APIPA

06/11/2026

💧 MARAIS-MASAY : ASA FANADIOVANA NY BASSIN ATSIMO SY BASSIN AVARATRA

Ao anatin’ny ezaka fanatsarana ny fikorianan’ny rano sy ny fiatrehana ny fotoam-pahavaratra, dia manatanteraka asa fanadiovana ireo Bassin Atsimo sy Bassin Avaratra eny Marais-Masay ny ekipan’ny APIPA.

Esorina ireo tsikafona miangona sy manentsina ny velaran-drano, mba hanamora ny fikorianan’ny rano sy hisorohana ny fitohanana izay mety hiteraka fiakaran’ny rano sy tondradrano.

📢 Andao hiara-hientana amin’ny fitandroana ny fahadiovan’ireo toerana fanangonan-drano. Aza manary fako na loto eny amin’ireo toerana ireo!

-

05/11/2026

30/10/2026

FANARENANA NY FEFILOHA –
ROUTE DIGUE RN58 A 🚧

Miasa manamboatra ny fefiloha eny amin’ny route digue eny Ambodihady Ambohimanarina ny ekipan’ny APIPA.
Anisan’ny asa maika tanterahina amin’izany ny fanotofana lavaka eo amin’ny ilany havanan’ny fefiloha mba isorohana ny fihotsahana mety hampidi-doza.

Izao asa izao dia anisan’ny ezaka atao amin’ny fiatrehana ny vanim-potoanan’ny orana, ho fiarovana ny mponin'Antananarivo sy ny manodidina.

-

29/10/2026

🅕🅐🅝🅓🅐🅗🅐🅡🅐🅝'🅝🅨 🅣🅥🅜/🅡🅝🅜, 🅐🅛🅐🅚🅐🅜🅘🅢🅨 ➋➒ 🅞🅚🅣🅞🅑🅡🅐 🅐🅜🅘🅝'🅝🅨 ➑🅞🅡🅐➌⓿🅜🅘🅝🅘🅣🅡🅐

Vahiny manokana ny MINISITRY NY FANAJARIANA NY TANY SY NY RAHARAHANTANY, ny Jeneraly Lylyson René De Rolland

Araky ny toromariky ny Filohan'ny Fanavaozana, Mickael RANDRIANINA dia hanao tatitry ny zavabitan'ny Minisitera iadidiany, indrindra ny Ady amin'ny kolikoly, ny Minisitry ny Fanajariana ny Tany sy ny Raharahantany, ny Jeneraly Lylyson René De Rolland. Androany Alakamisy 29 oktobra amin'ny 8ora sy 30 no hanomboka ny Fandaharana.

29/10/2026

📢MOMBA NY ASA ATAO EO AMIN’NY FARIHIN’ANOSY

❌ TSY HO TOTOFANA NY FARIHIN’ANOSY!

Manoloana ny tsaho miely momba ny mety hanotofana ny Farihin’Anosy, dia ampahafantarina ny besinimaro fa tsy fanotofana ny farihy no tanjon’ny asa atao eo amin’io toerana io, fa asa fanatsarana ny fotodrafitrasa, ao anatin’ny tetikasa PIAA II (Programme Intégré d’Assainissement d’Antananarivo).

🔎 Inona marina no asa atao?

✅ Fanatsarana ny fantsona lehibe fanarian-drano, mba hanatsarana ny fikorianan’ny rano.

✅ Fanatsarana ny rafitra fanarian-drano, ho fanampiana amin’ny fisorohana sy fampihenana ny mety ho voka-dratsin’ny tondradrano eto Antananarivo.

✅ Fanatanterahana ireo asa ara-teknika ilaina amin’ny fanatsarana ny fotodrafitrasa fanadiovana sy fanarian-drano.

📍 Inona no hitranga rehefa vita ny asa?

Araka ny fanazavana momba ny tetikasa, dia haverina amin’ny laoniny ny toerana voakasiky ny asa rehefa vita ny fanatanterahana azy.

ℹ️ Nahoana no ilaina izany asa izany?

Anisan’ny olana sedrain’Antananarivo ny fahasarotan’ny fanarian-drano, izay mety hampitombo ny loza ateraky ny tondradrano. Noho izany, ny fanatsarana ny fotodrafitrasa fanarian-drano dia anisan’ny ezaka atao hanatsarana ny fitantanana ny rano eto an-drenivohitra.

📣 Ampitaina izao fanazavana izao mba hampahafantarana ny rehetra ny tena tanjon’ny asa sy hisorohana ny fiparitahan’ny vaovao tsy voamarina.

-

28/10/2026

27/10/2026

FANADIOVANA NY LAKANDRANON’ANDRIANTANY – AMPEFILOHA

Ao anatin’ny fiatrehana ny fotoam-pahavaratra, dia manatanteraka asa fanadiovana sy fikojakojana ny lakandrano ny APIPA. Anisan’izany ny asa tanterahina eny Ampefiloha, amin’ny lakandranon’Andriantany.

Nesorina ireo fako sy tsikafona niangona tao anaty lakandrano, izay mety hanentsina ny lalan-drano sy hanembantsembana ny fikorianany.

Ny tanjona dia ny hampihenana ny mety hisian’ny fitohanana sy ny fiakaran’ny rano, indrindra amin’ny fotoanan’ny orana, mba hisorohana araka izay azo atao ny tondra-drano.

📢 HAFATRA HO AN’NY REHETRA

Mitaky ny fandraisan’anjaran’ny tsirairay ihany koa ny fitandroana ny fahadiovan’ny lakandrano. Koa samia mandray andraikitra amin’ny fiarovana ny tontolo iainana, ka tsy manary fako ao anaty lakandrano na eny amin’ny manodidina azy.

APIPA manadio, ianao aza mandoto!

-

23/10/2026

- - Analamanga

22/10/2026

FANADIOVANA NY LAKANDRANO – AMONT TSARASAOTRA

Mitohy hatrany ny asa fanadiovana ny lakandrano eny Amont Tsarasaotra. Nesorina ireo fako sy tsikafona niangona, izay nanentsina sy nanakantsakana ny fikorianan’ny rano.

Tafiditra ao anatin’ny ezaka ataon’ny APIPA amin’ny fiatrehana ny fotoam-pahavaratra izao asa izao, mba hanamorana ny fikorianan’ny rano sy hampihenana ny mety ho tondra-drano amin’ireo faritra manodidina.

📢 Zava-dehibe ny fiomanana mialoha, ary ilaina ihany koa ny fandraisan’anjaran’ny tsirairay amin’ny fisorohana ny fanariana fako eny amin’ny lakandrano, mba tsy hanentsina ny lalan’ny rano.

Aoka isika rehetra hiara-hientana amin’ny fitandroana ny fahadiovan’ny lakandrano, ho fiarovana ny tanàna amin’ny tondra-drano!

-