09/11/2026
ឯកឧត្តម ហង្ស សុតសំភារ រដ្ឋលេខាធិការ និងជាអគ្គលេខាធិការនៃអគ្គលេខាធិការដ្ឋាន គ.ស.ក. តំណាងដ៏ខ្ពង់ខ្ពស់ ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមប្រឹក្សា គ.ស.ក. បានអញ្ជើញជាអធិបតីភាពក្នុងពិធីបិទ “ មហោស្រពស្ថាបត្យកម្មកម្ពុជា ឆ្នាំ២០២៦ ” ថ្លែងក្នុងពិធីបិទ ឯកឧត្តមរដ្ឋលេខាធិការ និងជាអគ្គលេខាធិការនៃអគ្គលេខាធិការដ្ឋាន គ.ស.ក. លោកបានមានប្រសាសន៍ថា ដោយអនុវត្តតាមគោលនយោបាយយុទ្ធសាស្រ្តបញ្ចកោណដំណាក់កាលទី១ កំណត់អទិភាព ៖ មនុស្ស ផ្លូវ ទឹក ភ្លើង និងបច្ចេកវិទ្យា និងតាមគោលនយោបាយក្រសួង ១៥ចំណុច ដែលមានផែនទីឯកភាពការងារ ៦សមរភូមិរបស់ក្រសួង កិច្ចការដែលពាក់ព័ន្ធដោយផ្ទាល់និងស្ថាបត្យកម្ម ដូចជាកាងារនគរូបនីយកម្ម លំនៅឋាន សំណង់ និងស្ថាបត្យកម្មខ្មែរនាសហសម័យកម្ពុជា។
ការងារក្រសួង ដ.ន.ស និង គណៈស្ថាបត្យករកម្ពុជាកន្លងមកគឺសម្ដៅជាពិសេសធនធានមនុស្សនិងបច្ចេកវិទ្យា ដោយយក “ ស្ថាបត្យកម្ម និងនគរូបនីយកម្ម គឺជាជីវិត “ និងឆ្លងតាមរយៈការរៀបចំមហោស្រពស្ថាបត្យកម្មកម្ពុជា ឆ្នាំ២០២៦ បានបង្ហាញពីលទ្ធផលការងារ និងទទួលជោគជ័យដ៏ត្រចះត្រចង់ពីសំណាក់សាធារណៈជន មន្ត្រីរាជការ សិស្ស និស្សិត បញ្ញវន្ត រូបវន្តបុគ្គល និតិបុគ្គល ជាពិសេសទទួលបានការចាប់អារម្មណ៌និងជាបេសកកម្មមួយទៀតគឺ “ ស្ថាបត្យកម្មលើសពីសំណង់ ” ដែលក្រសួងដ.ន.ស ពិសេស ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានចាត់ទុកស្ថាបត្យកម្ម ជាកម្លាំងជំរុញស្មារតីជាតិនិងសេដ្ឋកិច្ច ប្រកបដោយចីរភាព។
ដូចនេះ គណៈស្ថាបត្យករកម្ពុជា និងគណៈវិស្វករកម្ពុជា ជាឆ្អឹងខ្នងនៃអង្គបច្ចេកទេសពោលគឺជាអ្នកវិទ្យាសាស្រ្ត។
នាថ្ងៃចុងក្រោយក៏មានការអញ្ជើញចូលរួមពីឯកឧត្តម ឡៅ ទិព្វសីហា រដ្ឋលេខាធិការ ឯកឧត្តម ម៉ម សូផាណា ទីប្រឹក្សាក្រសួង ឯកឧត្តម សេង ថានី អនុរដ្ឋលេខាធិការ និងជាប្រធានក្រុមការងារស.ស.យ.ក/ដ.ន.ស ឯកឧត្តម ហ៊ុន ប៊ុនថាន អនុរដ្ឋលេខាធិការ និង ឯកឧត្តម អ៊ុនផេង ពុធវិសាល ប្រធានសមាគមស្ថាបត្យករខ្មែរ ក្នុងការមើលធ្វើបទបង្ហាញ និងកិច្ចពិភាក្សាសំខាន់ៗ។
ថ្ងៃទី៨ ខែវិច្ឆិកា ឆ្នាំ២០២៦
#គណៈស្ថាបត្យករកម្ពុជា