01/11/2026
“15-ANYOS NGA ANAK ANG SUSPEK, INAHAN GIMARTILYO KA-UPAT KA HIGAYON”
15-anyos nga anak, miangkon sa pagpatay ug pagtago sa lawas sa inahan sa septic tank sa Panglao
Giila na sa kapulisan nga "solved" ang kaso sa pagpatay sa usa ka 46-anyos nga babaye kansang patayng lawas napalgan sulod sa usa ka daang septic tank sa Purok 3, Barangay Looc, Panglao, Bohol niadtong Oktubre 31, 2026, human mismong ang iyang 15-anyos nga anak nga lalaki miangkon sa paghimo sa maong krimen dili palang dugay karong adlawa Domingo, Nobyembre 1.
Sumala kang Police Major Joseph Lopena, Chief sa PCADU, nitug-an ang menor-de-edad nga gipukpok niya og martilyo ang ulo sa biktima nga si Rhea Hormiguera sa makaupat ka higayon. Nahitabo ang krimen human sa ilang mainit nga panaglalis dihang gikasab-an siya sa iyang inahan tungod sa pag-cutting sa klase.
Human sa pagpatay, giguyod sa suspek ang lawas sa biktima paingon sa septic tank nga nahimutang duol sa Looc Elementary School ug gitabonan kini og mga bato. Tungod kay duster ang gisuot sa iyang inahan, nahubo kini atol sa paguyod niini padulong sa Septic Tank.
Gilimpyohan pa sa batan-on ang mga dugo sa salog sa balay aron pagtago sa krimen, apan nakita sa mga sakop sa Scene of the Crime Operatives (SOCO) ang nabilin nga mantsa sa dugo diha sa bungbong ug malampuson usab nilang na-rekober ang martilyo nga gigamit diin gitagoan og maayu sa suspek.
Sa wala pa moangkon, unang nipadayag og alibi ang anak nga mibiya ang iyang inahan sa balay niadtong Oktubre 30 ug wala na kini makapauli.
Nasayran sa imbestigasyon nga layo sa pagka-badlongon ang suspek tungod kay maayu kini sa klase, usa ka atleta, walay bisyo, ug walay barkada. Hinuon, nasuta sa mga awtoridad nga adunay taas nga level ang account sa batan-on sa online game nga Roblox. Apan butyag ni Lopena, dili pa ma justify nga himoung anggolo ang Roblox.
Anaa na karon sa DSWD ang 15-anyos nga CICL.
Via Jomer Pequit, DYTR News
