ARKEP - Autoriteti Rregullativ i Komunikimeve Elektronike dhe Postare

🚨 KUJDES NGA SMS MASHTRUESE! 🚨

Janë duke qarkulluar mesazhe mashtruese që pretendojnë se “regjistrimi juaj po skadon” dhe kërkojnë klikim në linke të dyshimta për përditësim të të dhënave.

⚠️ Këto mesazhe mund të përdoren për:

• Vjedhje të të dhënave personale
• Vjedhje të kredencialeve bankare
• Marrje kontrolli të llogarive tuaja

❌ Mos klikoni në linke të panjohura
❌ Mos ndani të dhëna personale apo bankare
❌ Mos vendosni fjalëkalime në faqe të dyshimta

✅ Çfarë duhet të bëni:
• Fshijeni menjëherë mesazhin
• Bllokoni dhe raportoni numrin
• Raportoni rastin te banka juaj dhe në KOS-CERT
• Verifikoni çdo njoftim vetëm përmes kanaleve zyrtare

📱 Përdoruesit e iPhone:

Për siguri shtesë, rekomandohet deaktivizimi i iMessage nëse pranoni shpesh SMS të dyshimta nga numra të panjohur.

➡️ Settings → Apps → Messages → iMessage → Off
🔐 Mbroni të dhënat tuaja. Mbroni veten!

Prishtinë 04 Maj 2026

KOMUNIKATË PËR PUBLIKUN

Lidhur me ofrimin e shërbimeve “data eSIM” nga ofruesit me pakicë

Autoriteti Rregullativ i Komunikimeve Elektronike dhe Postare (tutje: ARKEP) në përputhje me kompetencat e përcaktuara me Ligjin Nr.04/L-109 për Komunikimet Elektronike, pas shqyrtimit të detajuar të shërbimeve të njohura si ”data eSIM” të ofruara nga ofrues të ndryshëm të shërbimeve me pakicë, analizën e mënyrës së funksionimit të këtyre shërbimeve dhe në përputhje me legjislacionin në fuqi për komunikimet elektronike, me qëllim të parandalimit të kushteve për zhvillimin e një tregu jokonkurrues dhe për mbrojtjen e të drejtave të konsumatorëve, vlerëson si në vijim:

Asnjë subjekt, nuk ka të drejtë të ushtroj veprimtarinë në Republikën e Kosovës, përmes ofrimit të shërbimeve të komunikimeve elektronike pa autorizim paraprak nga ARKEP. Sidoqoftë, për t’u autorizuar, respektivisht vendosur në regjistrin e notifikimeve duhet të plotësohen kushtet e caktuara në Rregulloren Nr. 37, për Autorizimet e Përgjithshme;

Shërbimet “data eSIM only” janë të dizajnuara kryesisht për përdorues që udhëtojnë jashtë vendit të tyre të rezidencës (të njohur si Travel eSiM) dhe bazohen në përdorimin e shërbimeve roaming për ofrimin e shërbimit të qasjes në të dhëna (Internet) duke përdorur rrjetet mobile.

Nga analiza e praktikave rregullatore në Evropë rezulton se në asnjë vend evropian nuk ekziston një autorizim i drejtpërdrejtë për ofruesit e shërbimeve “data-only eSIM” si kategori më vete. Kjo për shkak se këta ofrues nuk përmbushin karakteristikat e operatorëve tradicionalë apo të MVNO-ve, në kuptimin klasik rregullator, pasi nuk zotërojnë apo menaxhojnë elemente thelbësore të rrjetit dhe nuk ofrojnë shërbime të plota të komunikimeve elektronike (si zëri apo numeracioni). Në vend të kësaj, ata funksionojnë kryesisht si ofrues të shërbimeve mbi internet (OTT), duke përdorur kapacitete të blera nga operatorë të autorizuar (MNO/MVNO), ndërsa përgjegjësia rregullatore mbetet tek këta të fundit që sigurojnë qasjen në rrjet.

Për më tepër, për shkak të këtij modeli operimi dhe mungesës së elementeve thelbësore të ofrimit të rrjeteve apo shërbimeve publike të komunikimeve elektronike, këta ofrues nuk i plotësojnë kriteret ligjore për t’u konsideruar dhe autorizuar si ofrues të shërbimeve të komunikimeve elektronike në kuptimin e kornizës rregullatore të Republikës së Kosovës.

Korniza Rregullatore për komunikimet elektronike nuk lejon përdorimin e shërbimeve roaming në mënyrë të përhershme (permanent roaming), përkatësisht përdorimin sistematik dhe afatgjatë të rrjeteve të operatorëve vendas nga përdorues që kanë qëndrim të përhershëm në territorin e Republikës së Kosovës.

Rrjedhimisht, operatorët mobil në Republikën e Kosovës, në cilësinë e ofruesve të shërbimeve roaming në rrjetet e tyre, në cilësinë e ofruesve të shërbimeve roaming në rrjetet e tyre, kanë të drejtë që, në përputhje me marrëveshjet roaming, politikat e përdorimit të drejtë dhe legjislacionin në fuqi, të vendosin kufizime, masa menaxhuese ose të refuzojnë qasjen në rrjet në rastet kur konstatohet përdorim që përbën roaming permanent.

Ofruesit e shërbimeve “data eSiM only” mund të ofrojnë shërbime roaming ndërkombëtar (për qytetarët që udhëtojnë jashtë vendit), në rastet kur:

- përdorimi i tyre mbetet në përputhje me natyrën e roamingut si shërbim për përdorim të përkohshëm gjatë udhëtimit dhe nuk shndërrohet në përdorim të përhershëm në territorin e Republikës së Kosovës;
- nuk ekzistojnë pika fizike të sh*tjes në territorin e Republikës së Kosovës;
- nuk promovojnë/targetojnë ofrimin e shërbimeve të roamingut në Republikën e Kosovës për qytetarët e vendit (ngjashëm si roaming nacional).

Këto shërbime duhet të përdoren vetëm për nevoja të përkohshme të udhëtimit dhe nuk duhet të përdoren si zëvendësim për shërbimet e ofruara nga operatorët e autorizuar në tregun vendor.

Operatorët dhe subjektet përkatëse të sigurojnë që përdorimi i shërbimeve roaming të jetë në përputhje me qëllimin dhe kufizimet e përcaktuara në legjislacionin në fuqi, ndërsa përdoruesit me qëndrim të përhershëm në Republikën e Kosovës të përdorin shërbime të ofruara nga operatorë të autorizuar në tregun vendor.

Prishtinë, 02 Prill 2026

Mbahet takimi në mes përfaqësuesve të Autoritetit Rregullativ të Komunikimeve Elektronike dhe Postare (ARKEP) të Republikës së Kosovës dhe Autoriteti i Komunikimeve Elektronike dhe Postare (AKEP) të Republikës së Shipërisë.

Më 4 mars 2026, në zyrat e Autoriteti Rregullativ i Komunikimeve Elektronike dhe Postare (ARKEP), u mbajt një takim pune ndërmjet përfaqësuesve të ARKEP dhe AKEP nga Republika e Shqipërisë.

Qëllimi i këtij takimi ishte diskutimi mbi ecurinë e zbatimit të marrëveshjes së roamingut ndërmjet dy vendeve dhe adresimi i disa sfidave të përbashkëta që lidhen me qasjen dhe kualitetin e shërbimeve të komunikimeve elektronike për qytetarët gjatë qëndrimit të tyre në roaming.

Gjatë takimit u diskutua gjithashtu për zhvillimet e pritshme në kuadër të procesit për integrimin e vendeve të Ballkanit Perëndimor në regjimin “Roam Like at Home” (RLAH) me Bashkimin Evropian.

Një fokus i veçantë i diskutimeve ishte edhe identifikimi i mundësive për optimizimin e mbulimit në zonat kufitare, me qëllim përmirësimin e përvojës së përdoruesve, veçanërisht gjatë kalimit në segmentin ndërkufitar në mes të qytetit të Kukësit dhe Prizrenit.

Në takim u trajtuan gjithashtu edhe çështje të tjera me interes të përbashkët në fushën e rregullimit të komunikimeve elektronike, duke theksuar rëndësinë e bashkëpunimit të vazhdueshëm ndërmjet dy autoriteteve rregullatore për të siguruar shërbime më cilësore dhe më të përballueshme për qytetarët e të dy vendeve.

Prishtinë, 05 Mars 2026

NJOFTIM ZYRTAR

Lidhur me rimbursimin e konsumatorëve të tarifuar nga operatori postar DELEX Sh.p.k.

Autoriteti Rregullativ i Komunikimeve Elektronike dhe Postare (ARKEP) njofton opinionin publik dhe të gjithë konsumatorët se personat të cilët janë tarifuar me tarifë shtesë në vlerë prej dy (2) eurosh nga operatori postar Delex Sh.p.k., për shërbimet postare ekspres të dërgesave të pranuara përmes platformës AliExpress, do të rimbursohen në tërësi.

Të gjithë konsumatorët e prekur nga aplikimi i kësaj tarife shtesë kanë të drejtë në kompensim financiar nga operatori postar Delex Sh.p.k.

Për realizimin e procedurës së rimbursimit, konsumatorët mund të paraqiten personalisht në zyrat e operatorit në adresën:

Rruga e Pejës nr. 876, Fushë Kosovë,

ose të kontaktojnë përmes:

Tel.: +383 (0) 49 559 952

E-mail: [email protected]

ARKEP, si organi rregullator përgjegjës për mbikëqyrjen e sektorit të komunikimeve elektronike dhe shërbimeve postare, mbetet i përkushtuar në mbrojtjen e të drejtave të konsumatorëve dhe në garantimin e funksionimit të rregullt dhe transparent të tregut postar në Republikën e Kosovës.

Faleminderit për bashkëpunimin dhe mirëkuptimin tuaj.

Prishtinë, 10 Shkurt 2026.

KOMUNIKATË PËR PUBLIKUN

Autoriteti Rregullativ i Komunikimeve Elektronike dhe Postare (ARKEP), bazuar në ankesat e konsumatorëve të adresuara në Departamentin për Mbrojtjen e Konsumatorit dhe Inspektimit lidhur me aplikimin e tarifës shtesë nga operatori postar 'Delex Sh.p.k,' për shërbimet postare ekspres të dërgesave të arritura nga AliExpress, njofton se konform autorizimeve që ka, menjëherë ka reaguar duke e trajtuar çështjen me prioritet të lartë, realizimin e një inspektimi të menjëhershëm tek operatori, me ç’rast ka ndërmarrë të gjitha masat për ndërprerjen e tarifimit të panevojshëm ndaj konsumatorëve në përputhje me legjislacionin në fuqi..

Kujtojmë se ofruesit e shërbimeve postare që operojnë nën kushtet e ‘Autorizimit të Përgjithshëm’ të notifikuar/autorizuar nga ARKEP, janë të obliguar të respektojnë të gjitha detyrimet ligjore që rrjedhin nga Ligji Nr. 06/L-038 për Shërbimet Postare dhe rregulloret në fuqi.

ARKEP i fton të gjithë operatorët postar të notifikuar/autorizuar nga Autoriteti që të ofrojnë shërbimet postare në përputhje me rregullativën në fuqi dhe të parandalojnë çdo veprim që bie ndesh me ligjet dhe rregulloret për shërbimet postare.

ARKEP njofton të gjithë konsumatorët se ankesat pranuara nga aplikimi i tarifës shtesë për shërbimet postare do të shqyrtohen dhe do të vendoset në mënyre meritore për secilën veç e veç.

ARKEP, si organ rregullator në fushën e komunikimeve elektronike dhe shërbimeve postare, është i përkushtuar të ndërmarrë të gjitha veprimet e nevojshme përmes inspektimeve të vazhdueshme për rregullimin dhe mbikëqyrjen efektive të tregut të shërbimeve postare në Republikën e Kosovës.

Prishtinë, 23 janar 2026

Takim mes ARKEP-it dhe Inspektoratit të Tregut të Ministrisë së Tregtisë dhe Industrisë

Sot, në ambientet e Autoritetit Rregullativ të Komunikimeve Elektronike dhe Postare (ARKEP), u mbajt një takim zyrtar ndërinstitucional.

Kryetari i Bordit të ARKEP-it, z. Nazim Rahimi, së bashku me Drejtorin e Departamentit për Mbrojtjen e Konsumatorëve dhe Inspektimin, z. Sejdë Tolaj, mirëpritën përfaqësuesit e Inspektoratit të Tregut të Ministrisë së Tregtisë dhe Industrisë, znj. Elma Krasniqi – Ushtruese e Detyrës së Kryeinspektores së Inspektoratit të Tregut dhe znj. Besa Rama – Zyrtare Ligjore.

Gjatë takimit u diskutuan çështje të interesit të përbashkët, me theks të veçantë në forcimin e bashkëpunimit ndërinstitucional, shkëmbimin e informatave dhe koordinimin e aktiviteteve inspektuese. Në veçanti, u trajtua nevoja për planifikimin dhe realizimin e inspektimeve të përbashkëta ndaj subjekteve që veprojnë në fushën e komunikimeve elektronike dhe shërbimeve postare, me qëllim të rritjes së mbrojtjes së konsumatorëve dhe sigurimit të respektimit të legjislacionit në fuqi.

Të dy institucionet shprehën gatishmërinë për bashkërendim të vazhdueshëm të aktiviteteve dhe për intensifikimin e bashkëpunimit praktik në terren. Po ashtu, u dakordua që gjatë procesit të inspektimit të ketë koordinim të plotë ndëinstitucional, në mënyrë që të sigurohet zbatimi i ligjshmërisë, transparenca dhe cilësia e shërbimeve të komunikimeve elektronike dhe postare në tregun e Republikës së Kosovës.

Prishinë, 19 Janar 2026.

Njoftim lidhur me mesazhet (përmes aplikacionit iMessage) dhe SMS-të mashtrues

ARKEP njofton qytetarët se kohët e fundit janë identifikuar mesazhe dhe SMS mashtrues, përfshirë ato të dërguara përmes aplikacionit të Apple iMessage, me përmbajtje të rreme si: “Përditësimi i të dhënave të bankës” dhe “Gjoba në trafik nga Policia e Kosovës”.
Këto mesazhe përmbajnë linqe dhe faqe mashtruese, të cilat synojnë përfitim material duke mashtruar qytetarët që bien pre e tyre.

Si masa parandaluese ndaj këtyre dukurive, ARKEP u rekomandon qytetarëve që:

1. Të mos klikojnë në linqe apo faqe të tilla të dyshimta;
2. Rastet e reja t’i raportojnë në adresat:

a. [email protected];
b. [email protected]; duke përfshirë këto informacione:

o Screenshot të mesazhit/SMS-it;
o Adresën e plotë të email-it ose numrin e telefonit nga i
cili ka ardhur mesazhi/SMS-i;

b. Në iOS, përmes opcioneve që ofrohen nga aplikacioni
(Report as Spam/Junk);
3. T’i fshijnë këto mesazhe/SMS pas raportimit;
4. Përdoruesit e telefonave të mençur iPhone (iOS) dhe tabletëve iPad (iPadOS), nëse nuk e kanë të domosdoshme përdorimin e aplikacionit iMessage, rekomandohen që ta ndalin përkohësisht këtë shërbim deri në një njoftim të radhës.

Ndalja e shërbimit iMessage realizohet si në vijim:
Shkoni te Settings → Apps → Messages, pastaj te opsioni iMessage dhe rrëshqitni butonin në anën e majtë (OFF).

Prishtinë, Janar 2026,

KOMUNIKATË PËR PUBLIKUN

Autoriteti Rregullator i Komunikimeve Elektronike dhe Postare (ARKEP) njofton publikun dhe të gjithë subjektet ekonomike se, në përputhje me Ligjin Nr. 04/L-109 për Komunikimet Elektronike (LKE), asnjë subjekt nuk ka të drejtë të ofrojë shërbime të komunikimeve elektronike në territorin e Republikës së Kosovës pa autorizim paraprak nga ARKEP.

Sipas Ligjit për Komunikimet Elektronike, neni 4, paragrafi 1.32, “shërbim i komunikimeve elektronike” nënkupton shërbimin që zakonisht ofrohet me pagesë dhe që përftohet, tërësisht ose pjesërisht, nga përcjellja e sinjaleve përmes rrjeteve të komunikimeve elektronike, përfshirë shërbimet e telekomunikacioneve dhe shërbimet e transmetimit, ndërsa përjashtohen vetëm shërbimet që ofrojnë përmbajtje ose ushtrojnë kontroll redaksional mbi përmbajtjen.

Në këtë kuptim ligjor, të gjitha shërbimet që mundësojnë lidhje, qasje ose transmetim të të dhënave (internet) përmes rrjeteve të komunikimeve elektronike, pavarësisht teknologjisë së përdorur apo modelit të biznesit, kualifikohen si shërbime të komunikimeve elektronike dhe i nënshtrohen regjimit të autorizimit nga ARKEP.

ARKEP vëren se kohëve të fundit ka pasur rritje të konsiderueshme të numrit të subjekteve që ofrojnë shërbime “data eSIM”, për të cilat ekzistojnë indikacione se, përveç roamingut ndërkombëtar, po ofrojnë edhe shërbime të komunikimeve elektronike brenda territorit të Republikës së Kosovës, pa qenë të pajisura me autorizimin përkatës nga ARKEP.

Ofrimi i shërbimeve të komunikimeve elektronike pa autorizim përbën shkelje të drejtpërdrejtë të legjislacionit në fuqi, cenon konkurrencën e ndershme në treg, dëmton operatorët e autorizuar dhe mund të ndikojë negativisht në mbrojtjen e konsumatorëve, transparencën e shërbimeve dhe sigurinë e rrjeteve elektronike.

Në kuadër të ushtrimit të kompetencave të tij ligjore, ARKEP do të koordinojë aktivitetet dhe veprimet e tij edhe me Institucionet e tjera relevante të Republikës së Kosovës, me qëllim të sigurimit të zbatimit efektiv të legjislacionit në fuqi, mbrojtjes së interesit publik dhe funksionimit të rregullt të tregut të komunikimeve elektronike.

Prandaj, ARKEP bën me dije se në rast të identifikimit të shkeljeve, do të ndërmarrë të gjitha masat administrative dhe ligjore në përputhje me kompetencat dhe mandatin e përcaktuar me legjislacionin në fuqi.

Dhjetor 2025, Prishtinë

Përmbledhje e të arriturave të ARKEP gjatë vitit 2025

Autoriteti Rregullativ i Komunikimeve Elektronike dhe Postare (ARKEP) po e përmbyllë vitin 2025 me sukses dhe të shumë të arritura në fushën e Komunikimeve Elektronike dhe Postare.
Gjatë vitit 2025, Autoriteti Rregullator i Komunikimeve Elektronike dhe Postare, ka vazhduar të luajë një rol kyç në zhvillimin, rregullimin dhe mbikëqyrjen efektive të tregut të komunikimeve elektronike dhe shërbimeve postare në Republikën e Kosovës, në përputhje me legjislacionin në fuqi dhe praktikat më të mira evropiane.

Si rezultat i objektivave të qarta rregullatore dhe mbikëqyrjes së vazhdueshme të tregut, gjatë vitit 2025 është shënuar përmirësim i dukshëm i kualitetit të shërbimeve të komunikimeve elektronike, veçanërisht në rrjetet mobile. Shpejtësia e internetit mobil ka arritur deri në 900 Mbps, duke reflektuar investime të konsiderueshme nga operatorët, shfrytëzim më efikas të spektrit frekuencor, si dhe duke përmirësuar ndjeshëm përvojën e përdoruesve fundorë.

Në aspektin e zhvillimit teknologjik, ARKEP ka vazhduar të mbështesë shtrirjen e rrjeteve me kapacitete shumë të larta (VHCN), përfshirë rrjetet 5G. Gjatë vitit 2025, mbulueshmëria e popullsisë me rrjet 5G ka arritur mbi 70%, duke tejkaluar objektivat e përcaktuara nga ARKEP në dokumentet strategjike dhe rregullatore.

Ky progres përfaqëson një hap të rëndësishëm drejt transformimit digjital të vendit dhe krijimit të bazës për shërbime inovative dhe aplikacione të avancuara.

Si një arritje e rëndësishme gjatë vitit 2025, është avansimi i mëtutjehëm i Kornizës Rregulatore, duke përfshirë sigurinë dhe funksionimin e duhur të rrjeteve dhe shërbimeve të komunikimeve Elektronike. Legjislacioni i miratuar është në përputhje të plotë me direktivat përkatëse të Bashkimit Evropian, si dhe me dokumentin 5G Security Toolbox, duke reflektuar standardet më të avancuara evropiane në fushën e sigurisë së rrjeteve dhe shërbimeve të komunikimeve elektronike, përfshirë rrjetet 5G.

Në KOSIX (Nyja Shkëmbyese e Internetit të Kosovës) është bërë zhvillim në aspektin teknologjik si dhe është bërë anëtarsimi në RIPE N.C.C ku me që rast është marrë edhe Numri Autonom (AS Number) si dhe versionet e IP (IPv4 dhe IPv6) ku tani Nyja Shkëmbyese e Internetit do të operojë me të dy versionet njëkohësisht në shkëmbimin e trafikut të Internetit në nivel të vendit.

Një tjetër arritje e rëndësishme gjatë vitit 2025 ka qenë avansimi i mëtejmë i sistemeve të ARKEP për monitorim dhe mbikëqyrje teknike, të kanë forcuar ndjeshëm kapacitetet institucionale për mbikëqyrje efektive të tregut dhe për vendimmarrje rregullatore të bazuar në të dhëna:

• Sistemi për monitorimin e kualitetit të shërbimeve të komunikimeve elektronike, i cili mundëson m***e më të sakta dhe më të shpeshta të parametrave kryesorë të kualitetit të shërbimit, përfshirë shpejtësinë e transmetimit të të dhënave, vonesën (latency), stabilitetin e lidhjes dhe performancën e rrjeteve mobile;

• Sistemi për monitorimin e spektrit radio frekuencor, i cili mundëson vlerësim më të detajuar dhe objektiv të shtrirjes gjeografike të rrjeteve, identifikimin e zonave me mbulim të pamjaftueshëm, si dhe verifikimin e të dhënave të raportuara nga operatorët.

Po ashtu, viti 2025 është karakterizuar nga një rritje e konsiderueshme e aktiviteteve të inspektimit dhe mbikëqyrjes ndaj operatorëve, me fokus të veçantë në:

• verifikimin e përmbushjes së obligimeve ligjore dhe rregullatore që rrjedhin nga Rregullorja për kontratat dhe mbrojtjen e konsumatorit;
• zbatimin e marrëveshjes së roamingut (Roam Like at Home - RLAH), si dhe duke adresuar çështje që lidhen me transparencën e ofertave, pakot e ofruara dhe të drejtat e konsumatorit.

Gjatë vitit 2025, ARKEP ka pasur një rol kyç në procesin e draftimit të Ligjit të ri për Komunikimet Elektronike, i cili ligj synon transpozimin e plotë të Kodit Evropian të Komunikimeve Elektronike (EECC), si dhe të Aktit të Infrastrukturës Gigabit (GIA) të BE-së, duke krijuar bazën ligjore për zhvillimin e rrjeteve me kapacitet shumë të lartë, nxitjen e investimeve, rritjen e konkurrencës dhe forcimin e mbrojtjes së konsumatorëve.

Po ashtu, gjatë vitit 2025 është avansuar ndjeshëm me procesin e bartshmërisë së numrave, duke u adresuar të gjitha çështjet teknike dhe fillimin e testimeve në mes operatorëve si një hap i fundit drejt lansimit të këtij mekanizmi ndër më të rëndësishëm për mbrojtje të konkurrencës dhe të drejtën e konsumatorit për ndërrim të operatorëve.

ARKEP ka intensifikuar bashkëpunimin rajonal dhe ndërkombëtar, duke marrë pjesë aktive në forume rregullatore evropiane dhe organizata tjera ndërkombëtare (BEREC, CEPT/ECC, ITU), vizita studimore, me qëllim të shkëmbimit të përvojave dhe avansimin e mëtutjeshëm të ngritjes së kapaciteteve.

Në tërësi, viti 2025 ka qenë një vit i rezultateve konkrete për ARKEP, i karakterizuar nga rritja e kualitetit të shërbimeve, zgjerimi i mbulueshmërisë 5G, përtej objektivave të planifikuara, forcimi i sigurisë së rrjeteve, avancimi i sistemeve monitoruese, rritja e konkurrencës dhe mbrojtja e interesit të konsumatorëve, duke krijuar kushte të favorshme për zhvillimin e qëndrueshëm dhe afatgjatë të tregut të komunikimeve elektronike dhe postare në Republikën e Kosovës.

Dhjetor 2025, Prishtinë

KOMUNIKATË PËR PUBLIKUN

Delegacioni i Autoritetit Rregullativ i Komununikimeve Elektronike dhe Postare, mori pjesë në forumin “ITU-EKIP Regional Regulatory Forum for Europe 2025”, të organizuar nga Agjencia për Komunikime Elektronike dhe shërbime postare, nga Mali i Zi, dhe Unioni Ndërkombëtar i Telekomunikacioni (ITU), me temën “Building a Resilient and Human-Centric Digital World”, të mbajtur me datë 29 - 30 shtator 2025, në Budva të Malit të Zi.

Në këtë ngjarje, përveç zyrtarëve të ARKEP, z. Nazim Rahimi Kryetari i Bordit të ARKEP, mbajti një fjalë hyrëse në hapje të forumit, duke theksuar rëndësinë e bashkëpunimit rajonal dhe shkëmbimit të përvojave rregullative në fushën e komunikimeve elektronike dhe transformimit digjital.

Ndër të tjera në këtë forum u theksua se për Republikën e Kosovës, si dhe vendet e rajonit është interes strategjik ndërtimi i ekosistemeve digjitale të qëndrueshme dhe të fokusuar tek njeriu, që nënkuptojnë sigurimin e një infrastrukture digjitale të sigurt dhe të besueshme, promovimin e inovacionit, nxitjen e konkurrencës së drejtë dhe mbrojtjen e të drejtave të konsumatorëve.

Prishtinë 02 tetor 2025,