19/10/2026
ACPC, inilapit ang tulong pinansyal sa mga magsasaka at mangingisda ng Pangasinan sa pamamagitan ng Agri-RECOVER Caravan
Kasunod ng opisyal na paglulunsad ng Agricultural Rehabilitation, Emergency Credit, and Operational Viability for Economic Restoration (Agri-RECOVER) Program noong Setyembre 2026 sa Pampanga, nagtungo ang Agricultural Credit Policy Council (ACPC) sa Pangasinan upang ilapit ang abot-kayang pautang at iba pang serbisyo ng gobyerno para sa mga magsasaka at mangingisda. Isinagawa ang Agri-RECOVER Caravan noong Oktubre 16, 2026, sa SM City Urdaneta Central, Urdaneta City, Pangasinan, sa pakikipagtulungan ng Department of Agriculture Regional Field Office 1 (DA-RFO 1) at Bureau of Fisheries and Aquatic Resources (BFAR) Region 1.
Mula sa aktibidad na ito, 69 na magsasaka at mangingisda mula sa Pangasinan ang nakapag-avail ng Agri-RECOVER Calamity Loan na umabot sa Php 2,365,000.00. 21 walk-in applicants naman ang nakapagsumite ng kanilang mga aplikasyon na agarang ipoproseso ng partner lending conduit ng ACPC, ang Ilocos Consolidated Cooperative Bank (ICCB).
Mahigit 200 na magsasaka at mangingisda ang lumahok sa Agri-RECOVER Caravan sa Pangasinan, na naglalayong mag-abot ng agarang tulong pinansyal at financial literacy training upang palakasin ang kaalaman sa wastong pamamahala ng pananalapi ng magsasaka at mangingisda gayundin ang kanilang kahandaan at katatagan sa pagharap sa mga epekto ng El Niño at iba pang kalamidad.
Pinangunahan ng Ilocos Consolidated Cooperative Bank (ICCB) ang onsite processing ng mga loan applications. Naging pagkakataon din ito para sa mga magsasaka, mangingisda, at kooperatiba na makapag-avail ng crop insurance sa pamamagitan ng Philippine Crop Insurance Corporation (PCIC), mag-apply para sa National ID sa pamamagitan ng Philippine Statistics Authority (PSA), at beripikahin ang kanilang rehistrasyon sa Registry System for Basic Sectors in Agriculture (RSBSA) sa tulong ng DA upang matiyak ang kanilang pagiging kwalipikado sa mga kaukulang programa at serbisyong pampamahalaan.
Sa kanyang mensahe, binigyang-diin ni ACPC Executive Director Rallen O. Verdadero ang kahalagahan ng paghahanda sa El Niño at ang pangangailangan ng mga magsasaka at mangingisda sa sapat na puhunan upang mapanatili ang kanilang kabuhayan.
“Ang El Niño ay hindi na bago sa mga problemang nararanasan sa pagsasaka, kaya dapat ay napaghahandaan natin ito taon-taon. Naniniwala akong matatalino ang mga magsasaka at mangingisda ng Pangasinan at alam nila ang mga dapat gawin sa ganitong sitwasyon. Ngunit kailangan nila ng sapat na kapital upang maipagpatuloy at mapalakas ang kanilang mga kabuhayan sa kabila ng tagtuyot. Kaya narito ang ACPC upang tumulong,” aniya.
Dagdag pa niya, maaaring gamitin ang mga programa ng ACPC hindi lamang sa pagbangon mula sa pinsalang dulot ng kalamidad kundi pati sa paghahanda sa mga susunod na hamon sa agrikultura, kabilang ang pagpapatupad ng mga climate-resilient project gaya ng mga irrigation system at solar-powered water pumps.
Samantala, tiniyak ni DA-RFO 1 Agribusiness and Marketing Assistance Division (AMAD) Chief Irene Tactac ang patuloy na pakikiisa ng DA-RFO 1 sa pagbibigay ng suporta at serbisyong makatutulong sa mga magsasaka at mangingisda, lalo na sa pagharap sa mga hamong dulot ng pagbabago ng klima.
Para sa mga magsasaka at mangingisda ng Pangasinan na apektado ng kalamidad, maaaring makipag-ugnayan sa Ilocos Consolidated Cooperative Bank (ICCB) upang mag-apply para sa Calamity Loan.
Patuloy na ilalapit ng ACPC ang Agri-RECOVER Program sa iba't ibang panig ng bansa upang matulungan ang mga magsasaka at mangingisda na makabangon mula sa mga kalamidad, mapatatag ang kanilang kabuhayan, at mapaghandaan ang mga susunod na hamon sa sektor ng agrikultura at pangisdaan.
