08/10/2026
#𝗦𝗔𝗔𝗗𝗨𝗽𝗱𝗮𝘁𝗲𝘀 | 𝗗𝗔-𝗦𝗔𝗔𝗗 𝗻𝗮𝗴-𝗼𝗿𝗶𝗲𝗻𝘁 𝘀𝗮 𝗺𝗴𝗮 𝗳𝗮𝗿𝗺𝗲𝗿-𝗴𝗿𝗼𝘂𝗽𝘀 𝘀𝗮 𝗵𝘂𝘀𝘁𝗼𝗻𝗴 𝗽𝗮𝗴𝗴𝗮𝗺𝗶𝘁 𝘂𝗴 𝗽𝗮𝗴-𝗮𝘁𝗶𝗺𝗮𝗻 𝘀𝗮 𝗮𝗴𝗿𝗶𝗰𝘂𝗹𝘁𝘂𝗿𝗮𝗹 𝗺𝗮𝗰𝗵𝗶𝗻𝗲𝗿𝗶𝗲𝘀
Dili lang pagdawat sa makinarya ang katapusan sa usa ka proyekto. Importante usab nga kahibalo ang mga farmer-group sa hustong paggamit ug pag-atiman niini aron magamit nila kini sa dugay nga panahon.
Mao kini ang tumong sa Orientation and Maintenance Briefing on Agricultural Machineries nga gipahigayon karong adlawa, October 8, 2026, sa Conference Room sa DA-RFO 9 alang sa siyam ka SAAD farmer-groups nga nakadawat og corn sheller with dehusker, hammer mill, hand tractor, ug forage chopper ubos sa DA-SAAD Program Phase 2.
Mitambong sa kalihokan ang Si Nilo Farmers Association sa Tigbao, Pongapong Farmers Association sa San Pablo, Setio Duray Rural Improvement Club ug Rizal Farmers Association sa Sominot sa Zamboanga del Sur; Palalian Farmers Association ug New Calamba Farmers Association sa Kalawit, Marapong SAAD Farmers Association sa Jose Dalman, ug Tabon Integrated Farmers Association sa Sibutad sa Zamboanga del Norte; ug Israel Farmers Association sa Imelda, Zamboanga Sibugay.
Gipasiugda ang kalihokan ni Mr. Junrey Flores, SAAD Food Production and Livelihood (FPL) staff. Mitambong usab si Engr. Jeffrey Pepito gikan sa DA-Regional Agricultural Engineering Division (DA-RAED) aron mohatag og technical assistance ug suporta, ilabina sa hustong paggamit ug pag-atiman sa mga makinarya. Si Mr. Marlon Domingo, technical representative gikan sa supplier sa mga equipment, mitambong usab aron maghatag og mga pahimangno ug praktikal nga impormasyon sa mga partisipante.
Para sa mga farmer-group, ang makinarya usa ka dugang nga tabang aron mapagaan ang ilang trabaho sa uma. Apan kauban niini ang responsibilidad nga ampingan ug gamiton kini sa husto.
Mao usab kini ang gitan-aw sa Marapong SAAD Farmers Association nga nakadawat og hand tractor.
“Mapasalamaton mi sa DA-SAAD sa among nadawat nga hand tractor. Usahay, magtan-aw mi sa ubang association nga naa na sila ani, unya kami wala pa. Karon nga naa na mi, amo gyud ning ampingan ug tarungon ang paggamit,” matud sa presidente sa Marapong SAAD Farmers Association nga si Mr. Desiderio Adanza.
Pinaagi sa maong briefing, gihatagan og dugang kahibalo ang mga farmer-group dili lamang sa paggamit sa ilang nadawat nga makinarya, apan usab sa pag-atiman ug pagmintinar niini aron magamit ug mapuslan pa sa dugay nga panahon. #
Department of Agriculture ZAMPEN