CSV Lorentzweiler

03/11/2026

📣 NACH ENG WOCH!

🌾 Resilienz – Liewensmëttelproduktioun zu Lëtzebuerg erhalen

Den 10. November begréisse mir d’Landwirtschafts- a Sportsministesch Martine Hansen zu Luerenzweiler.

Wéi kënne mir eis Liewensmëttelproduktioun zu Lëtzebuerg laangfristeg erhalen a stäerken?

Kommt laanscht, informéiert Iech, diskutéiert mat a stellt Är Froen.

🗓️ 10. November 2026
🕢 19:30 Auer
📍 Foyer Saint Laurent
23, rue Saint Laurent · Luerenzweiler

Mir freeën eis op Iech!

26/10/2026

Eis häerzlecht Bäileed. 😔🕊️

🕊️Mat grousser Trauer soe mir dem Henri „Heng“ Frank fir ëmmer Äddi.

Den Heng war fir säi politescht Engagement am ganzen Osten an doriwwer eraus bekannt, hien war insgesamt 36 Joer Buergermeeschter vun der Gemeng Manternach. Hei huet hie sech wesentlech fir d‘Wuel vun de Biergerinnen a Bierger, fir den Ausbau vun den Infrastrukturen a fir déi politesch Entwécklung vun der Gemeng agesat.

Och an der CSV huet hie verschidde Posten op lokalem a regionalem Niveau bekleet. Ausserdeem war hie President vun de Chrëschtlech-soziale Gemengeréit.

Eist häerzlechst Bäileed an déifst Matgefill geet u seng Famill an un all seng Léifsten. Mir wënschen hinnen an dëser schwéierer Zäit vill Kraaft a Courage.

23/10/2026

📌 SAVE THE DATE

🌾 Resilienz – Liewensmëttelproduktioun zu Lëtzebuerg erhalen!

Mir invitéieren Iech op en interessanten Owend mat der Landwirtschafts- a Sportsministesch Martine Hansen zu Luerenzweiler.

🗓️ 10. November 2026 | 19:30 Auer
📍 Foyer Saint Laurent
23, rue Saint Laurent · L-7370 Luerenzweiler

Wéi kënne mir eis Liewensmëttelproduktioun zu Lëtzebuerg laangfristeg erhalen a stäerken? 🌱🇱🇺

Save the date – mir freeën eis op Iech!

22/10/2026

Eng interessant a lieweg Konferenz mam Finanzminister Gilles Roth zu Luerenzweiler!

Gëschter Owend, den 21. Oktober, hate mir de Finanzminister Gilles Roth bei eis am Foyer Saint Laurent op Besuch.

Ënnert dem Thema „Wat bedeit déi nei Steierklass fir Äre Portmonni?“ huet hien déi geplangte Steierreform op eng verständlech, konkret an uspriechend Manéier erkläert.

💬 Besonnesch flott war de liewegen Austausch mam Publikum. Et gouf nogefrot, diskutéiert, awer och gelaacht! Eng Konferenz, déi gewisen huet, datt och e komplext Thema wéi d’Steiere spannend an no beim Alldag vun de Leit ka sinn.

👏 E grousse Merci un de Gilles Roth fir seng interessant Erklärungen, seng oppen Aart an den direkten Dialog mat de Bierger.

🙏 Merci och un all déi Leit, déi dobäi waren an duerch hir Froen a Bäiträg zu dësem gelongenen Owend bäigedroen hunn!

📸 E puer Andréck vun engem informativen a gesellegen Owend.

10/10/2026

🏋️ FITNESSRAUM – QUO VADIS? ❓

Firwat gouf de Fitnessraum an der Sportshal zu Luerenzweiler definitiv zougemaach?

Sport ass wichteg fir eis Gesondheet, eis Jugend an d’Zesummeliewen an eiser Gemeng. D’Sportsveräiner spillen dobäi eng zentral Roll.

D'definitiv Zoumaachen vum Fitnessraum an der Sportshal suergt bei de lokale Veräiner fir Onverständnis, Onzefriddenheet a grouss Problemer.

No den Informatiounen, déi de Veräiner matgedeelt goufen, soll d’Zoumaachen duerch Vandalismus an eng geplangten Ëmnotzung vun de Raimlechkeeten zu Klassesäll begrënnt sinn.

⚠️ Dobäi stelle mir eis eng Rei wochteg Froen:

🔹 Firwat gouf de Fitnessraum definitiv zougemaach?

🔹 Firwat goufen déi betraffe Veräiner net am Virfeld consultéiert?

🔹 Wat geschitt mam Fitnessmaterial?

🔹 Wéi eng Alternativen ginn de Veräiner ugebueden?

🔹 Wéi eng Auswierkungen huet dës Entscheedung op d’Jugend an de lokale Sport?

🤝 Déi dräi Oppositiounsfraktiounen CSV, déi gréng an DP hunn dofir gemeinsam eng offiziell Ufro un de Schäfferot geriicht, fir Äntwerten op dës an aner Froen ze kréien.

Mir fuerderen, datt dësen Dossier nach eng Kéier iwwerpréift gëtt an eng passend Léisung fir déi betraffe Sportsveräiner fonnt gëtt.

💙💚💛 Fir eis Veräiner. Fir eis Jugend. Fir de Sport an eiser Gemeng.

09/10/2026

Quo Vadis Lokale Maart....

09/10/2026

LOKALE MAART 🛍️

Dëst Joer fënnt de lokale Maart ënnert anerer Form an op engem aneren Datum wéi ugekënnegt statt.

Wat stécht hannert dëse kuerzfristegen Ännerungen?

E liewege lokale Maart ass eis wichteg – an Transparenz bei esou Entscheedungen och!

08/10/2026

🌱 Klimaschutz an Energietransitioun – och bei eis zu Luerenzweiler!

Gëschter den Owend stoung zu Sandweiler eng interessant Konferenz mam Ëmweltminister Serge Wilmes um Programm.

Am Mëttelpunkt stoungen d’Klimabonus-Hëllefen, d’energetesch Sanéierung, d’Elektromobilitéit an de Schutz vun eiser Natur.

⚡ E konkret Beispill aus eiser Gemeng: De Projet „Mir deele Stroum“ zu Luerenzweiler gouf am Kader vun der Konferenz virgestallt.

Dës Initiativ weist, wéi lokal produzéierte Solarstroum gedeelt ka ginn a wéi mir gemeinsam zu enger méi nohalteger Energieversuergung bäidroe kënnen.

🤝 En informativen Owend mat interessanten Diskussiounen an engem flotte gemeinsamen Austausch.

💛 E grousse Merci un all d’Referenten an d’Organisateure fir déi gelongen Konferenz!