26/08/2026
🔴 CENLLE LEVA TODA A SEMANA SEN MÉDICO
Desde o BNG de Cenlle queremos denunciar a situación que está a vivir esta semana a nosa veciñanza pola falta de atención médica nos centros sanitarios do concello.
Cenlle conta con dous centros de Atención Primaria, o Centro de Saúde de Cenlle e o Consultorio de Barbantes, que son atendidos habitualmente por un mesmo médico que reparte a súa xornada entre ambos centros.
Esta semana, a ausencia deste profesional e a falta dunha substitución está deixando á veciñanza sen atención médica no seu propio concello.
E en Cenlle isto ten consecuencias especialmente graves.
Falamos dun concello rural, cunha poboación envellecida e dispersa entre diferentes parroquias e núcleos, no que moitas persoas maiores teñen dificultades para desprazarse e no que non existe unha rede de transporte público que permita acudir con facilidade a unha consulta médica noutro concello.
A alternativa non pode ser simplemente dicirlle á veciñanza que se desprace a Ribadavia ou Ourense.
Para unha persoa que dispón de coche pode significar varios quilómetros. Para unha persoa maior que vive soa, que non conduce ou que depende doutra persoa para desprazarse, pode significar directamente ter enormes dificultades para acceder á atención sanitaria que necesita.
Desde o BNG de Cenlle consideramos inaceptable que a ausencia dun único profesional deixe sen cobertura médica os dous centros sanitarios dun concello enteiro.
Esta situación demostra, unha vez máis, a necesidade de reforzar a Atención Primaria no rural e de garantir as substitucións do persoal sanitario.
Por iso, esiximos á Consellería de Sanidade e ao SERGAS a cobertura inmediata da ausencia e que se adopten as medidas necesarias para garantir unha atención médica estable e continuada en Cenlle e Barbantes.
Non queremos solucións puntuais cada vez que aparece o problema. Queremos que exista unha planificación que garanta que cando o médico titular estea de baixa, de permiso ou de vacacións, exista unha substitución desde o primeiro día.
Porque vivir no rural non pode significar ter menos dereitos nin peor acceso á sanidade pública.
Cenlle merece unha Atención Primaria digna.
Cenlle merece médico.
