27/10/2026
அனைத்திந்திய விவசாய, கிராமப்புர தொழிலாளர் சங்கம்
7வது மாநில மாநாட்டில் நிறைவேற்றப்பட்ட தீர்மானங்கள்:-
2026, அக்டோபர் 26, 27 நாட்களில் புதுக்கோட்டை, தோழர்கள் நாகபூஷன்-ராம் நரேஷ் ராம்-டிகேஎஸ் ஜனார்த்தனன் அரங்கில் (விஜய் பேலஸ்) நடைபெற்ற 7வது மாநில மாநாட்டில் நிறைவேற்றப்பட்ட தீர்மானங்கள்:
1) உலகம் முழுவதுமுள்ள ஏகாதிபத்திய எதிர்ப்பு சக்திகளுக்கு பெரும் உற்சாகம் அளிக்கிற வகையிலும் அடாவடி ட்ரம்ப் தலைமையிலான அமெரிக்க வல்லரசு அரசியலுக்கும் அவரது பிரேசிலிய தீவிர வலதுசாரி கூட்டாளி போல்ஸனரோவுக்கும் பலத்த அடிகொடுக்கிற வகையிலும் 4வது முறையாக லூலாவை வெற்றிபெற வைத்த லத்தின் அமெரிக்காவின் பிரேசில் தேர்தல் முடிவை மாநாடு வரவேற்கிறது. உலகம் முழுவதும் மக்கள் சார்பு கொள்கைகளுக்காக மக்கள் போராட்டங்கள் தீவிரம் பெற்று வரும் வேளையில், பிரேசில் லூலா அரசின் மக்கள் சார்பு கொள்கைகளுக்கு அழுத்தமான ஆதரவளிக்கிற வகையில் பிரேசில் மக்கள் தீர்ப்பை மாநாடு வரவேற்று பாராட்டுகிறது.
2) 13 கோடிக்கு மேற்பட்ட குடிமக்களின் வாக்குரிமையை பறித்து கொடூர குற்றம் புரிந்த தலைமை தேர்தல் ஆணையர் ஞானேஷ்குமாரை பதவி நீக்கம் செய்ய வேண்டும். சிறப்பு வாக்காளர் திருத்த நடவடிக்கையை ரத்து செய்யவேண்டும். தேர்தல் ஆணையர் தேர்வு தொடர்பான 2023 திருத்தச் சட்டத்தை ரத்து செய்யவேண்டுமென ஒன்றிய அரசை மாநாடு வலியுறுத்துகிறது. நாட்டு மக்களின் வாக்குரிமையை மீட்டெடுக்கவும் சுதந்திரமான, நியாயமான தேர்தல் முறையை பாதுகாக்கவும் நாடுதழுவிய அளவில் நடக்கும் மாணவர், இளைஞர், குடிமக்கள் நடத்திவரும் ஜனநாயகத்துக்கான போராட்டத்தை மாநாடு முழுமனதுடன் ஆதரிக்கிறது. எல்லாவகையிலும் இந்த போராட்டத்தை வெற்றிபெறச் செய்ய மாநாடு உறுதி ஏற்கிறது. ஜனநாயகத்தைப் பாதுகாக்க போராடி வரும் இளைய தலமுறையின் போராட்டங்களை மூர்க்கத்தனமாக நசுக்கத் துடிக்கும் பாசிச மோடி அரசாங்கத்தை மாநாடு வன்மையாக கண்டிக்கிறது.
3) நாட்டிலுள்ள கிராமப்புர வறிய மக்களின் முக்கிய வாழ்வாதாரமாக இருந்த மகாத்மா காந்தி தேசிய ஊரக வேலை உறுதித்திட்டத்தை ஒழித்துக்கட்டி, வேலை வாய்ப்பு உத்தரவாதத்தின் மீது கொடும் தாக்குதலை நடத்தியுள்ள மோடி அரசாங்கத்தை மாநாடு வன்மையாக கண்டிக்கிறது. ஆண்டுக்கு 200 நாட்கள் வேலையும்; நாளொன்றுக்கு ரூ 1000 ஊதியமும்; செயற்கை நுண்ணறிவு தொழில்நுட்பத்தை புகுத்தி தொழிலாளரை வேலையிலிருந்து விரட்டியடிக்கும் கருவிழிபடம், விரல் ரேகை படம் எடுக்கும் முறையை நீக்கி திட்டத்தை விவசாயத்துக்கும் பேரூராட்சி பகுதிகளுக்கும் விரிவுபடுத்தி மேம்படுத்தப்பட்ட மகாத்மா காந்தி தேசிய ஊரக வேலைத்திட்டத்தை மீண்டும் கொண்டுவர வேண்டுமென மாநாடு வலியுறுத்துகிறது. தேர்தல் வாக்குறுதிப்படி, நிபந்தனைகள் எதுவுமின்றி 25 நாட்கள் வேலை வழங்குவதற்கான நிதி ஒதுக்கீடு செய்திட வேண்டும். விவசாய, கிராமப்புர தொழிலாளருக்கு ஓய்வூதியம் மாதம் ரூ 10,000, இலவச மருத்துவக் காப்பீடு, வேலைசெய்யும் இடத்தில் மரணமுற்றால் நிவாரணம் ரூ பத்து லட்சம் உள்ளிட்ட சமூகப் பாதுகாப்பு நடவடிக்கைகளை தமிழ்நாடு அரசு விரைந்து செயல்படுத்திட வேண்டும். இந்த கோரிக்கைகளை நிறைவேற்ற ஒன்றிய, மாநில அரசுகளை வலியுறுத்தி தொடர் போராட்ட இயக்கங்களை நடத்தவும் மாநாடு முடிவுசெய்கிறது.
4) வீட்டுமனை, வீடு வறிய மக்களின் அடிப்படை வாழ்வாதாரமாகவும் அடையாளமாகவும் உள்ளது. ஒன்றிய, மாநில ஆட்சிகளின் கவர்ச்சிகரமான பல திட்டங்களுக்குப்பிறகும் மாநிலத்தில் பலபத்து லட்சம் கிராமப்புர வறிய மக்கள் வாழத்தகுந்த வீடுகள் இல்லாமலும் குடியிருக்கும் இடங்களுக்கு பட்டா இல்லாமலும் பல தலைமுறைகளாக துயரத்தில் வாழ்ந்து வருகின்றனர். திமுக ஆட்சியில், 22 லட்சம் பட்டாக்கள் கொடுத்துள்ளோம்; தவெக ஆட்சியில் 27 லட்சம் பட்டாக்கள் கொடுக்கப் போகிறோம் என்ற அறிவிப்புகள் தொடர்ந்து வருகின்றன. வீட்டுமனை இருந்தால்தான் அரசாங்க திட்டங்களில் வீடு கிடைக்கும் என்ற தவறான நிபந்தனைகளும் விதிக்கப்படுகின்றன.
இந்த நிலமைகளுக்கு முற்றுப்புள்ளி வைக்க, குறிப்பிட்ட காலக்கெடுவுக்குள் வீடு, வீட்டுமனை இல்லாதவர், குடிமனைக்கு பட்டா இல்லாதவர்களின் கணக்கெடுப்பை நடத்திட வேண்டும். அனைவருக்கும் வீட்டுமனையுடன் கூடிய வீடு, குடியிருக்கும் இடங்களுக்கு பட்டா வழங்கிட வேண்டும். அரசு வசமுள்ள நிலங்களை வீட்டு மனை, வீடு திட்டங்களுக்கு முன்னுரிமை அடிப்படையில் ஒதுக்கிட வேண்டும். ஒன்றிய, மாநில அரசாங்கங்கள் வீடுபெறும் உரிமையை அடிப்படை உரிமையாக்கி சட்டம் இயற்ற வேண்டுமென மாநாடு வலியுறுத்துகிறது.
5) மிட்டா, மிராசுகளின் முதுகெலும்பை ஒடித்த கட்சி எனப்பேசினாலும் ‘நிலப்பிரபுத்துவம் வீழ்ந்த கதை’ என ஆய்வு நூல்கள் வந்தாலும் கடந்தகால திராவிட ஆட்சிகள் முற்போக்கான நிலச் சீர்திருத்தத்தை செய்யத் தவறிவிட்டன. மக்கள் பெரிய எதிர்பார்ப்புகளுடன் தவெக ஆட்சிக்கு வாக்களித்துள்ளனர். விவசாயத்துக்கும் உணவுப் பாதுகாப்புக்கும் புத்துயிர் ஊட்டுகிற வகையில் மக்கள் சார்பு நில மறு விநியோகக் கொள்கையை தவெக ஆட்சி செயல் படுத்திட வேண்டும். நில உச்சவரம்பின் அளவைக் குறைப்பது, கோவில், மடம், அறக்கட்டளைகளுக்கு வழங்கப்பட்டுள்ள விதிவிலக்குகளை ரத்து செய்வது, குத்தகை சாகுபடியாளர்களுக்கு நிலத்தை சொந்தமாக்குவது, பஞ்சமி நிலங்களை சட்டவிரோத ஆக்கிரமிப்பிலிருந்து மீட்டு தலித்துகளுக்கே வழங்குவது, மத நிறுவன நிலங்களில் குடியிருப்போருக்கு நிலத்தை சொந்தமாக்குவது, வன உரிமைச் சட்டம் 2006 ன் படி பழங்குடி மக்களுக்கு நில உரிமை வழங்குவது, இனாம் நிலங்களை அபகரிக்க முயலும் கோவில் நிர்வாக முயற்சிகளை முறியடிக்க இனாம் ஒழிப்புசட்டத்தை தீவிரமாக செயல்படுத்துவது, வழக்குகளை காட்டி இழுத்தடிக்கும் முயற்சிக்கு முற்றுப்புள்ளி வைக்க உரிய சட்ட நடவடிக்கைகளை மேற்கொள்வது உள்ளிட்ட மக்கள் சார்பு நில மறு விநியோக நடவடிக்கைகளை அவசர அடிப்படையில் தவெக அரசு செய்திட வேண்டும்.
6) வரலாற்றுச்சிறப்புமிக்க கோவை சின்னியம்பாளையம் தியாகிகளுக்கும் கார்ப்பரேட் ஸ்டெர்லைட் எதிர்ப்பு போராட்டத்தில் கொல்லப்பட்ட தூத்துக்குடி தியாகிகளுக்கும் அரசு நினைவுச்சின்னம் எழுப்பிட வேண்டும். தொழிற்சங்க ஜனநாயகத்துக்காகவும் தொழிலாளர் உரிமைக்காகவும் வீரமிக்க வகையில் போராடிய பிரிக்கால் தொழிலாளர் போராட்டத்தில் அநீதியாக ஆயுள்தண்டனை விதிக்கப்பட்டு 2011 டிசம்பர் முதல் கடந்த 10 ஆண்டுகளுக்கு மேலாக சிறையிலுள்ள தோழர்கள் மணிவண்ணன், ராமமூர்த்தி இருவரையும் கருணை அடிப்படையில் முன்கூட்டியே விடுதலை செய்ய வேண்டுமென தமிழ்நாடு அரசை மாநாடு வலியுறுத்திக் கேட்டுக் கொள்கிறது. அவர்களது விடுதலையை கோரி வரும் டிசம்பரில் எஅய்சிசிடியூ நடத்த உள்ள இயக்கத்தில் பங்கு பெறுவதென்றும் மாநாடு முடிவு செய்கிறது.
7) தமிழ்நாடு முழுவதும் தாழ்த்தப்பட்ட, மிகவும் பிற்படுத்தப்பட்ட சமூக மக்கள் உரிய இடுகாடு, சுடுகாடு வசதிகளின்றி துன்புறுத்தலுக்கு ஆளாக்கப்பட்டு வருகின்றனர். சமீபத்தில் நாமக்கல் மாவட்ட பகுதியில் பிணத்தை எரியூட்டுவதற்கு அனுமதிக்க வேண்டி பொதுவெளியில் உயர்சாதி பிரதிநிதிகளது காலில் விழுந்து வணங்கும் வன்முறை அரங்கேற்றப்பட்டுள்ளது. இத்தகைய மானுட விரோத கொடூரங்கள் தொடர்ந்து நிகழ்கின்றன. தென்மாவட்டங்களில் உள்ள கல்விக்கூடங்களில் தலைவிரித்தாடிய சாதி ஆணவக் கொடூரங்கள் மேற்கு மாவட்டங்களுக்கும் பரவி வருகிறது. கோவையில் பள்ளி மாணவன் அகிலன் சாதிய துன்புறுத்தலால் தற்கொலை செய்துகொண்ட கொடூரச்செய்தி நாகரிக சமுதாயத்தின் மனசாட்சியை உலுக்குகிறது. காதல் வெறுப்பு சாதி ஆணவக் கொலைகள், பெண்கள், சிறுமிகள் மீது தொடரும் ‘வீரமணி வகை’ வன்முறைகள் ஆகியவற்றுக்கு முற்றுப்புள்ளி வைக்கும் சமூகக் கொள்கைகளை தவெக ஆட்சி விரைந்து செயல்படுத்திட வேண்டும். பொது சுடுகாடு/இடுகாடு முறையை கொண்டுவருவது, ஆணவக் கொலை தடுப்புச் சட்டத்தைக் விரைந்து கொண்டு வருவது, நீதிபதி சந்துரு ஆணைய பரிந்துரைகளை, அருணாஜெகதீசன் ஆணைய பரிந்துரைகளை செயல்படுத்துவது, வன்கொடுமை தடுப்புச் சட்டத்தை தீவிரமாக செயல்படுத்துவது உள்ளிட்டவற்றை விரைவாக நிறைவேற்றிட வேண்டும். இதன்மூலம், சாதி ஒழிப்பு, பெண்ணடிமைத்தன எதிர்ப்பு மரபு கொண்ட தமிழ்நாட்டில், தலித்துகள், மிகவும் பிற்படுத்தப்பட்டோர், பெண்கள், சிறுமிகள், விளிம்புநிலைப் பிரிவினர் ஆகியோரது பாதுகாப்பையும் கண்ணியத்தையும் உறுதிப்படுத்த தேவையான சமூக நடவடிக்கைகளை தவெக ஆட்சி தாமதமின்றி செய்திட வேண்டுமென மாநாடு வலியுறுத்துகிறது.
8) நாகரிக மானுடத்தின் மீதும் தமிழ்நாட்டின் முற்போக்கு மானுட மரபின் மீதும் தொடுக்கப்பட்ட அருவருப்பான தாக்குதலாக கடந்த திமுக ஆட்சிக்காலத்தில் வேங்கை வயல் தலித்துகள் அருந்தும் தண்ணீரில் மலம் கலக்கப்பட்ட நிகழ்வு நடந்தது. அதைவிடவும் கொடூரமாக அந்த செயலுக்கு தலித்துகளையே குற்றவாளிகளாக்கி வழக்கு நடத்தப்பட்டு வருகிறது. சமூகநீதி கொள்கைப் பிரகடனத்தை அறிவித்துள்ள தவெக ஆட்சி, சமூக அநீதிக்கும் துன்புறுத்தலுக்கும் ஆளான வேங்கை வயல் தலித்துகளுக்கு நீதி வழங்கும் விதமாக விரைந்து மறுவிசாரணை செய்து உண்மையான குற்றவாளிகளை சட்டத்தின் முன் நிறுத்த வேண்டும்; குற்றம்சாட்டப்பட்டுள்ள தலித்துகளை விடுவிக்க வேண்டுமென மாநாடு வலியுறுத்துகிறது.
9) சென்னையில் தொடங்கிய தூய்மைப் பணியாளர்களின் சமூகநீதி, சமத்துவம், சமூக கண்ணியத்துக்கான போராட்டத்தை முழுமனதுடன் ஆதரித்து மாநாடு ஒருமைப்பாடு தெரிவிக்கிறது. மாநிலம் முழுவதுமுள்ள தூய்மைப்பணியில் ஒப்பந்த முறையை ரத்து செய்து, அனைத்துவகை தூய்மைப் பணியாளர்களுக்கும் சமவேலைக்கு சம ஊதியத்தை செயல்படுத்திட வேண்டும். தவெக தேர்தல் வாக்குறுதிப்படி 5 ஆண்டுகள் பணிபுரிந்த தூய்மைப் பணியாளர்கள் அனைவரையும் நிரந்தரப் படுத்திட வேண்டும். தமிழ்நாடு முழுவதும் டாஸ்மாக் கடைகளை மூடிவிட்டு ஊழியர்கள் அனைவருக்கும் பணிநிரந்தரத்துடன் மாற்று அரசுப்பணி வழங்கிட வேண்டுமென்ற அவர்களது நியாயமான கோரிக்கையை தவெக அரசு ஏற்று விரைந்து செயல்படுத்திட வேண்டுமென மாநாடு கோருகிறது.
10) தவெக தேர்தல் வாக்குறுதிகள் படி விவசாயக் கடனை முழுமையாக தள்ளுபடி செய்ய வலியுறுத்தி தமிழ்நாடு முழுவதும் விவசாயிகள் நடத்திவரும் போராட்டத்தை மாநாடு ஆதரிக்கிறது. விவசாயிகளின் கோரிக்கைகளை நிறைவேற்ற வேண்டுமென வலியுறுத்துகிறது. கடந்த திமுக ஆட்சியில் நிறைவேற்றப்பட்ட நில ஒருங்கிணைப்பு சட்டத்தை ரத்து செய்ய வேண்டுமென மாநாடு வலியுறுத்துகிறது. கைவிடப்பட்ட பரந்தூர் விமான நிலையத்திற்காக கையகப்படுத்தப்பட்ட விவசாய நிலங்களை மாற்று தொழில் திட்டங்களுக்கு பயன்படுத்தாமல் விவசாயிகளிடமே மீண்டும் ஒப்படைக்க வேண்டுமென மாநாடு வலியுறுத்துகிறது.
11) தேசிய கல்விக் கொள்கை,2020 வலியுறுத்தும் கல்வியை வணிக மயமாக்கும் வகையிலும் கல்வியில் சமூகநீதியை மறுக்கும் விதத்திலும் நிறைவேற்றப்பட்டுள்ள ஆபத்தான புதிய பல்கலைக் கழக சட்டத்தை திரும்பப்பெற வேண்டுமென மாநாடு வலியுறுத்துகிறது. கல்லூரிகள், பல்கலைக் கழகங்களின் நிர்வாகத்தை ஜனநாயகப் படுத்தும் விதமாக மாணவர் பேரவைத் தேர்தல்களை நடத்திட வேண்டுமென தவெக அரசை மாநாடு வலியுறுத்துகிறது.
