06/11/2026
قومیت اور شہریت میں فرق سے ناواقف لوگ پشتون شناخت پر سوال اٹھانے کے بجائے تاریخ، جغرافیہ اور سیاسی شعور کا مطالعہ کریں، احسان اللہ خان
قومیت کسی دوسرے ملک میں گھر، جائیداد یا کاروبار رکھنے کا نام نہیں بلکہ اجتماعی تاریخ، زبان، ثقافت، تہذیب اور قومی شناخت کا نام ہے۔ شہریت ایک قانونی حیثیت ہے، جبکہ قومیت ایک تاریخی اور تہذیبی حقیقت اور شناخت ہے۔ دونوں تصورات کو خلط ملط کرکے پشتون قوم پرست سیاست کو طعنوں کا نشانہ بنانا سیاسی دلیل نہیں بلکہ فکری مغالطہ ہے۔
کچھ لوگوں کو شاید یہ معلوم نہیں کہ پشتون قوم کی تاریخ موجودہ ریاستی سرحدوں سے کہیں قدیم ہے۔ کوئی بھی سرحد کسی بھی شخص کی قومیت، زبان، ثقافت اور تاریخی رشتوں کو تقسیم نہیں کرسکتی۔ افغانستان میں رہنے والا پشتون بھی اتنا ہی پشتون ہے جتنا پاکستان میں رہنے والا پشتون ہے۔ کسی کو اپنی قومیت ثابت کرنے کے لیے کابل میں گھر بنانے یا بچوں کو وہاں تعلیم دلوانے کی ضرورت نہیں۔
کابل میں گھر بنانے یا اسلام آباد میں رہائش اختیار کرنے سے کسی کی قومیت کا تعین نہیں ہوتا۔ اگر اسلام آباد میں گھر، بچوں کی تعلیم اور بہتر رہائشی سہولیات حاصل کرنا کسی کی شہریت یا قومیت کا معیار ہے تو پھر دنیا بھر میں آباد اقوام کی شناخت پر سوال اٹھانا پڑے گا۔ کسی پشتون کا اسلام آباد، لندن، نیویارک یا کسی دوسرے شہر میں رہنا اس کی پشتون شناخت کو ختم نہیں کرتا۔
پشتون قوم پرستی کسی دوسرے ملک کی شہریت یا وہاں مستقل رہائش کا مطالبہ نہیں بلکہ اپنی سرزمین پر اپنے وسائل، اختیار، تشخص اور حقوق کی ضمانت کا مطالبہ ہے۔ اس طرح کی کھوکھلی باتیں کرنے کے بجائے پختونخوا کے عوام کے آئینی، سیاسی، معاشی اور قومی حقوق کی بات کی جائے۔ پشتونوں کو ایک دوسرے کے مقابل کھڑا کرنے اور ان کی تاریخی شناخت کو متنازع بنانے کے بجائے ان کے بنیادی مسائل، بدامنی، دہشتگردی، معاشی محرومی اور سیاسی و آئینی حقوق پر توجہ دی جائے۔
ہم قوم پرستی کے لیے کسی کے سرٹیفکیٹ، سرکاری منصب یا سیاسی بیان کے محتاج نہیں۔ قوم پرستی کے تصور کو اس طرح کی کھوکھلی باتوں سے نہیں سمجھا جاسکتا۔ اس کے لیے تاریخ، قومی تحریکوں اور پشتون خطے کی سیاسی و تہذیبی حقیقتوں کا ادراک ضروری ہے۔ قوم پرست سیاست کو مشکوک بنانے کی کوششیں حقائق تبدیل نہیں کرسکتیں۔
احسان اللہ خان
مرکزی ترجمان عوامی نیشنل پارٹی
|
