09/11/2026
Sa mensahe sa Monday convocation ni Vice Mayor Hector C. Siao iyang gipahayag ang kamahinungdanon sa pagkamalahutayon, kooperasyon, ug pagkamainantuson sa pagserbisyo sa publiko. Iyang gipasiugda nga ang Sangguniang Bayan (SB) andam nga makig-hand-in-hand sa mga department heads aron masiguro ang hapsay nga pagpatuman sa mga plano ug programa sa LGU Matanao.
Giawhag usab niya ang mga departamento nga ipaambit ang ilang mga insights ug rekomendasyon aron maplastar ug maandam ang mga dokumentong gikinahanglan sa hustong proseso. Pinaagi niini, mas mapalig-on ang koordinasyon tali sa Legislative ug Executive departments, nga maghatag og mas klaro, organisado, ug episyenteng direksyon sa matag programa ug kalihokan sa munisipyo.
Usa sa mga talagsaong pamaagi sa SB Matanao mao ang ilang paperless process, nga nahimong simbolo sa modernisasyon, organisasyon, ug paspas nga pagproseso sa mga dokumento. Kini nga sistema nakadani sa pagdayeg sa ubang mga munisipalidad, diin ang SB Matanao nahimong destinasyon sa serye sa benchmarking activities tungod sa ilang episyente ug sistematikong pamaagi sa pagdumala sa legislative processes.
Dili lamang kini pagpamatuod sa maayong sistema, kondili usa usab ka lig-on nga commitment sa paghatag og suporta sa mga programa ug plano sa LGU Matanao pinaagi sa hustong proseso ug kompletong dokumentasyon. Uban sa kooperasyon, responsableng pagdumala, ug padayon nga pagbag-o, ang Sangguniang Bayan nagpabiling lig-on nga kauban sa pagpalambo sa serbisyo publiko ug pag-uswag sa tibuok Matanao.
