06/10/2026
2025/26 ජාතික ආර්ථික සංගණනයේ (කෘෂිකාර්මික) කළුතර දිස්ත්‍රික් සමාරම්භය නෑබඩින් ඇරඹේ
ශ්‍රී ලංකාවේ කෘෂිකාර්මික ක්ෂේත්‍රයේ වත්මන් තත්ත්වය, ව්‍යුහය සහ අනාගත සංවර්ධන අවශ්‍යතා වෙනුවෙන් නිවැරදි හා යාවත්කාලීන දත්ත පද්ධතියක් සකස් කිරීමේ අරමුණින් සංවිධානය කරනු ලබන 2025/26 ආර්ථික සංගණනයේ (කෘෂිකාර්මික) කළුතර දිස්ත්‍රික් ආරම්භක අවස්ථාව අද (2026.10.06) පෙ.ව. 9.30 ට කළුතර දිස්ත්‍රික් ලේකම් එච්.එම්.එස්.පී. හේරත් මැතිතුමාගේ ප්‍රධානත්වයෙන් දොඩන්ගොඩ ප්‍රාදේශීය ලේකම් කොට්ඨාසයේ 807 නෑබඩ ග්‍රාම නිලධාරී වසමෙන් ආරම්භ කෙරිණි.
ජනලේඛන හා සංඛ්‍යාලේඛන දෙපාර්තමේන්තුව මඟින් සෑම වසර 10කට වරක්ම සිදුකරනු ලබන මෙම ජාතික කර්තව්‍යය හරහා 2025/26 මහ කන්නය සහ 2026 යල කන්නය අයත්වන පසුගිය වගා වර්ෂය ආවරණය වන පරිදි තොරතුරු රැස්කිරීම සිදු කෙරේ. දිවයිනේ දිස්ත්‍රික්ක 25 ම ආවරණය වන පරිදි ක්‍රියාත්මක වන මෙම සංගණනයේදී ග්‍රාමීය මට්ටමේ කුඩා බිම් කොටස් මෙන්ම මහා පරිමාණ වතු ද ගවේෂණය කිරීමට නියමිතය.
ලෝක ආහාර හා කෘෂිකර්ම සංවිධානයේ (FAO) මාර්ගෝපදේශවලට අනුකූලව සිදුකෙරෙන මෙම සංගණනයේදී ප්‍රධාන ප්‍රශ්නාවලිය සහ ග්‍රාම නිලධාරි කොට්ඨාස මට්ටමේ ප්‍රශ්නාවලිය යන ප්‍රධාන කාණ්ඩ දෙක යටතේ ප්‍රධාන අංශ කිහිපයක් කෙරෙහි අවධානය යොමු කෙරේ.
*ගොවිකාරකයින් සහ ගොවි කාණ්ඩ( හිමිකාරිත්වය සහ කෘෂිකාර්මික යටිතල පහසුකම්)
*භූමි භාවිතය සහ බෝග වගාව (වී, තේ, රබර්, පොල්, කුළුබඩු සහ අනෙකුත් බෝග)
*සත්ව පාලනය(ගව, එළුවන්, කුකුළු ගහණය සහ කිරි/බිත්තර නිෂ්පාදනය)
*ජලජීවී වගාව(මිරිදිය හා කරදිය මත්ස්‍ය වගාව)
*තාක්ෂණය හා යෙදවුම්( යන්ත්‍රෝපකරණ, පොහොර, කෘමිනාශක සහ ජලසම්පාදනය)
මෙමඟින් ලබාගන්නා නිවැරදි හා යාවත්කාලීන දත්ත, ජාත්‍යන්තර මට්ටමේ පර්යේෂණ හා සංවර්ධන කටයුතු සඳහා මෙන්ම ශ්‍රී ලංකාවේ ඉදිරි කෘෂිකාර්මික හා ආර්ථික සංවර්ධනය වෙනුවෙන් තීරණාත්මක ජාතික ප්‍රතිපත්ති සකස් කිරීමට මහත් පිටිවහලක් වනු ඇත.
මෙම අවස්ථාව සඳහා දොඩන්ගොඩ ප්‍රාදේශීය ලේකම් නයන රංජිත් ප්‍රියශාන්ත මහතා, දොඩන්ගොඩ ප්‍රාදේශීය සභාවේ සභාපති නිලූෂ කවිරත්න මහතා, ගොවිජන සංවර්ධන සහකාර කොමසාරිස් ඉසංක යූ.කේ. ලියනගේ මහතා, ජනලේඛන හා සංඛ්‍යාලේඛන නියෝජ්‍ය අධ්‍යක්ෂ ඩබ්.බී.ජේ. වික්‍රමාරච්චි මහතා, දොඩන්ගොඩ ප්‍රාදේශීය ලේකම් කාර්යාලයේ පරිපාලන ග්‍රාම නිලධාරී පී.කේ. ජයතිලක මහතා, ජනලේඛන හා සංඛ්‍යාලේඛන දෙපාර්තමේන්තුවේ කළුතර දිස්ත්‍රික් කාර්යාලයේ නිලධාරීන්, දොඩන්ගොඩ ප්‍රාදේශීය ලේකම් කාර්යාලයේ ජනලේඛන හා සංඛ්‍යාලේඛන නිලධාරී, ග්‍රාම නිලධාරීන්, ප්‍රජා සවිබල ගැන්වීමේ නිලධාරීන් සහ කෘෂිකර්ම නිෂ්පාදන සහකාර නිලධාරීන් ඇතුළු රාජ්‍ය නිලධාරීන් රැසක් සහභාගි වූහ.
