Gjykata Supreme e Kosovës

⚖️Po mbahet punëtoria e Gjykatës Supreme me gjyqtarët nga Gjykata e Apelit, për unifikimin e praktikës gjyqësore

Në kuadër të organizimit të punëtorive të Gjykatës Supreme të Kosovës me gjykatat e instancave më të ulëta, sot po mbahet punëtoria me gjyqtarët e Gjykatës së Apelit, me qëllim të koordinimit dhe harmonizimit të praktikës gjyqësore ndërmjet instancave gjyqësore.
Punëtoria zhvillohet nën drejtimin e Kryetarit të Gjykatës Supreme, Fejzullah Rexhepi, me mbështetjen e OSBE-së.
Diskutimet janë të përqendruara në trajtimin e çështjeve me rëndësi nga praktika gjyqësore, harmonizimin e vendimmarrjes dhe unifikimin e politikës ndëshkimore. Për të mundësuar shqyrtime më të fokusuara profesionale, pjesëmarrësit janë ndarë në dy grupe pune: gjyqtarët e lëmisë civile dhe ata të lëmisë penale.
Gjatë punëtorisë, Kryetari Rexhepi dhe gjyqtarët e Gjykatës Supreme po zhvillojnë diskutime me gjyqtarët e Gjykatës së Apelit lidhur me sfidat që paraqiten në praktikën e përditshme gjyqësore, si në aspektin procedural ashtu edhe në vendimmarrjen për raste të ngjashme.
Në fjalën e tij, Kryetari Rexhepi vuri theks të veçantë në rolin e Gjykatës së Apelit si instancë e dytë gjyqësore dhe në përgjegjësinë e saj për të kontribuar në efikasitetin e sistemit gjyqësor. Ai theksoi nevojën për shmangien e kthimit të panevojshëm të lëndëve në rigjykim, në rastet kur ato mund të zgjidhen ose ndryshohen nga vetë Gjykata e Apelit, duke ndikuar kështu në rritjen e efikasitetit dhe sigurisë juridike.
Po ashtu, Kryetari Rexhepi nënvizoi rëndësinë e zbatimit të mendimeve juridike dhe udhëzuesve të Gjykatës Supreme, si instrumente kyçe për harmonizimin e praktikës gjyqësore dhe sigurimin e vendimmarrjes së njëtrajtshme në të gjitha nivelet e gjyqësorit.
Duke vlerësuar rolin ndërmjetësues të Gjykatës së Apelit ndërmjet Gjykatës Supreme dhe gjykatave themelore, Kryetari Rexhepi ofroi mbështetje të plotë profesionale për adresimin e çështjeve juridike dhe njëkohësisht kërkoi bashkëpunim dhe koordinim të vazhdueshëm institucional. Ai theksoi se vetëm përmes komunikimit të rregullt dhe veprimit të koordinuar ndërmjet të gjitha niveleve të gjyqësorit mund të sigurohet një praktikë gjyqësore e unifikuar, konsistente dhe në shërbim të sundimit të ligjit.
Punëtoria me gjyqtarët e Gjykatës së Apelit do të vazhdojë edhe nesër, duke përmbyllur fazën e punëtorive që Gjykata Supreme ka zhvilluar me gjykatat e të gjitha niveleve në vend, me qëllim forcimin e bashkëpunimit institucional, harmonizimin e praktikës gjyqësore dhe avancimin e cilësisë së vendimmarrjes gjyqësore.

Linku i komunikatës: https://supreme.gjyqesori-rks.org/2026/06/01/po-mbahet-punetoria-e-gjykates-supreme-me-gjyqtaret-nga-gjykata-e-apelit-per-unifikimin-e-praktikes-gjyqesore/

Kryesuesi i KGJK-së priti në takim Kryetarin e Gjykatës Supreme

Prishtinë, 1 qershor 2026 – Kryesuesi i Këshillit Gjyqësor të Kosovës, Rrustem Thaqi, priti në takim Kryetarin e Gjykatës Supreme, Fejzullah Rexhepi, me rastin e fillimit të mandatit të tij në krye të KGJK-së.

Me këtë rast, Kryetari i Gjykatës Supreme e përgëzoi Kryesuesin e Këshillit Gjyqësor të Kosovës për emërimin në krye të institucionit, duke i uruar suksese në ushtrimin e mandatit dhe përmbushjen e përgjegjësive që lidhen me këtë funksion të rëndësishëm në sistemin gjyqësor të Republikës së Kosovës.

🖇️ https://www.gjyqesori-rks.org/2026/06/01/kryesuesi-i-kgjk-se-priti-ne-takim-kryetarin-e-gjykates-supreme/

⚖️Gjykata Supreme refuzon ankesën e LVV-së lidhur me mbajtjen e tubimit politik në sheshin “Skënderbeu”

Kolegji i Gjykatës Supreme të Kosovës e ka refuzuar si të pabazuar ankesën e subjektit politik Lëvizja Vetëvendosje (LVV), të paraqitur kundër vendimit të Panelit Zgjedhor për Ankesa dhe Parashtresa (PZAP), ZP.Anr.7/2026, të datës 22.05.2026.
Ankesa kishte të bënte me refuzimin e kërkesës së subjektit politik LVV për mbajtjen e një tubimi politik në Sheshin “Skënderbeu” në Prishtinë, për Zgjedhjet e Parakohshme për Kuvendin e Republikës së Kosovës, të planifikuara të mbahen më 07 qershor 2026.
Në ankesën e paraqitur në Gjykatën Supreme, LVV kishte pretenduar se PZAP ka zbatuar gabimisht nenin 4 të Rregullores Zgjedhore Nr. 07/2024 dhe se vendimi i këtij institucioni është i mangët në arsyetim, duke theksuar se kërkesa e subjektit tjetër politik, Partisë Demokratike të Kosovës (PDK), e datës 30.04.2026, nuk mund të krijonte përparësi procedurale, pasi në atë kohë Komisioni Komunal i Zgjedhjeve (KKZ) në Prishtinë ende nuk ishte konstituar.
Pas shqyrtimit të pretendimeve ankimore, përgjigjes në ankesë dhe të gjitha shkresave të lëndës, Gjykata Supreme vlerësoi se ankesa është e pabazuar dhe se vendimi i PZAP-së është i drejtë, i ligjshëm dhe i mbështetur në dispozitat përkatëse të Ligjit për Zgjedhjet e Përgjithshme dhe Rregullores Zgjedhore Nr. 07/2024 për Fushatën e Zgjedhjeve, Monitorimin e Fushatës dhe Deklarimin Financiar.
Gjykata Supreme konstatoi se Komisioni Komunal i Zgjedhjeve në Prishtinë kishte vepruar në përputhje me nenin 4 të Rregullores Nr. 07/2024, sipas të cilit KKZ mund të refuzojë kërkesën e një subjekti politik në rast se hapësira e kërkuar është rezervuar më parë nga një subjekt tjetër politik.
Nga shkresat e lëndës rezulton se subjekti politik PDK kishte dorëzuar kërkesën për mbajtjen e tubimit politik në Sheshin “Skënderbeu” më 30.04.2026, ndërsa LVV kishte paraqitur kërkesën më 08.05.2026, për të njëjtën datë dhe lokacion. Gjykata vlerësoi se Rregullorja Nr. 07/2024 përcakton vetëm afatin e fundit për paraqitjen e njoftimeve për tubime politike dhe nuk parasheh kufizime lidhur me kohën e paraqitjes së kërkesave para funksionalizimit të KKZ-së.
Po ashtu, Gjykata Supreme vlerësoi se pretendimet e LVV-së lidhur me mungesën e arsyetimit të vendimit të PZAP-së janë të pabazuara, pasi PZAP kishte trajtuar në mënyrë të mjaftueshme çështjen e funksionalizimit të KKZ-së dhe kishte dhënë arsye të qarta juridike mbi bazën e dispozitave të zbatueshme.
Si rrjedhim, Gjykata Supreme konstatoi se gjendja faktike është vërtetuar drejt, se nuk janë konstatuar shkelje procedurale apo zbatim i gabuar i ligjit dhe se pretendimet ankimore të subjektit politik LVV nuk janë mbështetur me prova relevante. Ndaj, ankesa u refuzua si e pabazuar, ndërsa vendimi i PZAP-së është lënë në fuqi.

🔗Linku i aktgjykimit:https://supreme.gjyqesori-rks.org/wp-content/uploads/verdicts/SUP_AA%20_23_2026_SQ.pdf

🔗Linku i komunikatës: https://supreme.gjyqesori-rks.org/2026/05/29/gjykata-supreme-refuzon-ankesen-e-lvv-se-lidhur-me-mbajtjen-e-tubimit-politik-ne-sheshin-skenderbeu/

Gjykata Supreme refuzon kërkesën për mbrojtje të ligjshmërisë në rastin e grupit të dyshuar për krim të organizuar, trafikim të lëndëve
narkotike dhe shpërlarje të parave

Kolegji i Gjykatës Supreme të Kosovës, në çështjen penale ndaj të pandehurve: R.N., R.B., A.I., A.Gj., E.I., Sh.B., A.V., B.Sh., R.V., R.B., A.R., E.B., A.M., K.D., O. V., L.T., K.B., K.A., Y.M. dhe S.L., për shkak të dyshimit për kryerjen e veprave penale: “Pjesëmarrja ose organizimi i grupit kriminal të organizuar”, lidhur me veprën penale “Blerja, posedimi, shpërndarja dhe sh*tja e paautorizuar e narkotikëve, substancave psikotrope dhe analoge”, si dhe “Shpërlarja e parave”, e ka refuzuar si të pabazuar kërkesën për mbrojtje të ligjshmërisë, të paraqitur kundër aktvendimeve të Gjykatës Themelore në Prishtinë dhe Gjykatës së Apelit të Kosovës.
Gjykata Themelore në Prishtinë-Departamenti Special, me aktvendimin PPPS.nr.50/2024 ua kishte vazhduar masën e paraburgimit të pandehurve për një periudhë prej dy (2) muajsh, deri më 03.05.2026, ndërsa në procedurën ankimore, Gjykata e Apelit e Kosovës-Departamenti Special, me aktvendimin PN1.S.nr.221/2026, i refuzoi si të pabazuara ankesat e mbrojtësve të të pandehurve dhe e vërtetoi aktvendimin e gjykatës së shkallës së parë.
Kundër këtyre aktvendimeve, kërkesë për mbrojtje të ligjshmërisë ka ushtruar mbrojtësi i të pandehurit Sh.B..
Gjykata Supreme vlerësoi se pretendimet e paraqitura në kërkesë janë të pabazuara, pasi nga provat e administruara në shkresat e lëndës rezulton dyshimi i bazuar se të pandehurit kanë kryer veprat penale që u vihen në barrë, ndërsa vërtetimi i plotë i këtyre fakteve do të jetë objekt i shqyrtimit gjatë fazave të mëtejshme të procedurës penale.
Sipas vlerësimit të Gjykatës Supreme, ekziston bazë ligjore për vazhdimin e paraburgimit, duke marrë parasysh provat dhe informacionet e siguruara gjatë hetimeve, përfshirë komunikimet e siguruara përmes bashkëpunimit juridik ndërkombëtar, transkriptet e komunikimeve, lëvizjet dhe kontaktet ndërmjet të pandehurve dhe personave të tjerë të përfshirë në hetim. Sipas dyshimeve, të pandehurit kanë vepruar si grup kriminal i organizuar në trafikimin e lëndëve narkotike.
Gjykata po ashtu vlerësoi se ekziston rreziku i ikjes, duke pasur parasysh peshën e veprave penale dhe sanksionet e parapara, si dhe faktin se një pjesë e të pandehurve dyshohet se kanë përdorur identitete të rreme apo kanë ndërruar identitet për t’iu shmangur identifikimit dhe arrestimit eventual në shtete të tjera.
Po ashtu, Gjykata Supreme konstatoi se janë plotësuar kushtet ligjore për vazhdimin e paraburgimit, për shkak të rrezikut se të pandehurit, nëse gjenden në liri, mund të ndikojnë në bashkëpandehurit, të koordinojnë deklaratat ose të pengojnë sigurimin dhe administrimin e provave, duke cenuar rrjedhën normale të procedurës penale.
Gjithashtu, Gjykata Supreme vlerësoi se vazhdimi i paraburgimit është i arsyeshëm, duke marrë parasysh mënyrën e organizimit dhe strukturimit të grupit, rolet e ndara të të pandehurve, si dhe rrezikun e përsëritjes së veprave penale. Në këtë drejtim, u morën parasysh edhe karakteristikat personale dhe e kaluara kriminale e disa prej të pandehurve, përfshirë dënime të mëparshme brenda dhe jashtë Kosovës, edhe për vepra që ndërlidhen me narkotikë.
Nga të gjitha arsyet e cekura, Gjykata Supreme vlerësoi se nuk ekzistojnë shkelje esenciale të dispozitave të procedurës penale, pasi gjykatat e instancave më të ulëta kanë dhënë arsyetim të mjaftueshëm dhe të bazuar ligjërisht për vazhdimin e paraburgimit. Po ashtu, u vlerësua se masat më të lehta të parapara me nenin 171 të KPP-së nuk janë të mjaftueshme për sigurimin e prezencës së të pandehurve dhe zhvillimin normal të procedurës penale.

Linku i aktgjykimit:https://supreme.gjyqesori-rks.org/wp-content/uploads/verdicts/SUP_PML_299_2026_SQ.pdf

Linku i komunikatës: https://supreme.gjyqesori-rks.org/2026/05/29/gjykata-supreme-refuzon-kerkesat-per-mbrojtje-te-ligjshmerise-ne-rastin-e-grupit-te-dyshuar-per-krim-te-organizuar-trafikim-te-lendeve-narkotike-dhe-shperlarje-te-parave/

⚖️Gjykata Supreme refuzon padinë e organizatës QIPS, të paraqitur kundër Rregullores për organizimin e Institutit Special në Shtime

Gjykata Supreme e Kosovës ka refuzuar si të pabazuar kërkesëpadinë e Qendrës për Informim dhe Përmirësim Social (QIPS) të ushtruar kundër Zyrës së Kryeministrit, lidhur me kërkesën për shfuqizimin e pjesshëm të Rregullores nr. 15/2024 për Organizimin e Brendshëm dhe Sistematizimin e Vendeve të Punës në Ministrinë e Shëndetësisë.
Paditësja kishte kërkuar nga Gjykata Supreme që të shpallë të paligjshme dhe të shfuqizojë dispozitat e neneve 41–46 të kësaj Rregulloreje, duke pretenduar se ato janë nxjerrë pa bazë ligjore dhe në kundërshtim me Ligjin për Shëndetësinë, Ligjin për Shëndetin Mendor dhe Statutin e SHSKUK-së. Sipas paditëses, përmes këtyre dispozitave është rregulluar organizimi dhe funksionimi i Institutit Special në Shtime (ISSH), ndonëse ky institucion nuk figuron si njësi e njohur në legjislacionin përkatës.
Pas shqyrtimit publik gjyqësor, analizimit të pretendimeve të palëve, si dhe vlerësimit të dispozitave kushtetuese, ligjore dhe nënligjore relevante, Gjykata Supreme konstatoi se kërkesëpadia nuk është e bazuar.
Gjykata vlerësoi se Rregullorja është nxjerrë nga organi kompetent, në bazë të autorizimeve kushtetuese dhe ligjore që burojnë nga Kushtetuta e Republikës së Kosovës, Ligji për Qeverinë, Ligji për Organizimin dhe Funksionimin e Administratës Shtetërore dhe Agjencive të Pavarura, si dhe legjislacioni përkatës në fushën e shëndetësisë dhe shëndetit mendor.
Gjykata Supreme thekson se dispozitat e kontestuara nuk krijojnë një subjekt të ri juridik jashtë sistemit ekzistues shëndetësor, por paraqesin rregullim organizativ dhe funksional të një strukture ekzistuese në kuadër të sistemit publik shëndetësor.
Gjykata vlerësoi, po ashtu, se neni 18 i Ligjit për Shëndetin Mendor përbën bazë të mjaftueshme ligjore për rregullimin me akt nënligjor të organizimit dhe funksionimit të institucioneve rezidenciale të përkujdesjes sociale dhe shërbimeve të shëndetit mendor që ofrohen në to.
Sipas Gjykatës, akti nënligjor i kontestuar nuk ka tejkaluar autorizimet ligjore dhe nuk ka cenuar parimin e ligjshmërisë, pasi është nxjerrë në kuadër të kompetencave të Ministrisë së Shëndetësisë dhe Qeverisë për organizimin e sistemit shëndetësor publik.
Gjykata gjithashtu theksoi se, ndonëse rregullimi i Institutit Special në Shtime mund të ishte bërë përmes një akti të veçantë nënligjor, kjo çështje lidhet me teknikën normative dhe nuk ndikon në ligjshmërinë e dispozitave të kontestuara.
Ndaj, Gjykata Supreme konstatoi se nuk ekziston bazë juridike për shfuqizimin e neneve 41–46 të Rregullores (ZKM) nr. 15/2024 dhe refuzoi në tërësi kërkesëpadinë e paditëses si të pabazuar.

🔗Linku i aktgjykimit:https://supreme.gjyqesori-rks.org/wp-content/uploads/verdicts/SUP__06_2026_SQ.pdf

🔗Linku i komunikatës: https://supreme.gjyqesori-rks.org/2026/05/28/gjykata-supreme-refuzon-padine-e-organizates-qips-te-paraqitur-kunder-rregullores-per-organizimin-e-institutit-special-ne-shtime/

⚖️Gjykata Supreme shfuqizon dispozitën e Statutit të OAK-së për humbjen automatike të së drejtës së ushtrimit të avokatisë

Kolegji i Gjykatës Supreme, në çështjen juridike të konfliktit administrativ sipas padisë së paditësit Nasuf Hasani nga Prishtina kundër të paditurës Odës së Avokatëve të Kosovës (OAK), me objekt shfuqizimin e pjesshëm të aktit nënligjor normativ - konkretisht paragrafit 2 të nenit 61 të Statutit të OAK-së të miratuar më 04 nëntor 2017 - pas shqyrtimit gjyqësor publik, ka aprovuar si të themeltë kërkesëpadinë e paditësit.
Është shpallur i paligjshëm dhe është shfuqizuar paragrafi 2 i nenit 61 të Statutit të Odës së Avokatëve të Kosovës.
Sipas vlerësimit të Gjykatës Supreme, shqyrtimi i ligjshmërisë së Statutit të OAK-së në procedurën e konfliktit administrativ nuk përbën ndërhyrje në pavarësinë funksionale të Odës së Avokatëve, pasi Gjykata Supreme ka juridiksion të vlerësojë ligjshmërinë e çdo akti nënligjor të institucioneve publike, në përputhje me dispozitat ligjore në fuqi. Gjykata thekson se kontrolli gjyqësor i akteve nënligjore garanton funksionimin autonom të institucioneve, por gjithmonë brenda kornizës ligjore.
Në arsyetimin e aktgjykimit, Gjykata Supreme vlerëson se Ligji Nr. 04/L-193 për Avokatinë, në nenin 39 paragrafi 1 nënparagrafi 1.10, përcakton qartë dhe në mënyrë taksative se avokati e humb të drejtën për ushtrimin e avokatisë vetëm nëse, brenda periudhës prej një (1) viti, nuk i përmbush detyrimet financiare ndaj Odës. Sipas Gjykatës, kjo dispozitë ligjore vendos një standard minimal kohor të detyrueshëm, i cili nuk mund të ndryshohet me akt nënligjor.
Nga ana tjetër, paragrafi 2 i nenit 61 të Statutit të OAK-së parashihte se, në rast të mospagesës së obligimeve brenda afatit të përcaktuar nga Oda, avokatit automatikisht i humb e drejta për ushtrimin e avokatisë dhe shlyhet nga Regjistri i Avokatëve. Gjykata konstatoi se kjo dispozitë i jepte Odës kompetencë diskrecionale për të përcaktuar afate më të shkurtra sesa ato të parapara me ligj.
Sipas Gjykatës Supreme, një rregullim i tillë krijon standard juridik më të ashpër se ai i përcaktuar me ligj dhe cenon parimin e hierarkisë së akteve juridike, pasi Statuti nuk kufizohet vetëm në operacionalizimin e ligjit, por ndryshon përmbajtjen materiale të tij. Gjykata thekson se Ligji për Avokatinë nuk i ka deleguar Odës së Avokatëve kompetencë për të përcaktuar afate më të shkurtra apo kushte më të rënda për humbjen e së drejtës së ushtrimit të profesionit.
Në përfundim, Gjykata Supreme vlerëson se dispozita e shfuqizuar, në pjesën ku parashihte humbjen “automatike” të së drejtës për ushtrimin e avokatisë mbi bazën e një afati të përcaktuar nga Oda, krijonte regjim juridik të pavarur dhe në kundërshtim me ligjin, duke cenuar parimin e sigurisë juridike dhe parimin e ligjshmërisë.

🔗Linku i aktgjykimit:https://supreme.gjyqesori-rks.org/wp-content/uploads/verdicts/SUP__09_2026_SQ.pdf

🔗Linku i komunikates: https://supreme.gjyqesori-rks.org/2026/05/26/gjykata-supreme-shfuqizon-dispoziten-e-statutit-te-oak-se-per-humbjen-automatike-te-se-drejtes-se-ushtrimit-te-avokatise/

Kundër-Reagim dhe sqarim për opinionin publik lidhur me pretendimet e Odës së Avokatëve për vonesa në çështjet e paraburgimit

Prishtinë, 25 maj 2026 - Gjykata Supreme e Kosovës shpreh keqardhje të thellë për mënyrën e reagimit të Odës së Avokatëve të Kosovës, për kinse vonesa në trajtimin e rasteve të paraburgimit nga Gjykata Supreme.
Gjykata Supreme, sqaron opinionin publik se, pas verifikimeve të kryera, pretendimet për vonesa sistematike në shqyrtimin e paraburgimeve, rezultojnë të pavërteta.
Çështjet që kanë të bëjnë me caktimin apo vazhdimin e masës së paraburgimit trajtohen me urgjencë dhe prioritet të lartë dhe shqyrtohen brenda afateve të përcaktuara me Kodin e Procedurës Penale, si dhe në përputhje me standardet dhe dispozitat ndërkombëtare që garantojnë mbrojtjen e lirisë personale dhe procesin e rregullt ligjor.
Gjykata Supreme mbetet e përkushtuar që në çdo rast të respektohen afatet ligjore dhe të sigurohet trajtim efikas i mjeteve juridike në çështjet e paraburgimit, duke pasur parasysh ndjeshmërinë dhe rëndësinë që këto raste kanë për të drejtat themelore të qytetarëve.
Nëse Oda e Avokatëve të Kosovës i referohet ndonjë rasti konkret, ku pretendohet se ka pasur tejkalim të afateve ligjore apo vonesa të pajustifikuara, ftohet që t’i adresojë të dhënat tek Kryetari i Gjykatës.
Gjykata Supreme është e hapur për bashkëpunim dhe komunikim profesional me të gjithë akterët e sistemit të drejtësisë, në funksion të garantimit të të drejtave dhe lirive themelore, forcimit të sundimit të ligjit dhe avancimit të administrimit të drejtësisë.




🔗 https://supreme.gjyqesori-rks.org/2026/05/25/kunder-reagim-dhe-sqarim-per-opinionin-publik-lidhur-me-pretendimet-e-odes-se-avokateve-per-vonesa-ne-ceshtjet-e-paraburgimit/

⚖️Gjykata Supreme vazhdon punëtoritë për harmonizimin e praktikës gjyqësore me gjyqtarët e Gjykatës Komerciale dhe asaj Administrative

Nën drejtimin e Kryetarit të Gjykatës Supreme të Kosovës, Fejzullah Rexhepi, sot po mbahet punëtoria e radhës me gjyqtarët e Gjykatës Komerciale dhe të Gjykatës Administrative.
Me këtë rast, kryetari Rexhepi i ftoi gjyqtarët që të diskutojnë hapur mbi sfidat dhe problematikat e identifikuara në praktikën gjyqësore, si dhe të kontribuojnë me rekomandime konkrete për avancimin e efikasitetit dhe cilësisë së vendimmarrjes.
Ai vuri theks të veçantë te Gjykata Administrative, e cila, ndonëse një gjykatë e re dhe e sapo-funksionalizuar, ka pranuar mijëra lëndë të bartura nga Gjykata Themelore në Prishtinë dhe nga shkalla e parë e Gjykatës Komerciale. Sipas tij, kjo gjykatë ka rol kyç në garantimin e mbrojtjes juridike të qytetarëve dhe subjekteve juridike ndaj vendimeve të administratës publike, prandaj ofroi mbështetje të plotë institucionale për forcimin e kapaciteteve dhe funksionalizimin sa më efikas të saj.
Kreu i Gjykatës Supreme theksoi rëndësinë e vendimmarrjes së drejtë dhe të paanshme, si dhe domosdoshmërinë e zbatimit të mendimeve juridike dhe udhëzuesve të Gjykatës Supreme, të cilët kontribuojnë në harmonizimin e praktikës gjyqësore dhe në sigurimin e një vendimmarrjeje të njëtrajtshme nga ana e gjyqtarëve.
Gjatë punëtorisë, pjesëmarrësit po diskutojnë për çështje të rëndësishme nga praktika gjyqësore, harmonizimin dhe unifikimin e saj në rastet e ngjashme, si dhe për sfidat që lidhen me zbatimin praktik të legjislacionit në fuqi.
Organizimi i këtyre punëtorive nga Gjykata Supreme me të gjitha gjykatat në vend është mbështetur nga OSBE.
Javën e ardhshme do të mbahet punëtoria e fundit, dyditore, me gjyqtarët e Gjykatës së Apelit.

🔗 Linku i komunikatës: https://supreme.gjyqesori-rks.org/2026/05/25/gjykata-supreme-vazhdon-punetorite-per-harmonizimin-e-praktikes-gjyqesore-me-gjyqtaret-e-gjykates-komerciale-dhe-asaj-administrative/

Gjyqtari i Gjykatës Supreme, Rrustem Thaqi, zgjedhet kryesuesi i ri i Këshillit Gjyqësor të Kosovës

Rrustem Thaqi zgjidhet Kryesuesi i ri i Këshillit Gjyqësor të Kosovës

Prishtinë, 25 maj 2026 – Këshilli Gjyqësor i Kosovës, nën udhëheqjen e Zëvendës Kryesueses, Arjeta Sadiku, mbajti mbledhjen e 367-të me radhë.

Gjatë këtij takimi anëtarët, si pikë të rendit të ditës kishin zgjedhjen e Kryesuesit të Këshillit Gjyqësor të Kosovës.

Kandidatët e nominuar për pozitën e Kryesuesit të Këshillit Gjyqësor të Kosovës, z. Rrustem Thaqi dhe z. Besnik Bislimaj, nuk paraqitën programet e tyre para anëtarëve të KGJK-së, pasi ato ishin prezantuar në mbledhjen e kaluar.

Pas procesit të votimit me shumicë votash anëtarët e KGJK-së, zgjodhën z. Rrustem Thaqin në pozitën e Kryesuesit të Këshillit Gjyqësor të Kosovës. Mandati i tij si Kryesues fillon nga data e zgjedhjes dhe është tre (3) vjeçar.

🖇️ https://www.gjyqesori-rks.org/2026/05/25/rrustem-thaqi-zgjidhet-kryesuesi-i-ri-i-keshillit-gjyqesor-te-kosoves/

Refuzohet ankesa e “Listës Serbe”, e paraqitur kundër vendimit të PZAP-së

Kolegji i Gjykatës Supreme të Kosovës ka vendosur lidhur me ankesën e subjektit politik “Lista Serbe”, të paraqitur kundër vendimit të Panelit Zgjedhor për Ankesa dhe Parashtresa (PZAP), ZP.Anr.5/2026, të datës 18.05.2026.
Në seancën e mbajtur më 22.05.2026, ankesa e subjektit politik “Lista Serbe” është refuzuar si e pabazuar, ndërsa vendimi i PZAP-së, është vërtetuar.
PZAP, me vendimin ZP.Anr.5/2026 të datës 18.05.2026, kishte refuzuar si të pabazuar ankesën e subjektit politik “Lista Serbe”, të paraqitur kundër vendimit të Komisionit Qendror të Zgjedhjeve (KQZ), lidhur me certifikimin e dhjetë (10) kandidatëve të subjektit politik “Za Slobodu Pravdu i Opstanak”, për Zgjedhjet e Parakohshme për Kuvendin e Republikës së Kosovës, që do të mbahen më 07 Qershor 2026.
Kundër vendimit të PZAP-së, subjekti politik “Lista Serbe” ka ushtruar ankesë në Gjykatë Supreme, duke pretenduar shkelje të Kushtetutës së Republikës së Kosovës, shkelje të dispozitave të Ligjit për Zgjedhjet e Përgjithshme, si dhe vërtetim të gabuar të gjendjes faktike. Ankuesi ka propozuar anulimin e vendimit të PZAP-së dhe të vendimit të KQZ-së, si dhe detyrimin e KQZ-së për nxjerrjen e një vendimi të ri.
Pas shqyrtimit të pretendimeve ankimore, përgjigjes në ankesë dhe shkresave të lëndës, Gjykata Supreme e Kosovës gjeti se ankesa është e pabazuar.
Gjykata Supreme vlerësoi se ankuesi nuk ka ofruar prova konkrete, të besueshme dhe bindëse për të mbështetur pretendimet se kandidatët e certifikuar nga KQZ-ja nuk i përkasin komunitetit serb.
Gjykata Supreme thekson se publikimet në portale elektronike apo artikujt medialë nuk përbëjnë prova juridikisht relevante për të vërtetuar përkatësinë etnike të kandidatëve.
Në arsyetimin e saj, Gjykata Supreme thekson se barra e të provuarit bie mbi ankuesin dhe se pretendimet për shkelje kushtetuese apo ligjore nuk mund të mbështeten vetëm në supozime apo interpretime subjektive.
Gjykata Supreme gjithashtu vlerëson se vendimi i PZAP-së është në përputhje me Kushtetutën e Republikës së Kosovës dhe Ligjin nr. 08/L-228 për Zgjedhjet e Përgjithshme në Republikën e Kosovës, duke respektuar parimet e barazisë, të drejtave zgjedhore dhe mbrojtjes së komuniteteve.

Linku i aktgjykimit:https://supreme.gjyqesori-rks.org/wp-content/uploads/verdicts/SUP_AA%20_21_2026_SQ.pdf

Linku i komunikates: https://supreme.gjyqesori-rks.org/2026/05/22/refuzohet-ankesa-e-listes-serbe-e-paraqitur-kunder-vendimit-te-pzap-se/