https://www.facebook.com/125016260691623/

Kilar Novels

Home
Zimbabwe
Harare
Kilar Novels

Call Directions Contact the organization

Kudzidza pamwe nekutandara tichiverenga zvedu mabhuku eshona (edutainment through reading)

18/08/2026

PRECIOUS - CHITSAUKO 3

https://chat.whatsapp.com/KLN7FBL0ElIBj3arzX9t4y?s=cl&p=a&ilr=4

By Clarence Mandisodza

0775874868

Nenguva dzesere chikwata chakange chasvika mubhawa rekwaMhishi kuMufakose. Vakange vaenda vari vatatu; Moreblessing uyo aidanwa nevamwe vake kuti Mobhi, Colin uyo aidanwa nevamwe vake kuti Kodza pamwe naDarlington uyo aidanwa kuti Dhadza. Mumwe nemumwe akanogara kwake, Mobhi achinge akapfeka zvekukwezva varume.
Hapana kupedza nguva asati asvikirwa nemumwewo murume ainge akapera nedoro achinetsekana nekufamba zvese nekumira. Ainge akabata kadoro kemubhotoro replastic kainge kakanyorwa kuti Vinyo. Achingogara padivi paMobhi, akabva aisa ruoko rwake muhuro maMobhi uyo akabva arwuvhizura achirwukanda kwakadaro uko. Hapana kupera nguva, Kodza akabva asvika akabata bhotoro reZambezi ndokusvikosimudza murume uya.
“Iwe ibva pano. Uri kuona iri type yako here iyi?” Akabvunza osairira murume uya kwakadaro uko ndokubva asvikonyondera pasi nemuromo.
Pakarepo Dhadza uyo ainge ambobuda akabva angodzoka achifambisa ndokusvikotaura nezwi rakaderera kwazvo kunyangwe zvazvo maive neruzha rwemhanzi. Vari vaviri, Dhadza naKodza vakabva vanogara kure naMobhi. Mushure memaminitsi angangoita matatu, makapinda hwitakwi yerume yainge yakabata makii emotokari muruoko rwerudyi. Yakabva yangonanga kukaunda kunotenga doro.
Akabvapo achinge abata doro rerudzi rweHeineken ndokutsvaga pekugara. Ndidzo nguva dzakabva dzasimuka Mobhi ndokunanga kwaari. Akasvikogara mberi kwemurume uyu ndokuita zvekunge atarisana naye. Achangoti garei, pakasvikawo mumwe mudzimai airatidza kuti akange agara kwazvo mubasa rechipfambi iri.
“This is my territory, get lost.” Akadaro mudzimai uya achidhonza wigi yaMobhi uyo akabva abata mudzimai uya ruoko pakarepo nekubva ada kurwuruma.
Pasina murume uya akange avingwa nevaviri ava akazochimbidza kubata, pangadai pakarwiwa. Yakazongosara yave hondo yemazwi mudzimai uya ndokubuda achiti ainoshevedza mamonya ake. Kodza naDarlington nekuziva kuti nzvimbo yavaive yaisave yekutamba nayo, vakachimbidza kutevera mudzimai uya ndokubva mumwe wavo atanga kutaura naye. Ko, akange achada kuendepi iye akange aona mhene yake?
Akaendwa naye naKodza panzvimbo yakavanzika asi Kodza achikwanisa kuona zvaiitika kumusuwo webhawa ndokutanga kutaurirana variko. Darlington ainge adzokera kunomira pamusuwo webhawa achiongorora zvaiitika kuna Mobhi uyo akange otaura nemurume uya vachiratidza kuwirirana chose.
Murume uya akasimuka oenda kuchimbuzi achisiya apa Mobhi mari yekunotenga rimwe doro. Zvakange zvarerukira gurokuro kuripa nederere, Mobhi akabva patafura iyi nemakii emotokari yemurume uyu ayo aainge asiya padivi nebhotoro redoro rake iro raakange apedza. Kuenda kwaakaita kuchimbuzi, Dhadza akabva angoteverawo. Akaendako achiburitsa kamwe kabhotoro kaiita seperfume iya yekupfapfaidza pamwe nekachira kaakatora muhomwe yekumashure.
Akapinda muchimbuzi ndokuona musina vamwe vanhu nokudaro akabva angopfapfaidza mushonga wake pakachira kaya ndokusvikovhara murume uya nekachira kaye pamhuno. Murume wacho akamboda kukakaritsa asi kufemera mukati kwaakaita akabva anzwa kupera simba ndiye rukutu. Dhadza haana kutambisa nguva, akabva angosecha homwe dzemurume uya pamwe nekutora serefoni dzake mbiri.
Achibuda, akabva ananga kumotokari yemurume uya uko akasvikowana Mobhi naKodza vatomumirira kare. Hapana akataura nemumwe, Dhadza akangovasimudzira makii emotokari yemurume uya Kodza ndokubva atonanga kumotokari yavainge vauya nayo achisiya vaviri ava vachipindawo muIsuzu KB yemurume uya. Vakabva vangoti hutu kuenda kumunda waichengeterwa mombe dzekanzuru kuBudiriro, pedyo nedzimba dzeCabs. Vakashandisa kamushini kavo kuona kuti mota iyi yakange isina tracker here.
Mushure mekugutsikana, vakatyaira vakananga kuWaterfalls mushure mekunge vazivisa Precious kuti vakange vouya. Vakange vaine chokwadi chekuti hapana aivatevera. Mobhi naDhadza vakafamba vachikurukura zvavo dzimwe nyaya dzisinei nekuba kwavakange vaita motokari. Vakange vachiziva kuti vachazongonoitaura mberi vamwe vavo vachinzwa kunyanya voudza Precious mafambiro avainge vaita.
Munzira imomo Dhadza akange asimudzira nyaya yake yaaisigaronetsera Mobhi. “Saka Moreblessing wakatozondiramba shuwa?” Akange atanga nekudaro mushure mekunge vatyaira chinhambwe kubva pavainge vatarisa tracker.
“Darlington unoda kundiuraisa nemukadzi wako?”
“Handina mukadzi Mobhi…”
“Zvandataura wazvinzwa Dhadza. Iwewe ita zvaPrecious wako. Unoona zvichiita here kudanana nemunhu wamadam boss?”
“Paye ndipo pasina kana rudo, kungoitisana. Zviri zverudo chaizvo, moyo wangu uri panewe shamwari. Musi weSunday uya ndakanzwa jealousy kukuona uina Skimbo. He doesn’t deserve you shamwari. Hauna kuona kuti paya ndakazoguma ndangonyarara?”
“Skimbo ndiye mufesi wangu, saka waonaka kuti zvaurikutaura hazviiti? Iwewe ita zveDeacones.” Akabva aseka zvake zviya zvekushora hudeacones hwacho.
“Saka wati todii shamwari nekuti ini ndiri kutokuda…”
“Hezvo! Ndezvenharo here? Ini handikudi Darlington, ita zvaBoss P ini wondisiyawo naSkimbo wangu.”
“Saka uri kundirambira Precious here?”
“Iwe uri kuona zvichiita here? Indava uchida kutikuvadzisa?”
“Saka uri kundirambira Precious here?” Darlington akadzokorodza zvakare mubvunzo wake.
“"Whatever zvawafunga Dhadza." Mobhi akataura achitarisa kudivi uku achipetera maoko ake pachipfuva chake kunge munhu ari kupindwa nechando.
"Manje ukasaita wangu hakuna mumwe munhu anodanana newe..."
"Iwe unotorwara chete. Ndezveforce here? And let me warn you, pakangowana chaitika kuna Skimbo chete hokoyo."
"Ugondiitei manje?"
Mobhi akabva angosona muromo wake Dhadza ndokusara achingoropodza zvisina maturo. Motokari yacho akange otyaira zvehasha. Yakatombodzima kaviri kose pamarobhotsi. Kusvika pavakaita pagedhi rakabva rangozarukawo zvekuti havana kana kumbomira kana kudzora mamhanyiro avo. Yakadarikira ndokunopinda mugaraji muya makange mambotorwa motokari naDhadza zuva riya raakange anotenga doro nenyama zvemhemberero dzehudeacones hwaPrecious. Pakarepo yakabva yatanga kushandwa ichibviswa pendi.
Vaizoti kana vapedza zvependi izvi, vaibva vachinja zvimwe zvinhu zvingangodaro zvichizoratidza kuti imotokari yanhingi. Mamwe mapatsi acho vaitonorasa. Vaizogumisira nekuipenda zvakare nerumwe rwuvara.
KuMabelreign kwaivewo nezvako zvaikunda ngoma yeZion kurira. Skimbo, Best naNoma vaivewo mukabhawa kanonzi Lig ako kaiwanikwa paMabelreign Shops chaipo. Ndiwo wakange uri muitiro wechikwata ichi icho chaizvidana nezita rekuti 'A Team'. Vaiti kana voenda kunoba motokari, kwavaidaidza kuti operation, vairova mbiri. Vaipatsanurana kuti rimwe boka kudivi uku, rimwe uku. Chikwata chaana Mobhi chaishevedzwa kuti MKD, zvichimirira kuti Mobhi, Kodza, Dhadza. Chepiri chaizivikanwa nezita rekuti NBS, Noma, Best naSkimbo. Zvaibva zvaita kunge zita rebhanga reNational Building Society.
Noma akange atorwa nerimwe zirume mubhawa makare ndokubva vangopinda vose mumotokari pamwe nekuenda kumba kwake. Skimbo naBest vakateverawo vari mumotokari yavo yerudzi rweBMW. Kuburikidza naNoma uyo aitaura naBest kuburikidza newhatsapp, vakange votoziva mamiriro kwavaienda vasati vatombosvikako. Kana iye ainge azvibatira husavi hwake hwechirariro, akange azvisasika kuburikidza nenhaurirano yaainge akwezverwa mairi.
"I hope kumba kwako hakuna munhu shamwari nekuti ini zvekunetsana nemukadzi wako no." Noma akange adaro nerurimi rwainzwika kuti aive muNdebele.
Murume uya akaseka zvake zvichiratidza kuti hwakange hwotanga kutonga mumusoro. Pashure akati, "Judith. Judy haako uyo. Ndakamuendesa kumasungiro. Unogona kutombogara zvako neni kana kweweek rese..."
"Hahada! Ndisiye zvangu ini. Unokwanisa kundibhadhara iwe?"
“Unomboziva kuti ndine gold mine here iwe? Just name your price."
"What's your offer? Ndione kuti value yaunondipa yakaita sei."
"Ini ndirikuda kuzivawo value yaunozvipa. Kana ukati ndisvike ndichikupa ndinotokupa. Asi why would a very beautiful lady like you do this kind of a job?"
“Chimbomira kundipindira mumunda mangu. Ngatipedzei deal redu iri. Ndinenge ndichida cash."
"That's not a problem, cash ndiyo yandinotogara nayo nekuti mazuvano kuisa mari kubank zvakafanana nekusungirira mari pagumbo reshumba. Unomuka yave 1 as to 1 nezig." Pakarepo akabva aridza tsamwa chiratidzo chekuti mari yake yakambosangana nazvo.
"Yuwi. Hautye kupindirwa nematsotsi?"
“Matsotsi? I have security cameras everywhere. Plus mira uone..." akabva atora kapfuti kake pasi pesiti raainge agere. Akaenderera mberi, "Plus this."
Nomalanga semunhu akange ajaira kubata pfuti pamwe nekutoishandisa kunyanya mazuva aakambogara Joni, akangonyeberawo kuvhunduka pamwe nekuratidza kutya.
Vakazosvika kumba otoziva kuti kwaigara garden boy, musikana webasa akange akaenda nemudzimai wake kwavatezvara vake, imba yake yaive nemipanda mingani uye akange aine motokari ngani. Chisina kutaurwa hwaive huwandu hwemari yaive mumba uye kuti inogara pai. Noma akange asina kuda kuzvibvunza, zvaizoita kuti murume uyu anyumwe. Akasvikawo kumba oziva zita remurume uyu, Amos.
Avawo Skimbo naBest vaingovewo shure kwemotokari iyi vachinge vari nechekure. Noma ainyanya kutaudza Amos kuti asacherechedze kuti kune motokari yaivatevera. Vakatsauka mumugwagwa Warbury Avenue ndokupinda muna12th Avenue. Vakasvika pamba pairatidza kuti zvedi murume uyu akange aine mari dzake. Nguva dzakange dzodokwairira kusvika pana12 wepakati pehusiku. Gedhi rake akange avhura nerumoti sezvo aiti akange asingachadi kumutsa garden boy wake.
"Ini kutaura chokwadi ndine nzara. I think kuti ndiwane simba ndirikuda kutanga ndadya something plus freshening up. Kuneiko kukicheni kwako?" Akadaro Noma.
"Ende uri active wena. Ini ndafunga kuti ndichagocha nekubva ndarova kasadza asi ndabva ndazosangana nefull package." Akapedza kutaura achirova Noma magadziko pamwe nekumapuruzira.
Noma wacho akabva amonera maoko ake ose mumutsipa waAmos ndokumutsvoda padama. "Let me prepare something quickly iwe uchimbogeza nhaika?"
Kutaura kwavo ndiko kwakaitika. Amos akabvisa tirauzi rake ndokusara nekakabudura ogadzirira kupinda muimba yekugezera iyo yainge yakabatanidzwa nebhedhuru rake hombe. Noma haana kure kwaainge aenda, ainge angobuda mubhedhuru nekunomira pedyo nemusuwo. Zvaakanzwa mvura yozarurwa akabva adzokamo ndokusvikonyamura tarauzi riya.
"Zvauriwe unonoke imomo. I just want to ask kuti ndongoisa kasadza neroasted beef here or uri kuda nebeef stew?

17/08/2026

PRECIOUS

By Clarence Mandisodza

0775874868

https://chat.whatsapp.com/KLN7FBL0ElIBj3arzX9t4y?s=cl&p=a&ilr=4

CHITSAUKO 2

Zuva raitevera racho Precious akamukira rungwana-ngwana kunomutsa vana. Akavapa mabasa ekuita ndokuchinogeza zvake achinge ogadzirira kuenda kukereke kwake makare muWaterfalls. Mabasa akasiirwa vana aisanganisira kutsvaira yadhi yose ichisara isina kana karara zvako, kudiridzira maruva, kusuka midziyo yaive kuimba huru. Yakange yave nesvondo rose isina kusukwa nokudaro yakange yakawanda kwazvo. Chimwezve chaida kuitwa kwaive kuwacha nhumbi nemagumbeze izvo zvavakasiya vaburitsirwa panze pamwe nesipo yacho.
Mushure mekunge ageza, Precious akatora nguva yake achipoda-poda chiso chake pamwe nekutsvaga nhumbi dzakanaka kwazvo sezvo ariye aiparidza zuva iri. Zvakatiwo zvakare zuva rimwechete iri raive nesarudzo dzevatungamiriri vekereke nokudaro aifanira kuona kuti apfeka zvakanaka. Zvedi, mucheno akaudema zvekusara achiita sekunge akazvarwa akapfeka sutu yeblue yaakange asarudza pazhinji dzaaive nadzo. Akabva aroverera pulling socks ndokupfeka shangu dzerudzi rwemaPams idzo dzaaizobvisa zvake kana achinge odzika mumotokari kana achinge asvika kukereke.
Akarongedza shangu dzake dzezvidodoma muchikweshe, dzaive neruvara rwumwechete nesutu yake. Kana iri perfume hatichatauri, akapfapfaidza yacho yaidhura pane dzose. Iyi aiti kana achinge asvika pane vane dzisina kusimba, dzaikundwa simba. Kana mumba maaizobuda, maisara muchinhuhwirira kusvika mwene wayo adzoka. Mhete akaisa zvakare dzaidondana nesutu, dzakange dziri dzeruvara rwesirivha dzichinge dziri dzedenderedzwa.
Achipedza chikamu chekupfeka ichi, akanozviringa pagirazi ndokugadzirisa maida kugadzirwa pashure ndokubuda. Akapinda mukicheni ndokupimira shuga mumakomichi maviri esimbi pamwe nemukaka wacho. Akadonhedzera tea bag rimwe rimwe mukomichi yega yega. Akatora chingwa chaive mubread bin ndokutora flask iyo yaive nemvura yakange yave nemazuva mana irimo. Zvose izvi akazvitakura ndokunozvisiya pamusuwo wemba yakange yarara Shingirirai naTsungirirai.
Akaenda kwaive naTsungirirai uko aigeza magumbeze ndokumuudza paakange asiya chikafu chavo. Akakiya magonhi ake ndokubuda kuenda kuchechi. Akatyaira uku mhanzi yerumbidzo ichidandaurwa neruzha rwaive pamusorosoro zvekuti kana dai aizorodzirwa bhero neimwe motokari, aisarinzwa. Zvakamutorera maminitsi angangoita gumi kuti asvike pachechi. Haana kuchimbidza kuburuka, akatanga azviringa-ringa pakagirazi kaainge aburitsa mukabhegi kake ndokuchizozora lipstick tsvuku pamuromo. Pedze'zvo, akapfeka shangu dzake dzezvidodoma dziya ndokuchizoburuka mumotokari okwazisana nevamwe.
"Yowe. Kuchena here uku Precious?" Uyu ndemumwe mudzimai ainzi amai Magube akataura achimbundirana naPrecious wacho.
Precious wacho akapindura achizvirumbidza, "Zvitsva here izvi nhai vasikana? Inga munoziva kuti kuchena ndiyo weakness yangu," pakarepo vakarovana maoko ndokuridza chikwe-e sevanhu vakange vapedza kumbundirana.
"Otherwise?"
“So so a'sikana. Ndakadzoka nezuro manheru, munoti kuneta here kwandakaita ikoko?"
“Tinotenda kana makatibatira basa zvakanaka."
"Zvakafamba zvakanaka shamwari. Ndakatozouya nevazukuru vangu, ndikati pachada kutsvagwa mumwe musarapavana upi ini ndiripo?"
“Ende wakagona mufunge. Mwari havambotadzi kukurangarira mudikani..."
"Amen!" akadaro Precious achinge agurisira amai Magube kutaura kwavo.
Pakasvikawo mamwe madzimai ndokukwazisana pamwe nekukurukura nyaya dzakasiyana-siyana kusanganisira sarudzo dzaida kuitwa mukereke zuva iri.
"A'sikana ndinovimba kuti makagadzirira kuita Deaconess. Ende mabva mauya makadema mucheno kuratidza kuti matononokerwa." Uyu ndemumwe mudzimai wechidiki ainzi amai Tashinga.
"I am ever ready vasikana. Besides, mukasavhotera ini mungade kuvhotera ani wamunoona akakodzera?" Ipapo tuziso twaiboira-boira kakawandisa munguva pfupi.
"You can say that again dhiya. Mucheno unokiya, bango remota yako unayo..." Amai Magube vakadimburwa naamai Tashinga.
"Mota imwechete here? Ane fleet chaiyo uyu. Pamba pake ungati pacar sale."
Vakaridza chikwe-e uku vachirovana maoko. Ndidzo nguva dzakabva dzasvika VaNheweyeshindi vachiratidza kusafara. "Madzimai handimbodi kukunyeberai, zvamuri kuita izvi it's very wrong. Kuridza chikwe-e pachechi kunge muri pachibhorani ndiko kuita sei? Pano tauya kuzonamata, pindai muchechi."
Nekuda kwenyadzi dzainge dzakavhenganiswa nekusvotwa, vakapinda muchechi vachinge vozevezera vachinyomba VaNheweyeshindi. Precious akanogara kuchigaro chemberi chaicho kunyangwe zvazvo kwainge kusina mumwe munhu. Ichi chaive chigaro chemuparidzi wezuva iri. Veboka rePraise and Worship ndivo vakange vogadzirira zvinhu zvavo. Waingonzwa "1, 2, 1, 2," kuchinge kuri kuraira kuti microphone dzakange dzoshanda zvakanaka here.
Hazvina kutora nguva mukomana wemidimbwa asati atanga kuitekenya wanike mhanzi yatotanga. Ndidzo nguva dzakashevedzwa Precious muhofisi mamufundisi umo vakasvikonamata vasati vabuda kuti vanotangisa sevhisi yezuva iri. Hakuna kutambiswa nguva sezvo kwaive nehurongwa hwesarudzo nokudaro zvinhu zvacho zvaingonzi ga, ga, ga. Mharidzo yaPrecious ndiyo yakadarikidza nguva zvishoma asi yakapera vanhu vachirikuda kunzwa.
Achipedza, chechi yose yakati kwanyanu kusimuka vamwe ndokutanga kuombera nekuda kweshoko rakapfuma rakange rashumirwa naPrecious. Mushure, kwakave nechikamu chehealing and deliverance icho Precious akabatsirawo mufundisi wake, Pastor Tom, Deacon Reuben, Deacones Maidei pamwe naElder Nheweyeshindi. Pane vapfumbamwe vakanamatirwa naPrecious, hakuna kana mumwechete zvake akanetsa. Kwevamwe uku waizongonzwa yave hondo nemadhimoni.
Kupera kwechikamu ichi, kwakatorwa mupiro wezuva iri ndokubva sarudzo dzatanga. Mazita akange akaiswa padivi kare neNominations Committee zvichienderana nenzvimbo dzaida vanhu. Committee iyi yakange iine vanhu vatanhatu avo vaisimudza mazita pamwe nekumanzvera vachiona kana vene vacho vainge vakakodzera kupinda muzvigaro zvacho. Vakafamba sekudai, vanenge vaine mazita adaidzwa kuve mutungamiri wecommittee, vaipinda muhofisi yaive padivi neyamufundisi vanhu vosara vachivhota. Kana chikamu chavo chapera, vaibva vashevedzwa vodzoka muchechi. Zvimwechete zvakaitwa pakusarudza Deacones.
Chikamu chesarudzo chichipera, marizautsi akataurwa mukereke mukave nenguva yekufarwa. Precious akange ave Deacones. Vatungamiri vatsva ava vakanamatirwa namufundisi ndokuzosara zvakapera sevhisi.
Nerimwe divi, zvakasara Shingirirai naTsungirirai vakaita basa ravo pasina nyaya zhinji sezvo mumwe nemumwe aishandira pake. Murume uya wavakaona aripo zuro madeko vakange vachigere kumuona. Kupedza kwakaita Shingirirai basa rake, akanobatsira Tsungirirai kuwacha magumbeze, nhumbi akanga apedza zvake. Apa ndipo pakange potsva nyaya manje zvichinge zvatanga naShingirirai.
"Tsungi, pano hapagariki kana nepadiki pose. Wazviona-ka kuti tete vako vakatitora kuti vagotishandisa chete? Izvezvi hona kwatakaradzikwa iye munhu aine imba yakakura kudai, kutiradzika mustoreroom vane chokwadi?" Ipapo Shingirirai ainge ambomira kutsika-tsika magumbeze.
"Hezvo! Zvaunenge wave kutondipopotera, ndini ndadiiwo ini?"
“Ndiwe waiti munhu bho. Waonaka kuti muroyi chaiye..."
"Iiii iwe Shingi. Bata muromo wako, chii chakaipa kuwacha magumbeze nehembe pamwe nekutsvaira yadhi? Inga tagara taizviita wani kumusha."
"Horaiti, kana iwewe uchivatsigira, wamboona here chikafu chatasiirwa? Kuita kupimirwa."
"Pamwe munhu anenge asinawo..."
"Tsungi problem yako ndeyekuda kuzoyeuka bako wanaiwa kare. Zvinhu zviri pachena kudai ndizvo zvauri kuda kumiririra. Wakanzwa rough yawakadirwa here pawakabvunza zvembwa?"
“Ngatichisiyai nyaya iyoyo. Pano hatizivi kuti pane vanhu here kana kuti kwete. Rega timboona mumazuva arikutevera kuti zvinenge zvakamira sei."
Vakaenderera mberi nebasa vachinge votaura nyaya dzakasiyana-siyana. Vachipedza, vakananika magumbeze pamwe nembatya dzose ndokuchizoguma nekusuka midziyo. Vaiita mubatira pamwe sezvo vaisada kusvikirwa vasina basa ravanenge vasina kupedza. Mushure mekunge vapedza basa rese, vakawana nguva yekudya ndokusuka midziyo yavo. Vakazove nenguva yekutenderera yadhi vachiona kukura kwayo.
Imbwa dzainge dzakavharirwa. Kwaivewo nechimwe chivakwa chaive nezigedhi raisaonesa zvemukati. Vakave nefungidziro yekuti pamwe ndimo maigara motokari yatete vavo asi chainge chakakurisa kuti chigare motokari imwechete. Kuseri kwaive nebindu guru kwazvo asi risingashandiswi. Imbwa dzainge dzichakavharirwa, vakatozonzwa dzokuhukura zvavakadarika nepo. Chinguvana, vakanzwa musuwo wekuimba huru wovhurwa ndokubva vananga ikoko.
Akange ari mumwe murume akange apfeka jinhi pamwe neshati yaive nemaoko mapfupi ichinge iri nhema. Kumeso ainge akapfeka magirazi ainge aine husviba husina kunyanya. Vakakwazisana ndokubva angoraira vana ava kuti aidzoka munguva pfupi yaitevera. Akange ataura achiisa kii muhomwe. Akanovhura imba iya yakange yafungirwa kuti inogara motokari. Imomo akatora motokari duku ndokubuda nayo achityaira. Akaimisa ndokubudamo odzokera kunovhara gedhi riya pamwe nekurikiya. Shingirirai naTsungirirai vakange vaonawo mumupanda makange mavhurwa umu muchiratidza kuti maive nedzimwe motokari.
Vana vakasara ndokupinda mumupanda mavo pamwe nekumborara sezvo vakaita zvekunyangirwa nehope vari mukutaura nyaya. Vakatozoita zvekumutswa natete vavo avo vakangopopota zvishoma ndokuchitanga kutaura zvakanaka.
"Handei kumba, ndine vaenzi saka movakwazisawo zvakanaka, nhaika?" Akadaro Precious nezwi rakaisvonaka.
Vazukuru vakagutsurira musoro ndokubva vatevera tete vavo. Vakasvika kumusuwo kuine vanhu vatanhatu, varume vachinge vari vatatu. Shingirirai naTsungirirai vakakwazisa vanhu vose ndokubva vapinda mumba vose. Imomo Precious akazivisa vazukuru vake kuvanhu vose ava. Kuvazukuru, vanhu vake akavazivisa kamwechete seshamwari dzake. Hapana kupedza nguva, murume uya ainge abuda nemotokari akadzoka ndokupinda nemakireti edoro. Nyama yakange yanotengwawo yakawanda kwazvo.
Moto wakatanga kukuhwidzwa kuma6, kunze kuchinge kwatanga kushevedza rima rekubatidza mwenje. Kubva zvainge zvauya shamwari dzaPrecious, aituma vazukuru vake zvakanaka kwazvo. Yaingove, "Shingi muzukuru wangu, tora chakati." "Tsungi mwana'ngu, chakati." Pakazonakidza munyori ndepakanzi, "Kana magumbeze asina kuoma musazvinetse vazukuru vangu, anorarapo. Hapana anombomaba. Munoziva a'sikana vana ava vawacha magumbeze ese mufunge. Washeni yese vakageza apa ndaiti ndichatsvaga munhu achawacha." Kuita sekunge aive mado evana kugeza magumbeze nembatya.
Pakazove nemufaro mukuru kwazvo vanhu vachinge vave panze. Ipapo munhu wese ainge akabata bhotoro redoro rake rake uku nyama ichigosvopwa pamabraai stands. Yaiti kubaiwa nemafoku, kutsva nemarasha, kutsengwa ichapisa kudaro. Zvaitengewo kwakange kwauya vamwe vanhu vatsva kusiyana nevakange vasvika nguva dzemasikati. Mapfekero akange atosiyana. Madzimai apfeka zvaisiya nyama zhinji panze uku mumwe nemumwe achinge aine munhurume wake. Precious akange aine murume uya akange atora motokari achizobuda kunotsvaga doro nenyama.
"Pamusoroi! Pamusoroi!" iri izwi remumwe murume rakanzwika kudaro vanhu vose ndokubva vangoti mwiro ukuwo mhanzi yakabva yangodzikisirwa ruzha kusara rwave pasi pasi.
Izwi riya rakanzwika naShingirirai naTsungirirai roenderera mberi. Panguva idzi vaive kwavo voga kwavainge vagere zvavo vachidyawo nyama iyo yavaipota vachishevedzerwa natete vavo kuti vauye kuzotora. Apa vakange vodya nesadza pamwe magaka, hanyanisi pamwe nemadomasi mambishi zvavakange vachangobva kupihwa. Madhiringi vaimwa emubhotoro ayo ainge angotengwa kireti rimwechete bedzi
"Today we are celebrating a great milestone. Sisi vedu is now a Deacones..." Pakarepo pakaridzwa mhururu nemiridzo uku vamwe vachikwatidza maoko kuombera.
Mushure mekunge ruzha rwaserera, izwi riya rakaenderera mberi. "To our big sister Precious, we say congratulations. You are a great leader and we never doubt that you will excel in your new position. I think everyone here can testify that she is indeed a great leader, tiri kungozviona neboka redu rino. Nekudaro, as a group, tiri kuti congratulations Deacones Precious. Kindly accept our little gift..." akaguma nekutaura achitambidza Precious makii emotokari.
Mushure mekunge vanhu vaombera, Precious akanzwika kutaura. "Thank you very much my team. Kutaura chokwadi I never expected this from you. This was my dream car..." akabva ambomira kutaura achinge ochema. Akaenderera mberi, “Without you team I don't think I will be a great leader as you were saying. You are a great team and I am proud of you. Let's continue with the celebrations, nhasi hakuna anoenda kumba."
Pakarepo mhanzi yakabva yatanga kudandaurwa mafaro ndokuchienderera mberi sekutaura kwaPrecious. Kwakatambwa zvekunge zviuno nemakumbo zvichatyoka. Vana ndivo vakazorairwa kuti vanorara zvavo mune mumwe mupanda muimba huru. Sevanhu vakange vaneta nemabasa ezuva iri, hope hadzina kunetsa kuvabasa.

17/08/2026

PRECIOUS

BY CLARENCE MANDISODZA

0775874868

https://chat.whatsapp.com/KLN7FBL0ElIBj3arzX9t4y?s=cl&p=a&ilr=4

MUNONGEDZO
Chembere masikati, husiku yodzoka zvayo kuve mvana. Imvura yegungwa, kuiona pamusoro payo woti heyo imbwa nyoro. Izvo kwaaniko? Pasi yakasenga zvikukutu; zvinonyudza, zvinokuvadza nezvinouraya. Wenge mushandirapamwe semajuru, kunge tsitsi nemoyochena, izvo hwi! Unotova mushaishirapamwe gomarara reitsvo neshuramatongo kudokwairira kusvitsa vatenzi kumasidzokwi.

CHITSAUKO 1

Vanhu vazhinji vakakwatidza maoko, madzimai achikwetsenura mhururu ukuwo mheterwa kubva kuvarume dzichidavirira nemakomo aive pedyo. Vana Jenamurebvu nanaSorojena ndivo vaionekwa kusimudza tsvimbo dzavo mudenga vachireva mazwi ekurumbidza. Waingonzwa, "Ndiko kugona kwawaita uku Pure," "Vana vanga vasarira nhamo ava," "Wayamura mweya waMwari," "Wagona!" "Ndizvo!" Vamwe vaitoita zvekukwamatata. VanaDzvatsva ndivo vakange vohukurawo sekunge vaiziva zvaitora nzvimbo, waingonzwa makomo kudavira. Zvimwe zvose zvakasara zvoitwa hazvo asi vazhinji vakange vafara kuti nherera dzakange dzawana muchengeti.
Baba vaShingirai naTsungirirai vakange vovavarira kusvitsa makore masere vashaya nekuda kwetsaona yemumugwagwa zvavaienda kubasa. Panguva idzi mapatya avo, Shingirai naTsungirirai vakange vave nemakore mashanu bedzi vaberekwa. Vakasara vachichengetwa naamai vavo avo vakaedza chose nepavaikwanisa napo kuriritira vana ava.
Sevanhu vaive nenzvimbo yekurima vachiita zvekudiridzira kana usiri mwaka wekunaya, vaiwana mari kubva muzvirimwa zvavo gore rose. Vana ava vakange vadzidziswawo zvekurima izvi kubva dzichiri ndumurwa chaidzo nokudaro zvakange zvapinda muropa. Kuchikoro kwacho vaive sharapura chaidzo, hapana aimisidzana navo mumakirasi avo.
Zvakange zvatanga kurwara amai vavo, ndivo vakange voita basa rose repamusha. Vaimuka rungwana-ngwana machongwe achiita makundano ekutanga kukukurudza. Ipapo vainodiridzira miriwo kubindu, vodzoka voita mabasa epamba. Vakange vochinjana kuenda kuchikoro vachiitira kuti pawane anosara naamai vavo. Kunyangwe zvakadaro, kuchikoro kwacho havana kudzikira nekuti njere dzavo dzainge dzakapinza senariti. Vaizowana nguva yekuti zvinenge zvadzidza mumwe zuva rinenge risina kuenda mumwe, vaizodzidzisana.
Amai vavo vakaita chifo chemakore maviri vachirwara ndokuzoshaya vave nemakore gumi nemashanu. Hanzvadzi yababa vavo iyo yaigara kuHarare ndiyo yaipota ichiuya pano neapo kuzoona vana pamwe nemuroora kunyangwe zvazvo pasina betsero huru yaaipa kuhutano hwemuroora. Nhamo yese ndiye akachizomiramira kuona kuti zvizhinji zvaivepo uye zvafamba zvakanaka.
Zvino mashoko aakange ataura pakutsvagwa kwemusarapavana ndiwo akange akonzera mufaro wose waive nevanhu. "Vana vehanzvadzi yangu havangachengetwi nemumwe munhu ini ndiripo. Ndinoenda navo kuHarare vonodzidza ikoko..." Asina kumbopedza, vanhu vakafara kwazvo. Mushure, akaenderera mberi achiti, "Zvizhinji ticharonga nehama asi vazukuru vangu ndirikuenda navo nhasi chaiye." Achipedza akabva agara pasi uku achigadzirisa rimwe rebvudzi rake kuti rirege kuvhara ziso reruboshwe.
Chiri chokwadiwo, hurongwa hwakafambira mberi vanhu ndokuparadzana mushure mekunge nhumbi dzemufi dzagovewa. Kwakazosara vashoma vehukama avo vakange voda kupedzisa kuronga zvepamusha. Nyaya huru yaive pakuti musha woitwa sei? Imwe yakange iri yevana avo vakange voramba kuenda Harare natete vavo. Mushure mekugadzirisa nyaya idzi, vana vakarongedza nhumbi dzavo pamwe nemabhuku ekuchikoro ndokupinda mumotokari matete vavo avo vakange vazvipira kupota vachibhadhara imwe hama yavo yaigara mumana makare kuti agare pamusha achiuchengeta.
Vana vakarwadziwa zvavakange vodarika nepachikoro chavaidzidza, Tsonzo St Mathias. Ipapo vainge vagere kumasiti ekumashure. Vakaita nguva vakatarisa chikoro chavo ichi gume vazoita zvekuchicheukira. Vakasvika paWatsomba mota ndokubva yambomiswapo ndokusiya varairwa kuti vasabudamo. Tete vakaita nguva vasati vadzoka ndokuzodzoka vakabata zvekudyira-dyira nezvekunwira. Ivowo vainge vazvitengera zvavo.
Kubva apa, mota yakatsikwa mafuta wanike nenguva pfupi yatosvika paAfrica University. Haina kumira, yakarohwa dakara yasvika paChristmas Pass panova payakambozorodzwa. Vakadzika vose nevana ndokumbotorana mifananidzo vachingochinjana. Pamwe pacho tete vaibva vatora ari maSelfie chaiwo nevazukuru vavo. Mimwe yemifananidzo yacho yakabva yatoturikwa pamastatus ichinyorwa zvakasiyana-siyana. Mushure memaminitsi angangoita gumi, mota yakarohwa yakananga maMutare, muSakubva, mushure mekunge vafonera mumwe munhu vachimuzivisa kuti vakange vosimuka kubva paChristmas Pass.
Vakasvika pamba pemunhu wacho uyo akabva angouya kuzovatambira kugedhi. Raive zirume raive nemazindebvu uku musoro uchinge uine muparavara. Akasvikira kudivi Precious uyo akange atodzika kare. Vakambundirana akange otoda kumutsvoda asi akabva aramba. Vakapinda mugedhi vachisiya vazivisa vana kuti varikudzoka manje-manje. Kwakaenda imbwa ndiko kwakaenda tsuro. Kuenda kwavo kwakaita kuti vana vasare vachinyatsotaura nemazwi, kubva zvavainge vabva kumusha nguva zhinji vaingunotaura nemaziso.
Shingirirai ndiye akatanga, "Tete vako ava, pane basa."
"Nditete vakowo zvakare, magame anenge akawandisa asi munhu bho manje." Tsungirirai akapindurawo.
"Munhu bho pakudii? Vakadii kurapisawo amai vedu?"
“Pamwe munhu anenge asinawo mari..."
“Iweka! Kuzofa kwakaita amai ndiko kuzowanikawo kwemari?"
“Iii, ungatongera munhu mari yake here?"
“Izvezvi vave kuda kutiendesa kuchikoro nhasi, pese apa vaivepi?"
"Ndizvo zvandati hatingatongeri munhu mari yake. Isu kana tada kuendeswa kuchikoro tingarambe here?"
“Dhuze kutotsvaga vanhu vanonovaitira basa kuHarare ikoko. Tinogona kutadza kukuenda kuchikoro kwacho."
"Vachitadza nei kutiendesa ivo vachiratidza kuti vane mari?"
“Saka wanga wave kurambirei kuuya navo?"
“Handiti ndiwe watanga kuramba. Wanga uchida kuti ndiuye navo ndega?"
“Ndanga ndichiramba nekuti zvipfuyo zvangu zvaizoshaya muchengeti. Zvakare, kungonotanga hupenyu hutsva zvakaoma."
"Rega tinoona asi tete munhu bho manje."
Vana vakakurukura nyaya dzakasiyana-siyana kusvika pakubvunzana kuti tete vakange vachirikuitei mavakange vapinda umu. Nguva dzakange dzotovavarira kubata 3 wemasikati. Vakange vasvika pamba apa nguva dzoda kubata 2. Tsungirirai ndiye akange otobatwa nehope apo akazonzwa kuzarurwa kwegedhi. Tete Precious vakange vadzoka.
"Ndivo vazukuru vangu ava Jay." Vakataura vachivhura gonhi remotokari kudivi raTsungirirai.
"Hesi vapfanha!" Jay wacho akakwazisa achiita seanovhundutsira.
"Makadii zvenyu?" ndiTsungirirai uyo akange okwazisana muchanza naJay wacho.
"Pure une muzukuru pombi kudai..."
"Iwe Jay ndoda kukwanirwa wanzwa? Ibva pano..." Precious akataura vosaidzira Jay kure naTsungirirai. Vakabva vangovhara gonhi racho nekubva vatopinda mumotokari.
"Saka wave kutoenda here?" Jay akabvunza nezwi nyoro achinge amira pahwindo paPrecious.
"I have to be in Harare ndimbowana nguva yekuzorora pamwe nekugadzirira sermon yemangwana.
"Hoo zviya mangwana ndiwe uri panyanga. Ini this time ndambozorora, ndapawo Levite."
"Chirega ndimhanye, tinotaura pafoni." Precious akataura achirivhesa motokari yake sezvo ainge aimutsa kare.
Jay akazonzwika kudaidzira achiti, "Safe journey."
Chiri chokwadiwo, mota yakatsikwa mafuta ikadavira. Apa tete nevazukuru vakange votaura nyaya pamwe nekutosekawo kusiyana nemapindiro avainge vaita maMutare. Tete ndivo vainyanya kubvunza vazukuru vavo zvakasiyana-siyana. Dzekuchikoro, mararamiro nezvimwe zvakangodaro. Precious wacho aiti akasvika paanenge afungidzira kuti vazukuru vake vangangodaro vasingazivi, aibva avatsanangurira. Senguva dzavakasvika patoll gate, akavabvunza kana vaipaziva ndokuzovatsanangurira zvizere pamusoro pebasa raro. MuHarare vakasvika nguva dzichangodarika 8 wehusiku asi kwaigara Precious vakazosvika dzovavarira kubata 9, kuWaterfalls.
Pamba paPrecious paive neruzhowa rwakareba kwazvo zvekudarika mamita matatu zvishoma. Painge pakaperera ruzhowa rwezvitinha urwu, iri double wall, kwaive nerazor wire iyo yainzwika kurira kuti ta, ta, ta chiratidzo chekuti magetsi aifamba muwaya iyi. Ruzhowa urwu rwaivewo zvakare nemwenje yainge yakajeka kwazvo pamusoro pawo kusanganisira nepagedhi. Iro gedhi racho raive rino zihombe richinge rakareba zvekuenzana nemudhuri.
Vazukuru vake vachiri kukahadzika nezvavaiona, vakaona tete vavo vodzikisira hwindo ravo ndokubaya kanhu kavasina kuona ako kaive muruoko rwavo. Pakarepo gedhi rakabva razaruka ndokubva vapinda. Vakakahadzika kuona rovhara zvakare pasina munhu wavaona mukati angangodaro ariye akaruzarura pamwe nekurivhara.
Vachipinda mukati Shingirirai nehanzvadzi yake Tsungirirai vaingopeka-peka meso kuona mamiriro ainge akaita chivanze ichi. Izvozvi mazimbwa mana ainge akakura kunge mhuru dzemombe akaonekwa achimhanya kuuya kumotokari achibva nechemberi kwayo. Zvainge zvatosiyana nembwa yaShingirirai Dzvatsvatsva iyo yaaishevedza kuti Dzvatsva chete. Idzi kana dzaive vanhu ndivo vaive varungu, vaya vane pfuma dzavo, vanodya vachiguta, vanoti kungonzwa pahuro pachivimbisa kurwadza mwedzi unouya, votomhanya kwachiremba. Dzvatsva aive munhu mutema anogara pasi kwenyika wekuti akarwara aingoponawo nenyasha dzaMwari.
"Tete, imbwa here idzi?" Tsungirirai ndiye akabvunza nezwi rairatidza kutya.
"Aewa. Imombe." Precious akapindura zvichisiya vana vangoti tuzu nekuti akange atoti kwindi.
Handei pakuchidzika apa, pakaita hondo vana vachirambira mumotokari sezvo imbwa dzainge dzatogarira pamusuwo Tete vakaita hasha dzikapera dzamara vazoraira mukomana aichengetapo kuti abatsire vana kupinda mumba. Kupinda kwavakaita mumba Precious akatanga kudya marasha.
"Imi vana imi musade kundijairira nhaika? Hamuzivi imbwa? Ndoda kukwanirwa, nditeerei tione." Vakadaro vachibva vatendeuka vachibuda panze.
Vakaenda kwaive neimba diki ndokusvikokumbira mukomana uya kuti avavhurire mumwe mupanda wairatidza kuti waisashandiswa nguva dzose. Wakakinurwa vana ndokubva vapinzwamo. Maive nekamubhedha kemunhu mumwechete.
"Ndimo mamuchange muchirara muno. Handidi kunzwa noise." Precious akabva angobuda.
Aka kaive kamupanda kadiki kainge kakazara nezvinhu kuti maku. Kwaiti chigenerator, zvigubhu zveoil yakamboshandiswa, mabroom, zvigero zvehuswa, majerry can nehumwewo hungwandangwanda. Kwechinguva, mapatya akasara akatarira pamusuwo painge pabuda natete vavo. Zvimwe vaifunga kuti vachadzoka vachivatora kuenda navo kuimba huru yavakange vasvikira. Vakatozovhara gonhi vaona umhutu hwopinda hwakanyanya. Pasina kuti Shingirirai akange atakura kagumbeze mune rimwe remabhegi avo, vangadai vakaurawa nechando. Mapatya akange atanga hupenyu hutsva pamba patete vavo Precious.

Address

7401, First Crescent Ext, W/Park 1
Harare

Telephone

+263775874868

Website

facebook.com

Alerts

Be the first to know and let us send you an email when Kilar Novels posts news and promotions. Your email address will not be used for any other purpose, and you can unsubscribe at any time.