Board of Architects Cambodia

ឯកឧត្តម ហង្ស សុតសំភារ រដ្ឋលេខាធិការ ក្រសួង ដ.ន.ស. និង ឯកឧត្តម ជាចន្ទ័ថែបរ៉ាស អគ្គលេខាធិការរង នៃអគ្គលេខាធិការដ្ឋាន គ.ស.ក. បានអញ្ជើញចូលរួមកិច្ចប្រជុំប្រកាសសមាសភាព និងភារកិច្ចរបស់ក្រុមការងារអន្តរក្រសួងពាក់ព័ន្ធនឹងបញ្ជីត្រៀមរបស់អង្គការយូណេស្កូ ក្រោមអធិបតីភាព លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ នៅសាលប្រជុំព្រះវិហារ នៃទីស្ដីការក្រសួងវប្បធម៌និងវិចិត្រសិល្បៈ។
ការចុះបញ្ជីបេតិកភណ្ឌ ទាំងរូបបី និង អរូបបី គឺជាការថែរក្សាអត្តសញ្ញាណជាតិ និងថែរក្សាមរតកដូនតាខ្មែរ។

ថ្ងៃទី២ ខែមិថុនា ឆ្នាំ២០២៦

#គណៈស្ថាបត្យករកម្ពុជា

ឯកឧត្តម ហង្ស សុតសំភារ រដ្ឋលេខាធិការ និង ឯកឧត្តម ជា ចន្ទ័ថែបរ៉ាស អគ្គលេខាធិការរង គ.ស.ក. បានអញ្ជើញចូលរួមកិច្ចសន្ទនាយុទ្ធសាស្ត្រទីក្រុងភ្នំពេញ៖ អាស៊ាន និងសណ្ដាប់ធ្នាប់ក្នុងតំបន់ ក្នុងយុគសម័យនិងការបែងចែកជាយុទ្ធសាស្រ្ត (The Phnom Penh Strategic Dialogue: ASEAN and Regional Order in an Age of Strategic Fragmentation)

គោលបំណងនៃកិច្ចសន្ទនានេះ គឺដើម្បីប្រមូលផ្ដុំអ្នកនយោបាយជាន់ខ្ពស់ អ្នកការទូត មន្រ្តីយោធា អ្នកបញ្ញវន្ត និងអ្នកអនុវត្តគោលនយោបាយដែលនឹងចូលរួមពិភាក្សាឆ្ពោះទៅមុខលើបរិយាកាសយុទ្ធសាស្រ្ត ដែលកំពុងប្រឈមមុខជាមួយអាស៊ាន និងអាស៊ីអាគ្នេយ៍។ កិច្ចសន្ទនានេះ ក៏នឹងរំលឹកដល់ការចូលរួមចំណែករបស់វិទ្យាស្ថានខ្មែរសម្រាប់សហប្រតិបត្តិការ និងសន្តិភាព ចាប់តាំងពីថ្ងៃបង្កើតវិទ្យាស្ថានជាង៣០ឆ្នាំ ក្នុងកិច្ចសន្ទនាថ្នាក់តំបន់ និងការចូលរួមក្នុងគោលនយោបាយ។

ថ្ងៃទី១ ខែមិថុនា ឆ្នាំ២០២៦

#គណៈស្ថាបត្យករកម្ពុជា

ឯកឧត្តម ឡៅ ទិព្វសីហា និងឯកឧត្តម រ័ត្ន វិរៈ រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ បានដឹកនាំកិច្ចប្រជុំសេចក្ដីព្រាងប្រកាសស្ដីពី “ ការកំណត់កម្រៃសេវាវិជ្ជាជីវៈស្ថាបត្យករ ” លើកទី៤ ដើម្បីប្រមូលធាតុចូលពី អង្គភាពពាក់ព័ន្ធ និងដៃគូសហការ។

ប្រកាសនេះកំណត់អំពីគោលការណ៍ វិធីសាស្ត្រគណនា និងអត្រាកម្រៃសេវាវិជ្ជាជីវៈស្ថាបត្យករអប្បបរមាណែនាំ នៅក្នុងព្រះរាជាណាចក្រកម្ពុជា ក្នុងគោលបំណងដើម្បី៖
­-បង្កើតក្របខណ្ឌគតិយុត្ត និងបទប្បញ្ញត្តិរួមប្រកបដោយសមធម៌ តម្លាភាព និងគណនេយ្យភាព ព្រមទាំងលើកកម្ពស់តម្លៃវិជ្ជាជីវៈស្ថាបត្យកម្មឱ្យស្របតាមឧត្តមានុវត្តន៍ស្ដង់ដាអន្តរជាតិ និងធានាការអភិវឌ្ឍវិស័យសំណង់និងនគរូបនីយកម្មប្រកបដោយចីរភាព
­-ធានានូវគុណភាព សន្តិសុខ សុវត្ថិភាពសំណង់ សោភ័ណភាព និងសណ្តាប់ធ្នាប់សាធារណៈ ព្រមទាំងការពារសិទ្ធិ ផលប្រយោជន៍ស្របច្បាប់ និងកម្មសិទ្ធិបញ្ញារបស់ភាគីពាក់ព័ន្ធក្នុងកិច្ចសន្យា
­-​​បង្កើតទំនាក់ទំនងស៊ីសង្វាក់គ្នារវាងវិសាលភាពនៃការផ្តល់សេវា និងការបែងចែកការទូទាត់កម្រៃសេវាឱ្យមានសង្គតិភាពទៅតាមដំណាក់កាលការងារជាក់ស្តែង ចាប់ពីដំណាក់កាលសិក្សាគំនិតបង្កើតប្លង់បឋម រហូតដល់ដំណាក់កាលបញ្ចប់ការសាងសង់
-​​បង្ការ និងទប់ស្កាត់ការប្រកួតប្រជែងលើការដាក់កម្រៃសេវាខុសពីស្តង់ដាបច្ចេកទេស ដែលនាំឱ្យមានការកាត់បន្ថយពេលវេលាសិក្សាគម្រោងប្លង់ ឬកាត់បន្ថយគុណភាពគំនូរប្លង់លម្អិត ដែលអាចបង្កហានិភ័យដល់អាយុជីវិតសាធារណជន និងទ្រព្យសម្បត្តិសង្គម
-បង្កើតយន្តការអនុគ្រោះ និងភាពបត់បែនសមស្រប សម្រាប់គម្រោងលំនៅឋានសង្គម សំណង់ប្រជាពលរដ្ឋខ្នាតតូច ជនងាយរងគ្រោះ និងសំណង់បម្រើផលប្រយោជន៍សាធារណៈ ដោយមិនប៉ះពាល់ដល់សុវត្ថិភាពសំណង់ និងគុណភាពសេវាវិជ្ជាជីវៈ។

សមាសភាពការអញ្ជើញចូលរួម៖ ឯកឧត្តម ម៉ម សូផាណា លោកជំទាវ នន់ ភានី​ទីប្រឹក្សាក្រសួង, ឯកឧត្តម ញ៉ន ស៊ី ឯកឧត្តម ទូស សាភឿន អគ្គលេខាធិការរង, តំណាងអគ្គនាយកដ្ឋានរៀបចំដែនដី, តំណាងនាយកដ្ឋានស្រាវជ្រាវបច្ចេកទេសសំណង់, តំណាងក្រុមហ៊ុនយូរ៉ាតា(ខេមបូឌា), តំណាងក្រុមហ៊ុនស៊ីអីឌីស៊ី ខូអបភើរេសិន, តំណាងក្រុមហ៊ុនអេស៊ី អុិនស្ពេក និងថ្នាក់ដឹកនាំ-មន្រ្តីនៃគណៈស្ថាបត្យករកម្ពុជា។

ថ្ងៃទី១ ខែមិថុនា ឆ្នាំ២០២៦

#គណៈស្ថាបត្យករកម្ពុជា