08/10/2026
JICA बाट NPCFSL लाई DNA extraction Kits हस्तान्तरण प्रयोगशाला अवलोकन
मिति २०८३ असोज २२ गते बिहीबार नेपाल सम्बत ११४६ ञलगा त्रयोदशीका दिन Japanese International Cooperation Agency (JICA) द्वारा नेपाल प्रहरी केन्द्रीय विधि विज्ञान प्रयोगशाला (NPCFSL) लाई DNA extraction Kits हस्तान्तरण गरेको छ ।
नेपाल प्रहरी केन्द्रीय विधि विज्ञान प्रयोगशाला, महाराजगञ्जमा आयोजित हस्तान्तरण कार्यक्रममा नेपालका लागि जापानी राजदूत महामहिम श्री माएदा तोरु (H.E. Mr. MAEDA Toru)ले माननीय विज्ञान, प्रविधि तथा नवप्रवर्तन मन्त्री श्री महावीर पुनलाई DNA Kit हस्तान्तरण गर्नुभयो। सो अवसरमा JICA नेपाल कार्यालयका मुख्य प्रतिनिधि श्री मात्सुजाकी मिजुकी (Mr. MATSUZAKI Mizuki) र माननीय विज्ञान, प्रविधि तथा नवप्रवर्तन मन्त्री श्री महावीर पुनबीच हस्तान्तरण तथा स्वीकार पत्र (Letter of Delivery and Acceptance) आदानप्रदान हुनुका साथै मानीय मन्त्री पुनले जापानी राजदुतमार्फत जापानी सरकार र JICA Nepal लाई सहयोगका लागि धन्यवाद दिनुभयो। उक्त कार्यक्रममा जापानी राजदूतावास तथा JICA Nepal का प्रतिनिधि तथा कर्मचारीहरु, नेपाल प्रहरी केन्द्रीय विधि विज्ञान प्रयोगशाला महाराजगञ्जका प्रयोगशाला प्रमुख प्रहरी वरिष्ठ उपरीक्षक योग बहादुर पाल लगायतका अधिकारीहरुको उपस्थिति रहेको थियो ।
हस्तान्तरण कार्यक्रम सम्पन्न भएपछि प्रयोगशालाका अधिकारीहरुको उपस्थितिमा प्रयोगशाला प्रमुख योग बहादुर पालले प्रयोगशालाको स्थापनादेखि हालसम्मको विकासक्रम, कार्यक्षेत्र तथा सम्पादित कार्यहरुको विवरण, समस्या तथा चुनौति र आगामी कार्यदिशा बारे माननीय विज्ञान प्रविधि तथा नवप्रवर्तन मन्त्रीज्यूसमक्ष प्रस्तुतिकरणमार्फत ब्रिफिङ गर्नुभएको थियो । साथै, माननीय मन्त्रीज्यूले उक्त प्रयोगशालाका विभिन्न शाखाहरुको अवलोकन गर्दै विधि विज्ञान प्रयोगशाला सम्बन्धी कार्यलाई नेपाल प्रहरीको केन्द्रीय विधि विज्ञान प्रयोगशाला र राष्ट्रिय विधि विज्ञान प्रयोगशालाको कार्यमा दोहोरोपन नहुने गरी आपसी सहकार्यमा कार्यसम्पादन र संस्थागत क्षमता विकासमा जोड दिने प्रतिबद्धता व्यक्त गर्नुभएको छ ।