట్రాంగ్ రూముల వద్ద నిరంతర సీసీ కెమెరాల నిఘా కొనసాగించాలని, పోలీసు గస్తీని మరింత ముమ్మరం చేయాలని, అనధికార వ్యక్తులు ఎట్టి పరిస్థితుల్లోనూ స్ట్రాంగ్ రూముల పరిసరాల్లోకి ప్రవేశించకుండా కట్టుదిట్టమైన చర్యలు చేపట్టాలని ఆదేశించారు. విధుల్లో ఉన్న అధికారులు ఎప్పటికప్పుడు స్ట్రాంగ్ రూములను, భద్రతా పరిసరాలను తనిఖీ చేస్తూ అప్రమత్తంగా ఉండాలని సూచించారు. కౌంటింగ్ కేంద్రాల వద్ద మూడంచెల భద్రతా విధానాన్ని సమర్థవంతంగా అమలు చేస్తూ, ప్రతి భద్రతా వలయంలో విధులు నిర్వహించే సిబ్బంది తమ బాధ్యతలను సమన్వయంతో నిర్వర్తించాలని స్పష్టం చేశారు.
కౌంటింగ్ కేంద్రాలకు అభ్యర్థులు, వారి అధీకృత కౌంటింగ్ ఏజెంట్లు ఎన్నికల సంఘం జారీ చేసిన గుర్తింపు కార్డులు, సంబంధిత ధృవీకరణ పత్రాలను పరిశీలించిన అనంతరమే నిర్దేశిత ప్రవేశ మార్గాల ద్వారా అనుమతించాలని, ప్రతి మండలానికి కేటాయించిన ప్రత్యేక ప్రవేశ మార్గాలను కచ్చితంగా అమలు చేయాలని సూచించారు. అనుమతి లేని వ్యక్తుల ప్రవేశాన్ని పూర్తిగా నియంత్రించాలని, విధుల్లో ఉన్న సిబ్బంది కూడా తమకు కేటాయించిన ప్రదేశాల్లోనే విధులు నిర్వహించేలా పర్యవేక్షించాలన్నారు. కౌంటింగ్ హాళ్లలోకి మొబైల్ ఫోన్లు, ఐప్యాడ్లు, ల్యాప్‌టాప్‌లు, ఆడియో, వీడియో రికార్డింగ్ పరికరాలు తదితర ఎలక్ట్రానిక్ వస్తువులను అనుమతించరాదని స్పష్టం చేశారు.
కౌంటింగ్ కేంద్రాల వద్ద పటిష్టమైన బారికేడింగ్ ఏర్పాటు చేసి, అవసరమైన ప్రాంతాల్లో అదనపు భద్రతా వలయాలను ఏర్పాటు చేయాలని, జనసమూహాల నియంత్రణకు ప్రత్యేక సిబ్బందిని నియమించాలని ఆదేశించారు. పబ్లిక్ అడ్రస్ సిస్టమ్ ద్వారా ఎప్పటికప్పుడు సూచనలు జారీ చేస్తూ, బాడీ వోర్న్ కెమెరాలు, డ్రోన్లు, సీసీ కెమెరాల ద్వారా కేంద్రాల పరిసరాలపై నిరంతర నిఘా ఉంచాలని సూచించారు. కౌంటింగ్ కేంద్రాల వద్ద చోటుచేసుకునే పరిణామాలను వీడియో, ఫొటోగ్రఫీ ద్వారా రికార్డు చేయాలని, ఎక్కడైనా అనుమానాస్పద వ్యక్తులు లేదా వస్తువులు కనిపిస్తే వెంటనే ఉన్నతాధికారుల దృష్టికి తీసుకురావాలని ఆదేశించారు.
కౌంటింగ్ కేంద్రాల వద్ద ట్రాఫిక్‌కు ఎటువంటి అంతరాయం కలగకుండా ముందస్తు వాహనాల మళ్లింపు చర్యలు చేపట్టాలని, అభ్యర్థులు, ఏజెంట్లు, ఎన్నికల సిబ్బంది వాహనాల కోసం నిర్దేశించిన పార్కింగ్ ప్రదేశాలను మాత్రమే వినియోగించేలా చూడాలని తెలిపారు.ఎన్నికల నియమావళి,30 పోలీసు యాక్ట్ సెక్షన్,163 అమలు మేరకు కేంద్రాల వెలుపల అనవసరంగా గుంపులుగా గుమిగూడడాన్ని, తాత్కాలిక షామియానాలు, పందిళ్లు ఏర్పాటు చేయడాన్ని అనుమతించరాదని, ఎటువంటి ఉద్రిక్త పరిస్థితులు తలెత్తకుండా నిరంతరం పర్యవేక్షించాలని ఆదేశించారు.
కౌంటింగ్ కేంద్రాల వద్ద బందోబస్తు నిర్వహించే సంబంధిత సబ్ డివిజన్ పోలీసు అధికారులు స్వయంగా భద్రతా ఏర్పాట్లను పర్యవేక్షించాలని, విధులకు నియమించిన ప్రతి పోలీసు అధికారి, సిబ్బందికి వారి విధులు, బాధ్యతలపై ముందస్తుగా స్పష్టమైన అవగాహన కల్పించాలని సూచించారు. కౌంటింగ్ కేంద్రాల పరిసరాల్లో సమస్యాత్మక వ్యక్తుల కదలికలపై నిఘా ఉంచాలని,ముందస్తు జాగ్రత్తలు తీసుకోవాలని ఆదేశించారు. అవసరమైన సందర్భాల్లో అదనపు పోలీసు బలగాలను తక్షణమే వినియోగించుకునేలా సిద్ధంగా ఉంచాలని తెలిపారు.
కౌంటింగ్ ప్రక్రియ పూర్తయి ఫలితాలు ప్రకటించిన అనంతరం ఎటువంటి విజయోత్సవ ర్యాలీలు, ఊరేగింపులు, బాణసంచా కాల్చడం అనుమతి ఉండదని,ఎన్నికల ఫలితాల నేపథ్యంలో ప్రత్యర్థి వర్గాలను కించపరిచేలా, కక్షపూరితంగా వ్యవహరించడం, సామాజిక మాధ్యమాల్లో రెచ్చగొట్టే పోస్టులు, తప్పుడు సమాచారాన్ని ప్రచారం చేయడం వంటి చర్యలకు పాల్పడితే చట్టప్రకారం కఠిన చర్యలు తీసుకుంటామని హెచ్చరించారు.రాజకీయ పార్టీలు, అభ్యర్థులు, వారి అనుచరులు సంయమనం పాటించాలని జిల్లా ఎస్పీ సూచించారు. కౌంటింగ్ ప్రక్రియ ముగిసి, ఎన్నికల సామగ్రి, బ్యాలెట్ పత్రాల భద్రతకు సంబంధించిన ప్రక్రియ పూర్తయ్యే వరకు పోలీసు సిబ్బంది పూర్తి అప్రమత్తతతో విధులు నిర్వర్తించాలని తెలిపారు.
ఓట్ల లెక్కింపు ప్రక్రియను పూర్తి పారదర్శకంగా, ప్రశాంత వాతావరణంలో నిర్వహించేందుకు పోలీసుశాఖ అన్ని ముందస్తు భద్రతా చర్యలు చేపట్టిందని, ప్రజలు, రాజకీయ పార్టీల నాయకులు, అభ్యర్థులు, కౌంటింగ్ ఏజెంట్లు పోలీసుశాఖకు సహకరించాలని జిల్లా ఎస్పీ శ్రీ కె.వి. మహేశ్వర రెడ్డి, ఐపీఎస్ గారు విజ్ఞప్తి చేశారు.
ఈ పరిశీలనలో జిల్లా ఎస్పీ తోపాటు విజిలెన్స్ అదనపు ఎస్పీ వివేకానంద, సంబధిత డివిజన్ ఆర్డీవోలు సాయి ప్రత్యూష, కృష్ణ మూర్తి, అప్పలరాజు,డీఎస్పీలు దనేంజయ నాయుడు, లక్ష్మణరావు ,జి వి రమణ, భాస్కర్ రెడ్డి, ఎస్బి ఇన్స్పెక్టర్ ఇమ్మాన్యూల్ రాజ్ పలువురు సిఐలు ఎస్సైలు పాల్గొన్నారు.
Dgp Andhra Pradesh Srikakulam District Police Andhra Pradesh Police
