13/11/2026
Seduta numru 36 tal-Kunsill Lokali Birżebbuġa.📋
Nhar it-Tlieta 10 ta' Novembru 2026, saret seduta tal-Kunsill Lokali Birżebbuġa fejn fiha ġew diskussi diversi punti.
• Preżenti għas-seduta:
Scott Camilleri Bilocca - Sindku
Josette Busuttil - Viċi Sindku
Alexander Caruana Maria Mifsud Ivan Abela Grech Karel Zahra Rohasia Zammit Darren Debono – Kunsilliera
Jordy Brincat - Segretarju Eżekuttiv
• Assenti b’appoloġija:
Johann Borg – Kunsillier
> Fabrika tal-Ħut – Ittra lil Ombudsman:
Il-Kunsill Lokali approva ittra li se tintbagħat l-għada tas-seduta (intbgħatet) lill-Ombudsman sabiex jinvestiga jekk l-ERA, bħala l-awtorità kompetenti, hix qed timmonitorja u tinforza r-regolamenti relatati mal-fabrika tal-ħut skont il-liġi.
> Fabrika tal-Ħut – Petizzjoni:
Il-Kunsill Lokali approva petizzjoni sabiex jinġabru l-firem biex titressaq quddiem il-Parlament Malti. (Din il-petizzjoni diġa bdiet titqassam mill-għada tas-seduta).
> Aġġornament dwar il-ħamiem:
Beda l-proċess biex jinqabad il-ħamiem. S'issa, dan il-proċess miexi tajjeb ħafna u jidher li n-numru ta' ħamiem, speċjalment fl-inħawi tal-knisja, qed jonqos.
> Land Reclamation:
Il-Kunsill Lokali qed iwaqqaf tim ta' professjonisti minn dixxiplini differenti sabiex jipprovdi appoġġ tekniku dwar il-kwistjoni tal-Land Reclamation. Dan it-tim se jkun qed jevalwa proposti u riskji f'isem il-Kunsill.
> Forti Bengħajsa:
Heritage Malta se tkun qed tħejji master plan għall-Forti Bengħajsa. Il-Kunsill Lokali se jkun qed jara li dan il-proċess jinvolvi wkoll lill-għaqdiet ta' Birżebbuġa.
> Triq Żaren Dalli:
Il-Kunsill Lokali beda jaħdem mal-perit sabiex jitħejjew il-pjanti għal din it-triq, bil-għan li tingħata dehra isbaħ permezz ta' sett ta' arbli dekorattivi.
> Blue Bins (Kontenituri għall-ħwejjeġ użati):
Il-blue bins ta' Triq Żaren Dalli ġew imċaqalqa għal Triq il-Gżira, ħdejn l-iBins. Dan sar sabiex ikunu jistgħu jiġu mmonitorjati permezz tal-kameras li diġà hemm fil-post u b'hekk jitnaqqas l-abbuż.
> Triq iż-Żurrieq:
Ix-xogħol għadu għaddej skont il-pjan. Fil-ġimgħat li ġejjin se jibda t-tqaxxir tal-ewwel parti tat-triq, u wara jsiru l-ewwel saffi tal-asfalt. Il-Kunsill bagħat email lil Infrastructure Malta dwar il-kwistjoni tal-ilma tax-xita (storm water), iżda s'issa għadha ma waslet l-ebda risposta.
> Sqaq fi Triq Birżebbuġa:
Sar rapport lid-Direttorat għas-Saħħa Ambjentali dwar problema ta' drenaġġ f'dan l-isqaq. Se jintalab ukoll li Enemalta tagħlaq il-parti kkonċernata, filwaqt li jinżamm l-aċċess għar-residenti tal-inħawi li għandhom servizzi jgħaddu minn dan l-isqaq.
> Ġnien f'Dawret il-Qalb Imqaddsa:
Il-Kunsill Lokali se jkun qed jiddiskuti mal-għaqdiet li għandhom il-bini fl-inħawi sabiex l-aċċess għal dan il-ġnien jerġa' jinfetaħ.
> Estimi Finanzjarji 2027:
Il-Kunsill Lokali approva l-estimi finanzjarji għas-sena 2027. Dawn jinkludu l-proġett ta' tisbiħ ta' Triq iż-Żurrieq.
> Laqgħa Annwali (Estimi Finanzjarji 2027):
Il-Kunsill Lokali jixtieq jinforma lill-pubbliku li l-laqgħa annwali tal-Kunsill Lokali se ssir nhar l-Erbgħa, 2 ta' Diċembru, fis-7:00pm.
Is-seduta ġiet aġġornata għal l-Erbgħa 2 ta’ Diċembru 2026, fil-17:00.
