Gjykata Supreme e Kosovës

30/10/2026

⚖️Kryetari Rexhepi dhe ekspertët gjermanë të IRZ-së diskutojnë avancimin e profesionalizmit dhe pavarësisë gjyqësore

Kryetari i Gjykatës Supreme të Kosovës, Fejzullah Rexhepi, ka pritur sot në takim një delegacion të Fondacionit Gjerman për Bashkëpunim Juridik Ndërkombëtar (IRZ), të kryesuar nga ekspertët gjermanë të fushës juridike, Prof. Dr. Michaela Wittinger, profesoreshë universitare dhe eksperte e lartë juridike, si dhe Dr. Thomas Dickert, ish-kryetar i Gjykatës së Lartë Rajonale të Nurembergut.
Gjatë vizitës, ekspertët gjermanë vizituan ambientet e Gjykatës Supreme, përfshirë Muzeun e Gjyqësorit dhe zyrën e një gjyqtari, dhe u informuan nga afër për rolin, kompetencat dhe funksionimin e instancës më të lartë gjyqësore në vend.
Kryetari Rexhepi vlerësoi lart mbështetjen e vazhdueshme që IRZ i ka ofruar sistemit gjyqësor të Kosovës, si dhe kontributin e ekspertëve gjermanë në shkëmbimin e përvojave dhe avancimin e njohurive profesionale të gjyqtarëve.
Vizita në Gjykatën Supreme u realizua pas përfundimit të punëtorisë dyditore të Këshillit Gjyqësor të Kosovës (KGJK), të organizuar në bashkëpunim me IRZ-në, me temën “Zhvillimi dhe zbatimi i mekanizmave efektivë për vetëqeverisjen dhe mbikëqyrjen e sistemit të drejtësisë”.
Çështjet e trajtuara gjatë punëtorisë ishin gjithashtu pjesë e diskutimeve ndërmjet kryetarit Rexhepi dhe ekspertëve gjermanë. Në këtë kontekst, u theksua rëndësia e garantimit të pavarësisë gjyqësore, proceseve të emërimit, vlerësimit dhe promovimit të gjyqtarëve, zhvillimit të tyre të vazhdueshëm profesional, mbikëqyrjes gjyqësore, si dhe forcimit të etikës dhe integritetit profesional dhe parandalimit të konflikteve të interesit.
Takimi shërbeu si mundësi për shkëmbimin e përvojave dhe diskutimin e praktikave të mira në funksion të forcimit të pavarësisë, llogaridhënies dhe profesionalizmit të sistemit gjyqësor.

Linku i komunikatës: https://supreme.gjyqesori-rks.org/2026/10/30/kryetari-rexhepi-dhe-ekspertet-gjermane-te-irz-se-diskutojne-avancimin-e-profesionalizmit-dhe-pavaresise-gjyqesore/

30/10/2026

⚖️Gjykata Supreme shfuqizon dispozitën për mbajtjen e patentë-shoferit deri në përfundimin e masës mbrojtëse

Gjykata Supreme e Kosovës e ka shpallur të paligjshëm dhe e ka shfuqizuar paragrafin 3 të nenit 17 të Udhëzimit Administrativ (Ministria e Punëve të Brendshme) Nr. 05/2023 për Procedurat e Kundërvajtjes, i cili përcaktonte se patentë-shoferi mund të tërhiqet nga pala, vetëm pas përfundimit të masës mbrojtëse të ndalimit të drejtimit të mjetit.
Kolegji i Gjykatës Supreme në çështjen juridike të konfliktit administrativ, duke vendosur sipas padisë së 28 paditësve kundër Ministrisë së Punëve të Brendshme - Policisë së Kosovës, ka aprovuar pjesërisht si të themeltë kërkesëpadinë për shfuqizimin e pjesshëm të aktit nënligjor normativ.
Gjykata Supreme ka vlerësuar se marrja e përkohshme e patentë-shoferit nga policia dhe masa mbrojtëse e ndalimit të drejtimit të mjetit janë dy institute të ndryshme juridike, të cilat nuk duhet të ngatërrohen në zbatimin e tyre.
Duke iu referuar nenit 244 të Ligjit Nr. 08/L-186 për Rregullat e Trafikut Rrugor, Gjykata ka konstatuar se mbajtja e përkohshme e patentë-shoferit nga policia nuk mund të zgjasë më shumë se tetë ditë. Për rrjedhojë, kushtëzimi i tërheqjes së dokumentit me përfundimin e masës mbrojtëse, e cila mund të zgjasë tre, gjashtë apo dymbëdhjetë muaj, është në kundërshtim me ligjin.
Sipas vlerësimit të Gjykatës Supreme, një akt nënligjor nuk mund të zgjerojë kompetencat e përcaktuara me ligj dhe as të vendosë kufizime shtesë që nuk kanë bazë ligjore.
Gjykata ka refuzuar si të pabazuar kërkesën për shfuqizimin e paragrafëve 1 dhe 2 të nenit 17 të këtij Udhëzimi Administrativ duke vlerësuar se këto dispozita kanë karakter procedural dhe organizativ, pasi përcaktojnë njësinë policore përgjegjëse për administrimin e dokumentit dhe detyrimin për lëshimin e vërtetimit për marrjen e përkohshme të patentë-shoferit, pa tejkaluar autorizimet e përcaktuara me ligj.

Linku i aktgjykimit:https://supreme.gjyqesori-rks.org/wp-content/uploads/verdicts/SUP__29_2026_SQ.pdf

Linku i komunikatës: https://supreme.gjyqesori-rks.org/2026/10/30/gjykata-supreme-shfuqizon-dispoziten-per-mbajtjen-e-patente-shoferit-deri-ne-perfundimin-e-mases-mbrojtese/

29/10/2026

29/10/2026

Gjykata Supreme aprovon pjesërisht kërkesën për mbrojtje të ligjshmërisë së V.Ll., çështjen e kthen në rivendosje

Kolegji i Gjykatës Supreme të Kosovës, në çështjen penale ndaj të pandehurit V.Ll., për shkak të veprave penale “Mashtrimi lidhur me pranimin e fondeve nga Komuniteti Ndërkombëtar”, nga neni 325, të KPRK-së, “Mashtrimi”, nga neni 323 të KPRK-së, “Lidhja e kontratës së dëmshme”, nga neni 285 të KPRK-së, dhe “Shpërdorimi i pasurisë së huaj”, nga 318 të KPRK-së, duke vendosur lidhur me kërkesën për mbrojtje të ligjshmërisë të mbrojtësit të të pandehurit, paraqitur kundër aktvendimit të Gjykatës Themelore në Prishtinë dhe aktvendimit të Gjykatës së Apelit të Kosovës, pjesërisht ka aprovuar kërkesën e mbrojtësit të të pandehurit. Çështja i është kthyer gjykatës së shkallës së parë në rivendosje. Bazuar në aktgjykimin PML.nr.805/2026, i pandehuri ka mbetur në paraburgim deri në marrjen e një vendimi të ri nga gjykata e shkallës së parë.

Linku i Aktgjykimit:https://supreme.gjyqesori-rks.org/wp-content/uploads/verdicts/SUP_PML_2026-075685_SQ.pdf

Linku i komunikatës: https://supreme.gjyqesori-rks.org/2026/10/29/gjykata-supreme-aprovon-pjeserisht-kerkesen-per-mbrojtje-te-ligjshmerise-se-v-l-ceshtjen-e-kthen-ne-rivendosje/

27/10/2026

⚖️Gjykata Supreme e Kosovës e hedh si të palejuar ankesën kundër vendimit të KPK-së, për largimin e Kryeprokurorit nga pozita udhëheqëse

Gjykata Supreme e Kosovës, në seancën e kolegjit të mbajtur më 27 tetor 2026, ka nxjerrë aktvendim me të cilin e ka hedhur si të palejuar ankesën e B.I., Kryeprokuror i Prokurorisë Speciale të Republikës së Kosovës, të paraqitur kundër vendimit të Këshillit Prokurorial të Kosovës (KPK), nr. 695/2026, të datës 2 tetor 2026, lidhur me largimin e tij nga pozita udhëheqëse.
Pas shqyrtimit të lejueshmërisë së ankesës, në kuptim të nenit 15 të Ligjit për Përgjegjësinë Disiplinore të Gjyqtarëve dhe Prokurorëve dhe në lidhje me dispozitat përkatëse të Ligjit për Konfliktet Administrative, Gjykata Supreme ka konstatuar se ankesa është e palejuar.
Gjatë vlerësimit, Gjykata ka marrë parasysh natyrën juridike të vendimit të kontestuar, bazën ligjore mbi të cilën është nxjerrë dhe procedurën në kuadër të së cilës është marrë, duke ardhur në përfundimin se nuk janë plotësuar kushtet ligjore për shqyrtimin e ankesës nga Gjykata Supreme në kuadër të kompetencës së veçantë të përcaktuar me nenin 15 të Ligjit për Përgjegjësinë Disiplinore të Gjyqtarëve dhe Prokurorëve.
Sipas vlerësimit të kolegjit të Gjykatës Supreme, fakti që një vendim i Këshillit sjell ndërprerjen e ushtrimit të funksionit ose pozitës udhëheqëse të kryeprokurorit nuk përcakton, në vetvete, natyrën disiplinore të atij vendimi. Që një vendim të cilësohet si disiplinor, kërkohet që, për nga përmbajtja dhe procedura e zhvilluar, ai të ketë për objekt konstatimin e përgjegjësisë disiplinore dhe përcaktimin e pasojave juridike që rrjedhin nga kjo përgjegjësi, në përputhje me dispozitat përkatëse të Ligjit për Përgjegjësinë Disiplinore të Gjyqtarëve dhe Prokurorëve.
Në rastin konkret, Gjykata Supreme ka vlerësuar se vendimi i KPK-së për largimin e kryeprokurorit nga pozita udhëheqëse është nxjerrë në bazë të nenit 22, paragrafit 5, të Ligjit për Këshillin Prokurorial të Kosovës, pa u konstatuar përgjegjësia disiplinore e ankuesit. Për këtë arsye, vendimi i kontestuar, për nga natyra e tij juridike, përbën akt individual me karakter administrativ dhe jo vendim disiplinor në kuptim të ligjit përkatës.
Rrjedhimisht, ligjshmëria e këtij vendimi i nënshtrohet kontrollit gjyqësor në procedurën e konfliktit administrativ, para gjykatës me kompetencë lëndore, sipas legjislacionit në fuqi. Ky vlerësim mbështetet në nenet 1, 4 dhe 10, paragrafi 2, të Ligjit për Konfliktet Administrative, si dhe në këshillën juridike të dhënë në vetë vendimin e kontestuar.
Për këto arsye, duke qenë se nuk ekziston bazë e mjaftueshme ligjore për ushtrimin e kompetencës së veçantë të Gjykatës Supreme, të përcaktuar me nenin 15 të Ligjit nr. 06/L-057 për Përgjegjësinë Disiplinore të Gjyqtarëve dhe Prokurorëve, kolegji i Gjykatës Supreme ka vendosur që ankesën e ankuesit ta hedhë si të palejuar.

Linku i Aktvendimit:https://supreme.gjyqesori-rks.org/wp-content/uploads/verdicts/SUP_AA%20_40_2026_SQ.pdf

Linku i komunikatës: https://supreme.gjyqesori-rks.org/2026/10/27/gjykata-supreme-e-kosoves-e-hedh-si-te-palejuar-ankesen-kunder-vendimit-te-kpk-se-per-largimin-e-kryeprokurorit-nga-pozita-udheheqese/

23/10/2026

🏛️Gjykata Supreme e Kosovës hap dyert për qytetarët: Diskutohet roli dhe puna e Dhomës së Posaçme

⚖️ Në kuadër të aktivitetit tradicional “Ditët e hapura”, në ambientet e Gjykatës Supreme të Kosovës u mbajt takimi i hapur me qytetarë, me qëllim të informimit të tyre për punën dhe funksionimin e Dhomës së Posaçme.
Gjyqtari mbikëqyrës i Dhomës së Posaçme të Gjykatës Supreme, Sylejman Shumolli, priti qytetarët e interesuar, të cilët i informoi lidhur me punën, kompetencat dhe rolin specifik të kësaj Dhome.
Gjatë takimit, gjyqtari Shumolli, iu përgjigj pyetjeve të qytetarëve, i dëgjoi kërkesat dhe shqetësimet e tyre dhe ofroi sqarime lidhur me çështjet që ndërlidhen me procedurat dhe përgjegjësitë e Dhomës së Posaçme.

➡️Ky aktivitet synon forcimin e transparencës dhe llogaridhënies, si dhe rritjen e besimit të publikut në sistemin gjyqësor përmes komunikimit të drejtpërdrejtë ndërmjet qytetarëve dhe përfaqësuesve të institucioneve gjyqësore.
Përveç informimit, takimi ofron mundësi që qytetarët të paraqesin kërkesat dhe shqetësimet e tyre, si dhe të marrin informacione të drejtpërdrejta lidhur me çështjet që kanë të bëjnë me punën dhe kompetencat e Dhomës së Posaçme.
Gjykata Supreme e Kosovës mbetet e përkushtuar ndaj transparencës, informimit të saktë të publikut dhe komunikimit të hapur me qytetarët.

Linku i komunikatës: https://supreme.gjyqesori-rks.org/2026/10/23/gjykata-supreme-e-kosoves-hap-dyert-per-qytetaret-diskutohet-roli-dhe-puna-e-dhomes-se-posacme/

22/10/2026

⚖️Kryetari Rexhepi dhe gjyqtarët e Gjykatës Supreme pjesëmarrës në shënimin e 17-vjetorit të Gjykatës Kushtetuese

Kryetari i Gjykatës Supreme të Kosovës, Fejzullah Rexhepi, së bashku me gjyqtarët e kësaj gjykate, po merr pjesë në Konferencën Ndërkombëtare të organizuar nga Gjykata Kushtetuese e Republikës së Kosovës, me rastin e shënimit të 17-vjetorit të themelimit të saj.
Konferenca, e cila po mbahet në Prishtinë, me temën “Roli i gjykatave kushtetuese në mbrojtjen e demokracisë dhe funksionimin demokratik të institucioneve”, ka mbledhur bashkë përfaqësues të gjykatave kushtetuese dhe supreme, si dhe ekspertë të së drejtës nga Kosova, Evropa dhe institucionet ndërkombëtare.
Në kuadër të konferencës, pjesëmarrësit po diskutojnë çështje që lidhen me standardet ndërkombëtare dhe evropiane në interpretimin kushtetues, praktikën gjyqësore të Gjykatës Evropiane për të Drejtat e Njeriut, si dhe rolin e gjykatave kushtetuese në mbrojtjen e demokracisë, forcimin e sundimit të ligjit dhe ruajtjen e ekuilibrit institucional.
Konferenca përbën një mundësi për shkëmbimin e përvojave dhe të praktikave gjyqësore ndërmjet përfaqësuesve të institucioneve gjyqësore vendore dhe ndërkombëtare, si dhe për diskutimin e sfidave aktuale që lidhen me mbrojtjen e vlerave demokratike dhe funksionimin e institucioneve në përputhje me parimet kushtetuese.
Pjesëmarrja e kryetarit Rexhepi dhe gjyqtarëve të Gjykatës Supreme në këtë konferencë dëshmon rëndësinë e bashkëpunimit ndërmjet institucioneve gjyqësore dhe të dialogut profesional për çështjet që lidhen me sundimin e ligjit, pavarësinë e gjyqësorit dhe mbrojtjen e të drejtave dhe lirive themelore.

Linku i komunikatës: https://supreme.gjyqesori-rks.org/2026/10/22/kryetari-rexhepi-dhe-gjyqtaret-e-gjykates-supreme-pjesemarres-ne-shenimin-e-17-vjetorit-te-gjykates-kushtetuese/

22/10/2026

KGJK certifikon mandatin e gjyqtares Mejreme Memaj si anëtare e KGJK-së

Prishtinë, 22 tetor 2026 – Këshilli Gjyqësor i Kosovës (KGJK), në vazhdim të takimit të 373-të, ka vendosur për certifikimin e znj. Mejreme Memaj, gjyqtare e Gjykatës Supreme si anëtare e Këshillit Gjyqësor të Kosovës.

🔗 https://www.gjyqesori-rks.org/2026/10/22/kgjk-certifikon-mandatin-e-gjyqtares-mejreme-memaj-si-anetare-e-kgjk-se/

20/10/2026

⚖️Përfaqësues të Zyrës së BE-së, OSBE-së dhe EULEX-it diskutojnë me Kryetarin Rexhepi mundësitë për rritjen e efikasitetit të proceseve gjyqësore

Kryetari i Gjykatës Supreme të Kosovës, Fejzullah Rexhepi, i shoqëruar nga gjyqtari Burim Ademi dhe këshilltaret e Kabinetit të tij, Rina Koliqi dhe Blerta Ferizi, priti sot në takim të përbashkët përfaqësues të Zyrës së Bashkimit Evropian në Kosovë, Organizatës për Siguri dhe Bashkëpunim në Evropë (OSBE) dhe Misionit të Bashkimit Evropian për Sundimin e Ligjit në Kosovë (EULEX), me të cilët diskutoi gjetjet nga monitorimi i seancave gjyqësore në rastet e krimit të organizuar dhe korrupsionit të nivelit të lartë.
Delegacioni i Zyrës së BE-së u kryesua nga Frederique Hanotier, udhëheqëse e Ekipit për Sundimin e Ligjit dhe të Drejtat Themelore në Sektorin e Bashkëpunimit, e shoqëruar nga Fotini Antonopoulou, Sylvie Estriga dhe Behlul Zeka. Në takim morën pjesë edhe përfaqësuesi i OSBE-së, Kahramon Sanginov dhe përfaqësuesit e EULEX-it, Giovanni Galzignato, Oscar San Jose dhe Bart Scheffers.
Qëllimi i takimit ishte informimi i Kryetarit Rexhepi lidhur me iniciativën e ndërmarrë gjatë këtij viti nga Zyra e BE-së në Kosovë, OSBE dhe EULEX-i për të prezantuar gjetjet e monitorimit të gjykimeve në rastet e krimit të organizuar dhe korrupsionit të nivelit të lartë.
Kryetari Rexhepi vlerësoi kontributin e vazhdueshëm të partnerëve ndërkombëtarë në forcimin e sundimit të ligjit dhe mbështetjen e institucioneve të drejtësisë në Kosovë. Ai theksoi rëndësinë e monitorimit të proceseve gjyqësore dhe të avancimit të standardeve profesionale, duke vënë në pah se gjetjet dhe rekomandimet e raporteve të organizatave kredibile, si OSBE-ja dhe EULEX-i, përbëjnë një mundësi për identifikimin e sfidave dhe përmirësimin e funksionimit të sistemit të drejtësisë.
Gjatë takimit, pjesëmarrësit diskutuan një sërë çështjesh që ndërlidhen me efikasitetin dhe cilësinë e procedurave gjyqësore, përfshirë produktivitetin e seancave, rigjykimet në rastet komplekse, shqiptimin e dënimeve plotësuese, cilësinë dhe strukturën e aktakuzave, zbatimin e Udhëzuesit të Gjykatës Supreme, për matjen e dënimit, si dhe performancën e gjyqtarëve.
Takimi u përmbyll me diskutimin e veprimeve të mundshme për rritjen e efikasitetit dhe përmirësimin e cilësisë së procedurave gjyqësore, në funksion të forcimit të sundimit të ligjit dhe avancimit të administrimit të drejtësisë.

Linku i komunikatës: https://supreme.gjyqesori-rks.org/2026/10/20/perfaqesues-te-zyres-se-be-se-osbe-se-dhe-eulex-it-diskutojne-me-kryetarin-rexhepi-mundesite-per-rritjen-e-efikasitetit-te-proceseve-gjyqesore/