Ministria e Shëndetësisë

Shënohet Dita Botërore pa Duhan: Të rinjtë sensibilizohen për rreziqet e duhanit dhe produkteve të nikotinës

Shënohet Dita Botërore pa Duhan nën moton: “Zbulimi i joshjes – luftimi i varësisë nga nikotina dhe duhani”, Ministria e Shëndetësisë / Instituti Kombëtar i Shëndetësisë Publike të Kosovës, në bashkëpunim me Ministrinë e Arsimit dhe Shkencës, si dhe me drejtoritë komunale të arsimit, sot ka zhvilluar një aktivitet ndërgjegjësues me rastin e shënimit të Ditës Botërore pa Duhan, e cila çdo vit shënohet më 31 maj.

Ky aktivitet kishte për qëllim ngritjen e vetëdijes tek të rinjtë dhe qytetarët për pasojat e dëmshme të përdorimit të duhanit dhe produkteve të nikotinës, duke promovuar rëndësinë e një jetese të shëndetshme dhe pa varësi.

Përmes këtij organizimi u synua sensibilizimi i komunitetit mbi ndikimin negativ që këto produkte kanë në shëndet, sidomos tek gjeneratat e reja, si dhe inkurajimi i tyre për të zgjedhur mënyra më të shëndetshme jetese.

Aktiviteti u pasurua me ndarjen e çmimeve për nxënësit pjesëmarrës në garën me punime me mesazhe kundër duhan pirjes dhe me ekspozimin e punimeve të realizuara nga ana e tyre, të përcollën mesazhe vetëdijësuese dhe kreative kundër përdorimit të duhanit dhe nikotinës.

Le të ndërtojmë së bashku një shoqëri më të shëndetshme duke zgjedhur jetën pa duhan dhe pa nikotinë. Çdo vendim i sotëm për shëndetin është një investim për të ardhmen tonë dhe të brezave që vijnë.

Ministria e Shëndetësisë shpreh pikëllim për ndarjen nga jeta të ish Ministrit të Shëndetësisë, Prof. Dr. Alush Gash*t.

Në këto momente të vështira, i shprehim ngushëllimet më të sinqerta familjes Gashi, miqve, kolegëve dhe gjithë atyre që patën fatin ta njohin dhe të bashkëpunojnë me të.

Prof. Dr. Alush Gashi do të kujtohet me respekt për kontributin e tij në sistemin shëndetësor dhe në edukimin e brezave të mjekëve.

Qoftë i përjetshëm kujtimi për të.

Ministria e Shëndetësisë ndan përvojën e saj në financimin e shërbimeve për nënat dhe fëmijët në forumin rajonal të UNICEF-it

Ministria e Shëndetësisë mori pjesë në takimin ndër-rajonal të organizuar nga UNICEF në Sofja, i cili iu kushtua programit të financimit të sistemeve të vizitave në shtëpi për nënat dhe fëmijët nga mosha 0 deri në 3 vjeç, si dhe ndërhyrjeve në fëmijërinë e hershme.

Gjatë këtij takimi u diskutuan praktikat më të mira dhe modelet e financimit të shërbimeve të vizitave në shtëpi për nënat dhe fëmijët, me fokus të veçantë në qëndrueshmërinë financiare dhe planifikimin afatgjatë të këtyre programeve.

Në këtë kontekst, rezultatet e arritura nga Kosova në këtë fushë u vlerësuan si ndër më të mirat në rajon, veçanërisht për stabilitetin dhe vazhdimësinë e financimit të këtyre shërbimeve.

Pjesëmarrja në këtë takim përbën një mundësi të rëndësishme për shkëmbim përvojash, forcim të bashkëpunimit rajonal dhe avancim të mëtejshëm të politikave dhe shërbimeve që mbështesin zhvillimin e hershëm të fëmijëve dhe mirëqenien e familjeve në vend.

Java e Ndërgjegjësimit për Shëndetin Mendor - 11 - 17 maj 2026

Me rastin e shënimit të Javës së Ndërgjegjësimit për Shëndetin Mendor, Ministria e Shëndetësisë ka mbajtur sot një tryezë të rrumbullakët, si pjesë e aktiviteteve që synojnë rritjen e vetëdijes për rëndësinë e shëndetit mendor dhe fuqizimin e shërbimeve në këtë fushë.

Kjo tryezë bashkon përfaqësues institucionalë, profesionistë të shëndetit dhe akterë relevantë, me qëllim diskutimin e sfidave aktuale dhe identifikimin e mundësive për përmirësimin e shërbimeve të shëndetit mendor në vend. Përmes këtij aktiviteti synohet forcimi i bashkëpunimit ndërinstitucional dhe avancimi i politikave në këtë fushë me rëndësi të veçantë për shoqërinë.

Java e Ndërgjegjësimit për Shëndetin Mendor ka një rëndësi të veçantë, pasi synon të promovojë kujdesin për shëndetin mendor, parandalimin e problemeve të shëndetit mendor dhe uljen e stigmës ndaj personave që përballen me sfida të tilla, duke inkurajuar një qasje më gjithëpërfshirëse dhe mbështetëse në shoqëri.

Në këtë frymë, Ministria e Shëndetësisë fton qytetarët që të kujdesen për shëndetin e tyre mendor, të kërkojnë ndihmë pa hezitim kur kanë nevojë dhe të kontribuojnë në krijimin e një shoqërie më të hapur, mbështetëse dhe gjithëpërfshirëse.

11–17 Maj 2026 shënohet Java e Ndërgjegjësimit për Shëndetin Mendor, me moton:

“Të veprojmë për veten, për të tjerët, për të gjithë ne”

Kjo javë synon të promovojë rëndësinë e kujdesit për shëndetin mendor, mbështetjen dhe mirëkuptimin për të gjithë ata që përballen me sfida të shëndetit mendor.

Certifikohen 33 koordinatorë të cilësisë në kuadër të SHSKUK

Ministria e Shëndetësisë, në bashkëpunim me Shërbimin Spitalor Klinik Universitar të Kosovës dhe me mbështetjen e partnerit strategjik International Health Services (IHS), ka organizuar për herë të parë një trajnim për koordinatorët e cilësisë në kuadër të SHSKUK-së.

Trajnimi 4-ditor arriti të përmbushë synimet e paracaktuara duke ngritur kapacitetet teorike dhe praktike të zyrtarëve të cilësisë për të projektuar dhe nisur zbatimin e Sistemit të Menaxhimit të Cilësisë brenda institucioneve shëndetësore të kujdesit spitalor.

Meqenëse ky aktivitet po fillon rishtas në nivelin tretësor shëndetësor, si i tillë përbën një hap të rëndësishëm drejt fuqizimit të sistemit shëndetësor më cilësor dhe më të besueshëm.

Në këtë trajnim janë certifikuar 33 koordinatorë të cilësisë, me synim përmirësimin e cilësisë së shërbimeve shëndetësore, rritjen e sigurisë së pacientëve dhe fuqizimin e kapaciteteve profesionale në kujdesin spitalor.

Ministria e Shëndetësisë mbetet e përkushtuar në ngritjen e standardeve dhe ofrimin e shërbimeve sa më cilësore për qytetarët.

Digjitalizohet regjistrimi i lindjes së fëmijës në Klinikën e Gjinekologjisë në QKUK

Transformimi i Klinikës së Gjinekologjisë në QKUK është një nga investimet më të rëndësishme në sektorin e shëndetësisë publike, me një vlerë mbi 5.5 milionë euro.

Fillimisht janë modernizuar kushtet për pacientet, duke kaluar nga 8 shtretër në një dhomë në vetëm 2, si dhe duke siguruar banjo brenda çdo dhome për trajtim më të dinjitetshëm.

Paralelisht, janë funksionalizuar tri shërbime të reja.

Si, fertilizimi i asistuar mjekësor, shërbim për të cilin qytetarët nuk kanë më nevojë të shpenzojnë mijëra euro në institucione private.

Amniocenteza, shërbim për të cilin pacientet më herët kanë paguar deri në 600 euro në sektorin privat.

Gjithashtu, është funksionalizuar edhe mjekësia fetale, duke rritur cilësinë e kujdesit gjatë shtatzënisë.

Në vazhdën e këtyre investimeve, sot u lansua edhe shërbimi digjital “Lindja e Fëmijës”, i integruar në platformën eKosova.

Ky shërbim u mundëson prindërve që procedurat për regjistrimin e të porsalindurit t’i bëjnë me disa klikime në spital, pa pasur nevojë që në momentet e tyre më të lumtura të paraqiten fizikisht nga një institucion në tjetrin.

Shërbimi përfshin regjistrimin në sistemin informativ shëndetësor, aplikimin për shtesat për lehonën dhe fëmijën, regjistrimin e vaksinimit, hapjen e llogarive në eKosova dhe njoftimin elektronik të institucioneve statistikore.

Platforma ofron gjithashtu informacione për secilën fazë, nga para shtatzënia, shtatzënia, lindja deri te zhvillimi i hershëm i fëmijës, si dhe liston 245 shërbime, duke u mundësuar qytetarëve që, sipas vendbanimit, të identifikojnë institucionet më të afërta shëndetësore ku mund t’i marrin ato.

Ky shërbim tashmë ofrohet në spitalet e Gjilanit dhe Ferizajt, ndërsa nga sot edhe në QKUK, dhe shumë shpejt në të gjitha maternitetet e vendit.

Ministri i Shëndetësisë Dr. Arben Vitia theksoi se digjitalizimi i shëndetësisë mbetet një nga prioritetet kryesore, duke falënderuar partnerët ndërkombëtarë për mbështetjen e vazhdueshme.

Ministri falënderoi në veçanti Ambasadorin e Gjermanisë, Shkëlqesinë e tij Rainer Rudolph, Ministrin e Ministrisë së Digjitalizimit dhe Administratës Publike, z. Lulëzon Jagxhiu, znj. Vanessa Sabelski nga GIZ Kosova dhe Bashkimin Evropian.

Po ashtu, ai shprehu mirënjohje dhe falenderim të përzemërt për profesionistët shëndetësorë për punën e tyre të palodhshme.

Sot, Ministri i Shëndetësisë, Dr. Arben Vitia, priti në takim z. Anthony Randazzo, Drejtor Menaxhues i Zyrës për Bizneset e Vogla dhe Shërbimet Financiare në Korporatën Amerikane për Financimin e Zhvillimit Ndërkombëtar, me fokus në shëndetësi dhe bujqësi, së bashku me kolegët e Ambasadës së Shteteve të Bashkuara të Amerikës në Kosovë.

Gjatë takimit u prezantuan prioritetet e Ministrisë së Shëndetësisë dhe u diskutua për mundësitë e investimeve në sektorin e shëndetësisë në Kosovë.

Jemi shumë falenderues për mbështetjen dhe interesimin për zhvillimin e sistemit tonë shëndetësor.