Komuna Klinë

Drejtori i Arsimit, Dr.Sc. Qemajl Sejdija, priti në takim përfaqësues të Universitetit “Haxhi Zeka”

Sot, Drejtori i Arsimit, Dr. Sc. Qemajl Sejdija, priti në takim përfaqësuesit e Universitetit “Haxhi Zeka”, Prof. Dr. Ibrahim Hoxha, Prof. Dr. Nexhdet Shala, Prof. Asoc. Milaim Musliu dhe MSc. Ukë Selimaj.

Gjatë takimit u diskutuan mundësitë e bashkëpunimit institucional, si dhe format më efikase për informimin e maturantëve rreth programeve akademike dhe mundësive të studimit që ofron universiteti.

Drejtori i Arsimit, Qemajl Sejdija, theksoi gatishmërinë e Komunës së Klinës për të bashkëpunuar me institucionet e arsimit të lartë, me qëllim mbështetjen e të rinjve në orientimin e tyre akademik dhe profesional.

Vizita vijoi me takime me nxënësit e Shkollës së Mesme “Luigj Gurakuqi” në Klinë, si dhe me nxënësit e Shkollës së Mesme “Fehmi Agani” në Klinë, ku u prezantuan programet studimore dhe u ofruan informacione të detajuara për procesin e aplikimit dhe përfitimet e studimit në këtë universitet.

Në këtë aktivitet morën pjesë edhe studentë të universitetit, të cilët kontribuan aktivisht në shpërndarjen e materialeve informuese dhe në bashkëbisedime me nxënësit, duke ndarë përvojat e tyre studimore dhe duke iu përgjigjur pyetjeve të maturantëve.

Nisin përgatitjet për Festivalin Folklorik “I këndojmë Lirisë”

Në Klinë kanë nisur përgatitjet për mbajtjen e Festivalit Folklorik “I këndojmë Lirisë” , i cili mbahet më 6, 7 dhe 8 qershor të këtij viti. Sivjet është edicioni i 24-të, në të cilin marrin pjesë ansamble, grupe folklorike, rapsodë, valltarë e instrumentistë nga të gjitha trojet shqiptare. Në mbledhjen e Këshillit organizativ u zgjodhën edhe organet drejtuese të festivalit.

Drejtor i festivalit u zgjodh Alban Gashi, drejtoria artistike në përbërje Halit Gashi drejtor dhe antarët Daut Gashi dhe Fatmir Berisha, zëdhënës i festivalit Enver Maloku si dhe trupat tjerë punues.

Festivali si edhe viteve të tjera mbështetet nga komuna e Klinës dhe në përkujdesje të kryetarit të Komunës, Prof.Dr. Zenun Elezajt. Edhe sivjet botohet revista “Lyra” nga gazetarët Enver Maloku, kryeredaktor, Sadri Haxhaj, redaktor dhe Bedri Morina, lektor. Drejtori komunal i Kulturës, Rinisë dhe Sportit, Lorenc Marku, theksoi se përgatitje për organizimin e festivalit kanë filluar edhe më herët, në mënyrë që festivali të organizohet sa më mirë. Ndërkaq, nënkryetari i Komunës së Klinës, Fadil Gashi, tha se komuna është e përkushtuar në të gjitha aspektet për festivalin Folklorik “I këndojmë Lirisë”, duke ofruar kushte sa më të mira për të gjithë pjesëmarrësit.

Gjatë tri ditëve, sa mbahet festivali organizohen edhe aktivitete të tjera, të cilat e begatojnë këtë manifestim folklorik gjithëkombëtar. Festivali nis në Çabiq, në vendlindjen e Mujë Krasniqit.

Drejtori i posa zgjedhur, Alban Gashi, pasi që falënderoj për besimin e dhënë, theksoi se të jesh drejtor i këtij festivali, pos që është nder dhe konsideratë, njëkohësisht është edhe përgjegjësi e madhe duke pas parasysh karakterin e festivalit. Ndaj, do të punojmë me përkushtim të madh që festivali, si deri tash të organizohet sa më mirë. Ai njoftoi edhe për procedurat e nevojshme tenderuese që duhet të kryhen.

MESAZH URIMI I KRYETARIT TË KOMUNËS, PROF. DR. ZENUN ELEZAJ, ME RASTIN E FESTËS SË PASHKËVE ORTODOKSE

Me rastin e festës së shenjtë të Pashkëve Ortodokse, kryetari i Komunës, Prof. Dr. Zenun Elezaj, ka përcjellë urimet e tij më të sinqerta për të gjithë qytetarët e besimit ortodoks.

Ai u ka dëshiruar shëndet, paqe, mirëqenie dhe suksese, duke vlerësuar rëndësinë e bashkëjetesës dhe respektit të ndërsjellë ndërmjet komuniteteve.

“Gëzuar Pashkët Ortodokse për të gjithë besimtarët ortodoksë në Kosovë. Uroj që kjo festë e shenjtë të sjellë shëndet, begati, harmoni dhe mirësi në familjet tuaja”, thuhet në urimin e kryetarit Elezaj.

KRYETARI ELEZAJ PRITI NË TAKIM KRYETARIN E BASHKISË SË SELENICËS, NERTIL BELLAJ

Sot, Kryetari i Komunës, prof. dr. Zenun Elezaj, ka pritur në takim kryetarin e Bashkisë së Selenicës, Qarku i Vlorës, z. Nertil Bellaj.

Në këtë takim morën pjesë edhe nënkryetari i komunës, Fadil Gashi dhe kryesuesi i Kuvendit, Enver Berisha, ndërsa nga Bashkia e Selenicës nënkryetari Artan Haxhiaj, kryetari i Këshillit të Bashkisë Nimet Dapaj, si dhe këshilltarë dhe drejtues të administratës së bashkisë.

Kryetari Elezaj e falënderoi kryetarin Bellaj për vizitën dhe e informoi atë lidhur me zhvillimet aktuale në komunë, duke përfshirë gjendjen ekonomike dhe sociale, projektet e realizuara dhe ato në planifikim, si dhe aktivitetet kulturore. Po ashtu, u diskutuan mundësitë e bashkëpunimit ndërmjet dy komunave në fusha të ndryshme me interes të përbashkët.

Në fokus të veçantë ishte shkëmbimi i përvojave në qeverisjen lokale, me theks në zhvillimin ekonomik lokal, menaxhimin e shërbimeve publike, rritjen e transparencës dhe përfshirjen e qytetarëve në proceset vendimmarrëse.

Kryetari i Bashkisë së Selenicës, z. Netil Bellaj, shprehu mirënjohjen për mikpritjen dhe vlerësoi gatishmërinë për thellimin e bashkëpunimit ndërmjet dy institucioneve, duke theksuar rëndësinë e ndërtimit të partneriteteve të qëndrueshme.

Kryetari Elezaj dhe Bellaj u dakorduan që të vazhdojnë koordinimin dhe të konkretizojnë bashkëpunimin përmes iniciativave dhe projekteve të përbashkëta në të ardhmen, veçanërisht në fushën e kulturës.

KLINA NẼ DHEMBJEN E 4 PRILLIT

Lëshimi i faturave të tatimit në pronë për vitin 2026

Ju njoftojmë se faturat e tatimit në pronë për vitin tatimor 2026 janë lëshuar më datë 31.03.2026, dhe mund të qaseni në platformën zyrtare e-Kosova: https://ekosova.rks-gov.net/ ose në objektin e Komunës së Klinës, përkatësisht në Drejtorinë e Financave.

Afatet e pagesës së kësteve:
• Kësti i parë: deri më 30 qershor 2026
• Kësti i dytë: deri më 30 shtator 2026

Mosrespektimi i afateve rezulton në një gjobë dhe me interes prej 10% të këstit të parë dhe interes prej 0.65% këstit të dytë në muaj.

Po ashtu, ju njoftojmë se për mosparaqitjen e kërkesës për regjistrim të pronave të reja do të ndëshkoheni me gjobë sipas ligjeve në fuqi.

Për çdo paqartësi, ju lutemi kontaktoni zyrtarët komunalë të tatimit në pronë.

Paguaj tatimin sot që të kesh mirëqenie më të mirë nesër.

SQARIM LIDHUR ME PRETENDIMET PËR DEPONI TË MBETURINAVE TE LIQENI I SFERKËS

Komuna e Klinës ka pranuar shqetësimet e qytetarëve, veçanërisht të banorëve të fshatit Sferkë, lidhur me disa pretendime të përhapura se hapësira në vendin e quajtur Liqeni i Sferkës mund të caktohet si lokacion për një deponi të mbeturinave.

Me qëllim të informimit të drejtë dhe transparent të opinionit publik, Komuna e Klinës sqaron se nuk ka planifikuar dhe as nuk ka shqyrtuar ndonjëherë mundësinë e caktimit të këtij lokacioni për deponi të mbeturinave.

Po ashtu, bëjmë të ditur se zona te Liqeni i Sferkës është nën menaxhimin e kompanisë Boksitet e Kosovës, e cila monitorohet nga Agjencia për Kosovare e Privatizimit dhe Agjencia për Menaxhimin e Minierave dhe Mineraleve të Kosovës dhe çdo veprim apo ndërhyrje në këtë hapësirë mund të realizohet vetëm me autorizimin e institucionit përkatës.

Komuna e Klinës vlerëson se Liqeni i Sferkës duhet të ruhet dhe të trajtohet si një hapësirë me potencial për zhvillimin e turizmit dhe si një atraksion për qytetarët.

Komuna e Klinës mbetet e përkushtuar për transparencë dhe për informim të drejtë të qytetarëve për çdo çështje që lidhet me interesin publik.

Bëhen homazhe në nderim të dëshmorëve të kombit në kuadër të Epopesë së UÇK-së

Në kuadër të aktiviteteve për shënimin e Epopeja e UÇK-së, kryetari i komunës, Zenun Elezaj, bashkë me bashkëpunëtorë të komunës, përfaqësues të Organizata e Veteranëve të Luftës së Ushtrisë Çlirimtare të Kosovës dhe veteranë të luftës, bënë homazhe në nderim të dëshmorëve të kombit.

Homazhet u zhvilluan te shtatorja e komandantit “Kapuçit”, Mujë Krasniqi, si dhe në Kompleksin Memorial “Kodra e Kuqe”, te varrezat e dëshmorëve në Grabanicë.

Epopeja e UÇK-së përfaqëson një nga ngjarjet më të rëndësishme të historisë sonë kombëtare dhe një dëshmi të guximit, sakrificës dhe vendosmërisë së popullit shqiptar për liri. Rënia heroike e komandantit legjendar Adem Jashari u shndërrua në thirrje për qëndresë dhe mobilizim të përgjithshëm për çlirimin e vendit.

Sakrifica e dëshmorëve mbetet themel i lirisë dhe shtetit tonë. Nderimi dhe kujtimi për ta mbetet obligim i përhershëm institucional dhe qytetar.

Lavdi e përjetshme dëshmorëve të kombit!

Kryetari Elezaj priti në takim Komandantin e Komandës Rajonale Perëndimore të KFOR-it, Kolonel Federico Mora

Kryetari i Komunës së Klinës, Zenun Elezaj, priti në takim Komandantin e Komandës Rajonale Perëndimore të KFOR-it, Kolonel Federico Mora. Në këtë takim ishte i pranishëm edhe Komandanti i Stacionit të Policisë në Klinë, Kapiten Enis Lluka.

Gjatë takimit, kryetari Elezaj shprehu mirënjohjen e Komunës së Klinës për mbështetjen dhe ndihmën e vazhdueshme që KFOR-i u ofron institucioneve lokale dhe qytetarëve. Ai theksoi se qytetarët e Kosovës do të jenë gjithmonë mirënjohës për kontributin e NATO për Kosovën në rrugën drejt lirisë dhe paqes.

Në takim u diskutua për zhvillimet aktuale në komunën e Klinës, projektet që janë në realizim e sipër, si dhe për projektet që pritet të fillojnë së shpejti. Kryetari Elezaj gjithashtu informoi Kolonel Morën për sfidat me të cilat përballet komuna si institucion lokal.

Gjatë bisedës u theksua edhe roli i rëndësishëm i KFOR-it, i cili përveç kontributit në ruajtjen e sigurisë, mbështet komunën edhe përmes projekteve të ndryshme, veçanërisht në fushën e arsimit dhe shëndetësisë.

Në fund të takimit, palët u pajtuan që bashkëpunimi i mirë ndërmjet Komunës së Klinës dhe KFOR-it të vazhdojë edhe në të ardhmen, me qëllim të realizimit të projekteve që sjellin përfitime për qytetarët.

Komuna e Klinës dhe PREDA Plus nënshkruajnë Memorandum për fuqizimin e grave sipërmarrëse

Kryetari i Komunës së Klinës, Zenun Elezaj, së bashku me drejtorin e Qendrës për Punë Sociale, Ilir Bacaj, kanë pritur në takim drejtorin e projektit në PREDA Plus, Valentin Hoxha, me të cilin u nënshkrua Memorandumi i Bashkëpunimit për realizimin e projektit “E ARDHMJA E SAJ, Fuqizimi i Grave Sipërmarrëse në Kosovë”.

Kryetari Elezaj falënderoi z. Hoxha për nënshkrimin e këtij Memorandumi të Bashkëpunimit dhe theksoi se Komuna e Klinës mbetet e përkushtuar për të mbështetur iniciativa që synojnë aftësimin dhe zhvillimin ekonomik të qytetarëve, si dhe do të përmbushë me përgjegjësi të gjitha obligimet që rrjedhin nga kjo marrëveshje bashkëpunimi.

Ky projekt ka për qëllim aftësimin dhe ofrimin e pajisjeve për bizneset e reja në pronësi të grave, duke kontribuar drejtpërdrejt në rritjen e pjesëmarrjes së grave në jetën ekonomike.

Projekti financohet nga Ministria Gjermane për Bashkëpunim Ekonomik dhe Zhvillim (BMZ), zbatohet nga organizata joqeveritare PREDA Plus, në partneritet me WEntrepreneur dhe me mbështetjen e Arbeiter Samariter Bund (ASB) Köln.
Përmes këtij bashkëpunimi synohet fuqizimi i grave në Kosovë përmes zhvillimit të aftësive të tyre në biznes, krijimit të rrjeteve mbështetëse dhe promovimit të një mjedisi të favorshëm për ndërmarrësinë e grave.

Projekti përfshin planifikim strategjik, ngritje kapacitetesh dhe krijimin e hapësirave të dedikuara ku gratë sipërmarrëse mund të lidhen, të mësojnë dhe të zhvillojnë bizneset e tyre, duke kontribuar në barazinë gjinore dhe zhvillimin e qëndrueshëm ekonomik.

28 vite nga Epopeja e Ushtrisë Çlirimtare të Kosovës

Me rastin e 28 vjetorit të Epopesë së Ushtrisë Çlirimtare të Kosovës, Komuna e Klinës organizon homazhe në nderim të dëshmorëve dhe martirëve të kombit.

Epopeja e Ushtrisë Çlirimtare të Kosovës më 5, 6 dhe 7 mars 1998, rënia heroike e komandantit legjendar Adem Jashari dhe familjes Jashari, mbetet një nga ngjarjet më të rëndësishme të historisë sonë të re, duke simbolizuar qëndresën, heroizmin dhe sakrificën për liri.

Më 5 mars

Ora e parë mësimore në të gjitha shkollat e Komunës së Klinës i kushtohet Epopesë së UÇK-së

Homazhet do të bëhen të premten, më 6 mars.

09:30 - Homazhe pranë shtatores së Mujë Krasniqi - Komandant Kapuçit, në Klinë.

09:45 - Homazhe në Kompleksin Memorial “Kodra e Kuqe”, te varrezat e dëshmorëve në Grabanicë.

Ftojmë qytetarët të marrin pjesë.

Lavdi e përjetshme!