Pantawid Pamilyang Pilipino Program - Palawan

30/10/2026

26/10/2026

"MAS PINADALING PAGTANGGAP NG GRANT: DISTRIBUSYON NG SET 14 EMV CASH CARDS PARA SA MGA BAGONG REHISTRADONG PAMILYA SA PALAWAN"

Isang mahalagang hakbang tungo sa mas madali at maginhawang pagtanggap ng grant ang isinagawa ng DSWD Pantawid Pamilyang Pilipino Program–Palawan sa pamamagitan ng distribusyon ng SET 14 EMV cash cards para sa mga bagong rehistradong benepisyaryo ng 4Ps.

Mula Oktubre 20 hanggang 24, 2026, nagsagawa ng distribusyon sa iba’t ibang sangay at lugar ng Land Bank of the Philippines (LBP), katuwang ang mga Municipal at City Operations Office (MOO/COO). Bukod sa pagtanggap ng kanilang cash cards, inasistehan din ang mga benepisyaryo sa pagpaparehistro ng kanilang mga card upang maihanda ang mga ito para sa mas mabilis at maginhawang pagkuha ng kanilang mga grant sa pamamagitan ng ATM.

Nagsimula ang distribusyon noong Oktubre 20, 2026, kung kailan nakatanggap ng cash cards ang 64 sa 66 na nakatakdang benepisyaryo sa LBP West Branch, sa pangangasiwa ng MOO San Vicente. Sa parehong araw, nakumpleto naman ang distribusyon sa LBP Coron Branch, kung saan lahat ng 25 nakatakdang benepisyaryo sa ilalim ng MOO Busuanga ay nakatanggap ng kanilang cash cards.

Nagpatuloy ang aktibidad noong Oktubre 21, 2026, sa LBP West Branch, kung saan nakatanggap ng cash cards ang 50 sa 51 na nakatakdang benepisyaryo sa ilalim ng MOO Roxas.

Kinabukasan, Oktubre 22, 2026, muling isinagawa ang distribusyon sa LBP Coron Branch. Lahat ng 40 nakatakdang benepisyaryo sa ilalim ng COO Puerto Princesa City at lahat ng 11 nakatakdang benepisyaryo sa ilalim ng MOO Culion ay nakatanggap ng kanilang cash cards.

Samantala, noong Oktubre 24, 2026, isinagawa ang distribusyon sa Taytay Central Junior High School sa ilalim ng koordinasyon ng MOO Taytay at MOO El Nido, gamit ang LBP Rizal Branch bilang sangay na nag-release ng mga cash card. Sa kabuuan, nakatanggap ng cash cards ang 139 sa 142 na nakatakdang benepisyaryo mula sa MOO Taytay at lahat ng 31 nakatakdang benepisyaryo mula sa MOO El Nido.

Sa kabuuan, 359 sa 366 na nakatakdang benepisyaryo ang nakatanggap ng kanilang SET 14 EMV cash cards, katumbas ng humigit-kumulang 98.09% ng mga nakatakdang tatanggap sa lahat ng nabanggit na distribusyon.

Sa pamamagitan ng gawaing ito, layunin ng DSWD Pantawid Pamilya na mapadali ang pag-access ng mga bagong rehistradong pamilya sa kanilang mga grant sa pamamagitan ng ATM. Kasabay ng pagbibigay ng cash cards, mahalaga rin ang paggabay sa mga benepisyaryo sa pagpaparehistro at tamang paggamit ng mga ito.

Patuloy ang pagsisikap ng Pantawid Pamilya na gawing mas maayos, episyente, at maginhawa ang proseso ng pagtanggap ng grant para sa mga pamilyang benepisyaryo.

26/10/2026

"MULA SA PAMUMUNO, TUNGO SA PAG-UNLAD: PAGSASANAY PARA SA MGA LIDER NG SITIO SINCAB 🌱🤝"

Ang matatag na komunidad ay nagsisimula sa mga lider na handang matuto, makiisa, at manguna sa pagbabago.

Sa bawat komunidad na nangangarap ng mas maayos na kinabukasan, mahalaga ang pagkakaroon ng mga lider na may sapat na kaalaman, kakayahan, at kahandaang maglingkod. Sila ang maaaring maging tulay upang mapag-ugnay ang pangangailangan ng mga residente at ang mga oportunidad para sa kaunlaran.

Bilang bahagi ng patuloy na pagsisikap na palakasin ang kakayahan ng komunidad ng Sitio Sincab, Pulot Interior, Sofronio Española, Palawan, nagsagawa ang DSWD Pantawid Pamilyang Pilipino Program–Palawan ng dalawang araw na Leadership Training para sa 25 miyembro ng CORE Group ng komunidad.

Layunin ng pagsasanay na higit na malinang ang kakayahan ng mga lider sa pangunguna, pakikipag-ugnayan, pakikipagtulungan, at aktibong pakikilahok sa mga gawaing pangkomunidad. Sa pamamagitan nito, hangad na maihanda sila bilang mga katuwang at posibleng tagapagpasimula ng mga inisyatiba kapag may mga programang pangkaunlaran at suportang maihahatid sa kanilang lugar.

Higit pa sa paglinang ng kasanayan sa pamumuno, mahalaga ang pagkakaroon ng mga lider na kayang makinig sa kanilang kapwa, magbuklod ng mga residente, at tumulong sa pagtukoy ng mga pangangailangan at posibleng solusyon ng komunidad. Sa ganitong paraan, mas nagiging makabuluhan ang pakikilahok ng mga residente sa mga hakbang na naglalayong mapabuti ang kanilang pamumuhay.

Ang pagsasanay na ito ay isang hakbang tungo sa pagbuo ng isang komunidad na hindi lamang handang tumanggap ng mga oportunidad, kundi may mga lider ding handang makiisa, manguna, at tumulong upang maisulong ang mga ito.

Dahil ang tunay na pag-unlad ay hindi lamang tungkol sa mga programang naihahatid sa komunidad, ito rin ay tungkol sa mga taong inihahanda upang maging bahagi ng pagbabago.

Sa Sitio Sincab, ang paglinang sa mga lider ngayon ay paghahanda para sa mga oportunidad ng bukas. 🌱

26/10/2026

SA LIKOD NG MAPUTIK NA DAAN, MAY PAG-ASANG SISIBOL: PAGTUTULUNGAN PARA SA KABUHAYAN NG SITIO SINCAB 🌱🤝

Hindi naging hadlang ang ulan, putik, at kawalan ng regular na transportasyon. Sa kabila ng mga hamon sa paglalakbay, nagkaisa ang iba’t ibang ahensiya upang tuklasin ang mga oportunidad para sa mas matatag at napapanatiling kabuhayan ng komunidad.

SOFRONIO ESPAÑOLA, PALAWAN | Oktubre 21, 2026 — Sa likod ng maputik at mahirap na daan patungo sa Sitio Sincab, Pulot Interior, dala ng mga kinatawan mula sa iba’t ibang ahensiya ng pamahalaan ang iisang layunin: matukoy ang mga potensiyal na mapagkukunan ng kabuhayan at ang mga kinakailangang suporta upang maisulong ang pangmatagalang pag-unlad ng komunidad.

Bilang bahagi ng Provincial Inter-Agency Committee – Technical Working Group (TWG) for Livelihood Concern, pinangunahan ng DSWD Pantawid Pamilyang Pilipino Program–Palawan Operations ang pagsasagawa ng field visit sa suporta at pag-apruba ni Ms. Eleanor M. Lotivo, OIC-APCO at Tagapangulo ng TWG. Naisakatuparan ang aktibidad noong Oktubre 21, 2026 bilang bahagi ng sama-samang pagtugon sa mga pangangailangan ng komunidad.

Bago tumulak patungong Sitio Sincab, nagsagawa muna ng courtesy call sa Pamahalaang Bayan ng Sofronio Española. Dahil sa nauna nang nakatakdang mga gawain ng Punong Bayan sa araw na iyon, itinalaga niya si Elizabeth Joy A. Baladhay (EMS-I), upang kumatawan sa lokal na pamahalaan. Sa pagkakataong ito, nagkaroon ng maikling briefing at naipahayag ang pasasalamat sa suporta at pakikipagtulungan ng Pamahalaang Bayan sa pagsasakatuparan ng aktibidad.

Hindi naging madali ang paglalakbay patungo sa lugar. Dahil sa maputik na daan, pag-ulan, at kawalan ng regular na transportasyon, kinailangang lumusong at magpatuloy sa paglalakad ang mga kalahok upang marating ang komunidad. Sa kabila nito, nagpatuloy ang grupo upang maisakatuparan ang layunin ng pagbisita.

Pagdating sa lugar, mainit silang tinanggap ng CORE Group ng Sitio Sincab, na binubuo ng 25 lider ng komunidad, kabilang ang mga purok leader, parent leader, at lider ng mga katutubo (IP).

Sa isinagawang briefing, ipinaliwanag sa mga residente ang layunin ng pagbisita at ipinakilala ang mga kinatawan ng bawat ahensiya. Nakatuon ang aktibidad sa pagtatasa ng mga likas na yaman at hilaw na materyales na matatagpuan sa Sitio Sincab upang matukoy ang mga potensiyal na pagkakakitaan ng komunidad, gayundin ang mga kakulangan at karagdagang suportang kinakailangan upang malinang ang mga ito bilang pangmatagalan at napapanatiling mapagkukunan ng kabuhayan. Ang inisyatibang ito ay tugon sa naunang needs assessment ng komunidad, kung saan natukoy ang kabuhayan bilang isa sa mga pangunahing prayoridad. Bago ang aktuwal na pagtatasa, sumailalim sa oryentasyon ang mga assessor hinggil sa assessment tool na gagamitin upang matiyak ang sistematiko at magkakatugmang proseso ng pagsusuri at makabuo ng mga rekomendasyong angkop sa pangangailangan ng komunidad.

Nakiisa sa aktibidad ang mga kinatawan mula sa iba’t ibang ahensiya, kabilang ang dalawa mula sa Department of Agriculture (DA)–MIMAROPA, isa mula sa Provincial Agriculture Office (PAGO), apat mula sa Western Philippines University (WPU)–Agricultural Section, isa mula sa Department of Trade and Industry (DTI), tatlo mula sa Municipal Agriculture Office (MAO), at dalawa mula sa Municipal Social Welfare and Development (MSWD) Office ng Sofronio Española. Kasama rin sa aktibidad ang Municipal Link na nakasasakop sa Sitio Sincab, apat na kasamahan nito mula sa 4Ps Municipal Sub-Office, at tatlong kinatawan mula sa DSWD Pantawid Pamilyang Pilipino Program–Provincial Operations Office (POO), na nagsilbing mga facilitator. Sa pamamagitan ng kanilang pinagsama-samang kaalaman at teknikal na kadalubhasaan, inaasahang matutukoy ang mga angkop na interbensiyon at oportunidad na makatutulong sa pagsusulong ng mas matatag at napapanatiling kabuhayan para sa komunidad.

Nagtapos ang aktibidad sa isang photo opportunity at pagpapahayag ng pasasalamat sa mga residente at lider ng Sitio Sincab sa kanilang mainit na pagtanggap at pakikiisa.

Taos-puso kaming nagpapasalamat sa Pamahalaang Panlalawigan ng Palawan, sa pamumuno ni Gobernador Amy Roa Alvarez, sa pagpapahiram ng sasakyan at pagsagot sa gastusin sa gasolina. Malaki ang naging tulong ng inyong suporta upang marating namin ang Sitio Sincab at maisakatuparan ang layunin ng aming pagbisita.

Maraming salamat din sa Pamahalaang Bayan ng Sofronio Española, sa pamumuno ni Mayor Abner Rafael N. Tesorio, sa inyong suporta at pakikipagtulungan sa gawaing ito.

Lubos din ang aming pasasalamat sa lahat ng assessor at kinatawan mula sa DA-MIMAROPA, PAGO, WPU, DTI, MAO, at MSWD na tumugon sa aming paanyaya at nagbahagi ng kanilang oras, kaalaman, at teknikal na kadalubhasaan. Ang inyong pakikiisa ay mahalagang bahagi ng sama-samang pagsisikap na matukoy ang mga potensiyal na oportunidad sa kabuhayan at ang mga suportang kinakailangan upang higit na mapalakas ang kakayahan ng komunidad.

Higit sa lahat, maraming salamat sa CORE Group at sa buong komunidad ng Sitio Sincab sa inyong mainit na pagtanggap, bukas na pakikipag-ugnayan, at aktibong pakikiisa. Sa kabila ng mga hamon sa paglalakbay, ang inyong pagtanggap at kahandaang makipagtulungan ay nagbigay-halaga sa layunin ng aming pagbisita.

Sa inyong lahat, maraming salamat sa pagiging bahagi ng inisyatibang ito. Nawa'y magsilbi itong mahalagang hakbang tungo sa pagtukoy ng mga angkop na suporta at sa pagsusulong ng mas matatag at napapanatiling kabuhayan para sa Sitio Sincab. 🌱🤝

19/10/2026

⚡ POWERING EDUCATION, STRENGTHENING PARTNERSHIPS! ⚡

In line with the three-year commitment and partnership between the Global Peace Foundation Philippines (GPF Philippines) and the Department of Social Welfare and Development (DSWD) Pantawid Pamilyang Pilipino Program (4Ps), a Ceremonial Turnover of Solar Generator Donations was held on October 19, 2026, at Princesa Garden Island Resort and Spa, Puerto Princesa City, Palawan.

Through this partnership, generator sets were turned over to Cacarigan Elementary School in Narra, Palawan, and Nanabu Indigenous People Elementary School in Roxas, Palawan -- two schools located in Geographically Isolated and Disadvantaged Areas (GIDAs). This initiative aims to help address the schools’ energy needs and support a more conducive learning environment for learners, teachers, and the school community.

The activity brought together representatives from GPF Philippines, DSWD – 4Ps Palawan, the Schools Division Office of Palawan, and the recipient schools, reflecting a shared commitment to bringing meaningful and sustainable interventions to underserved communities.

This initiative reflects the shared commitment of DSWD 4Ps and its partners to bring meaningful support to underserved communities, ensuring that children and families in geographically isolated areas have better opportunities to thrive.

Together, we strengthen families, invest in children’s futures, and turn partnerships into meaningful opportunities for every Filipino child. 💚💙

19/10/2026

𝐌𝐆𝐀 𝐁𝐀𝐆𝐎𝐍𝐆 𝐑𝐄𝐇𝐈𝐒𝐓𝐑𝐀𝐃𝐎𝐍𝐆 𝐏𝐀𝐌𝐈𝐋𝐘𝐀 𝐒𝐀 𝟒𝐏𝐬, 𝐓𝐔𝐌𝐔𝐍𝐆𝐎 𝐒𝐀 𝐏𝐀𝐆𝐊𝐔𝐇𝐀 𝐍𝐆 𝐂𝐀𝐒𝐇 𝐂𝐀𝐑𝐃𝐒

PALAWAN — Nagsagawa ang Department of Social Welfare and Development (DSWD) Pantawid Pamilyang Pilipino Program (4Ps) ng pamamahagi ng cash cards sa mga bagong rehistradong benepisyaryong pamilya sa ilang lugar sa Palawan, katuwang ang Land Bank of the Philippines (LBP), noong Oktubre 13–15, 2026.

Layunin ng aktibidad na mabigyan ang mga bagong rehistradong pamilya ng cash cards na gagamitin sa pagtanggap ng kanilang mga grant sa bawat payout, alinsunod sa mga umiiral na patakaran ng programa.

Batay sa talaan ng pamamahagi, nakapagtala ang mga sumusunod na sangay at lugar ng distribusyon:

📍 LBP Coron Branch – Isinagawa noong Oktubre 13, 2026, kung saan 22 sa 23 target na benepisyaryo ang nakakuha ng kanilang cash cards.

📍 LBP Brooke’s Point Branch – Set 14, First Batch – Isinagawa noong Oktubre 14, 2026, kung saan 23 sa 26 na target na benepisyaryo mula sa Brooke’s Point ang nakakuha ng kanilang cash cards.

📍 Bataraza, Palawan – Isinagawa noong Oktubre 15, 2026, sa Terminal Market sa Bataraza. Sa 73 target na benepisyaryo, 72 ang nakakuha ng kanilang cash cards.

Sa kabuuan, 117 sa 122 target na benepisyaryo ang matagumpay na nakakuha ng kanilang cash cards. Lima naman ang hindi pa nakakuha ng kanilang cash cards sa panahon ng distribusyon.

Patuloy na isinusulong ng DSWD Pantawid Pamilya ang maayos at episyenteng paghahatid ng mga serbisyo upang matiyak na ang mga kwalipikadong pamilyang benepisyaryo ay magkaroon ng kinakailangang access sa kanilang mga grant sa ilalim ng programa.

17/10/2026

📣 TULAY NG UGNAYAN, SANDIGAN NG SERBISYO: 4Ps CITY LINKS AT KAWANI, PINATATAG ANG KOMUNIKASYON AT PAMUMUNO

Matagumpay na naisagawa ang dalawang araw na capacity-building activity para sa ating mga City Link at kawani ng Pantawid Pamilyang Pilipino Program (4Ps) noong Oktubre 15–16, 2026, na nagpatibay sa kanilang kakayahan sa komunikasyon, partnership, at pamumuno. 💙

📌 DAY 1 | OCTOBER 15, 2026
Skills Enhancement in Effective Communication and Partnership with Program Partners and Stakeholders for City Link

Sa Victoriano J. Rodriguez (VJR) Hall, nagsimula ang pagsasanay sa pagpapahusay ng malinaw at makabuluhang pakikipag-ugnayan. Hinasa ng mga City Link ang aktibong pakikinig, maayos na koordinasyon, at pagbuo ng mga estratehiyang magpapatibay sa pakikipagtulungan sa mga program partner at stakeholder. Sa bawat talakayan at karanasang ibinahagi, mas lumalim ang pag-unawa nila na ang matibay na ugnayan ang sandigan ng mas maayos na paghahatid ng serbisyo sa mga pamilyang benepisyaryo.

📍 DAY 2 | OCTOBER 16, 2026
Bridging Leadership

Sa ikalawang araw, pamumunong nagbubuklod ang naging sentro ng pagsasanay. Lumakas ang teamwork, tiwala, at sama-samang pagkilos ng mga City Link at kawani ng 4Ps tungo sa iisang layunin: ang makapaghatid ng makabuluhang serbisyo sa bawat pamilyang benepisyaryo. Higit sa pagiging lider, itinampok ang halaga ng pagiging tulay ng komunikasyon, pagkakaunawaan, at pagtutulungan upang makabuo ng mga solusyong tunay na tumutugon sa pangangailangan ng mga pamilya.

Lubos din ang aming pasasalamat sa Pamahalaang Panlalawigan ng Palawan sa paglalaan ng VJR Hall bilang venue ng unang araw ng aktibidad.

Sa pamamagitan ng patuloy na pagtutulungan at paglinang sa kakayahan ng ating mga kawani, mas napagtitibay ang pundasyon ng isang mas mahusay at tumutugon na programa.

Sa mas matatag na komunikasyon, mas malawak na partnership, at mas mahusay na pamumuno, patuloy nating pinapalakas ang ugnayan at sama-samang pagkilos tungo sa mas maayos at makabuluhang serbisyo para sa mga pamilyang 4Ps