Agjencia e Menaxhimit Emergjent

TELEGRAM NGUSHËLLIMI

Të nderuar familjarë të të ndjerit Abedin,(Jonuz) Ademaj,
Të nderuar kolegë dhe bashkëpunëtorë të NJPZSH- Prizren dhe komunitetit të Zjarrfikjes dhe Shpëtimit në mbarë vendin,

Me pikëllim të thellë dhe dhimbje të madhe pranuam lajmin për ndarjen nga jeta të zyrtarit tonë të respektuar, zjarrfikësit Abedin (Jonuz) Ademaj, si pasojë e një sëmundjeje të rëndë.
I lindur më 12.04.1965 në Prizren, Abedin (Jonuz )Ademaj ndërroi jetë më 17.07.2026. Humbja e tij lë një zbrazëti të madhe,jo vetëm në familjen tuaj, por edhe në radhët e Agjencisë së Menaxhimit Emergjent dhe të gjithë komunitetit të zjarrfikësve në Prizren e mbarë vendin.

Si zjarrfikës që nga viti 2001, Abedini shërbeu me nderë, profesionalizëm dhe përkushtim të lartë gjatë gjithë karrierës së tij, duke qenë gjithmonë i gatshëm për t'u dalë në ndihmë qytetarëve në momentet e tyre më të vështira. Abedini me vetëmohimin e pashoq, duke vënë edhe jetën në rrezik, nuk hezitoi të shpëtojë dhe ndihmojë qytetarët e rrezikuar nga zjarret dhe fatkeqësitë tjera.

Në emër të Agjencisë së Menaxhimit Emergjent, i shprehim ngushëllimet më të sinqerta familjes Ademaj, miqve, kolegëve dhe të gjithë atyre që patën nderin të punojnë me të.
Kujtimi për profesionalizmin dhe shpirtin e tij human do të mbetet gjithmonë i gjallë në institucionin tonë.
U prehtë në paqe!

U.d Drejtori Ekzekutiv i Agjencisë së Menaxhimit Emergjent z.Shefki Abdullahu

Drejtori Ekzekutiv i AME-së priti në takim Drejtorin e Departamentit për Siguri Publike të Misionit të OSBE-së në Kosovë

Prishtinë, 8 Korrik 2026

U. d. Drejtori Ekzekutiv i Agjencisë për Menaxhimin e Emergjencave z. Shefki Abdullahu, së bashku me stafin e Agjencisë, mirëpriti në një takim zyrtar Drejtorin e Departamentit për Siguri Publike të Misionit të OSBE-së në Kosovë z.Bertman Welsing.

Takimi u zhvillua në një atmosferë konstruktive, ku u diskutua për bashkëpunimin e deritanishëm ndërmjet AME-së dhe OSBE-së, si dhe për mundësitë konkrete të thellimit të partneritetit në fusha me interes të përbashkët. Vëmendje e veçantë i’u kushtua forcimit të kapaciteteve institucionale, zhvillimit të trajnimeve profesionale, shkëmbimit të përvojave dhe avancimit të praktikave më të mira në menaxhimin e emergjencave dhe sigurinë publike.

Drejtori Ekzekutiv i AME-së z.Shefki Abdullahu falënderoi përfaqësuesit e OSBE-së për mbështetjen e vazhdueshme që i kanë dhënë Agjencisë ndër vite, duke theksuar se partneriteti me OSBE-në ka qenë një faktor i rëndësishëm në ngritjen e kapaciteteve profesionale dhe operacionale të institucionit.

Nga ana e tij, Drejtori i Departamentit për Siguri Publike të OSBE-së vlerësoi angazhimin dhe profesionalizmin e AME-së në përmbushjen e misionit të saj, duke shprehur gatishmërinë për të vazhduar bashkëpunimin përmes projekteve të përbashkëta që kontribuojnë në rritjen e gatishmërisë institucionale, përmirësimin e koordinimit ndërinstitucional dhe forcimin e sigurisë publike.

Takimi shërbeu si një mundësi e mirë për shkëmbimin e ideve dhe identifikimin e fushave të reja të bashkëpunimit, me synimin e ndërtimit të një sistemi edhe më të fuqishëm dhe më efikas të menaxhimit të emergjencave në shërbim të qytetarëve.

AME-ja mbetet e përkushtuar në kultivimin dhe fuqizimin e partneriteteve strategjike me organizatat vendore dhe ndërkombëtare, duke vlerësuar se bashkëpunimi dhe koordinimi janë elemente kyçe për rritjen e sigurisë, gatishmërisë dhe reagimit efektiv ndaj çdo situate emergjente nga Fatkeqësitë Natyrore dhe Fatkeqësitë Tjera në nivel vendi.

Agjencia e Menaxhimit Emergjent pjesë e Ushtrimit “Golden Sabre 2026”

Prishtinë, 3 Korrik 2026

Agjencia e Menaxhimit Emergjent mori pjesë në ushtrimin e përbashkët “Golden Sabre 2026”, i cili u zhvillua në kampin Vrellë dhe u drejtua nga KFOR-i.

Në kuadër të ushtrimit u testuan procedurat operacionale, komunikimi dhe koordinimi ndërinstitucional ndërmjet institucioneve përgjegjëse me qëllim rritjen e gatishmërisë dhe efektivitetit në përballimin e situatave të ndryshme emergjente.

Gjatë zhvillimit të ushtrimit, zyrtarët e AME-së demonstruan profesionalizëm, gatishmëri dhe aftësi të larta operacionale në përmbushjen e detyrave të tyre.

Ushtrimin nga afër e përcolli Drejtori Ekzekutiv i AME-së, z. Shefki Abdullahu, së bashku me Komandantin e KFOR-it, Gjeneral Major Özkan Ulutaş, si dhe udhëheqës të lartë të FSK-së, NALT, Policisë së Kosovës dhe EULEX-it.

Në ushtrimin “Golden Sabre 2026” morën pjesë KFOR-i, FSK-ja, Policia e Kosovës, EULEX-i dhe Agjencia e Menaxhimit Emergjent.

Agjencia e Menaxhimit Emergjent mban konferencë për media me temën: Koordinimi ndër institucional gjatë periudhës me temperatura të larta dhe rritja e vetëdijes për parandalimin e zjarreve.

Prishtinë, 1 korrik 2026

Agjencia e Menaxhimit Emergjent/MPB, ka mbajtur sot një konferencë të përbashkët për media me temën: "Ngritja e temperaturave të larta – Koordinimi institucional për parandalimin, gatishmërinë dhe reagimin në mbrojtje të jetës, pronës dhe mjedisit në nivel vendi."

Në këtë konferencë morën pjesë krerët dhe përfaqësuesit e institucioneve kyçe shtetërore të menaxhimit emergjent, duke përfshirë U.d së Drejtorit Ekzekutiv të AME-së, z. Shefki Abdullahu, Drejtorin e Përgjithshëm të Policisë së Kosovës, z. Gazmend Hoxha, përfaqësuesin e Institutit Hidrometeorologjik të Kosovës, z. Bashkim Kastrati, Drejtorin e Agjencisë Pyjore të Kosovës, z. Menderes Ibra, si dhe Drejtorin e Departamentit të Bujqësisë, z. Tahir Ahmeti.

Gjatë konferencës, U.d i Drejtorit Ekzekutiv të Agjencisë së Menaxhimit Emergjent, z. Shefki Abdullahu, iu drejtua të pranishmëve me këtë fjalim të plotë zyrtar:
Kam nderin t’ju drejtohem në këtë konferencë të përbashkët për media, e cila organizohet me qëllim të informimit të opinionit publik lidhur me situatën e krijuar nga ngritja e temperaturave të larta, rreziqet që burojnë prej tyre, si dhe masat e ndërmarra nga institucionet relevante të Republikës së Kosovës në funksion të parandalimit, gatishmërisë dhe reagimit emergjent.

Prania e përbashkët institucionale në këtë forum përbën dëshmi të qartë të nivelit të lartë të koordinimit ndërinstitucional dhe të funksionimit të mekanizmave shtetërorë të menaxhimit emergjent. Përballë fenomeneve të tilla, të cilat bartin rrezik të shtuar për jetën e qytetarëve, pronën dhe mjedisin, veprimi i fragmentuar institucional është i pamjaftueshëm. Në këtë drejtim, bashkërendimi i plotë operacional dhe institucional mbetet domosdoshmëri absolute.

Agjencia e Menaxhimit Emergjent, në cilësinë e institucionit qendror përgjegjës për menaxhimin e emergjencave civile në Republikën e Kosovës, ushtron mandatin e saj ligjor në funksion të parandalimit të rreziqeve, përgatitjes së kapaciteteve, koordinimit të veprimeve institucionale dhe reagimit të shpejtë dhe efikas në mbrojtje të jetës, pronës dhe mjedisit. Ky mandat zbatohet në mënyrë të vazhdueshme dhe të pandërprerë në të gjithë territorin e Republikës së Kosovës.

Sipas të dhënave dhe parashikimeve të Institutit Hidrometeorologjik të Kosovës, vendi ynë do të vazhdojë të përballet me temperatura të larta edhe në vijim, çka ndikon drejtpërdrejt në rritjen e rrezikut për shpërthimin dhe përhapjen e zjarreve në pyje, kullosa dhe sipërfaqe bujqësore, si dhe paraqet rrezik të shtuar për shëndetin publik, veçanërisht për kategoritë e ndjeshme të shoqërisë.

Sezoni veror, në mënyrë të përsëritur, është dëshmuar si periudhë me sfida të shtuara për sistemin e menaxhimit emergjent në vend.
Gjatë sezonit të kaluar janë regjistruar gjithsej 11466 vatra zjarri në territorin e Republikës së Kosovës, të cilat kanë kërkuar angazhim të gjerë institucional dhe ndërinstitucional. Në menaxhimin e tyre kanë marrë pjesë Njësitë Profesionale të Zjarrfikjes dhe Shpëtimit, Policia e Kosovës, Agjencia Pyjore e Kosovës, Forca e Sigurisë së Kosovës, si dhe institucionet komunale dhe të tjera relevante.

Falë ndërhyrjes së shpejtë dhe koordinimit efektiv ndërinstitucional, pjesa më e madhe e këtyre rasteve është lokalizuar dhe menaxhuar me sukses, duke shmangur pasoja më të rënda për jetën e qytetarëve dhe pasurinë publike e private.
Megjithatë, duhet theksuar se çdo incident i kësaj natyre përbën rrezik serioz dhe shkakton dëme të konsiderueshme në ekosistem, ekonomi dhe infrastrukturë, si dhe kërkon mobilizim të konsiderueshëm të resurseve shtetërore.

Në këtë kontekst, mbetet shqetësuese fakti se një pjesë e konsiderueshme e këtyre zjarreve kanë si shkak faktorin njerëzor, qoftë përmes pakujdesisë, qoftë përmes veprimeve të qëllimshme, të cilat cenojnë drejtpërdrejt sigurinë publike dhe mjedisin.
Në funksion të parandalimit dhe forcimit të kontrollit institucional, Agjencia e Menaxhimit Emergjent ka ndërmarrë masa shtesë operacionele dhe ka intensifikuar inspektimet e vazhdueshme në terren nga inspektorët e saj, të cilët veprojnë në koordinim të ngushtë me institucionet relevante, me qëllim të identifikimit të hershëm të rreziqeve dhe parandalimit të incidenteve.

Në aspektin operacional, Agjencia ka ngritur nivelin e gatishmërisë në të gjitha strukturat e saj:
• Qendra Operative Emergjente funksionon në regjim të pandërprerë 24 orë në ditë, 7 ditë në javë;
• Qendrat Rajonale të Menaxhimit Emergjent ushtrojnë monitorim të vazhdueshëm dhe koordinim me nivelin lokal;
• Njësitë Profesionale të Zjarrfikjes dhe Shpëtimit janë në gatishmëri të plotë operative;
• Mekanizmat e inspektimit dhe parandalimit janë aktivizuar në mënyrë të shtuar;
• Koordinimi ndërinstitucional në nivel qendror dhe lokal është i vazhdueshëm dhe i strukturuar.

Në këtë kuadër, theksoj gjithashtu aspektin e zbatimit të ligjit:
Të gjitha rastet e zjarrvënieve, pavarësisht nëse janë rezultat i veprimit të qëllimshëm apo i pakujdesisë, do të trajtohen në përputhje të plotë me legjislacionin në fuqi. Personat përgjegjës do të përballen me masat përkatëse ndëshkuese dhe procedurat ligjore, pa asnjë përjashtim. Ky qëndrim institucional përbën mesazh të qartë të angazhimit të shtetit për mbrojtjen e rendit publik dhe të mjedisit.
Megjithatë, duhet ritheksuar se asnjë mekanizëm institucional nuk mund të jetë plotësisht efektiv pa bashkëpunimin e qytetarëve.

Në këtë drejtim, apeloj:
• të mos ndizni zjarre në ambiente të hapura;
• të mos digjni mbetje bujqësore apo materiale të tjera;
• të mos hidhni materiale të ndezshme në natyrë;
• të respektoni plotësisht udhëzimet e institucioneve kompetente;
• dhe të raportoni menjëherë çdo vatër zjarri në numrin emergjent 112.

Gjithashtu, rekomandohet kujdes i shtuar për shëndetin gjatë periudhave me temperatura të larta, veçanërisht për kategoritë më të ndjeshme të popullatës.
Dëshiroj të shpreh mirënjohjen institucionale për qytetarët e Republikës së Kosovës për bashkëpunimin e vazhdueshëm me institucionet reaguese, i cili ka qenë dhe mbetet faktor kyç në menaxhimin e situatave emergjente.

Njëkohësisht, shpreh vlerësim të lartë për bashkëpunimin e qëndrueshëm dhe efikas ndërinstitucional, si në nivel qendror ashtu edhe në nivel lokal, i cili ka mundësuar reagim të shpejtë, të koordinuar dhe profesional në situata të ndryshme emergjente.

Ky nivel bashkërendimi institucional mbetet garanci themelore për mbrojtjen e jetës së qytetarëve, pronës publike dhe private, si dhe mjedisit në Republikën e Kosovës.
“Një falënderim i veçantë i shkon mediave për mbështetjen, bashkëpunimin dhe pasqyrimin profesional të këtij aktiviteti.”
Mesazhi institucional mbetet i qartë: institucionet janë të përgatitura dhe në gatishmëri të plotë, ndërsa suksesi i përgjithshëm varet nga bashkëpunimi dhe përgjegjësia e përbashkët.

Pas fjalës kryesore, përfaqësuesit e të gjitha institucioneve të pranishme konfirmuan gatishmërinë e tyre të plotë dhe ripërsëritën thirrjen drejtuar qytetarëve për kujdes maksimal, me qëllim të parandalimit të rreziqeve përgjatë këtij sezoni.

Paralajmërimi i hershëm dhe parashikimi bazuar në ndikim

Prishtinë, 17.06.2026

Me mbështetjen e Komisionit Evropian dhe zbatimin nga Banka Botërore, në periudhën 16–18 Qershor 2026 po mbahen punëtori me temën “Paralajmërimi i hershëm dhe parashikimi bazuar në ndikim”.

Në kuadër të projektit TAFF treditor 2024, janë mbledhur së bashku akterët relevantë nga niveli qendror dhe lokal me qëllim të diskutimit të mundësive për përmirësimin e sistemit të paralajmërimit të hershëm dhe parashikimit bazuar në ndikim nga fatkeqësitë.

Në këtë punëtori po marrin pjesë :përfaqësues nga Drejtoritë e Mbrojtjes dhe Shpëtimit, Qendrat Operative Emergjente 112 si dhe udhëheqës të agjencive dhe departamenteve të nivelit qendror, përfshirë IHMK-në, APK-në, SHGJK-në dhe institucione të tjera relevante.

Takimi shërbeu si platformë për diskutim dhe shkëmbim përvojash, me fokus në rishikimin e aspekteve praktike dhe identifikimin e mundësive për përmirësim, veçanërisht në aspektin e Procedurave Standarde Operative, duke forcuar lidhjen ndërmjet Paralajmërimit të Hershëm dhe Veprimit të Hershëm në procesin e menaxhimit të fatkeqësive në nivel vendi.

Fjalën hyrëse për hapjen e punëtorisë e bëri UD. Drejtori Ekzekutiv i AME-së, z. Shefki Abdullahu me ç’ rast uroi mirëseardhje në punëtorinë me temën :"Paralajmërimi i Hershëm dhe Parashikimi Bazuar në Ndikim", një aktivitet me rëndësi të veçantë për forcimin e kapaciteteve tona në menaxhimin e rreziqeve dhe mbrojtjen e qytetarëve nga fatkeqësitë natyrore dhe rreziqet e tjera.

Ndër të tjerash Drejtori Ekzekutiv z.Abdullahu tha: “në emër të Agjencisë së Menaxhimit Emergjent, shpreh mirënjohjen time për të gjithë ju që keni gjetur kohë të merrni pjesë në këtë punëtori.
Një falënderim i veçantë shkon për Bankën Botërore për mbështetjen profesionale dhe bashkëpunimin e vazhdueshëm, si dhe për Bashkimin Evropian për mbështetjen financiare që ka bërë të mundur organizimin e këtij aktiviteti.

Sot, përballë sfidave gjithnjë e më të mëdha që sjellin ndryshimet klimatike dhe fenomenet ekstreme të motit, është e domosdoshme që institucionet tona të zhvillojnë sisteme moderne të paralajmërimit të hershëm, të cilat jo vetëm që parashikojnë ngjarjet e rrezikshme, por edhe vlerësojnë ndikimin e tyre te njerëzit, infrastruktura dhe mjedisi. Qasja e bazuar në ndikim na ndihmon të marrim vendime më të shpejta, më të sakta dhe më efektive për mbrojtjen e jetës dhe pronës.

Jam i bindur se diskutimet, prezantimet dhe shkëmbimi i përvojave gjatë kësaj punëtorie do të kontribuojnë në avancimin e bashkëpunimit ndërinstitucional dhe në forcimin e kapaciteteve tona për reagim dhe gatishmëri.
Ju falënderoj për pjesëmarrjen dhe ju dëshiroj punë të mbarë dhe diskutime frytdhënëse”.

Përmbyllet me sukses aktiviteti dyditor për Kërkim-Shpëtim dhe mbijetesë,çertifikohen nxënësit nga tri komuna dhe pjesëmarrësit tjerë.

Prishtinë, 02.06.2026

Sot është përmbyllur me sukses aktiviteti dyditor i trajnimit bazik për Kërkim-Shpëtim dhe mbijetesë i organizuar nga Agjencia e Menaxhimit Emergjent/MPB.
Në këtë trajnim, i cili u mbajt më 1 dhe 2 Qershor, morën pjesë nxënës nga 18 shkolla të ndryshme të komunës së Mitrovicës, Fushë Kosovës dhe Shtimes, të cilët në fund u çertifikuan për suksesin e këtij trajnimi edhe pjesëmarrësit tjerë.

Në hapjen e këtij aktiviteti, për të parë nga afër dhe për rritur vetëdijen mbi sigurinë emergjente, morën pjesë krerët më të lartë të institucioneve të Republikës së Kosovës: Kryeministri z.Albin Kurti, Ministri i Punëve të Brendshme z.Xhelal Sveçla, Sekretari i Përgjithshëm i MPB-së z.Genc Metaj, u.d. Drejtori i Përgjithshëm i AME-së .u.d z.Shefki Abdullahu, si kryetarët e komunave përkatëse dhe zyrtarë nga Policia e Kosovës dhe AME-ja.

Agjencia e Menaxhimit të Emergjent/MPB përgëzojnë të gjithë nxënësit për disiplinën dhe vullnetin e treguar, si dhe falënderojnë komunat dhe shkollat pjesëmarrëse, po ashtu falenderojmë:
• Klubin e zhytjes Trepça-Mitrovicë,
•Ekipin kombëtar të Kërkim-Shpëtimit në ujëra sipërfaqësore me barka;
•Shoqatën e Kosovës për Kërkim-Shpëtim;
•Policia e Kosovës;
• Akademinë e Kosovës për Siguri Publike;
•Instruktorët e AME-së;
•Komunën e Mitrovicës së Jugut;
•Komunën e Fushë Kosovës;
•Komunën e Shtimes;
•Njësinë e Zjarrfikjes dhe Shpëtimit-Mitrovicë;
•Njësinë e Zjarrfikjes dhe Shpëtimit- Vushtrri;
•QKMF Mitrovicë;
•Spitalin i Përgjithshëm “Dr. Sami Haxhibeqiri" Mitrovicë dhe
• Ekipi nacional për fikjen e zjarreve.

I falenderojmë të gjithë të lartëcekurit për kontributin e tyre!

Nxënës nga tri komuna përfundojnë sot aktivitetin dyditor për Kërkim-Shpëtim në Zubin Potok, marrin pjesë krerët më të lartë shtetërorë

Zubin Potok, 02.06.2026

​ Nën organizimin e Agjencisë së Menaxhimit të Emergjencave
/ MPB , gjatë datave 1 dhe 2 Qershor është realizuar me sukses aktiviteti i trajnimit për kërkim-shpëtim, ku morën pjesë nxënës nga 18 shkolla të ndryshme të komunave të Mitrovicës, Fushë Kosovës dhe Shtimes.

​Fëmijët pjesëmarrës u akomoduan në objektin e AME-së në Zubin Potok, ku patën mundësinë të pajisen me njohuri teorike dhe praktike mbi reagimin në raste të emergjencave dhe rëndësinë e kërkim-shpëtimit.

​Në hapjen e këtij aktiviteti, për të parë nga afër dhe për rritur vetëdijen mbi sigurinë emergjente, morën pjesë krerët më të lartë të institucioneve të Republikës së Kosovës si: Kryeministri z.Albin Kurti, Ministri i Punëve të Brendshme z.Xhelal Sveçla, Sekretari i Përgjithshëm i MPB-së z.Genc Metaj, u.d. Drejtori i Përgjithshëm i AME-së z. Shefki Abdullahu, si kryetarët e komunave përkatëse dhe zyrtarë nga Policia e Kosovës dhe AME-ja.

Përfaqësues nga Agjencia e Menaxhimit Emergjent /MPB morën pjesë në Konferencën rajonale treditore me temë:” Nga mësimet e identifikuara tek mësimet e mësuara “ përmes konceptit të Mbështetjes së Vendit Pritës (HNS).

E përfaqësuar prej tre zyrtarëve nga Agjencia e Menaxhimit Emergjent/ MPB, me mbështetje nga projekti IPA OSA morën pjesë në konferencën tre ditore kushtuar Mbështetjes së Vendit Pritës (Host Nation Support – HNS), e cila u zhvillua në Bodrum të Turqisë.

Ky aktivitet mblodhi ekspertë dhe përfaqësues të institucioneve të menaxhimit emergjent nga vende të ndryshme, me qëllim koordinimin dhe ngritjen e kapaciteteve për përballjen me krizat dhe fatkeqësitë natyrore.

Punimet e sivjetme të konferencës u përqendruan në një cikël jetik për sigurinë, analizën e mësimeve të identifikuara nga operacionet e kaluara dhe shndërrimin e tyre në mësime të mësuara dhe të zbatuara në praktikë. Përfaqësuesit nga Kosova kontribuan aktivisht në këto diskutime, duke ndarë përvojat institucionale mbi mënyrën se si procedurat e pranimit të ndihmës rajonale po rishikohen dhe po përmirësohen vazhdimisht bazuar në sfidat reale të hasura në terren.

Konferenca “Host Nation Support” në Turqi rikonfirmon përkushtimin e institucioneve të Kosovës për të ndjekur standardet më të larta të menaxhimit të emergjencave, duke u bazuar në analizën dhe praktikën të mbështetjes së operacioneve të shpëtimit dhe ndihmës.

Akademia e Kosovës për Siguri Publike ka filluar trajnimi me temën “Përdorimi i Mjeteve Themelore për Shuarjen e Zjarreve dhe Ndihma e Parë”, i organizuar nga Agjencia e Menaxhimit të Emergjencave për zyrtarët e Ministria e Punëve të Brendshme.

Prishtinë 19.05.2026

Trajnimi po mbahet në mbështetjen e Akademisë së Kosovës për Siguri Publike, e cila po ofron mbështetjen e nevojshme logjistikë dhe organizimeve për realizimin e këtij aktiviteti trajnimor.

Në këtë trajnim po marrin pjesë rreth 50 pjesëmarrës nga Agjencia e Regjistrimit Civil, përkatësisht nga Qendrat e Regjistrimit të Automjeteve dhe Qendrat për Pajisje me Dokumente.

Qëllimi i trajnimit është ngritja e kapaciteteve profesionale në fushën e reagimit fillestar ndaj zjarreve, përdorimit të mjeteve themelore për shuarjen e zjarreve, si dhe ofrimit të ndihmës së parë në raste emergjente.

Trajnimi do të zhvillohet përmes ligjëratave teorike dhe ushtrimeve praktike, me fokus në përgatitjen dhe reagimin efikas në situata emergjente.