01/11/2026
Maanta, oo ay kow iyo toban sano ka soo wareegtay geeridii naxdinta lahayd ee Marxuum Jeneraal Cabdikariim Yuusuf Aadam (Dhegabadan), oo geeriyooday 1-dii Nofeembar 2015, waxaan xus iyo maamuus ku weynaynaynaa halyey Soomaaliyeed oo naftiisa qaaliga ah u huray difaaca dadkiisa, dalkiisa iyo diintiisa.
Marxuumku wuxuu ka mid ahaa geesiyaashii u istaagay difaaca shacabka Soomaaliyeed, kana dhiidhiyey dhibaatadii iyo gumaadkii ay kooxda xagjirka ah ee Khawaarijta ku haysay dalkiisa iyo dadkiisa.
Waxa uu tusaale u ahaa geesinnimo, waddaniyad, xilkasnimo iyo naf-hurnimo mudan xus iyo maamuus.
Jeneraal Cabdikariim (Dhegabadan) wuxuu ahaa halyey ka soo jeeday deegaannada Galmudug, gaar ahaan degmada Xeraale ee gobolka Galguduud, kaalintii uu ku lahaa halgankuna waxa ay sharaf iyo magac wanaagsan u soo hoysay dalkiisa iyo deegaankiisa Galmudug.
Waxaa sidoo kale mudan in la xuso qoyskiisa iyo ehelkiisa, oo taariikh gaar ah ku leh halganka lagaga soo horjeedo kooxda Al-Shabaab iyaga oo qayb naf-hurnnimo ah ku lahaa halgankii ay bulshada Galmudug u gashay difaaca deegaannadeeda, nabadda iyo karaamada dadkeeda.
Geeridiisu waxa ay murugo weyn ku reebtay qaranka Soomaaliyeed, gaar ahaan ehelkiisii, saaxiibbadiisii iyo guud ahaanna ummadda Soomaaliyeed. Hase yeeshee, halgankii uu dalkiisa u soo galay, kaalintii uu ku lahaa difaaca shacabka iyo raadkii wanaagsanaa ee uu ka tegay waxa ay mudan yihiin in ay tusaale u noqdaan jiilasha Soomaaliyeed iyo dhaxal taariikheed oo jiil waliba u gudbiyo jiilasha ka dambeeya.
Haddaba, anigoo ku hadlaya magacayga, magaca shacabka iyo kan Dowlad-Goboleedka Galmudug, waxaan farriin xus, maamuus iyo duco ah u dirayaa Marxuum Jeneraal Cabdikariim Yuusuf Aadam (Dhegabadan) iyo dhammaan halyeeyadii Soomaaliyeed ee naftooda u huray difaaca diinta, dadka iyo dalka, sugidda nabadda iyo dhowrista sharafta ummadda.
Waxaan si gaar ah u xusuusanaynaa hooyooyinkii wiilashooda waayey, carruurtii aabbayaashood waayey iyo qoysaskii ay ka geeriyoodeen geesiyaashii u naf-waayey difaaca dalkooda. Waxaan u xaqiijinayaa in aynaan marnaba illaawi doonin naf-hurnimadii halyeeyadooda, isla markaana xusuustooda iyo maamuuskoodu ay weligood ku sii jiri doonaan quluubta ummadda Soomaaliyeed, gaar ahaan reer Galmudug.
Waxaa sidoo kale si gaar ah noogu waajib ah in aan xusuusta halyeygeenna Marxuum Jeneraal Cabdikariim Yuusuf Aadam (Dhegabadan) ku maamuusno adkaynta nabadda, dhowrista midnimada, dhismaha dowladnimada iyo u adeegidda shacabka uu naftiisa u huray.
Alle (SWT) ha u dembi dhaafo Jeneraal Cabdikariim Dhegabadan, ha u naxariisto, hoygiisa aakhirana ha ka yeelo Jannatul Firdowsa. Aamiin.
