29/09/2026
Madaxweyne Ku-xigeenka DDS, Mudane Ibraahim Cusmaan Faarax, ayaa saaka dhagax-dhigay Mashruuca Dhismaha Xafiiska Shirkadda Dhismaha DDS.
Mashruucan oo ay ku baxeyso lacag kor u dhaafaysa 800 Milyan oo Birr, ayaa ka kooban 6 dabaq(G+6) oo si casri ah loo dhisayo, waxaana Madaxweyne Ku-xigeenka ku wehelinayay dhagax-dhigga Mashruucan Madaxa Xarunta Dhexe ee Xisbiga, Eng. Maxamed Shaale, iyo Maareeyaha Guud ee Shirkadda Dhismaha DDS, Mudane Eng. Cabdirashiid Maxamed Cumar.
Madaxweyne Ku-xigeenka DDS, Mudane Ibraahim Cusmaan Faarax, oo ka hadlayay munaasabaddii dhagax-dhigga, ayaa sheegay inay Xukuumaddu isbeddelkii kadib ahmiyad weyn siisay Sector-ka Horumarinta Corporation-ka iyo Dhismaha, isagoo carrabka ku dhuftay in xafiisyo badan oo ku habboon adeeg-bixinta bulshada laga dhisay Deegaanka.
Madaxweyne Ku-xigeenka ayaa sidoo kale tibaaxay in dhismahan cusub uu qayb ka yahay dadaallada lagu xoojinayo adeegyada maalgelinta, horumarinta dhismaha iyo abuurista jawi ku habboon adeeg-bixinta iyo soo jiidashada maalgashadayaasha kala duwan.
Maareeyaha Guud ee Shirkadda Dhismaha DDS, Mudane Eng. Cabdirashiid Maxamed Cumar, oo isaguna ka hadlay munaasabadda, ayaa Xukuumadda uga mahadceliyay ahmiyadda iyo mudnaanta ay siisay Sector-ka Horumarinta Dhismaha, isagoo tibaaxay in Mashruucan, oo ay fulinayso Shirkadda Dhismaha DDS, loogu talogalay in lagu dhamaystiro muddo sanad iyo badh gudihiis ah.
Dadaallada loogu jiro kor u qaadida kobaca dhaqaale ee Deegaankeenna intii ka dambaysay isbeddelka maamul ee ka hanaqaaday dalka iyo Deegaankaba, ayay Xukuumaddu gundhig uga dhigtay aasaasidda iyo xoojinta Shirkadaha Horumarinta Dawladda, kuwaas oo meelmarin kara maalgelinta mugga leh ee lagu samaynayo adeegyada aasaasiga ah ee sida tooska ah uga jawaabaya baahiyaha bulshada.
Shirkadaha Horumarinta Dawladda ayaa loogu talogalay inay qayb muhiim ah ka qaataan fulinta mashaariicaha wax ka beddelaya nolosha dhaqan-dhaqaale iyo mida bulshadaba ee Deegaanka Soomaalida.