10/08/2026
Ang New Cabalan Senior High School ay buong pagmamalaking nakikiisa sa pagdiriwang ng Buwan ng Wikang Pambansa 2026 na may temang:
“𝐖𝐢𝐤𝐚𝐧𝐠 𝐅𝐢𝐥𝐢𝐩𝐢𝐧𝐨 𝐚𝐭 𝐀𝐈: 𝐊𝐚𝐬𝐚𝐧𝐠𝐤𝐚𝐩𝐚𝐧 𝐬𝐚 𝐏𝐚𝐧𝐚𝐧𝐚𝐥𝐢𝐤𝐬𝐢𝐤 𝐚𝐭 𝐓𝐮𝐥𝐚𝐲 𝐬𝐚 𝐘𝐚𝐦𝐚𝐧 𝐧𝐠 𝐈𝐦𝐩𝐨𝐫𝐦𝐚𝐬𝐲𝐨𝐧.”
Ang temang ito ay binibigyang-diin ang mahalagang ugnayan ng Wikang Filipino at Artificial Intelligence (AI) bilang makabagong kasangkapan sa pananaliksik, paglikha, at pagpapalaganap ng kaalaman. Hinihikayat nito ang bawat isa na gamitin ang AI nang may pananagutan, integridad, at paggalang sa mga pamantayang etikal, habang patuloy na pinauunlad at pinayayabong ang paggamit ng ating Wikang Pambansa sa gitna ng mabilis na pag-unlad ng teknolohiya.
Sa pagdiriwang na ito, muli nating ipinapaalala na ang wikang Filipino ay hindi lamang daluyan ng komunikasyon, kundi sisidlan ng ating kasaysayan, kultura, pagkakakilanlan, at pagmamahal sa bayan. Sa pamamagitan ng wika, nagkakaisa tayo bilang isang bansa at nagiging mas makabuluhan ang ating pakikibahagi sa makabagong lipunan.
Ang Buwan ng Wikang Pambansa ay ipinagdiriwang tuwing buwan ng Agosto alinsunod sa Proklamasyon Blg. 1041, na nilagdaan ni dating Pangulong Fidel V. Ramos noong 1997.
Inaanyayahan ang buong komunidad ng New Cabalan Senior High School na aktibong makiisa sa iba't ibang gawaing inihanda para sa pagdiriwang na ito. Sama-sama nating ipagdiwang ang kagandahan, kahalagahan, at patuloy na pag-unlad ng Wikang Filipino sa makabagong panahon.
# BagongKabataannamayKababaang-loobatLantadnaKahusayan