Agjencia Kosovare e Privatizimit

REAGIM ZYRTAR I AGJENCISË KOSOVARE TË PRIVATIZIMIT (AKP) LIDHUR ME PUBLIKIMIN E SHKRIMIT NË PORTALIN "INFOKUSI" PËR SH*TJEN DIREKTE TË NJË PARCELE NË ZK NEKODIME, KOMUNA E FERIZAJIT

Agjencia Kosovare e Privatizimit (AKP) shpreh shqetësimin e saj lidhur me artikullin e publikuar nga portali Gazeta Infokus, në të cilin paraqiten pretendime të pasakta, interpretime të njëanshme dhe konkluzione të pambështetura në fakte, të cilat krijojnë perceptim të gabuar tek publiku dhe kanë potencial të ndikojnë në proceset demokratike dhe zgjedhore përmes keqinformimit dhe dezinformimit të opinionit publik.

Për hir të informimit të drejtë të qytetarëve, AKP sqaron si në vijim:
Para se të trajtohen aspektet ligjore dhe procedurale të këtij rasti, është e rëndësishme të theksohet se vetë dokumentet e publikuara nga portali Gazeta Infokus dëshmojnë një fakt thelbësor që është lënë jashtë artikullit. Parcela objekt i sh*tjes direkte në këtë rast, me sipërfaqe prej 2,524 m², është sh*tur për shumën prej 302,880 euro, përkatësisht me çmim prej 120 euro për m². Ndërkaq, nga vendimet e Bordeve te kaluara vendime të publikuara në të njëjtin artikull rezulton se AKP ka realizuar sh*tje të ngjashme me çmime prej 20.00 euro/m², 17.27 euro/m², 15.05 euro/m² dhe 1.10 euro/m². Mesatarja e këtyre rasteve është rreth 13.36 euro/m², që nënkupton se parcela në fjalë është sh*tur me çmim afërsisht nëntë (9) herë më të lartë. Ky fakt, i cili mund të verifikohet nga çdo lexues duke iu referuar vetë dokumenteve të publikuara nga portali, bie ndesh me narrativën e paraqitur në artikull se kemi të bëjmë me zhvlerësim apo favorizim në sh*tjen e asetit. Përkundrazi, të dhënat tregojnë se në këtë rast është realizuar një vlerë e lartë financiare në interes të ndërmarrjes shoqërore dhe kreditorëve të saj.

1. Sh*tja nuk është realizuar jashtë procedurave ligjore
Rasti në fjalë nuk përbën një vendim të veçantë apo të jashtëzakonshëm, por është trajtuar në përputhje të plotë me:
• Ligjin për Agjencinë Kosovare të Privatizimit;
• Shtojcën e Ligjit të AKP-së, konkretisht nenin 18 paragrafi 1.4;
• Rregulloren Nr. 04/2024 për Sh*tjen Direkte të Aseteve të Caktuara të Ndërmarrjeve Shoqërore.
Kjo rregullore është miratuar pikërisht për trajtimin e rasteve ku sh*tja përmes tenderit publik nuk është e mundshme ose do të shkaktonte humbje ekonomike për ndërmarrjen shoqërore.

2. Parcela nuk ishte e përshtatshme për tender publik
Parcela kadastrale nr. 410-0 në ZK Nekodime ishte e rrethuar në të gjitha anët me prona private të privatizuara më herët dhe, sipas gjendjes faktike në terren, ishte bërë pjesë integrale e një kompleksi privat banimi.

Në këtë parcelë dhe mbi të ishin shtrirë:
• objekte banimi;
• rrugë të brendshme;
• infrastrukturë e ujësjellësit;
• kanalizim;
• rrjet energjetik dhe infrastrukturë përcjellëse.
Ekspertizat profesionale, raportet e terrenit dhe vlerësimet teknike kanë konstatuar se gjendja ishte e pakthyeshme dhe se parcela kishte humbur funksionin e saj fillestar.
Në këto rrethana, AKP kishte detyrim ligjor të vlerësonte nëse tenderimi publik do të ishte realisht i mundshëm dhe ekonomikisht i arsyeshëm.

3. Vetë rregullorja e parashikon këtë kategori sh*tjeje
Neni 4 paragrafi 1.3 i Rregullores për Sh*tjen Direkte parashikon shprehimisht mundësinë e sh*tjes direkte kur:
“Ngastra kadastrale ose pjesa e caktuar e ngastrës kadastrale amë në pronësi të ndonjë ndërmarrje shoqërore e cila sipas gjendjes faktike në terren, është si pjesë integrale e kompleksit të pronësisë private ose nuk ka dalje në rrugë, me ç’rast tenderimi publik konsiderohet i pamundur apo sjell dëme potenciale ekonomike për vlerën reale të asetit dhe zhvlerësimin e tij.”
Po ashtu, rasti konkret përmban elemente që lidhen edhe me paragrafin 1.2 të nenit 4 të së njëjtës rregullore, pasi në parcelë ekzistojnë ndërtime dhe infrastrukturë e përhershme.
Pikërisht kjo është situata faktike e konstatuar në këtë rast.

4. Pretendimi për favorizim bie ndesh me vetë faktet
Artikulli tenton të krijojë përshtypjen se prona është sh*tur nën vlerë.
Faktet tregojnë të kundërtën.
Parcela prej 2,524 m² është sh*tur për 302,880 euro, përkatësisht 120 euro për m².
Vetë dokumentet e publikuara nga portali tregojnë se në raste të tjera të trajtuara nga Bordet paraprake të AKP-së janë realizuar sh*tje me vlera dukshëm më të ulëta për metër katror.
Kjo tregon qartë se nuk kemi të bëjmë me zhvlerësim të asetit, por me një realizim financiar që ka ruajtur dhe maksimizuar interesin ekonomik të ndërmarrjes shoqërore.

5. Vlera nuk është përcaktuar arbitrarisht
Në kundërshtim me pretendimet e artikullit, çmimi nuk është përcaktuar nga ndonjë individ apo organ politik.
Sipas Rregullores Nr. 04/2024, vlera e asetit dhe/ose pjesës së tij bazohet në treguesit e vlerave referente në harmoni me klasifikimet e parapara në hartat digjitale të zonave të vlerësimit, të publikuara nga Ministria e Financave për qëllime të tatimit në pronë.
Për rrjedhojë, vlera e asetit nuk përcaktohet sipas vlerësimeve subjektive apo diskrecionit të zyrtarëve të AKP-së, por sipas metodologjisë zyrtare të vlerësimit të pronave të aplikuar në të gjithë territorin e Republikës së Kosovës.

6. Emrat e blerësve nuk fshihen – mbrohet privatësia e palëve
Artikulli pretendon se AKP ka fshehur emrin e blerësit.
Ky pretendim është i pasaktë.
AKP zbaton standard të njëjtë për të gjitha rastet e sh*tjeve direkte dhe publikimit të vendimeve administrative.
Të dhënat personale të personave fizikë anonimizohen në pajtim me legjislacionin për mbrojtjen e të dhënave personale dhe privatësinë e palëve.
Ky standard zbatohet pa dallim për të gjithë qytetarët dhe nuk ka të bëjë me identitetin, pozitën apo përkatësinë politike të ndonjë personi.

7. AKP është institucion i pavarur dhe jo organ politik
AKP vepron në bazë të mandatit të përcaktuar me ligj dhe vendimet e saj merren në bazë të dokumentacionit profesional, ekspertizave teknike, analizave juridike dhe procedurave të miratuara nga organet kompetente.
Përfshirja e emrave të figurave politike në tituj sensacionalë, pa asnjë provë se ato kanë pasur rol në procesin administrativ apo vendimmarrës, krijon perceptime të rreme dhe cenon besimin e publikut në institucionet shtetërore.

AKP mbetet e përkushtuar ndaj ligjshmërisë, transparencës, trajtimit të barabartë të të gjitha palëve dhe mbrojtjes së interesit publik gjatë administrimit, privatizimit dhe likuidimit të aseteve të ndërmarrjeve shoqërore.

Duke konsideruar se artikulli në fjalë nuk ka paraqitur në mënyrë të plotë faktet relevante, bazën ligjore të procesit, rrethanat faktike të rastit dhe elementet që kanë ndikuar në përcaktimin e vlerës së asetit, vlerësojmë se opinioni publik është informuar në mënyrë të njëanshme dhe jo të plotë. Për këtë arsye, kërkojmë nga portali Gazeta Infokus që, në përputhje me standardet profesionale të gazetarisë dhe parimin e informimit të drejtë të publikut, të publikojë këtë reagim dhe të korrigjojë artikullin përkatës duke reflektuar faktet dhe sqarimet zyrtare të paraqitura nga Agjencia Kosovare e Privatizimit.

Agjencia Kosovare e Privatizimit
Prishtinë, qershor 2026.

KOMUNIKATË PËR MEDIA
MBLEDHJA E BORDIT TË DREJTORËVE TË AKP-së

Prishtinë - Bordi i Drejtorëve i Agjencisë Kosovare të Privatizimit mbajti mbledhjen e rregullt, në të cilën u shqyrtuan dhe u miratuan një sërë vendimesh me rëndësi për vazhdimin dhe forcimin e qeverisjes institucionale brenda Agjencisë.

Në këtë mbledhje, Bordi u informua për nënshkrimin e Marrëveshjes së pranim-dorëzimit ndërmjet AKP-së dhe Ministrisë së Bujqësisë, Pylltarisë dhe Zhvillimit Rural/Agjencisë së Pyjeve, lidhur me transferimin e Ekonomive Pyjore dhe Ekonomive të Gjuetisë. Kjo marrëveshje ishte aprovuar paraprakisht nga Bordi i Drejtorëve të AKP-së me Vendimin numër: BD-191-6, të datës 30 nëntor 2023.

Bordi gjithashtu miratoi Raportin Vjetor të Agjencisë për vitin 2025.

Duke pasur parasysh se Bordi i Drejtorëve nuk ka qenë funksional nga gushti 2025 deri në fund të muajit prill 2026, me funksionalizimin e Bordit të ri janë krijuar kushtet për vazhdimin e plotë të aktiviteteve që hyjnë në mandatin ligjor të AKP-së. Në këtë drejtim, Bordi miratoi planet e reja për sh*tjet me tender publik dhe sh*tjet direkte për pjesën e mbetur të vitit 2026.

Në kuadër të përmirësimit të menaxhimit të ndërmarrjes NSh “Inex Sharr Planina Brezovicë”, Bordi miratoi strukturën e re organizative për Qendrën e Skijimit Brezovica, Planin investiv për sezonin dimëror 2026/2027, si dhe autorizoi inicimin e procedurave për shpalljen e hapësirave të reja me qira dhe rivlerësimin e qiradhënieve aktuale në kuadër të ndërmarrjes.

Në fushën e likuidimit të ndërmarrjeve shoqërore, Bordi miratoi shpërndarjen e mjeteve për kreditorët e NSh PRZ014 “IGK Ballkan”, në shumën prej 1,164,721.79 euro për 1,348 kreditorë. Po ashtu, Bordi miratoi shpërndarjen e mjeteve për kreditorët e NSh PRN046 “Fan Zahir Pajaziti”, në shumën prej 88,801.06 euro për 56 kreditorë.

Agjencia Kosovare e Privatizimit mbetet e përkushtuar që, në përputhje me mandatin e saj ligjor, të avancojë proceset e privatizimit, likuidimit dhe administrimit të aseteve shoqërore në mënyrë transparente, profesionale dhe në funksion të mbrojtjes së interesit publik.

KOMUNIKATË PËR MEDIA

Nënshkruhet marrëveshja: AKP bartë rreth 200 mijë hektarë prona pyjore në Ministrinë e Bujqësisë

Kryetari i Bordit të Agjencisë Kosovare të Privatizimit, z. Hekuran Nikçi, dhe drejtori ekzekutiv në detyrë, z. Burim Leci, nënshkruan sot marrëveshjen e pranim-dorëzimit me ministrin e Bujqësisë, Pylltarisë dhe Zhvillimit Rural, z. Armend Muja dhe me drejtorin në detyrë të Agjencisë së Pyjeve të Kosovës, z. Menderez Ibra, për transferimin e Ekonomive Pyjore dhe Ekonomive të Gjuetisë nga AKP-ja në Ministrinë e Bujqësisë.
Gjatë një ceremonie rasti të mbajtur në ambientet e Ministrisë së Bujqësisë, marrëveshja e nënshkruar u vlerësua si ndër proceset më meritore të pasluftës, me ç’rast asetet e rëndësishme po përjashtohen nga procesi i privatizimit dhe po kalojnë në menaxhim të Ministrisë së Bujqësisë dhe Pylltarisë për interes publik.
Bëhet fjalë për rreth 200 mijë hektarë prona të shpërndara në 3015 parcela që kanë qenë nën menaxhimin e AKP-së. I gjithë dokumentacioni me listën e aseteve dhe me parcelat e evidentuara poashtu u barten në Ministri, të cilat pas përfundimit të procedurave kadastrale do të jenë publike.
AKP me rastin e transferimit të këtyre aseteve dhe detyrimeve te Agjencia Pyjore e Kosovës, ka ofruar të gjithë dokumentacionin relevant në dispozicion, të dhëna këto të paraqitura në formë të Shtojcave të kësaj Marrëveshje. Ndërsa, sipas nevojës, do të formojë komisione të përbashkëta me Agjencinë Pyjore të Kosovës për kontrollimin dhe transferimin e pronësisë në emër të Qeverisë së Kosovës.
Vendimi për bartjen e 22 Ekonomive Pyjore dhe dy Ndërmarrjeve Pyjore Industriale është marrë paraprakisht në Bordin e AKP-së dhe është bazuar në Ligjin e AKP-së Nr. 04/ L-034 dhe në Ligjin Nr. 08/L-137 për Pyjet.

KOMUNIKATË PËR MEDIA
MBLIDHET BORDI I AKP-së, MERR DISA VENDIME

Bordi i Drejtorëve të Agjencisë Kosovare të Privatizimit (AKP) mbajti mbledhjen e jashtëzakonshme me datë 04 maj 2026, në të cilën u miratuan disa vendime kyçe për avancimin e proceseve të privatizimit, menaxhimin efikas të aseteve dhe forcimin e qeverisjes institucionale. Kjo ishte mbledhja e parë e Bordit që nga emërimi nga Kuvendi me datë 27 prill 2026 sipas vendimit nr.10-V-075.
Bordi emëroi Zëvendës Kryesuesin e Bordit z. Gent Nushi sipas nenit 12.4 të Ligjit për Agjencinë Kosovare të Privatizimit Nr. 04/L-034 (të ndryshuar me Ligjin 06/L-023, Ligjin nr. 05/L-080 dhe Ligjin 04/L-115).
Bordi miratoi shpalljen e konkursit publik të rekrutimit për pozitën Drejtor Ekzekutiv i Agjencisë gjë që do të bëhet së shpejti.

KOMUNIKATË PËR MEDIA
AKP ofron për qira 604 prona në rajone të ndryshme të Kosovës

Agjencia Kosovare e Privatizimit (AKP) ka shpallur ofertën publike për qiradhënien e gjithsej 604 pronave, të shpërndara në disa rajone të Kosovës, duke ofruar mundësi të reja për zhvillim ekonomik dhe investime.

Asetet e ofruara përfshijnë lokale afariste, parcela tokësore, depo dhe zyra, të cilat janë të përshtatshme për aktivitete të ndryshme biznesore. Qiradhënia realizohet në forma vjetore, mujore dhe komerciale, në varësi të natyrës së pronës.

Sipas shpërndarjes rajonale, numri më i madh i pronave ndodhet në rajonin e Pejë, me gjithsej 433 njësi në dispozicion. Ndërkohë, në rajonin e Mitrovicës janë ofruar 40 prona, ndërsa në rajonin e Gjilan janë në dispozicion 131 prona.

AKP u bën thirrje të gjitha subjekteve të interesuara që të aplikojnë brenda afatit të përcaktuar. Afati i fundit për dorëzimin e ofertave është 28 prill 2026, ndërsa ofertat duhet të dorëzohen në zarf të mbyllur në zyrat rajonale përkatëse të AKP-së, nga ora 10:00 deri në 12:00. Hapja e ofertave do të bëhet në të njëjtën ditë, duke filluar nga ora 12:30.

Të gjitha informatat e detajuara lidhur me asetet e ofruara mund të merren në zyrat rajonale respektive të AKP-së: Pejë, Mitrovicë dhe Gjilan, si dhe në faqen zyrtare: www.pak-ks.org, rubrika “Shpallje”: https://www.pak-ks.org/page.aspx?id=1,35.

🎿 OFERTA E PRILLIT ❄️

Prilli në Brezovicë – një mundësi e rrallë për skijim që nuk vjen shpesh!

Shijo një eksperiencë të paharrueshme në qendrën e skijimit Brezovica!

📅 Data: 09 Prill – 13 Prill 2026 (e enjte – e hënë)

🏨 Akomodimi: Hotel Molika

Përfshihet:

✔️ Fjetje
✔️ Mëngjes
✔️ Ski Pass

💶 Çmimi: vetëm 35€ për person.

Mos e humb këtë ofertë fantastike për disa ditë relaksi dhe adrenalinë në borë! ⛷️

📞 Na kontakto për rezervime: 044/605-451.

Njoftim për Adhuruesit e Skijimit - Përditësim i Funksionimit të Ski Pass-it në Qendrën e Skijimit Brezovica

Qendra e Skijimit Brezovica ka përditësuar konfigurimin e Ski Pass. Nga tani e tutje, të gjithë ski pass-et do të mbeten automatikisht të vlefshme për ditën/et pasuese nëse nuk përdoren fare (pra, nëse nuk skanohen në asnjë rampe hyrëse, përfshirë edhe trenin).
(Kjo vlen në rastet kur, për çfarëdo arsye, Qendra e Skijimit nuk është operacionale, për shembull në rast të kushteve të pafavorshme atmosferike, mungesës së energjisë elektrike ose problemeve teknike me teleferik apo ski lift)
Kjo do të thotë që ski pass-i juaj do të mund të përdoret ditën/et pasuese, sipas llojit të ski pass-it të blerë (p.sh., Gjate Javës ose Vikend), ndërsa kontrolli i qasjes në teleferikë mbetet i pandryshuar.

Për më shumë informata, vizitoni web faqen e Agjencisë Kosovare të Privatizimit: www. pak-ks.org.

NJOFTIM ME RËNDËSI NGA BREZOVICA

Të dashur adhurues të skijimit

Ju njoftojmë se nga sot, të gjitha shërbimet për:

• Rimbushjen e Ski Pass;
• Blerjen e biletave për një vozitje me Teleferik;
• Ski Lift;
• Tren;

mund t’i realizoni edhe ONLINE përmes faqes zyrtare të Ndërmarrjes Shoqërore “Inex Sharr Planina – Brezovica”: www.brezovica.info.

Për qasje të drejtpërdrejtë në sh*tjen online mund të përdoret linku në vijim: https://www.brezovica.info/prices.php?lang=en

Shmangni pritjet dhe siguroni biletën tuaj me vetëm disa klikime!

Me respekt
Agjencia Kosovare e Privatizimit
Phone:+383(0)38 500 400
Email. [email protected]

SHPALLJE PUBLIKE PËR KREDITORËT
Agjencia Kosovare e Privatizimit njofton të gjithë kreditorët të cilëve u janë aprovuar shpërndarjet sipas listës më poshtë, por të cilët ende nuk kanë dorëzuar të dhënat e nevojshme për realizimin e pagesave, si vijon:
Të gjithë kreditorët përkatës obligohen që, brenda 30 ditësh nga dita e kësaj shpallje, të dorëzojnë pranë AKP-së dokumentacionin e plotë dhe korrekt, përfshirë, por pa u kufizuar në:
- të dhënat bankare (llogaria bankare valide),
- dokumentet identifikuese,
- dhe çdo dokument tjetër të kërkuar në përputhje me procedurat e - pagesës (në rastet e kreditorëve që kanë ndërruar jetë aktvendimet mbi trashëgiminë).
Mosdorëzimi i të dhënave të kërkuara brenda afatit të përcaktuar mund të rezultojë në bartjen e mjeteve nga Ndërmarrjet Shoqërore si fonde të përkohshme për Qeverinë e Republikës së Kosovës dhe në rast se paraqiteni më vonë atëherë do të ketë vonesa në procesin e pagesave dhe gjithashtu mund të rezultojë edhe përgatitjen e Raportit Përfundimtar në përputhje me nenin 43 të Shtojcës së Ligjit Nr. 04/L-034 për Agjencinë Kosovare të Privatizimit dhe mbylljen e procesit të likuidimit për Ndërmarrjet Shoqërore specifike, pa cenuar të drejtën materiale të kreditorit për shpërndarje, deri në përmbushjen e obligimeve procedurale.
Kreditorët ftohen që për informata shtesë të kontaktojnë AKP-në përmes e-mailit: [email protected] ose të paraqiten fizikisht në adresën: Rr. “Dritan Hoxha” Nr. 55 , Prishtinë.
Kjo shpallje publikohet me qëllim të informimit transparent dhe sigurimit të zbatimit efikas të vendimeve për shpërndarje.
Për ta shkarkuar listën klikoni mbi linkun në vijim:
https://www.pak-ks.org/Page.aspx?id=1,%208,998

Agjencia Kosovare e Privatizimit rikthen në emër të ndërmarrjes shoqërore pronën me vlerë milionëshe në Fushë Kosovë.

Agjencia Kosovare e Privatizimit (AKP) njofton publikun se ka pranuar aktgjykimin e Departamentit për Krime të Rënda të Gjykatës Themelore në Prishtinë, PKR.nr.196-21, me të cilin, falë angazhimit ligjor të AKP-së dhe në bashkëpunim të plotë me Prokurorinë kompetente, është arritur rikthimi i pronës me vlerë të lartë ekonomike në emër të ndërmarrjes shoqërore.

Prona në fjalë, e cila ndodhet në Fushë Kosovë dhe ka sipërfaqe prej 02.14 hektarësh, është fituar sërish në emër të Ndërmarrjes Shoqërore KBI “Kosova Eksport” në Fushë Kosovë.

Ky vendim gjyqësor paraqet një sukses të rëndësishëm institucional dhe dëshmi të përkushtimit të AKP-së për mbrojtjen e pasurisë shoqërore, sundimin e ligjit dhe korrigjimin e tjetërsimeve të kundërligjshme të pronave.