23/09/2026
𝗦𝗛𝗙𝗖, 𝗽𝗶𝗻𝗮𝗯𝗶𝗯𝗶𝗹𝗶𝘀 𝗮𝗻𝗴 𝗽𝗮𝗴𝗸𝘂𝗺𝗽𝗹𝗲𝘁𝗼 𝗻𝗴 𝗛𝗗𝗛 𝗽𝗿𝗼𝗷𝗲𝗰𝘁𝘀 𝗽𝗮𝗿𝗮 𝘀𝗮 𝗮𝗴𝗮𝗿𝗮𝗻𝗴 𝗽𝗮𝗴𝗹𝗶𝗽𝗮𝘁 𝗻𝗴 𝗺𝗴𝗮 𝗯𝗲𝗻𝗲𝗽𝗶𝘀𝘆𝗮𝗿𝘆𝗼
Upang matukoy at mapabilis ang mga kinakailangang hakbang para sa agarang paglipat ng mga pamilyang benepisyaryo sa kanilang mga bagong tahanan, pinulong ng Social Housing Finance Corporation (SHFC), sa pangunguna ni President and CEO Federico Laxa, ang mga opisyal ng Balikatan Samahan ng Mapulang Lupa (BSML) at contractor ng proyekto sa tanggapan ng ahensya sa Makati ngayong araw.
Ang BSML sa Barangay Viente Reales, Malanday, Valenzuela City ay kabilang sa mga proyektong isinasagawa sa ilalim ng High Density Housing (HDH) Program, na naglalayong magbigay ng permanenteng tahanan sa mga pamilyang naninirahan danger zones. Mahigit 1,300 pamilya ang inaasahang makikinabang sa nasabing proyekto.
Sa dayalogong pinangunahan ng SHFC, tinalakay ang mga natitirang gawain at kinakailangang hakbang upang mapabilis ang pagkumpleto ng proyekto at maisakatuparan ang paglipat ng mga benepisyaryo sa kanilang mga bagong tahanan ngayong Nobyembre.
Binigyang-diin ni President Laxa ang kahalagahan ng pagtutulungan ng SHFC, BSML, at contractor upang matugunan ang mga kinakailangang aksyon at maiwasan ang mga karagdagang pagkaantala sa proyekto.
Ikinatuwa naman ng mga opisyal ng samahan ang mga napagkasunduan sa pulong, partikular ang mga konkretong hakbang at malinaw na timeline para sa kanilang paglipat sa kanilang mga bagong tahanan.
Kasamang dumalo sa pagpupulong sina Legal Affairs Group Vice President Atty. Melanie Valenciano at HDH Head Joseph Eisma.
Samantala, nakipagpulong din si President Laxa sa mga water utility at fire protection contractor ng iba pang HDH projects, kabilang ang Genesis Ville, Hopeville Phase 2, Alyansa ng Mamamayan sa Caloocan Housing Cooperative, at ALPAS 1 at 2.
Tinalakay sa hiwalay na pagpupulong ang mga konkretong hakbang upang mapabilis ang pagkakabit ng mga kinakailangang utility at matiyak na magiging maayos, ligtas, at komportable ang paglipat ng mga pamilyang benepisyaryo sa kanilang mga bagong komunidad.
Nangako naman ang mga contractor na bibilisan ang kanilang trabaho upang matiyak ang agarang pagkumpleto ng mga kinakailangang pasilidad at maisakatuparan ang paglipat ng unang batch ng mga benepisyaryo sa kanilang mga bagong tahanan pagsapit ng Disyembre.
Nakatakda namang makipagpulong ang SHFC sa Maynilad bukas upang pag-usapan ang mga hakbang para mapabilis ang pagkakabit ng water service at matiyak na matatapos at maita- turnover sa takdang panahon ang mga housing units.
Sa kabuuan, mahigit 2,000 housing units sa iba’t ibang HDH projects ang target na ma-turnover ng SHFC bago matapos ang taon, bilang bahagi ng patuloy na pagsisikap ng ahensya na mapabilis ang paghahatid ng ligtas, maayos, at permanenteng tahanan sa mga pamilyang benepisyaryo.
