27/10/2026
Kryetari i LDK-së, Lumir Abdixhiku përkujton Ukë Bytyçin në 24 vjetorin e vrasjes së tij.
“Më 27 tetor 2002, në ditën kur LDK-ja festonte fitoren në Suharekë, u vra tinëzisht veprimtari i shquar i çështjes kombëtare, kryetari i atëhershëm i kësaj komune dhe njëri nga themeluesit e LDK-së në Suharekë, Ukë Bytyçi, së bashku me dy bashkëveprimtarët e tij, Bafti Bajramin dhe Bajram Bytyçin.
Në 24-vjetorin e kësaj vrasjeje, kryetari i Lidhjes Demokratike të Kosovës, Lumir Abdixhiku, nderon jetën dhe veprën e Ukë Bytyçit, një prej figurave emblematike të LDK-së, i cili i shërbeu me përkushtim Kosovës në rrugën e saj drejt lirisë, pavarësisë dhe demokracisë.
Ukë Bytyçi ishte veprimtar i palodhur i çështjes kombëtare, bashkëpunëtor i afërt i Presidentit historik, dr. Ibrahim Rugova, dhe një nga themeluesit e degës së LDK-së në Suharekë. Me guxim, vendosmëri dhe përkushtim të jashtëzakonshëm, ai u bë zë i qytetarëve dhe simbol i angazhimit politik e atdhetar. Si kryetar i komunës, punoi për ndërtimin e qeverisjes demokratike lokale, duke dëshmuar se shërbimi ndaj qytetarëve është përgjegjësi dhe mision.
Vrasja e tij, në kulmin e angazhimit politik dhe në ditën e fitores së LDK-së në Suharekë, synonte të ndalte një veprimtar që besonte në vlera demokratike, në vullnetin e qytetarëve dhe në të ardhmen e lirë të Kosovës. Por, as dhuna dhe as vrasja nuk mundën ta fshinin gjurmën e tij, ta zhbënin veprën e tij apo ta zbehnin kujtimin për të.
Ukë Bytyçi mbetet pjesë e historisë së LDK-së dhe e kujtesës sonë kolektive: një njeri me vlera të larta njerëzore, i guximshëm, modest dhe i përkushtuar deri në fund ndaj vendit dhe qytetarëve të tij.
Në këtë përvjetor, kujtojmë me nderim edhe Bafti Bajramin dhe Bajram Bytyçin, të cilët humbën jetën bashkë me të.
Lavdi jetës dhe veprës së Ukë Bytyçit, Bafti Bajramit dhe Bajram Bytyçit!”
