10/11/2026
“𝗗𝗜 𝗚𝗬𝗨𝗗 𝗦𝗔𝗬𝗢𝗡 𝗔𝗡𝗚 𝗕𝗔𝗬𝗥𝗢𝗡𝗢𝗡”: 𝗠𝗔𝗚𝗦𝗢𝗢𝗡 𝗦𝗔 𝗧𝗔𝗡𝗚𝗨𝗕 𝗖𝗜𝗧𝗬 𝗡𝗔𝗚𝗣𝗔𝗦𝗔𝗟𝗔𝗠𝗔𝗧 𝗦𝗔 𝗧𝗔𝗕𝗔𝗡𝗚 𝗦𝗔 𝗔𝗦𝗗 𝗙𝗥𝗘𝗘 𝗛𝗢𝗦𝗣𝗜𝗧𝗔𝗟𝗜𝗭𝗔𝗧𝗜𝗢𝗡 𝗣𝗥𝗢𝗚𝗥𝗔𝗠
Dili masukod sa kantidad ang kahupayan nga madala sa tabang, labi na kung kinabuhi ug dakong bayronon sa ospital ang gihisgotan.
Kini ang gibati ni Adoracion Saberon Abuhan, 68 anyos, usa ka tindera ug utanon sa Tangub City, human natabangan ang iyang magulang nga si Leonora Tanggocogo Saberon, 72 anyos, pinaagi sa Asenso Segundo Distrito (ASD) Free Hospitalization Program ni Cong. Ando Oaminal.
Si Leonora, nga kaniadto nagbaligya usab ug utanon, nakaagi ug dakong pagsulay tungod sa diabetic foot gangrene nga miresulta sa pagkaputol sa duha niya ka tiil. Kapin usa ka bulan siyang naospital sa Medina General Hospital, diin nagpatong-patong ang gasto alang sa iyang operasyon ug pag-atiman.
Mikabat sa ₱343,544.82 ang nahibiling balanse human sa PhilHealth, senior citizen discount, ug down payment.
Mas bug-at pa ang ilang kahimtang tungod kay si Leonora walay kaugalingong pamilya ug namatay na usab ang ilang mga ginikanan. Si Adoracion, isip iyang manghod, maoy nag-atiman ug naningkamot nga matubag ang iyang mga panginahanglan.
Apan pinaagi sa ASD Free Hospitalization Program, natabangan ang tibuok ₱343,544.82 nga nahibiling balanse.
“Di gyud masayon ang tabang! Pasalamat gyud mi'g dako kay kung wala pa, ambot unsaon na lang! Kinasingkasing gyud ang pagtabang ni Cong. Oaminal. Perte gyud namong pasalamat kay dili sayon ang bayronon,” matod ni Adoracion.
Alang sa magsoon, dili lang kini pagtabang sa bayronon sa ospital, kondili usa ka dakong kahupayan gikan sa kabug-at nga dugay nilang gipas-an.
“Grabe among pasalamat sa Ginoo tungod niya. Way kabutangan ang among pasalamat,” dugang pa niya.
Usa na usab kini ka pamilya nga nakasinati sa tinuod nga kahulugan sa tabang nga moabot sa panahon nga labing gikinahanglan.