12/10/2026
Déi 5. Editioun vum Symposium „Beweegung, méi ewéi nëmmen Sport? Sport, méi ewéi nëmmen Beweegung?” am LTPES mat der Participatioun vum Educatiounsminister Claude Meisch an der Sportministesch Martine Hansen war erëm ee grousse Succès.
De Symposium huet sech nees mam Wierkungsgeflecht vu Beweegung a Sport am Kontext vun der ganzheetlecher Entwécklung bei ganz klenge Kanner, bei Kanner a bei Jugendlechen auserneegesat mam d'Zil, d’Akteuren am Beräich vun der Beweegungsförderung ze ënnerstëtzen. D'Editioun vum Symposium vun dësem Joer stoung ënnert dem Titel „Beweegung – denken, fillen, erliewen“ an huet sech also op d‘Zesummespill vu Beweegung, Kognitioun an sozial-emotionaler Entwécklung konzentréiert.
De positiven Afloss vu Beweegung a Sport op déi kierperlech, sozial, psychesch-emotional a kognitiv Entwécklung ass onëmstridden. An deem Sënn soll d’Erausfuerderung ugeholl ginn an dem Beweegungsmangel an deenen domat zesummenhängende gesondheetleche Probleemer entgéintgewierkt ginn, andeems d’Loscht un der Beweegung vu klengem un an iwwer déi verschidde Liewensspannen an alle Liewensberäicher an de Mëttelpunkt geréckelt gëtt.
Dëst Joer war ewéi virun zwee Joer erëm de Prof. Dr. Rolf Schwarz (Pädagogische Hochschule Karlsruhe) op Besuch fir de Keynote-Virtrag zur Eröffnung vum Symposium. Duerno stoungen eng grouss Unzuel un inspiréierende Workshope vun nationalen an internationalen Experten an der Beweegungsförderung um Programm.
Och dëst Joer hunn erëm bal 200 Participanten mat vill Engagement aktiv un deene sëllechen Atelieren deelgeholl a sech mëttes un deem vun der Direction de la Santé vum Gesondheetsministère offréierte gesonde Buffet gestäerkt.
