déi gréng Käl-Téiteng

25/10/2026

🌿 Gemengerot vum 9. Oktober 2026 – Eis Positiounen
✅ MATGESTËMMT
🌳 Plan de gestion des forêts 2027 – nohalteg Gestioun vun eisen 200 Hektar Bësch. E grousse Merci un eise Fierschter fir säin Asaz! Dem Här Sannipoli, dee geschwënn an d'Pensioun geet, alles Guddes. Hien huet sech seng Pensioun verdéngt! 🌲
🏡 Kaf vun engem Appartement fir de logement abordable.
🏡 Erhéijung vum impôt foncier op Grondstécker, déi net bebaut sinn.
💚 Décompte 2025 vum Jugendhaus – e grousse Merci un déi pedagogesch Ekipp!
🌱 Mise en sécurité vum Foussgängersträifen an Entsigelung vum Îlot an der Rue Pierre Schiltz – fir méi Sécherheet a manner Iwwerhëtzung.
❌ NET MATGESTËMMT
⚖️ Locatiounsvertrag fir e 53 m² grousst Gemengelokal an der Rue de Dudelange.
Mir fannen, datt Gemengelokaler éischter de Veräiner a soziale Projete wéi kommerziellen Zwecker (enger Assurance) zur Verfügung gestallt solle ginn. Waasser, Stroum an Heizung sinn och am Loyer inclus – eng finanziell Belaaschtung fir d'Gemeng, wann d'Energiepräisser weider klammen oder explodéieren. Och eng Locatioun ouni Ausschreiwung wërft Froen op.
📌 Office social – Fair Prozedure si wichteg
Bei de Wale fir fräi Posten am Verwaltungsrot huet eis Vertriederin de Sall verlooss. Mir sinn der Meenung, datt d'Prozedur net all Kandidatur gläichberechtegt berücksichtegt huet.
💚 Fir eng nohalteg, sozial an transparent Gemengepolitik – am Interessi vu Käl an Téiteng!

31/07/2026

Gemengerot vum 15.Juli 2026

☀️🌳 Eis Motioun fir eng méi resilient Gemeng gouf ugeholl!
Hëtztwellen ginn ëmmer méi heefeg. Mir hu gefuerdert, datt d'Gemeng elo e Plang fir Hëtzteresilienz ausschafft. D'Zil ass kloer: eis Dierfer un de Klimawandel upassen an d'Liewensqualitéit fir all AwunnerInnen verbesseren.

🌳 méi Beem, Gréngflächen a Schied am ëffentleche Raum,
💧 e bessere Zougang zu Drénkwaasser,
🧱 Entsigelung a méi Plaz fir Natur,
🏡 klimafrëndlech Bauprojeten an eng Architektur, déi sech un déi nei klimatesch Realitéiten upasst.
Solidaritéit tëscht Noperen a Schutz fir vulnérabel Persounen.
Mir freeën eis, datt dës Motioun – an enger ugepasster Form – vun alle Parteien ausser dem ADR ugeholl gouf. Elo muss dëse Plang mat konkrete Mesuren ëmgesat ginn.

🏡 Eng nohalteg Entwécklung vum Quartier Käl-Nord
Zougestëmmt: - der Convention cadre mam Ministère du Logement et de l’Aménagement du territoire -dem PDP vum zukünftege Quartier Käl-Nord.
Fir eis ass dëse Projet e Schrëtt an déi richteg Richtung: abordabele Wunnraum, Gréngflächen, sécher Weeër fir Foussgänger a Vëloen, manner Autosverkéier.
Konform mat de Klima-a Biodiversitéitsziler vun der Gemeng

🏊 Bébés nageurs bleiwen erhalen
Mir hunn och d'Convention mam Schwammclub Monnerech matgestëmmt. Et ass eis wichteg, datt d'Kuren « Bébés nageurs » och an Zukunft ugebuede kënne ginn.

☀️ D'Energietransitioun däerf net um Budget scheiteren.
De Budget fir d'Subsiden op Photovoltaikanlagen ass schonn ausgeschöpft. Fir eis ass dat dat falscht Signal. Wien haut an erneierbar Energie investéiert, soll net Méint op seng Ënnerstëtzung waarden. Dofir hu mir eng Budgetserweiderung gefuerdert. Leider gouf dës Propositioun net ugeholl.

🍎 Liewensmëttel retten amplaz verschwenden
Eis Propose: nach dëst Joer eng Informatiounscampagne iwwer d'Aktioun « Gielt Band » ze organiséieren. Esou kënnen d'Friichte vun den ëffentleche Beem vun de Bierger gepléckt ginn, amplaz ongenotzt um Buedem ze landen.
💚 Mir setzen eis weider konsequent fir eng nohalteg, sozial an awunnerfrëndlech Gemeng an – mat méi Natur an eisen Dierfer, enger konsequenter Energietransitioun a Léisungen, déi d'Liewensqualitéit vun allen Awunner stäerken.

06/07/2026

📍 Gemengerot vum 29. Juni 2026
An der leschter Gemengerotssëtzung hu mir eis Positiounen zu dräi wichtegen Dossiere kloer vertrueden.

📚 Schoulorganisatioun & PDS (Plan de Développement Scolaire)
👉 Matgestëmmt. Bildung ass a bleift eng vun eise gréisste Prioritéiten.
👉 E grousse Merci geet un all d'Schoulpartner fir hiren deeglechen a wäertvollen Asaz fir eng Bildung, déi sech un den individuelle Besoine vun all Kand orientéiert.
👉 Gläichzäiteg fuerdere mir beim Educatiounsministère eng Erhéijung vun de Kontingentsstonnen ab 2027, fir datt all Kand déi Ënnerstëtzung kritt, déi et brauch.

👨‍👩‍👧 Règlement d’ordre intérieur vum SEA
👉 Net matgestëmmt. Eng wichteg sozial Prioritéit gouf gestrach: Kanner aus Famillen a besonnesch schwierege soziale Situatiounen haten bis elo Prioritéit.
👉 Besonnesch problematesch: D’Prioritéit fält ewech, wann den Elterendeel net schafft – och bei elengerzéiende Famillen, wou den Elterendeel z. B. duerch eng schwéier Krankheet (wéi Kriibs) arbechtsonfäheg ass.
👉 Dat trefft Famillen genau dann, wann se an enger extrem vulnerabler Situatioun sinn.
👉 Chancëgläichheet fänkt do un, wou d’Gemeng déi Schwächste schützt.

🌳 PAP Rue de Schifflange – Fonds du Logement
👉 Net matgestëmmt. Dëse PAP entsprécht net méi den Ufuerderunge vun haut.
👉 Kritiséiert hu mir besonnesch:
• eng ze héich Buedemversiegelung
• keng Hëtztstudie trotz ëmmer méi heefegen Hëtzewellen
• ze wéineg Beem, Gréngflächen a Schiedzonen
• eng verpasste Chance, de Quartier mat engem modernen an nohaltegen Energiekonzept (Photovoltaik, Batteriespäicher, Wärmepompelen…) ze plangen.
👉 En neie Quartier muss haut esou geplangt sinn, datt d’Leit och bei Hëtzewellen do gesond a liewenswäert kënne wunnen.
👉 Mir brauchen Wunnquartieren, déi Klimaschutz, Liewensqualitéit a sozial Nohaltegkeet konsequent verbannen.

19/06/2026

De Bezirk Süden stäerken 🌻💚
Mat vill Engagement a konkreten Iddien hunn d’Käler Gréng aktiv matgeschafft. Zesumme setze mir eis fir e nohaltegen, liewenswäerten a solidarësche Süden an.

01/06/2026

De Weekend hate mir op een interessante Moie mam grénge Mann zu Käl am Bësch invitéiert. Mir kruten interessant Informatioune iwwer d'Natur a flott Geschichte verzielt.

Duerno hu mer de Mëtte bei enger Zopp an engem gudde Gedrénks ausklénge gelooss.

Merci all den Interesséierten déi deel geholl hunn.

20/05/2026

Fréijoers-Trëppeltour e Samschden, den 30. Mee! Vergiesst net iech unzemellen! 💚🍀🌻

12/05/2026

🟢 Gemengerot vum 6. Mee 2026 – eis Positiounen
Och dës Kéier hunn déi gréng konstruktiv matgeschafft, awer och kloer Kritik geäussert, wou Prioritéiten an déi falsch Richtung ginn.
✅ Matgestëmmt hu mir:
🌱 Mise à disposition vun engem Gemeinschaftsgaart
🌳 Konventioun mam SICONA: 44 Uebstbeem + Bau vun enger Dréchenmauer
🤝 Contrat de bail fir den Office social
☀️ Contrat de rachat vum iwwerschëssege Solarstroum
👉 Mee: Fir eis ass et eng verpasste Chance, dass d’Gemeng hire Solarstroum léiwer verkeeft amplaz e méi selwer ze notzen an domat Geld ze spueren.
Mir fuerderen de Schäfferot op, dës kuerzfristeg Approche ze iwwerdenken an eng Strategie fir méi Energie-Autonomie auszeschaffen.

💡 Déi gréng proposéieren:
⚡ De produzéierte Stroum aus de PV-Anlagen soll prioritär vun der Gemeng selwer genotzt ginn.
🌿 De Naturpark „Vir Bruch“ däerf net weider verfalen. Trotz opkaaften Terrainen ass de Site nach ëmmer net valoriséiert.
👉 Mir fuerderen, dass op mannst en Deel fir Naturaktivitéite mat Kanner amenagéiert gëtt.
🏭 ArcelorMittal ass senge Verpflichtungen um Crassier zu Téiteng nach ëmmer net komplett nokomm. Doduerch gi wichteg Projete blockéiert.
👉 Mir verlaangen, dass de Gemengerot eng formell Decisioun hëlt, fir eng Entschiedegung viru Geriicht anzefuerderen.
🟦 Mir hu proposéiert, e System anzeféieren, fir datt déi blo Valorlux-Tuten net méi duerch Wand oder Vandalismus op d'Strooss geheit ginn.
🚶‍♀️🚲 Mir fuerderen eng besser Koordinatioun vu Stroossechantiers an eng verbessert Sécherheet fir Foussgängerinnen a Velosfuererinnen.

❌ Net matgestëmmt hu mir:
📢 Eng Budgetserhéijung vu 66.000 € fir Kommunikatioun, Marketing a Publicitéit.
Domat klëmmt dëse Budget op 163.000 € – méi wéi dat Duebelt vum Budget 2024.
👉 Fir eis sinn dat falsch Prioritéiten, besonnesch zu enger Zäit, wou an anere Beräicher gespuert gëtt.

🟢 Déi gréng: nohalteg denken, Prioritéite richteg setzen a konkret Léisunge proposéieren.

11/05/2026

10/05/2026

10/05/2026

Ee flotten Dag um Käler Blummefest. Wéi all Joer erëm "The place to be"