29/10/2026
پاکستان عوامی تحریک ضلع کیماڑی کے زیرِ اہتمام ماہانہ درسِ عرفان القرآن کا آغاز 30 اکتوبر سے ہوگا، علامہ علی اختر اعوان خطاب کریں گے
کراچی: قرآن مجید کی تعلیمات کو عام کرنے اور سیاسی و سماجی شعور کی بیداری کے لیے پاکستان عوامی تحریک ضلع کیماڑی کے زیرِ انتظام ماہانہ درسِ عرفان القرآن کا آغاز کیا جا رہا ہے۔ اس سلسلے میں پہلی تقریب جمعہ 30 اکتوبر 2026ء کو بعد نمازِ مغرب راؤ کامران محمود کی رہائش گاہ، نزد مدینہ مسجد، سیکٹر 4I، بلدیہ ٹاؤن کراچی میں منعقد ہوگی۔
درسِ عرفان القرآن کی اس مقدس تقریب سے معروف عالمِ دین علامہ علی اختر اعوان خطاب کریں گے، جبکہ زندگی کے مختلف شعبہ ہائے حیات سے تعلق رکھنے والی شخصیات، مرد و خواتین، بھی خصوصی شرکت کریں گی اور اپنے خیالات کا اظہار کریں گی۔
درسِ عرفان القرآن کا مقصد قرآن مجید کی تعلیمات اور پیغامِ ہدایت کو عام کرنے کے ساتھ ساتھ معاشرے میں اخلاقی اقدار، دینی شعور، سیاسی و سماجی آگاہی اور خدمتِ انسانیت کے جذبے کو فروغ دینا ہے۔
پاکستان عوامی تحریک ضلع کیماڑی کے زیرِ اہتمام اس ماہانہ سلسلے کے ذریعے عوام کو قرآن مجید کی رہنمائی سے روشناس کرانے اور معاشرے میں مثبت فکری و عملی تبدیلی کے لیے کردار ادا کرنے کی کوشش کی جائے گی۔ تقریب میں مختلف شعبوں سے وابستہ افراد کی شرکت متوقع ہے۔
