12/11/2026
TINGNAN | 𝗜𝗗𝗘𝗔𝗟𝗦, 𝗜𝗡𝗖., 𝗡𝗮𝗸𝗶𝗽𝗮𝗴-𝘂𝗴𝗻𝗮𝘆𝗮𝗻 𝘀𝗮 𝗟𝗚𝗨 𝗢𝗹𝗱 𝗞𝗮𝗮𝗯𝗮𝗸𝗮𝗻 𝗽𝗮𝗿𝗮 𝘀𝗮 𝗠𝘂𝗻𝗴𝗸𝗮𝗵𝗶𝗻𝗴 𝗦𝗲𝗿𝗯𝗶𝘀𝘆𝗼𝗻𝗴 𝗟𝗲𝗴𝗮𝗹 𝗮𝘁 𝗣𝗿𝗼𝘁𝗲𝗸𝘀𝗶𝘆𝗼𝗻 𝗦𝗮 𝗞𝗼𝗺𝘂𝗻𝗶𝗱𝗮𝗱
Nagsagawa ng courtesy visit ang mga kinatawan ng Initiatives for Dialogue and Empowerment through Alternative Legal Services, Inc. (IDEALS, Inc.) sa Lokal na Pamahalaan ng Old Kaabakan, kung saan sila ay tinanggap ng Municipal Information Officer at pormal na nagsumite ng liham para sa pakikipag-ugnayan at koordinasyon sa tanggapan ni Municipal Mayor Hon. Tonicks S. Enalang. Sa nasabing pagbisita, ipinakilala ng IDEALS, Inc. ang kanilang mga kasalukuyan at panukalang programang nais ipatupad sa Bangsamoro Autonomous Region in Muslim Mindanao (BARMM), partikular ang Rights in Crisis and Emergencies (RICE) Program. Kabilang sa mga layunin ng programa ang pagtulong sa pagkuha ng legal na pagkakakilanlan at civil registration, pagbibigay ng legal at makataong impormasyon sa panahon ng emergency, pagpapalakas ng proteksiyon sa kababaihan at mga bata, at paghahatid ng legal na tulong sa mga bulnerable at conflict-affected communities. Ang pagbisita ay nagsilbing paunang hakbang upang maipabatid sa Lokal na Pamahalaan ang mga posibleng larangan ng pakikipagtulungan at ang mga serbisyong maaaring maiugnay sa pangangailangan ng mga mamamayan ng Old Kaabakan.
Sa ilalim ng pamumuno ni Mayor Tonicks S. Enalang, kinikilala ng Pamahalaang Bayan ang kahalagahan ng pakikipag-ugnayan sa mga organisasyong nagbibigay-diin sa karapatang pantao, access to justice, at proteksiyong panlipunan. Sa pamamagitan ng paunang koordinasyong ito, magkakaroon ng pagkakataong matukoy ang mga programang maaaring iangkop sa kalagayan ng munisipalidad, lalo na para sa mga pamilyang nangangailangan ng legal na dokumentasyon, proteksiyon, at angkop na suporta sa panahon ng krisis. Ang mga panukalang inisyatiba ng IDEALS, Inc. ay maaari ring magsilbing karagdagang oportunidad upang mapalawak ang kaalaman ng komunidad tungkol sa kanilang mga karapatan at mga serbisyong maaari nilang lapitan. Nananatiling mahalaga ang maayos na koordinasyon sa pagitan ng Lokal na Pamahalaan at mga katuwang na organisasyon upang matiyak na ang mga programang imumungkahi ay naaayon sa aktuwal na pangangailangan at kapakanan ng mga mamamayan. Sa pamamagitan ng ganitong mga paunang ugnayan, layunin ng LGU Old Kaabakan na mapalawak ang mga oportunidad para sa makabuluhan, inklusibo, at makataong serbisyong pampubliko.