09/11/2026
⭐ Lectura do mes de novembro no noso club de lectura para adultas!
👉Esta é a súa sinopse: Lía, a protagonista, nai e avoa, coidadora, tantas veces vagalume na escuridade para os seus, vai guiándonos por un universo de mulleres diferentes, de personaxes vulnerables, entrañables, mentres loita por non perderse no camiño.
A pesar dos atrancos da vida, conserva a ledicia e a bondadem a ansia por aprender e superarse, sempre coa lembranza dun idealizado amor de xuventude que a axuda a elevarse por riba da súa propia realidade.
👉E así é como comeza: Vivía do outro lado do río, onde se perde a vista e os pasos dubidan. Era pobre, esquivo por necesidade e desdentado por un golpe do destino. Antes de facer os trece anos xa lles sacaba unha cuarta a todos os rapaces e á meirande parte dos homes da aldea, aínda que a súa ousada estatura non lle traía máis ca pesares. Á falta dun equipo onde puidese brillar como pivote, a súa deserción do país dos ananos supúxolle unha morea de golpes extra e o honor de que o nomeasen varexador oficial de noces e cereixas.