09/11/2026
𝐖𝐚𝐬𝐚𝐚𝐫𝐚𝐝𝐝𝐚 𝐌𝐚𝐚𝐥𝐢𝐲𝐚𝐝𝐝𝐚 𝐢𝐲𝐨 𝐇𝐨𝐫𝐮𝐦𝐚𝐫𝐢𝐧𝐭𝐚 𝐃𝐡𝐚𝐪𝐚𝐚𝐥𝐚𝐡𝐚 𝐉𝐒𝐋 𝐨𝐨 𝐊𝐮𝐥𝐚𝐧 𝐋𝐚 𝐘𝐞𝐞𝐥𝐚𝐭𝐚𝐲 𝐖𝐞𝐟𝐭𝐢 𝐊𝐚 𝐒𝐨𝐜𝐝𝐚𝐲 𝐁𝐚𝐧𝐠𝐢𝐠𝐚 𝐀𝐝𝐝𝐮𝐮𝐧𝐤𝐚................................................................................
𝐇𝐚𝐫𝐠𝐞𝐲𝐬𝐚, 𝟎𝟗 𝐍𝐨𝐯𝐞𝐦𝐛𝐞𝐫 𝟐𝟎𝟐𝟔 (𝐖𝐌&𝐇𝐃𝐡) –
Wasaaradda Maaliyadda iyo Horumarinta Dhaqaalaha Jamhuuriyadda Somaliland ayaa maanta kulan muhiim ah la yeelatay wefti ka socday Bangiga Adduunka, kaas oo dalka u jooga qiimaynta heerka fulineed ee mashaariicda horumarinta kaabayaasha dhaqaalaha, gaar ahaan mashaariicda dhismaha iyo horumarinta waddooyinka.
Kulanka oo ay ka qaybgaleen Wasiirka Wasaaradda Maaliyadda iyo Horumarinta Dhaqaalaha JSL, 𝐌𝐮𝐝𝐚𝐧𝐞 𝐂𝐚𝐛𝐝𝐢𝐥𝐥𝐚𝐚𝐡𝐢 𝐗𝐚𝐬𝐚𝐧 𝐀𝐚𝐝𝐚𝐧, Wasiiru-dawlaha Wasaaradda Maaliyadda iyo Horumarinta Dhaqaalaha, 𝐌𝐮𝐝𝐚𝐧𝐞 𝐈𝐬𝐦𝐚𝐚𝐜𝐢𝐢𝐥 𝐌𝐚𝐰𝐥𝐢𝐢𝐝 𝐂𝐚𝐛𝐝𝐢𝐥𝐥𝐚𝐚𝐡𝐢, Wasiirka Wasaaradda Gaadiidka iyo Horumarinta Jidadka, 𝐌𝐮𝐝𝐚𝐧𝐞 𝐂𝐢𝐬𝐦𝐚𝐚𝐧 𝐈𝐛𝐫𝐚𝐚𝐡𝐢𝐧 𝐍𝐮𝐮𝐫 (𝐀𝐟𝐠𝐚𝐚𝐛),Agaasimaha Guud ee Wasaaradda Maaliyadda, 𝐌𝐮𝐝𝐚𝐧𝐞 𝐌𝐚𝐱𝐚𝐦𝐞𝐝 𝐗𝐚𝐬𝐚𝐧 𝐒𝐚𝐥𝐞𝐞𝐛𝐚𝐚𝐧, iyo masuuliyiin kale, ayaa diiradda lagu saaray saddex mashruuc oo Bangiga Adduunku maalgeliyo, kuwaas oo kala ah:
1. Stairs2Jobs MPA (Wejiga Koowaad).
2. Mashruuca Isku-xidhka Kaabayaasha Geeska Afrika (SHIIP).
3. Mashruuca NAGAAD.
Intii kulanku socday, waxa si gaar ah looga wada hadlay halka uu marayo diyaar-garowga mashruuca dhismaha waddada Haleeya–Ina Guuxa, dhammaystirka naqshaddeeda farsamo iyo diyaargarowga dhinaca Dawladda Somaliland ee ku aaddan hirgelinta mashruuca. Waddadan oo dhererkeedu yahay 94 KM ayaa noqonaysa waddada ugu dheer ee Bangiga Adduunku ka maalgeliyo Somaliland, waxaana la filayaa in hawlaha fulinteeda dhawaan la bilaabo.
Sidoo kale, kulanka waxa lagu falanqeeyey horumarka laga sameeyey mashruuca NAGAAD ee ay fulinayso Dawladda Hoose ee Hargeysa, gaar ahaan dhismaha Waddada 150-ka. Mashruucan ayaa maraya heer wanaagsan, waxaana la filayaa in dhawaan la soo bandhigo naqshadda waddada.
Wasiirka Wasaaradda Maaliyadda iyo Horumarinta Dhaqaalaha JSL, 𝐌𝐮𝐝𝐚𝐧𝐞 𝐂𝐚𝐛𝐝𝐢𝐥𝐥𝐚𝐚𝐡𝐢 𝐗𝐚𝐬𝐚𝐧 𝐀𝐚𝐝𝐚𝐧, ayaa weftiga uga warramay muhiimadda istaraatiijiyadeed ee waddada Haleeya–Ina Guuxa u leedahay koboca dhaqaalaha, isku-xidhka bulshada iyo fududaynta isu-socodka dadka iyo badeecadaha. Wasiirku waxa uu caddeeyey in Dawladda Somaliland ay diyaar u tahay gudashada dhammaan waajibaadka iyo hawlaha dhinaceeda ku xidhan, isla markaana ay ka go’an tahay dardargelinta iyo tayeynta fulinta mashaariicda horumarineed.
Wasiirku waxa kale oo uu carrabka ku adkeeyey baahida loo qabo in Somaliland lagula shaqeeyo hannaan tixgelinaya horumarka ay ka gaadhay dhinacyada dawlad-wanaagga, maamulka iyo diyaar-garowga hirgelinta mashaariicda. Waxa uu sidoo kale ku baaqay in si hufan oo degdeg ah loo dhammaystiro hawlaha farsamo, maaliyadeed iyo habraacyada qandaraasyada, si mashaariicdu ugu hirgalaan muddadii loogu talagalay, una gaadhaan ujeeddooyinkooda.
Dhankiisa, Wasiirka Wasaaradda Gaadiidka iyo Horumarinta Jidadka, 𝐌𝐮𝐝𝐚𝐧𝐞 𝐂𝐢𝐬𝐦𝐚𝐚𝐧 𝐈𝐛𝐫𝐚𝐚𝐡𝐢𝐧 𝐍𝐮𝐮𝐫 (𝐀𝐟𝐠𝐚𝐚𝐛), ayaa tilmaamay muhiimadda ay kaabayaasha dhaqaaluhu u leeyihiin koboca iyo horumarka Qaranka. Waxa uu xusay in Wasaaraddiisu si dhow ula socon doonto, isla markaana dabagal ku samayn doonto fulinta mashaariicda, si waafaqsan qorshayaasha iyo jadwallada loo dejiyey.
Sidoo kale, Agaasimaha Guud ee Wasaaradda Maaliyadda iyo Horumarinta Dhaqaalaha, 𝐌𝐮𝐝𝐚𝐧𝐞 𝐌𝐚𝐱𝐚𝐦𝐞𝐝 𝐗𝐚𝐬𝐚𝐧 𝐒𝐚𝐥𝐞𝐞𝐛𝐚𝐚𝐧, ayaa is dultaagay doorka Wasaaraddu ku leedahay isku-dubbaridka hay’adaha dawladda ee ku hawlan mashaariicdan, isaga oo sheegay in la sii xoojin doono wada-shaqaynta iyo isku-duwidda hay’adaha ay khusayso, si loo xaqiijiyo fulin hufan oo wax-ku-ool ah.
Wasaaradda Maaliyadda iyo Horumarinta Dhaqaalaha JSL waxa ka go’an xoojinta wada-shaqaynta hay’adaha horumarinta caalamiga ah iyo dardargelinta mashaariicda maalgashiga, si kor loogu qaado kaabayaasha dhaqaalaha, loo abuuro fursado shaqo, loona xoojiyo koboca iyo horumarka dhaqaale ee Jamhuuriyadda Somaliland.
●🆇/ 𝗧𝘄𝗶𝘁𝘁𝗲𝗿 :
https://x.com/slmofd/status/2119848525806567741?a=n31XlCtYb0mwJf71hFo&s=19
● 𝗪𝗲𝗯𝘀𝗶𝘁𝗲 :
https://slmof.org/news/view/?id=52b99810-d01c-44cd-bc98-4e223e9d5984
● 𝗜𝗻𝘀𝘁𝗮𝗴𝗿𝗮𝗺 :
https://www.instagram.com/p/Dfh3YKUjZQP/?srtk=NWR0ZjJheWZvOW05
=𝑾𝒂𝒃𝒊𝒍𝒍𝒂𝒂𝒉𝒊 𝑻𝒂𝒘𝒇𝒊𝒊𝒒=
𝐖𝐚𝐚𝐱𝐝𝐚 𝐗𝐢𝐝𝐡𝐢𝐢𝐝𝐡𝐤𝐚 𝐃𝐚𝐝𝐰𝐞𝐲𝐧𝐚𝐡𝐚 𝐢𝐲𝐨 𝐗𝐨𝐠𝐭𝐚
🌐 𝐬𝐥𝐦𝐨𝐟.𝐨𝐫𝐠
📧 𝐢𝐧𝐟𝐨@𝐬𝐥𝐦𝐨𝐟.𝐨𝐫𝐠
☎️ 𝟗𝟒𝟗𝟒
📱 𝐖𝐡𝐚𝐭𝐬𝐀𝐩𝐩: +𝟐𝟓𝟐 𝟔𝟓 𝟕𝟕𝟐 𝟗𝟗𝟗𝟗