08/11/2026
🚨Notorian'i Fanirisoa Ernaivo ireo Gen Z ka nandefa taratasy fifonana taminy !
Notorian'i Fanirisoa Ernaivo ireo Gen Z noho ny teny sy lahatsoratra navaoka tao amin'ny pejy Facebook « Mouvement Gen Z », « Tolom-bahoaka Ofisialy » sy ny kaonty « Jari Arye, Rado Randriam's, Arimamy Todisoa, Ny Amboara Ramanankajarivo ».
Toy izao no voarakitra tao anatin'ilay taratasy 👇👇👇
TARATASY MANAMAFY NY FITSAHARAN'NY FAHATOKISANA.
Ramatoa Ministra,
Manoratra aminao izahay mba hanehoana amin'ny fomba ofisialy sy an-tsitrapo ny fitsaharan'ny fahatokisanay anao mitana ny andraikitra ambony ; amin'ny maha-Mpitahiry ny Tombo-kase anao ; izay andry hiankinan'ny Fanavaozana ny Repoblika vokatry ny tolombahoaka tamin'ny taona 2025.
Izany moa dia nohon'ny fitoriana napetrakao teo anoloan'ny Lehiben'ny Mpitsara Mpanadihady (Doyen des Juges d'Instruction) eo anivon'ny Fitsarana Ambara-tonga Valoalohany Antananarivo.
I. FANEKENA
1. Manaiky izahay fa nandritra ny volana septambra sy oktobra 2026, dia nisy lahatsoratra, sary, teny ary fanehoan-kevitra (commentaires) navoaka tao amin'ny pejy sy kaonty voalaza etsy ambony, izay ampiasain'ny mpikambana Mouvement GenZ. Ekenay fa nampiasa voambolana noheverinao ho manevateva izahay. Marihinay anefa fa toa maika loatra ny filazanao hoe « tsy misy porofo »: efa nisy tokoa ny fivoahan'ny voafonja Sinoa iraika ambin'ny folo(11), ka efatra tamin'izy ireo no nandao ny firenena. Ny tsy mbola nametrahan'ny fitsarana porofo mazava momba ny fandraisanao anjara dia tsy tokony ho lolom-po entina hanenjehana anay ara-dalàna. Mihatra amin'ny rehetra ny foto-kevitry ny tsy fananan-tsiny mandra-paporofoana, ao anatin'izany ireo mitsikera anao.
2. Momba ny fiampangana ho nanao fanalam-baraka sy fanenjehana : Milaza ianao fa « nalam-baraka » sy « voatsikera mafy » (harcelée). Voamarikay ny fikasanao hampitsahatra ireo fitsikerana mampiady saina ny olompirenena ireo. Fa ny zava-misy nambaranay sy nozarainay dia manodidina ny "polémique" teny amin'ny tambazotra serasera ihany : ny famoahana voafonja tsy nahazoan-dalana nataon'ny mpiasan'ny fonja, ny ahiahy mipetraka amin'ny rojo fibaikoana dia anisan'ny adihevitra ampahibemaso sy ny tombontsoam-bahoaka. Ny filazana azy ireo ho « fanenjehana » dia toa fahasahiana mihoampefy: mampifangaro ny fitsikerana ara-politika, amin'ny fanenjehana manokana izany. Ny fahalalahana mamoaka hevitra, izay narovanao tamin'ny fomba ampahibemaso ho an'ny hetsiky ny GenZ tamin'ny taona 2025 dia misy ny zo hitsikera ny asan'ny minisitra.
3. Momba ny andraikitry ny minisitra (fototry ny resaka): Mangataka anay hanaiky ny fahadisoanay tamin'ny zo anay ianao. Asainay ampanajana kosa ianao, hieritreritra ny fahadisoanao. Amin'ny maha-Mpitahiry ny Tombo-kase anao, ianao no tokony hiantoka ny fahaleovantenan'ny fitsarana sy ny fandehan'ny raharaha ao amin'ny fonja. Nasehon'ny raharaha Sinoà 11 ny fahalemen'ny fitantananao. Tokony ho nitady izay tompon'andraikitra tao amin'ny ministeranao ianao, fa ianao nifidy hanenjika ireo tanora maneho hevitra. Asehonao amin'ny fangatahanay fifonana aminao indray izao fa hafangaronao ve sanatria ny tombontsoa manokana sy ny tombontsoam-bahoaka amin'ny famefena ny fahalalahana mitenin'ny tanora genZ.
Ity fihetsika ity, izay mampiasa ny rafitra fitsarana hampanginana ireo mpitsikera amin'ny raharaha lehibe, dia mitovy amin'ny fanodinkodinana fahefana (détournement de pouvoir) sa fanararaotam-pahefana ara-dalàna.
II. FIJOROANA
Manolo-tena izahay, tsirairay avy sady miaraka, ary manome toky fa mijoro miharo ny fahalalahana miteny sy maneho hevitra. Izany dia raisinay ho adidy amin'ny maha olompirenena manohitra ny kolikoly anaty rafitra.
Mijoro izahay manoloana ny fiantsiana sy fanitsahana ny zon'ny olompirenena, toa zary kilalao sy hatsikana raha ny toe-javatra hanenjehana anay.
Farany, mampametram-panontaniana ny fampitandremana mafy nataonao. Mitaky fanesorana ny ranty zarainay ao anatin'ny 48 ora ianao noho ny teninay tao amin'ny tambajotra sosialy. Etsy ankilany, ny fanadihadiana momba ny famoahana voafonja 11, izay tokony hamantatra ny tompon'andraikitra, dia toa miadana. Vonona ny haneho ezaka amin'ny fomba fitsikeranay ny mpiasam-bahoaka izahay, saingy mangataka aminao kosa amin'ny fahamatorana mitovy amin'izany, mba hiantoka ny fahazavana amin'ity raharaha ity.
Tsy tokony hisy fifangaroan’ny tombontsoa manokana sy ny tombontsoam-bahoaka eo amin’ny fitantanana ny raharaham-panjakana. Tsy izany indrisy ny zava-misy asehonao androany. Ka izany indrindra no nahavery tanteraka ny hany mba fahatokisana kely nananay taminao nahare ny fitorianao anay olompirenena maneho hevitra tsotra.
Ny fitsikeranay moa dia mihezaka manaja ny endrika fitsikerana fomba fa tsy olona , Ary hanohy hamelona ny fotokevitra.
Mangataka anao izahay, Ramatoa Ministra, handray ny fanehoam-panajana avo lenta, sy ny fikasana mafy hijery ny fitsarana eto amin'ny firenena hifanaraka amin'ny foto-kevitra tokony ho entiny.
