10/11/2026
𝗧𝗜𝗡𝗚𝗡𝗔𝗡: PCPC at PCAT-VAWC, pinalakas ang kampanya sa proteksyon ng kababaihan at mga bata sa Aurora; S.A.F.E Framework at Project BE CAREFUL, pormal na pinagtibay
Pinagtibay ng Provincial Council for the Protection of Children (PCPC) at ng Provincial Committee on Anti-Trafficking and Violence Against Women and their Children (PCAT-VAWC) ang mga bagong hakbang at balangkas upang mas mapaigting ang kaligtasan at kapakanan ng mga bata at kababaihan sa buong lalawigan sa ginanap na 4th Quarter Joint Council Meeting ng mga ito noong Nobyembre 4, 2026 sa Governor’s Conference Room, Provincial Capitol Building, Baler, Aurora.
Ang pagpupulong ay pinangunahan ni Provincial Board Member Hon. Mae Ann K. Tolentino, Chairperson ng SP Committee on Social Welfare, Relief Services, Women and Family, and Gender Equality at Co-Chairperson ng PCPC at PCAT-VAWC, katuwang si Provincial Social Welfare and Development Officer Ms. Abigaiel F. Paulino, head secretariat.
𝗣𝗮𝗴𝗽𝗮𝗽𝗮𝘁𝗶𝗯𝗮𝘆 𝘀𝗮 𝗦.𝗔.𝗙.𝗘. 𝗙𝗿𝗮𝗺𝗲𝘄𝗼𝗿𝗸 𝗮𝘁 𝗣𝗿𝗼𝗷𝗲𝗰𝘁 𝗕𝗘 𝗖𝗔𝗥𝗘𝗙𝗨𝗟
Isa sa mga naging tampok ng pulong ang pormal na adopsiyon ng S.A.F.E. (Shield, Affirm, Fortify, and Extend) Framework ng Schools Division Office (SDO) - Aurora na iprinisenta ni Mr. Gibbs Baldonade.
Ayon kay Mr. Baldonade, ang nasabing balangkas ay binuo ng Division Office alinsunod sa DepEd Order No. 006, s. 2026, upang magsilbing pinag-isang sistema sa pagtataguyod ng kaligtasan, proteksyon, at kapakanan ng mga mag-aaral. Nakapaloob dito ang malinaw na mga patnubay sa pag-iwas sa mga posibleng panganib, pagtugon sa mga insidente, pagsuporta sa mga apektadong mag-aaral, at pagpapanatili ng ligtas na kapaligiran sa pag-aaral sa pamamagitan ng pinagsama-samang pagsisikap at pananagutan ng mga kinauukulan.
Kasabay nito, pormal ding pinagtibay ng konseho ang Project BE CAREFUL (Barangay Empowerment on Child Abuse Resistance and Elimination – Fight Unwanted Lewd Design), isang inisyatibang pinangungunahan ng PNP Women and Children Protection Desk, na naglalayong maprotektahan ang mga bata at kababaihan laban sa pang-aabuso, pagsasamantala, at karahasan sa pamamagitan ng community education, mass information drive, at multi-sectoral partnership.
Pinagtibay rin ang Local State of the Children Report para sa CY 2026 na ibinahagi ni Mr. Adonis Jake Bihasa ng Provincial Planning and Development Office.
𝗨𝗹𝗮𝘁 𝘀𝗮 𝗞𝗮𝘁𝗮𝘆𝘂𝗮𝗻 𝗻𝗴 𝗺𝗴𝗮 𝗕𝗮𝘁𝗮 𝗮𝘁 𝗞𝗮𝗯𝗮𝗯𝗮𝗶𝗵𝗮𝗻
Binigyang-pansin din sa pulong ang 3rd Quarter Situational Report on Children, kung saan iniulat ng Provincial Health Office ang pagtaas ng porsyento ng infant death. Ayon sa PHO, ang mga naitalang kaso ay kinabibilangan ng mga ipinanganak sa pamamagitan ng hilot at mga sanggol na ipinagbuntis ng ina habang nasa ibang lugar ngunit inabutan ng panganganak sa lalawigan.
Iniulat naman ni PMAJ Lorena Bautista, WCPD Chief ng Aurora Police Provincial Office, ang mga naitalang kasong kinasasangkutan ng mga bata at kababaihan sa lalawigan mula Hulyo 2026 hanggang Nobyembre 5, 2026.
Batay sa ulat, mayroong anim na kaso ng Violence Against Children (VAC), tatlo rito ay r**e cases. Lima naman ang kaso ng Children in Conflict with the Law (CICL), kung saan apat ang may kaugnayan sa Reckless Imprudence Resulting in Physical Injury and Damage to Property, habang wala namang kaso ng Children at Risk (CAR). Para naman sa Violence Against Women (VAW) ay mayroon dalawang kasong naitala.
Ayon kay PMAJ Bautista, bagaman nananatili ang pagkakaroon ng mga insidente ng sekswal na pang-aabuso sa mga bata at kababaihan sa lalawigan, makikita sa datos ang pababang trend ng mga kaso, na maiuugnay aniya sa sama-samang pagsisikap ng PNP, PSWDO, LSWDO, at ipa bang mga stakeholder sa antas ng barangay sa pamamagitan ng patuloy na pagpapatupad ng Project BE CAREFUL.
Sa iba pang mga ulat, nakapagtala ang mga MSWDO ng kabuuang 11 kaso ng VAWC, habang wala namang naitala sa PSWDO.
Sa kabuuan, binigyang-diin ng pagpupulong ang kahalagahan ng mas pinaigting na koordinasyon ng mga ahensiya ng pamahalaan, kapulisan, lokal na pamahalaan, at mga katuwang na organisasyon upang matiyak ang epektibong pagpapatupad ng mga programa at serbisyong naglalayong protektahan ang mga bata at kababaihan.
Sa pamamagitan ng mga pinagtibay na framework, proyekto, at mga ulat, patuloy na isinusulong ng Pamahalaang Panlalawigan ng Aurora, sa liderato ni Governor Isidro P. Galban, ang pagbuo ng isang ligtas at mapagkalingang komunidad kung saan pinangangalagaan ang karapatan, dignidad, at kapakanan ng bawat bata at babae.
𝙒𝙧𝙞𝙩𝙚𝙧: Lyn C. Robles
𝙋𝙝𝙤𝙩𝙤𝙜𝙧𝙖𝙥𝙝𝙚𝙧: Erica Polinada
𝙋𝙝𝙤𝙩𝙤 𝙀𝙙𝙞𝙩𝙤𝙧: Mark Ryan N. Lumasac
