11/10/2026
𝐓𝐈𝐍𝐆𝐍𝐀𝐍: 𝐇𝐢𝐠𝐢𝐭 𝟒𝟎𝟎 𝐫𝐞𝐬𝐢𝐝𝐞𝐧𝐭𝐞, 𝐧𝐚𝐤𝐢𝐢𝐬𝐚 𝐬𝐚 𝐁𝐚𝐫𝐚𝐧𝐠𝐚𝐲 𝐀𝐬𝐬𝐞𝐦𝐛𝐥𝐲 𝐧𝐠 𝐃𝐚𝐤𝐢𝐥𝐚
Oktubre 10, 2026 – Matagumpay na isinagawa ang Barangay Assembly ng Barangay Dakila para sa ikalawang semestre ng taong 2026, na dinaluhan ng higit 400 residente, kasama ang mga panauhin at kinatawan mula sa iba’t ibang tanggapan ng pamahalaan.
Pinangunahan ni Igg. Punong Barangay Vener C. Dela Cruz, kasama ang mga kagawad ng Sangguniang Barangay, ang pagtitipon na naglalayong ilahad ang mga programa, proyekto, at mahahalagang ulat ng barangay, gayundin ang pagbibigay ng pagkakataon sa mga residente na makilahok sa mga usaping may kaugnayan sa kaunlaran at kapakanan ng pamayanan.
Dumalo rin si Igg. Geli Bulaong, Konsehal ng Lungsod ng Malolos, kasama ang mga kinatawan ng DILG Malolos na pinangunahan ni Ma’am Josephine Gan at iba pang kawani nito, na naghatid ng mensahe mula sa tanggapan ng DILG. Nakibahagi rin sa pagtitipon ang mga kinatawan mula sa PNP Malolos at BFP Malolos, bilang pagpapakita ng patuloy na pagtutulungan ng mga tanggapan ng pamahalaan para sa isang ligtas, maayos, at maunlad na pamayanan.
Ang Barangay Assembly ay isinagawa sa temang “Tayo na sa Barangay Assembly! Nagkakaisang Tinig, Makabuluhang Usapan, at Sama-samang Pagkilos para sa Ating Komunidad.” Binigyang-diin nito ang kahalagahan ng aktibong pakikilahok ng bawat mamamayan sa pagtataguyod ng bukas na pamamahala, pananagutan, at sama-samang pagkilos para sa ikabubuti ng Barangay Dakila.
Taos-pusong nagpapasalamat ang Sangguniang Barangay ng Dakila sa lahat ng residenteng dumalo, sa mga panauhin, at sa mga katuwang na tanggapan ng pamahalaan na nakiisa sa makabuluhang pagtitipon na ito. Ang inyong pakikilahok ay mahalagang bahagi ng patuloy na pagsulong ng isang barangay na bukas sa tinig ng mamamayan at nakatuon sa sama-samang kaunlaran.
Mabuhay ang nagkakaisang Barangay Dakila!