02/11/2026
“Mësues për Italinë”, Qeveria premton 25 milion lek buxhet për 50 mësues - Nga Yllka Lezo
Një premtim i mbajtur ndaj diasporës apo një lëvizje politike për t’u treguar shqiptarëve në Itali se qeveria nuk i ka harruar, edhe në mandatin e katërt i cili zien mes protestave, skandaleve dhe dosjeve të funksionarëve të lartë në zyrat e SPAK?
Më 2 nëntor 2026, gjatë prezantimit të projektbuxhetit të Ministrisë për Evropën dhe Punët e Jashtme për vitin 2027, ministri Ferit Hoxha njoftoi zgjerimin e programit “Mësues për Greqinë” edhe në Itali. Sipas të dhënave të bëra publike për këtë nismë, parashikohen 25 milionë lekë dhe mbështetja e 50 mësuesve.
Sigurisht që ky është një lajm pozitiv. Italia është një nga vendet me komunitetin më të madh shqiptar në Evropë dhe nevoja për mësimin e gjuhës shqipe është e konsiderueshme. Për shumë familje shqiptare, ruajtja e gjuhës së origjinës është një shqetësim i përditshëm, ndërsa mësuesit që kanë mbajtur gjallë shkollat shqipe kanë bërë një punë që shteti shqiptar për dekada nuk e ka mbështetur financiarisht.
Por pikërisht këtu duhët ngritur një pyetje thelbësore: A është ky program një politikë serioze arsimore për diasporën apo thjesht një skemë e kufizuar financimi, e cila nuk zgjidh problemet e vjetra të mësimit të gjuhës shqipe?
25 milionë lekë për 50 mësues: sa është realisht mbështetja?
Ministri Hoxha e prezantoi nismën si vazhdim të modelit të zbatuar në Greqi, duke e cilësuar atë një përvojë të suksesshme.
Sipas deklaratës së tij, “shteti shqiptar paguan mësues të certifikuar, të cilët zhvillojnë mësim në shkolla dhe ushtrojnë profesionin e tyre kundrejt një pagese mujore”.
Por (ndoshta sepse “Mësues për Italinë” ishte nje pjesë e vogël e prezantimit të projektbuxhetit të MPEJ!!! ) ministri nuk përmendi një bilanc konkret të programit në Greqi: sa mësues janë financuar, sa nxënës kanë përfituar, sa shkolla janë përfshirë, sa është rritur numri i fëmijëve që ndjekin mësimin dhe cilat janë rezultatet e matshme të kësaj nisme.
Të thuash se një program ka rezultuar i suksesshëm nuk është e njëjta gjë me të paraqitur një vlerësim të dokumentuar të rezultateve të tij.
Sipas modelit të zbatuar në Greqi, mësuesit përfitojnë rreth 340 euro në muaj për dy orë mësimi në javë, me kohëzgjatje 60 minuta për orë. Kontrata parashikohet për nëntë muaj dhe pagesat realizohen përmes ambasadës shqiptare, e cila ndjek dhe monitoron zbatimin e programit.
Nëse i njëjti model do të zbatohet në Itali, atëherë lind një tjetër pyetje: si është përllogaritur fondi prej 25 milionë lekësh?
Nëse 50 mësues do të paguhen me 340 euro në muaj për nëntë muaj, fondi i përgjithshëm i pagesave do të ishte 153 mijë euro, pa përfshirë ndonjë shpenzim tjetër. Kjo shumë duhet krahasuar me fondin e deklaruar prej 25 milionë lekësh (përafërsisht 275 mijë euro) dhe të shoqërohet me një pasqyrë të qartë financiare.
Ministria duhet të bëjë publike ndarjen e buxhetit: sa shkon për pagesat e mësuesve, sa për administrimin, sa për monitorimin dhe nëse ka fonde të tjera të parashikuara për programin.
Transparenca nuk është një kërkesë e tepruar. Bëhet fjalë për para publike dhe për një program që synon të mbrojë një interes kombëtar.
Lexo shkrimin e plotë në link në koment 👇
