Këshilli Lokal-Dragobil

Dragobili mbahet i pastër falë kontributit të përbashkët

Edhe gjatë këtyre ditëve po vazhdon mirëmbajtja e hapësirave publike në fshatin tonë. Pastrimi, kositja dhe kujdesi për ambientin janë punë që ndikojnë drejtpërdrejt në pamjen dhe jetën e përditshme të secilit prej nesh.

Këto aktivitete realizohen nga mirëmbajtësi i fshatit, paga mujore e të cilit mbulohet nga Fondacioni Humanitar Dragobili, fondacion që krahas aktiviteteve humanitare ka si qëllim edhe mirëmbajtjen e hapësirave publike dhe përmirësimin e jetës në fshatin tonë.

Fatkeqësisht, pagesat vullnetare janë zvogëluar ndjeshëm muajt e fundit. Për shkak të mungesës së fondeve kemi pasur edhe raste kur është detyruar të ndërpritet puna e mirëmbajtjes, derisa janë siguruar mjete për vazhdimin e saj.

Aktualisht, gjendja e fondit është e tillë që kemi mjete të mjaftueshme vetëm për edhe një pagë mujore prej 500 eurosh, siç dëshmohet edhe nga bilanci i paraqitur.

Prandaj, ftojmë të gjithë bashkëfshatarët, mërgatën dhe miqtë e Dragobilit që, sipas mundësive të tyre, të vazhdojnë mbështetjen vullnetare të Fondacionit Humanitar Dragobili. Çdo kontribut, sado i vogël, ndihmon që fshati ynë të mbetet i pastër, i rregullt dhe me aktivitete në shërbim të komunitetit.

Dragobili është shtëpia jonë e përbashkët. Ta ruajmë dhe ta mirëmbajmë së bashku.

27 vjet pa Refkiun dhe Ditonin, por përjetësisht në kujtesën dhe krenarinë tonë.

Kujtimi për Refkiun dhe Ditunin ka një domethënie të veçantë, por sot kujtojmë me respekt veprën dhe sakrificën e secilit dëshmor që dha gjithçka për atdheun. Falë gjakut dhe heroizmit të tyre, ne sot jetojmë të lirë në shtetin tonë.

Në këtë ditë të veçantë kujtojmë me krenari bijtë më të mirë të kombit: Ibrahim S. Mazreku, Kujtim S. Krasniqi, Ejup Kryeziu, Safet dhe Sabit Hazrolli, Dituni dhe Refki Paçarizi, Visar Krasniqi dhe Milaim Beha, të cilët sakrifikuan jetën e tyre në rrugën drejt lirisë dhe pavarësisë së vendit tonë.

Lavdi jetës dhe veprës së tyre!
Lavdi e përjetshme Dëshmorëve të Kombit! 🇦🇱🇽🇰

NJOFTIM

27 VJETORI I RËNIES SË DËSHMORËVE REFKI DHE DITONI PAÇARIZI – KLEÇKË

FTESË PËR PJESEMARRJE
Të nderuara familje të dëshmorëve, martirëve, veteranë dhe banorë të fshatit Dragobil,

Me rastin e 27-vjetorit të rënies heroike të Dëshmorëve të Lirisë Refki Paçarizi dhe Ditoni Paçarizi në Kleçkë,organizohen aktivitete përkujtimore sipas kësaj agjende:

E martë, 02 qershor 2026
Pika e mbledhjes: Parking i xhamisë së fshatit Dragobil

Agjenda:
• Ora 09:30 – Tubimi te parkingu i xhamisë
· Ora 10:00 - Homazhe në Varrezat e Dëshmorëve në Malishevë
• Ora 11:30 – Vizitë dhe përkujtim në Kompleksin Memorial “Dëshmorët e Dragobilit”

Ky organizim është bërë në koordinim të plotë me familjarët e dëshmorëve.

Ju ftojmë të gjithëve të merrni pjesë për të nderuar me respekt kujtimin e Refkiut dhe Ditonit – bijve të Dragobilit që ranë për lirinë tonë!

Lavdi e përjetshme Dëshmorëve të Kombit🇦🇱🇽🇰

NJOFTIM

Njoftohen banorët e fshatit DRAGOBIL se nesër ditë e premte, datë 29.05.2026, nga ora 08:00 – 12:00, do të bëhet spërkatja selektive nga toka kundër EHKK në hapësirat publike dhe private.

Obligohen banorët që të marrin masat e nevojshme preventive dhe të lënë dyert e oborreve të hapura për qasje gjatë realizimit të spërkatjes.

Njoftohen edhe bletarët që të kenë kujdes të shtuar dhe t’i mbajnë bletët të izoluara gjatë kohës së spërkatjes, për shkak të rrezikshmërisë së mundshme.

Varësisht nga kushtet meteorologjike, data dhe orari mund të ndryshojnë për ditën vijuese.

Lajmërohen

Lajmërohen Banorët e Fshatrave DRAGOBIL, PALLANKA, BURIM, GURBARDH DHE TURJAKË, se do të bëhet spërkatja selektive nga toka kundër EHKK të hapësirave publike dhe private sipas këtij ORARI:

Nr. Vendi- Fshati- Lagjja

1 DRAGOBIL: data: 29.05.2026 - ora: 08:00 – 12:00
2 BURIM dhe PALANKA: datë: 30.05.2026 - ora: 08:00 – 12:00
3 GURBARDHË datë: 31.05.2026 - ora: 08:00 – 12:00
4 TURJAKË: datë: 01.06.2026 - ora: 08:00 – 12:00

“ Obligohen banorët që ti marrin masat e duhura preventive” !

Vërejtje:
Varësisht kushteve meteorologjike, orari dhe data mund të ndryshojnë me ditën vijuese.

Me rastin e Festës së Kurban Bajramit, ju shpreh urimet më të sinqerta për paqe, mirëqenie dhe qëndrueshmëri shpirtërore.
Kjo ditë e shenjtë, e themeluar mbi parimet e sakrificës, solidaritetit dhe devotshmërisë, qoftë një mundësi reflektimi për vlerat morale që forcojnë kohezionin familjar.
Uroj që bekimet e kësaj feste të kontribuojnë në rritjen e harmonisë, në forcimin e përgjegjësisë së përbashkët dhe në kultivimin e një mjedisi të bazuar në respekt dhe mirëkuptim.
Gëzuar Kurban Bajramin, me shëndet dhe begati!

Sot në Dragobil nuk u bë vetëm pastrim – u dha një mesazh i qartë

Në kuadër të projektit të Komunës së Malishevës “Për Malishevën e pastër”, qytetarë, nxënës dhe mësimdhënës u angazhuan dhe treguan që ambienti ruhet me bashkëpunim.

Tek bregu i ravinave janë vendosur edhe dy shenja informuese!
Dragobili po tregon që ambienti ruhet me vepra, jo me fjalë.

Njoftim për qytetarët – Dragobil

Gjatë ditës së djeshme, tek Bregu i Ravinave në fshatin Dragobil, është evidentuar një rast i hedhjes së mbeturinave në hapësirë publike.

Falë bashkëpunimit të qytetarëve dhe raportimit të rastit, personi përgjegjës është identifikuar dhe është gjobitur me 200€ nga Inspektorati Komunal.

Ky rast tregon qartë se çdo shkelje do të trajtohet dhe nuk do të tolerohet.

Ftojmë të gjithë qytetarët që të kontribuojnë duke raportuar raste të tilla, në mënyrë që ta mbajmë fshatin tonë të pastër.

Këshilli Lokal Dragobil–Maxharrë

Bashkëpunimi i qytetarëve me Inspektorat po jep rezultate në ruajtjen e ambientit

Drejtoria e Inspektoratit në Komunën e Malishevës po vazhdon veprimet në terren për parandalimin e hedhjes së mbeturinave në hapësira publike. Kështu ka bërë të ditur sot, drejtori i drejtorisë së Inspektoratit në Malishevë, Jakup Gashi, duke shprehur përkushtimin e drejtorisë për ruajtjen e ambientit dhe paralajmërimin e drejtorisë për zbatimin e ligjeve dhe rregulloreve për ruajtjen e ambientit.

Falë bashkëpunimit të qytetarëve dhe raportimeve të tyre, së fundmi është shqiptuar edhe një gjobë mandatore në vlerë prej 200 euro ndaj një qytetari nga Llapçeva, i cili kishte hedhur mbeturina në një hapësirë publike në fshatin Dragobil.

“Inspektorati Komunal falënderon qytetarët për bashkëpunimin dhe mbetet i përkushtuar në zbatimin e ligjit dhe ruajtjen e një ambienti të pastër për të gjithë”, është shprehur drejtori Gashi, i cili ka njoftuar se paralajmërimi për këtë dukuri, të hedhjes së mbeturinave, është serioz dhe do të zbatohet në përpikëri.

Njoftim:

Nesër në ora 11:00 mbahet aksioni “Për Malishevën e pastër”. Dilni kush mundet dhe njoftoni edhe të tjerët.

Fshati po pastrohet dhe mirëmbahet rregullisht. Kjo punë humb kuptimin nëse vazhdohet me hedhjen e mbeturinave vend e pa vend.

Mos e ndotni atë që po pastrohet çdo ditë. Mbeturinat hidhen vetëm në vendet e caktuara. Kush kapet, ndëshkohet me gjobë.

Dragobili mbahet pastër vetëm me kujdesin e të gjithëve.