10/11/2026
«Unha tarde que espertou o sentido de ser e estar na natureza» 🍂
Así describía unha das persoas participantes o encontro que compartimos a semana pasada na Biblioteca Verde do CEIDA. E que ben resume o que vivimos!
No marco da Bienal Lucky Books, reunímonos arredor de algo que nos conecta profundamente: a literatura de natureza e a nosa relación co mundo natural.
Comezamos cunha aproximación a este xénero, descubrindo algunhas das obras máis representativas, e explorando as emocións que se recollen entre as súas páxinas.
Falamos dos vínculos entre literatura e natureza, de como os libros poden transformar a nosa maneira de mirar, de sentir e de relacionarnos co que nos rodea.
Na segunda parte as palabras saíron das páxinas para ser compartidas en voz alta. Creamos un espazo de escoita e complicidade no que cada lectura foi sumando emocións, resonancias e novas maneiras de mirar aquilo que nos une á natureza.
Non podemos estar máis agradecidas por esta tarde tan bonita, na que as palabras e as lecturas removeron moitas cousas, fixeron aflorar emocións e nos permitiron compartir, sentir e emocionarnos xuntas 💚